‘Zeidang Vialte Nakin, Pakhat Le Pakhat Fakpi In I Daw U’
“Zeizong vialte donghnak caan hi a nai ko cang. Cucaah . . . Zeidang vialte nakin, pakhat le pakhat lungtakte [“fakpi,” NW] in i daw u. ” — 1 PITER 4:7, 8.
JESUH nih a zultu pawl he hmanung bik an rak um ṭimi caan tlawmte kha a sungtuk ti a rak hngalh. An hmaiah a ummi thil zong kha a rak hngalh. Rian nganpi kha hlawhtling tein an ṭuan lai, sihmanhsehlaw amah bantukin mi huat le hremnak an huah lai. (Johan 15:18-20) An sin i a um lio hmanung bik zanah “pakhat le pakhat i daw u” tiah voi khatnak tamin ralrinnak a rak pek hna.—Johan 13:34, 35; 15:12, 13, 17.
2 Mah zan i a ummi lamkaltu Piter nih Jesuh chim duhmi kha a rak hngalhthiam. Kum tampi a luan hnu, Jerusalem a rawh hlan deuh te i a rak ṭialmi ca ah Piter nih dawtnak a biapitnak kha fakkhun in a rak langhter. Khrihfa pawl kha hitihin ruahnak a rak cheuh hna: “Zeizong vialte donghnak caan hi a nai ko cang. Cucaah, . . . Zeidang vialte nakin, pakhat le pakhat lungtakte [“fakpi,” NW] in i daw u.” (1 Piter 4:7, 8) Piter chimmi bia cu atu thil ningcang “ni hmanung bik” chung i a nungmi hna caah a hleiin sullam a ngei. (2 Timote 3:1) ‘Fakpiin i dawt’ ti cu zeidah a si? Zeicah midang cungah cu bantuk dawtnak langhter cu a biapit? Cu dawtnak cu zeitindah langhter khawh a si?
‘Fakpiin Dawtnak’—Cucu Zeidah A Si?
3 Mi a tamdeuh nih dawtnak cu amah tein a chuakmi lungputning pakhat a si tiah an ruah. Sihmanhsehlaw Piter nih kha bantuk dawtnak phun kha a chimmi a si lo; a sunglawi bikmi dawtnak kong a chimmi a si. 1 Piter 4:8 chung i “dawtnak” timi biafang cu Greek biafang a·gaʹpe in lehmi a si. Mah biafang nih khan phunglam nih lamhruaimi mahzawnlawng ruah lo dawtnak kha a chim duhmi a si. Fianternak pakhat nih hitihin a ti: “Agape dawtnak cu nawl pekmi a ngai khomi a si, zeicahtiah cucu lung cawlcanghnak ah aa hngatmi siloin tuahsernak lei ah mi a hruaimi biakhiahnak pakhat a si.” Mah zawnruahnak lungthin ro kan co caah pakhat le pakhat nan i daw lai tiin ralrin pek kan herh, Pathian phunglam lamhruai ningin khakha langhter a si.—Genesis 8:21; Rom 5:12.
4 Ka rian a si ti phun menmen in pakhat le pakhat i dawt ding a si ti kha a chim duhmi a si lo. A·gaʹpe cu cawnglomhnak le intuarmi hngalhnak a um lomi dawtnak a si lo. Piter nih ‘pakhat le pakhat fakpiin [biafang ningin, “samhmi”] dawtnak’ kan ngei lai tiah a rak ti.a (Kingdom Interlinear) Asinain, cu bantuk dawtnak langhter dingah i zuam a hau. Ca lei thiamsang pakhat nih ‘fakpiin’ tiah lehmi Greek biafang he aa tlaiin hitin a ti: “Tlik zuampa pakhat nih kawltung a phak laite ah a thazang ngeihmi chuah dih in aa zuamnak a langhtermi bia a si.”
5 Cu a si ahcun, dawtnak kha dawtnak langhter a fawimi hna cung lawngah asiloah mi tlawmte cung lawngah kan langhter lai lo. Dawtnak langhter a har caan hmanhah Khrihfa dawtnak kan langhternak thawngin kan lungthin kha kan “samh” lai. (2 Korin 6:11-13) Lentecelhnak i aa zuammi pakhat nih a thiamnak kha haarter dingah a cawn le a hman a herh bantukin cu bantuk dawtnak cu ṭhanter le hman a herhmi a si. Pakhat le pakhat cungah kha bantuk dawtnak ngeih kha a biapi. Zeicah a si? A tlawm bik in a ruang pathum a um caah a si.
