“Mising Hna Aw” Kha I Ralring
“Midang [“mising,” NW] cu an zul duh hna lo, a zaam in an zaam tak lei hna, zeicahtiah an aw [“mising hna aw,” NW] kha an hngal lo.”—JOHAN 10:5.
1, 2. (a) Jesuh nih Mari kha a min in a auh tikah zeitindah a rak leh, i hlan i Jesuh nih a rak chimmi zei bia kha dah a fianter? (b) Zeinihdah Jesuh he naih tein a kan umter khawh?
ATHO ṭhanmi Jesuh nih a lawngmi a thlan pawngah nu pakhat a dir ko kha a hmuh. Mah nu kha ṭhate in a hngalh. Amah cu Mari Magdalin asi. A luan cia kum hnih hrawngah, mah nu chung i khuachia kha a rak chuah piak. Cu ri thawk in Jesuh le a lamkaltu pawl kha a rak zulh hna i, nifate an herhmi kha a tuah piak hna. (Luka 8:1-3) Asinain, Mari nih Jesuh a thih kha a rak hmuh, atu ah a ruak a tlau a hun hmuh chinchin caah a ngaih a chia tuk hringhran i a ṭap len ko! Cucaah Jesuh nihcun “zeicahdah na ṭah len ko? Ahodah na kawl?” tiah a hal. Amah kha dum cawngtupa asi rua tiah a ruah i “Bawipa, nangmah nih na lak asi ahcun na chiahnak kha ka chim tuah, ka va kal lai i ka va lak lai” tiah a leh. Khi tikah Jesuh nih “Mari” tiah a vun ti! I thei-hngal ngaiin a chonh tikah mah nu nih khan a hngalh cawlh. “Rabboni” (saya) tiah thanuam ngaiin a auh i a kuh.—Johan 20:11-18.
2 Mah tuanbia nih hin tuan deuh lio i Jesuh nih a rak chim ciami kha hmual ngei ngaiin a fianter. Amah le amah kha tukhal he aa tahchunh i a zultu hna kha tuu he a rak tahchunh hna, tukhal nih a tuu kha an min in a auh hna i annih nih a aw kha an hngalh tiah a rak ti. (Johan 10:3, 4, 14, 27, 28) Angaitein, tuu nih a khaltu kha a hngalh bantukin, Mari nih a Khaltu asimi, Khrih kha a rak hngalh ve. Nihin zongah Jesuh i a zultu hna nih cutin an hngalh ve. (Johan 10:16) Tuu pakhat cu thleidan thiamnak hna a ngeihmi nih a khaltu sinah naihte in a umter khawh bantukin, kan thlaraulei thleidan thiamnak nih kan Tukhal Ṭha, Jesuh Khrih i a keneh kha naihte in a kan zulh ter khawh.—Johan 13:15; 1 Johan 2:6; 5:20.
3. Jesuh chimmi tukawm bianabia thawngin lungthin chungah a chuakmi biahalnak cheukhat cu zeidah an si?
3 Asinain, mah bianabia ningin minung aw a hngal khomi mah tuu nih khan a hawikawm lawng si loin a ral zong kha a hngalh khawh. Mi hlen hmangmi a kan dotu an um caah mah hngalhnak ngeih kha a biapi ngaingai. Annih cu ahote dah an si? Zeitindah an tuah tawn? Kanmah le kanmah zeitindah kan i ven khawh lai? A phi hngalh awkah, tukawm bianabia chungah Jesuh nih zeidah a chim rih ti kha zoh u sih.
‘Inka In A Lut Lomi’
4. Tukhal bianabia ningah, aho dah tuu nih an zulh, i aho dah an zulh lo?
4 Jesuh nih hitin a ti: “Innka in a lutmi cu tu a zohkhenhtu tukhal kha asi. Inka cawngtu nih khan inka cu a rak hun piak i tuu nih khan a aw cu an theih; a tuu kha an min in a auh hna i lengah a chuahpi hna. An dihlak in a chuah dih hna tikah an hmai in a kal i a aw kha an hngalh caah tu nih cun an zulh. Midang [“mising,” NW] cu an zul duh hna lo, a zaam in an zaam tak lei hna, zeicahtiah an aw [“mising hna aw,” NW] kha an hngal lo.” (Johan 10:2-5) Jesuh nih “aw” timi bia voithum a hman kha philh hlah. Tukhal aw tiah voihnih a chim, asinain voithumnak cu, “mising hna aw” asi tiah a rak ti. Zeibantuk mising kha dah Jesuh nih a chimmi asi?
