CAWN DINGMI 28
Jehovah Le Jesuh Nih An In Tuahpiakmi Thil Cungah Naa Lawmhnak Kha Langhter
Na hawi pakhat nih aa dawh tukmi laksawng aan pek tikah zeitindah na um? Mah nih aan lawmhter tuk i laksawng aan petu na hawi cungah naa lawmhnak kha langhter na duh ko lai. Jehovah le Jesuh nih kan hmuh khawhmi lakah a sunglawi bikmi tlanhnak man laksawng kha a kan pek. Mah caah kan i lawmhnak kha zeitindah kan langhter khawh?
1. Pathian le Khrih nih a kan tuahpiakmi thil caah lawmhnak kan langhter khawh ning lamkhat cu zeidah a si?
Baibal nih “amah [Jesuh] a zummi paoh” cu zungzal in an nung lai tiah bia a kan kamh. (Johan 3:16) Cutin zeitindah kan tuah khawh? Jesuh kan zumh kha kan langhter a hau. Cun kan i thimmi le kan tuahmi thil zongah kan zumhnak kha kan langhter a hau. (Jeim 2:17) Kan tuahsernak le kan biachim in kan zumhnak kha kan langhter tikah Jesuh le a Pa, Jehovah he kan i hawikomhnak cu a fek chin.—Johan 14:21 rel.
2. Jehovah le Jesuh nih an tuahmi cungah kan i lawmhnak langhter awkah zei a sunglawimi puai nih dah a kan bawmh?
Jesuh nih a thih lai zan ah a zultu pawl kha a pekmi raithawinak cungah an i lawmhnak langhter khawh ning a dang lam kong kha a chimh hna. Baibal nih “Bawipa Zanriah” tiah a timi, Khrih a Thih Philh Lonak Puai ti zongin hngalhmi a sunglawi tukmi puai ah i pumh dingin a chimh hna. (1 Korin 11:20) Jesuh nih lamkaltu pawl le anmah hnuah a hmaanmi Khrihfa dihlak nih kan caah a nunnak a pekmi kha philh hna hlah seh ti a duh. Cucaah hitin nawlbia a pek hna: “Keimah philh lonak ah run tuah u.” (Luka 22:19) Cucaah Ruahnolhnak i naa pumh tikah Jehovah le Jesuh nih an langhtermi dawtnak cungah naa lawmh kha na langhtermi a si.
TAM DEUH IN HLATHLAI
Jehovah le Jesuh nih an langhtermi dawtnak cungah naa lawmhnak langhter khawh ning lam kha tam deuh in hlathlai. Cun Khrih a thih Philhlonak Puai cu zeicah a biapit tuk timi kong zong kha hlathlai.
3. Kan i lawmhnak langhter awkah zeidah kan tuah khawh?
Mi pakhat nih na nunnak aan khamh tiah na mitthlam ah cuanter hmanh. Cutin aan khamhtu kong kha fawi tein na philh kho lai maw? Asiloah a tuahmi cungah naa lawmhnak langhter khawh ning lam kha na kawl lai maw?
Jehovah langhtermi zaangfahnak thawngin zungzal nunnak caanṭha kan hmu. 1 Johan 4:8-10 rel law mah biahalnak hna hi i ruah u:
Jesuh raithawinak cu zeicah a sunglawi tukmi laksawng a si?
Jehovah le Jesuh nih na caah an in tuahpiakmi thil kong he aa tlaiin zeitindah na um?
Jehovah le Jesuh nih kan caah a kan tuahpiakmi thil cungah kan i lawmhnak kha zeitindah kan langhter khawh? 2 Korin 5:15 le 1 Johan 4:11; 5:3 rel. Mah Baibal caang pakhat cio nan rel dih hnuah mah biahalnak hi i ruah u:
Mah Baibal caang cungah i hngat in kan i lawmhnak langhter awkah zeidah kan tuah khawh?
4. Jesuh kha i zohchunh
Kan i lawmhnak kan langhter khawh ning a dang lamkhat cu Jesuh kan i zohchunhnak thawngin a si. 1 Peter 2:21 rel law mah biahalnak hi i ruah u:
Jesuh keneh kha naih tein zei ti lam hna in dah na zulh khawh?
Jesuh nih Baibal kha a sunsak, thawngṭha kha a chim i midang kha a bawmh hna
5. Khrih a thih Philhlonak Puai ah i pum
A hmasa bik Bawipa Zanriah ah zeidah an tuah timi kong hngalh awkah, Luka 22:14, 19, 20 rel law mah biahalnak hna hi i ruah u:
Bawipa Zanriah ah zeidah an tuah?
Mitsur zu le changreu nih zeidah a aiawh? —Caang 19 le 20 ah zoh.
Jesuh nih a thih ni a phanh fatin a zultu pawl nih kumkhat ah voikhat Bawipa Zanriah kha tuah hna seh ti a duh. Cucaah Jehovah Tehte Hna nih Jesuh nih nawl a pek hna bantukin Khrih a thih philhlonak puai kha kum fatin an tuah. Mah a biapimi pumhnak kong hlathlai awkah, VIDEO kha piah. Cun a tanglei biahalnak hi i ruah u.
Ruahnolhnak ah zeidah an tuah?
Mitsur zu le changreu nih thil cheukhat kha a aiawh. Changreu nih Jesuh nih kan caah a pekmi a tlingmi minung a pum kha a aiawh. Mitsur zu nih a thisen kha a aiawh
MI CHEUKHAT CHIMMI: “Jesuh kha ka Bawipa le ka Khamhtu in ka cohlan caah a dang zei thil hmanh tuah a hau ti lo.”
Mah lawngin a za lo timi kong hmuhsak awkah Johan 3:16 le Jeim 2:17 kha zeitindah na hman khawh?
A TAWINAK
Jesuh nih a kan tuahpiakmi thil cungah kan i lawmh kha amah kan zumh kan langhternak thawngin le a thih Philhlonak ah kan i pumhnak thawngin kan langhter khawh.
I Ruahṭi Ṭhannak
Jesuh zumhnak langhter timi cu zei sullam dah a si?
Jehovah le Jesuh nih an in tuahpiakmi thil cungah naa lawmhnak kha zeitindah langhter na duh?
Khrih a thih Philhlonak Puai ah i pumh cu zeicah a biapit tuk?
HLATHLAI CHAP
Khrih a thihnak nih zei tuah awkah dah a kan forh?
Zumhnak kong le zumhnak langhter khawh ning kong kha tam deuh in hlathlai.
“Jehovah Biakam Na Zumhnak Kha Langhter” (2016, October, Vennak Innsang)
“Ka Nunnak Cu A Thiang Ṭhan Cang I A Ṭha Bik Nunnak In Ka Nung Kho Cang” timi capar chungah nu pakhat nih Khrih tlanhnak man cu a caah zei sullam dah a ngeih ti a hun hngalh tikah a nunnak a ṭhancho ning kong kha hlathlai.
Ruahnolhnak ah zeicah mi tlawmte lawng nih mitsur zu le changreu an hman timi kong kha hlathlai.