5. Zeicahdah Johan angan 10 chimmi mising cungah khualtlung dawtnak langhter ding asi lo?
5 Jesuh nih khualtlung dawt kan duhmi mising kong kha a chimmi asi lo, a hrampi Baibal bia ah khualtlung dawt timi bia kha “mising kha daw hna” ti sullam a ngei. (Hebru 13:2) Jesuh chimmi bianabia i, mising cu sawmmi khual kha asi lo. Amah cu “tukawm chungah innka in a lut lo i ka dangin a kai.” Amah cu “mifir le damiah asi.” (Johan 10:1) Aho dah Baibal chungah langhtermi mifir le damiah kha a rak si hmasa cem? Satan khuachia kha asi. Amah asi ti a langhtertu kha Genesis ah kan hmuh.
Mising Aw Hmasa Bik Rak Theih Caan
6, 7. Zeiruangah Satan cu mising, mifir tiah tlak ngaiin auh khawh asi?
6 Vawlei cungah mising aw kha zeitindah hmasa bik theih a rak si ti kha Genesis 3:1-5 nih a langhter. Satan nih hmasa bik minu Evi kha a va naih i rul hmangin a rak hlen tiah mah kong ṭialmi nih a langhter. Mah kong ṭialmi ah Satan kha a biafang ningin “mising” tiah auh asi lo cu a hmaan ko. Sihmanhsehlaw, a tuahsernak hna cu Johan angan 10 ah ṭialmi Jesuh bianabia i langhtermi mising he lam a phunphun in an i lo. An i lawhnak cheukhat kha ruat hmanh.
7 Mising nih tukawm chung i saram hna sinah a vel in vel in a ra tiah Jesuh nih a ti. Cubantuk cun, Satan nih tlaih a timh mi sinah rul kha a rak hman i dairek loin a rak ra. Mah a zernak nih khan Satan cu a ngaitein mi hrokhrol ramhtu asi kha a langhter. Cupinah, mising nih tuu ngeitu taktak i a tuu hna kha chuh a timh. A ngaingai in, aa timhmi cu “thah duh le hrawh duh” kha asi caah, mifir pakhat nakin a ṭha lo deuh. (Johan 10:10) Mah bantuk cun, Satan cu mifir pakhat asi. Evi i Pathian cung i zumh-awk tlak asinak kha a hlen i a rak fir. Cuhleiah, Satan nih minung kha thihnak ah a hruai hna. Cucaah, amah cu lainawng asi.
8. Satan nih Jehovah a bia le a tuahsernak kha zeitindah a rak merh?
8 Jehovah bia le tuahsernak a merh ning zong in Satan a dinfel lonak kha a lang. Evi kha “dum chung i a ummi thing thei hi a zeihmanh nan ei lai lo tiah Pathian nih an ti taktak hna maw?” tiah a rak hal. ‘Pathian cu cu tluk cun maw khua a tuak khawh lo?’ ti phun in, Satan cu aa lauter. Cun “Pathian nih cu bantuk in a ti cu, kha thingthei nan ei ahcun nan ei cangka in amah bantuk in hngalhnak nan ngei ve lai i a ṭha le a ṭhalo kha nan hngal ve lai ti a hngalh caah asi” tiah a ti rih. ‘Pathian nih a hngalh’ timi a bia kha philhhlah. ‘Pathian hngalhmi kha ka hngalh, aa tinhmi zong ka hngalh i, an ṭha lo’ ti phun in Satan nih a chim. (Genesis 2:16, 17; 3:1, 5) Adam le Evi nih mising aw an rak theih i an rak i mer lomi kha ngaihchiat awk ngai asi. Mah canah, a aw kha an rak ngaih i anmah theng le an tefa hna cu harnak an phan.—Rom 5:12, 14.
9. Zeicahdah nihin ah mising aw kan theih lai tiah kan i ruahchan khawh?
9 Nihin Pathian miphun kha hlen awkah Satan nih kha bantuk thil tining kha a hman. (Biathlam 12:9) Amah cu “lih vialte pa” asi i, amah bantuk in, Pathian salle hlen aa zuammi hna cu a fale an si. (Johan 8:44) Nihin i mising aw theihning lam cheukhat hna kha ṭhate in zoh u sih.
Nihin I Mising Aw Theih Ning
10. Mising aw theihnak lam phun khat cu zeidah asi?
10 Mi a hleng khomi ruahnak. Lamkaltu Paul nih “cawnpiaknak hmaan lo a phunphun kha a ping ah i hruaiter hna hlah u” tiah a rak ti. (Hebru 13:9) Zeibantuk cawnpiaknak phun dah asi? ‘A pingah a kan hruai’ khawh caah kan thlaraulei rualternak a hrawk khomi cawnpiaknak phun kha Paul nih a chimmi asi ti cu a fiang. Mah bantuk cawnpiaknak thar cu ahote nih dah an chim? Paul nih Khrihfa upa pawl kha hitin a rak ti hna: “Nanmah bu chung lila zong hin mi a cheu nih a zummi hna kha anmah lei i hruai awk ah lih an chim lai can kha a phan lai.” (Lamkaltu 20:30) Angaitein, Paul chan bantukin nihin ah, hlan i Khrihfa bu chungmi a rak simi cheukhat hna cu “lih” asimi a cheu a hmaanmi le a hmaan hrimhrim lomi bia in tuu pawl kha lam pialter an i zuam. Lamkaltu Piter nih a chim bangin, annih nih “phuahchommi tuanbia,” biatak si dawh a lomi bia, tangka deu bantukin man ngei lomi bia hna kha an hman.—2 Piter 2:3.
11. 2 Piter 2:1, 3 chung bia hna nih zumhnak in a pialmi hna an thil tining le an i timhmi kha zeitindah a phuan?
11 Zumhnak a pialmi hna nih “thil rawktu asimi . . . zumhning kha an chuahpi lai” tiah a chimnak thawngin Piter nih an mi hlenning hna kha a phuan. (2 Piter 2:1, 3) Jesuh i tukawm bianabia ah mifir cu “innka in a lut lo i ka dangin a kai” bantukin zumhnak a pialmi hna cu a thli tein kan sinah an ra. (Galati 2:4; Judas 4) An i timh-mi cu zeidah asi? Piter nih “nanmah miak khawhnak caah asi” tiah a rak ti. Mah zumhnak in a pialmi hna nih zeiti hmanh in lih an hei chim len hmanhah an i timhmi taktak cu “fir duh le thah duh le hrawh duh lawng” kha asi ko. (Johan 10:10) Mah bantuk mising hna kha i ralring!
12. (a) Zeitindah kan hawi kan kawm hna sinin mising bia a rat khawh? (b) Nihin ah Satan le mising pawl an zernak zei aa lawhnak dah a um?
12 Hrawk khotu asimi hawikawm. Mising aw kha kan hawikawm hna sinin kan theih men lai. Hrawk khotu asimi hawikawm hna cu mino pawl caah a hleiin ṭih a nung. (1 Korin 15:33) Satan nih hmasa bik minung nuva hna chung in a no i a hmuhtonnak a tlawmmi Evi kha a hmuichon ah a rak chiah ti kha philhhlah. Zalawng tein tuahnak nawl a ngei ko nain, a za lawnnak kha aa tlak lo piin Jehovah nih a tlaih tiin a rak zumhter. A taktak ah, Jehovah nih a sermi minung kha a dawt hna i an ca ṭhatnak kha a duh. (Isaiah 48:17) Nihin zongah, mising hna nih nannih mino hna kha nan nule le nan pale nih nan zalawnnak kha aa tlak lo piin an tlaih tiah ruat dingin an i zuam. Cu bantuk mising hna nih zeitindah an in hnorsuan khawh? Khrihfa nu pakhat nih hitin a ti: “Ka khaan hawi hna ruangah ka zumhnak sau nawnpi a rak der. Na biaknak nih aa tlak lo piin an khenkham tiah an ka ti lengmang.” Asinain, na nu le na pa nih an in dawt ti cu a hmaanmi asi. Cucaah na nu le na pa cungah lunghrinnak na ngeih nakhnga na khaan hawi pawl nih an i zuam tikah Evi bantukin a ping ah i hruaiter lai ci.
13. David cu zei fimnak lam dah a rak zulh, i kan i zohchunh khawhmi lam pakhat cu zeidah asi?
13 Hrawk khotu asimi hawikawm hna he aa tlaiin Salm caṭialtu David nih hitin a ti: “Hlen hmangmi kha ka kawm hna lo i mi hrokhrol zong kha ka kawm hna lo.” (Salm 26:4) Mising hna ziaza kha na hngal maw? Satan nih rul a hman i aho asi aa hngalhter lo bantukin annih zong zei bantuk minung dah an si ti kha an i hngalhter lo. Nihin, ziaza a rawkmi cheukhat nih Internet hmangin aho an si le an i tinhmi taktak kha an i hngalhter lo. A ṭhalomi upa hna hmanh nih bia ruahnak hmun (chat rooms) ah mino i lawhter in nangmah kha rap foih awkah an in leem men ko lai. Cucaah nannih mino hna, nan thlaraulei a rawh nakhnga lo zangfahnak in i ralring khun u.—Salm 119:101; Phungthlukbia 22:3.
14. A chelchel ah mising aw kha thawng theihternak in zeitindah an thanh?
14 A hmaan lo piin soinak. Thawngpang theihternak cheukhat nih duhdanh ngei loin Jehovah Hngaltu hna kong kha an thanh ko nain, a caancaan ahcun misinglei ṭangin an bia kha thawng theihternak in an thanh tawn. Tahchunhnak ah, ram pakhat i thawng theihternak pakhat nih Hngaltu pawl cu Ralpi Pa hnihnak lioah Hitler a ṭanh-mi an si tiah asi lo piin a chim. Ramdang pakhat ahcun Hngaltu pawl nih church inn an hrawh tiah an thanh. Ram tam nawn ah Hngaltu pawl cu fale sii a thlop lomi le zumtu khat pawl tuahmi sualnak ngan hna aa hmuhter hram lomi an si tiah thawng theihternak in sual an puh hna. (Matthai 10:22) Asinain, kan sining a hngal taktakmi hna nih cun mah sual puhnak hna a hmaan lo ti kha an hngalh.
15. Zeicahdah thawng theihternak nih a thanhmi vialte zumh dih cu fim asi lo?
15 Cu bantuk mising aw nih a thanh-mi soinak hna he hmaitonh in kan i ton tikah zeidah tuah ding asi? Phungthlukbia 14:15 i ruahnak cheuhnak hi kan i cinken ding asi: “Mi lungthin tlawm nih cun zei paoh kha a zumh, sihmanhsehlaw mifim nih cun a lamh ding kha ṭhate in a zoh.” Thawng theihternak nih a thanhmi vialte hi a hmaan dih tiin zumh cu hruh asi hnga. Hi vawlei thawngpang dihlak cungah zumh lo nak kan ngei lo nain, “vawlei hi a pumpi in Miṭhalo pa kuttangah a um” ti cu kan cohlan.—1 Johan 5:19.
‘An Ngeihmi Thlarau Cu Va Hlathlai U’
16. (a) Johan 10:4 i Jesuh chimmi bia a hmaan kha tuu taktak pawl i umtuzia nih zeitindah an langhter? (b) Zeituah awkah dah Baibal nih a kan forh?
16 Kan kawmhmi hna hi kan hawikawm maw an si, kan ral dah ti kha zeitindah kan hngalh taktak khawh lai? Jesuh nih “[Tukhal] aw kha an hngalh caah tuu nih cun an zulh” tiah a ti. (Johan 10:4) Tukhal a muisam kha si loin a aw kha an hngalh caah tuu nih an zulhmi asi. Hlanah khual a va tlawngmi pakhat nih tuu pawl nih an tukhal kha a aw si loin a hnipuan in an hngalh tiah a rak ti tiin Baibal hmunhma hna kong cauk nih a ti. Tukhal pakhat tu nih cun tuu pawl nih a aw kha an hngalh tiah a ti. Mah khakha fianter nak caah mah mising he khan an hnipuan an i thleng. Tukhal pa hnipuan aa hrukmi mah mising pa nih khan tuu pawl kha a auh len ko hna nain an ra lo. A aw an theih lo caah asi. A hnipuan aa thlengmi tukhal nih tuu pawl kha a auh tik hna ah a sinah an va phan cawlh. Cucaah, mi pakhat cu tukhal mui a ken hmanhah tukhal taktak asi tiah tuu nih an cohlang lai lo. Asi, tuu nih a autu hna aw kha tukhal aw he an tahchunh i an thleidan khawh. Baibal zong nih cutin tuah awkah hitin a kan forh: “An ngeihmi Thlarau cu Pathian sinin a ra mi asi maw silo ti kha va hlathlai hmasa u.” (1 Johan 4:1; 2 Timote 1:13) Cutin tuah awkah zeinihdah a kan bawmh lai?
17. (a) Jehovah aw kha zeitindah ṭha tein kan hngalh khawh? (b) Jehovah kan hngalhnak nih zeidah a kan tuahter khawh?
17 Jehovah bia asiloah thawngpang kan hngalh deuhdeuh tikah, mising aw kan hun hngalh khawh deuhdeuhmi hi khuaruahhar awk asi lo. Mah hngalhnak kha zeitindah kan ṭhanchoter khawh ti kha Baibal nih hitin a langhter: “Lam in kehlei orhlei ah nan pial sual ahcun, ‘Lam cu hika lei ah hin asi. Lam kha zul u,’ tiah nan hnulei in aw kha nan theih lai.” (Isaiah 30:21) Kan hnulei in kan theihmi “aw” cu Pathian Bia asi. Pathian Bia kan rel fate a liannganmi kan Tukhal, Jehovah aw kan theih bantuk asi. (Salm 23:1) Cucaah, Baibal tam deuhdeuh kan rel ah, Pathian bia kha ṭha tein kan hngalh deuhdeuh ve. Cutin kan hngalh deuhdeuhnak nih mising aw kha a kan hngalhter khawh cawlh.—Galati 1:8.
18. (a) Jehovah aw hngalhnak ah zeidah aa tel? (b) Matthai 17:5 ningin, zeiruangah Jesuh aw kan zulh ding asi?
18 Jehovah aw hngalhnak ah zeidah aa tel? Hna theihnak lawng si loin, zulh zong aa tel. Isaiah 30:21 kha ṭha tein rel ṭhan. Pathian Bia nih “lam cu hika lei ah hin asi” tiah a ti. Asi, Baibal kan hlathlainak thawngin Jehovah lamhruainak hna kha kan theih. Cun, ‘hi lam hi zul’ tiah a ti chap. Jehovah nih kan hngalh ningin nung hna seh ti kha a kan duh. Cucaah, kan theihmi ningin kan nunnak thawngin Jehovah aw kha a thei menmen mi si loin a zulmi kan si ti kha kan langhter. (Deutero-nomi 28:1) Jehovah aw zulh timi cu Jesuh aw zulh ti asi, zeicahtiah Jehovah theng nih cutin tuah ding a kan chimh. (Matthai 17:5) Tukhal ṭha, Jesuh nih zei tuah ding dah a kan chimh? Zultu siter awk le “zumh-awk a tlakmi le a fimmi sal” bia zumh awkah a kan cawnpiak. (Matthai 24:45; 28:18-20) Pathian aw kan zulhnak nih zungzal nunnak a kan hmuhter lai.—Lamkaltu 3:23.
‘An Zam Tak Lai’
19. Mising aw kha zeitindah kan leh hna ding asi?
19 Mising pawl aw kha zeitindah kan leh hna lai? Tuu pawl bantukin kan leh hna ding asi. Jesuh nih “mising hnu zulh hin loin an zam tak lai” tiah a rak ti. (Johan 10:5, NW) Lam hnih in kan leh lai. Pakhatnak ah, “mising hnu zulh hin loin” kan um lai. Asi, mising kha kan hlawt dih hirhiar lai. Grik Baibal, biafang ah “hin” timi bia nih mah Grik holh in fek tein hlawt kha a langhtermi asi. (Matthai 24:35; Hebru 13:5) Pahnihnak ah, kan “zam tak lai” asiloah a sinin kan i mer lai. Cu tin tuah cu tukhal ṭha aw he aa khat lomi cawnpiaktu pawl kan leh hna dingmi lam asi.
20. (a) Mihlen a hmangmi zumhnak in a pialmi hna, (b) Hrawk khotu hawikawm hna, (c) Duhdanh a ngeimi thawng theihternak hna he kan ni ton tikah zeitindah kan leh hna lai?
20 Cucaah, zumhnak in a pialmi hna i an cawnpiaknak an thanhmi he kan ni ton tikah Baibal nih hitin a chim bangin tuah kan duh: “Cheunak a chuah tertu hna le zumhnak a tuaitertu, nannih nih nan hmuh ciami cawnpiaknak a ralchanhmi hna kha i ralring hna u tiah kan forh hna; annih cu hrial ko hna u.” (Rom 16:17; Titas 3:10) Cubantukin, hrawk khotu asimi hawikawm ral a tongmi Khrihfa mino hna cu Paul nih mino Timote a rak cawnpiakmi hi bia hi zulh an duh: “Tlanval lio pumsa duhnak kha zamtak i zuam hna.” Thawng theihternak in an thanhmi a hmaan lomi sualpuhnak hna kan theih tikah Paul nih Timote lungthin a rak cheuh chap mi kha kan hun hngalh lai: “[Mising aw a ngaimi hna nih cun] minung tuanbia tu kha ngaih an duh deuh lai. Sihmanhsehlaw nang cu zei tik caan paoh ah daite le khua lu khua taw khak tein um ko.” (2 Timote 2:22; 4:3-5) Mising aw cu zei tluk duhnungmi si dawh a lawh hmanhah, kan zumhnak a hrawk khomi thil vialte khan kan zam.—Salm 26:5; Phungthlukbia 7:5, 21; Biathlam 18:2, 4.
21. Mising aw a hlawmi hna cu zei laksawng nih dah a hngah hna?
21 Chiti thuhmi Khrihfa hna nih mising aw an hlawt nak thawngin, Luka 12:32 chung i Tukhal Ṭha aw kha an zulh. Jesuh nih hitin a ti hna: “Turun hmete hna, nan thinphang hlah u! Zeicahtiah nan Pa nih Pennak cu nanmah kha pek an duh hna.” Cubantuk cun, “tuudang” hna nih Jesuh chimmi hi bia theih lai kha lungtho tein an i ruah chan: “Nannih, ka Pa nih thluachuah an pek mi hna, ra tuah u. Ra u law vawlei ser ri in nan caah timh asimi pennak cu ra co tuah u.” (Johan 10:16; Matthai 25:34) “Mising hna aw” kha kan al ahcun duhnungmi laksawng nih a kan hngah ko!
Naa Cinken Maw?
• Jesuh chimmi tukawm bianabia ah langhtermi mising sining cu Satan he zeitindah an i lawh?
• Nihin ah mising hna aw zeitindah theih asi?
• Mising hna aw kha zeitindah kan hngalhthiam khawh?
• Mising hna aw kha zeitindah kan leh awk asi?
[Cahmai 14nak i Hmanthlak]