Zeicah Pakhat Le Pakhat Kan I Dawt Ding A Si?
6 A pakhatnak ah, “dawtnak hi Pathian sinin a rami a si caah” a si. (1 Johan 4:7) Dawtnak i a hrampi a simi Jehovah nih a kan dawt hmasa. Lamkaltu Johan nih hitihin a ti: “A Fapa ngeihchunte kha vawlei ahhin a run thlah i amah thawng in nunnak kan ngei lai.” (1 Johan 4:9) Pa-thian Fapa cu minung pakhat in phung-chimnak rian a rak ṭuan i hremnak tungcung ah thihnak ing dingin “thlah” a rak si, cu thil vialte cu ‘nunnak kan ngeih khawh nakhnga’ caah a si. Cu tluk in a nganmi Pathian dawtnak cu zeitindah kan leh awk a si? Johan nih hitin a chim: “Hi hi Pathian nih a kan dawt ning a si ahcun, kannih zong pakhat le pakhat kan i dawt ve awk a si.” (1 Johan 4:11) Johan ṭialmi kha ṭha tein zoh, “Hi hi Pathian nih a kan dawt ning”—nangmah ti loin, kan tiah a ti. A sullam cu a fiang ko: Pathian nih amah a biami kan hawile kha a dawt hna ahcun, kannih zong nih kan dawt ve hna awk a si.
7 A pahnihnak ah, “zeizong vialte donghnak caan hi a nai” caah bawmhnak a herhmi kan unau hna bawmh awkah a hleiin atu ah pakhat le pakhat i dawt hi a herh ngaingai. (1 Piter 4:7) Kannih cu “harnak caan” ah kan nung. (2 Timote 3:1) Vawlei thil umtu-ning, leiser ral le ralchannak hna nih a kan harter. A har ngaingaimi thil sining tang-ah hlan nakin pakhat le pakhat kan i hawikawmh deuh awk le kan i dawt deuh awk a si. Fakpiin i dawtnak nih a kan rualremter lai i ‘pakhat le pakhat zawn a kan ruahter’ lai.—1 Korin 12:25, 26.
8 Pathumnak ah, Satan hmanmi kan si nakhnga lo ‘Satan cu caan ṭha pek’ kan duh lo caah pakhat le pakhat kan i dawt a hau. (Efesa 4:27) Kan tlukrilh nakhnga zumtu hawi pawl tlinlonak hna—chambaunak, palhnak hna—kha hman dingah Satan cu hliphlau tein a um. Ruat setsai loin chimmi bia asiloah zangfahnak a ngei lomi pa-khat i a tuahsernak nih Khrihfabu chung-in a kan chuahter maw? (Phungthlukbia 12:18) Pakhat le pakhat fakpiin kan i dawt a si ahcun cutin kan um lai lo! Mah bantuk dawtnak nih Pathian rian kha dai te le “lungkhat tein” ṭuan awkah a kan bawmh.”—Zefaniah 3:9.
Midang Kan Dawtnak Hna Langhter Ning
9 Dawtnak kha Innchungkhar ah kan langhter hmasa bik lai. Jesuh nih a zultu taktak pawl cu pakhat le pakhat an i dawtnak thawngin hngalh an si lai tiah a rak ti. (Johan 13:34, 35) Dawtnak kha Khrihfabu lawngah si loin innchungkhar ah, nu le va, nulepa le fale karlak zongah langhter ding a si. Chungkhar mi hna kha dawtmi an si hngalhternak men in a za lo; a ṭhami tuahnak in dawtnak kha kan langhter a hau.
10 Nu le va hna nih pakhat le pakhat an i dawtnak kha zeitindah an langhter khawh? Nupi a daw taktakmi pa nih cun mi hmai ah siseh, mi um lonak ah siseh a nupi a dawtnak kha a bia chim in le a tuahsernak in a langhter. A nupi kha a hmaizah i a ruahnak, a hmuhning le a lungchung a ummi kha a ruahthiam piak. (1 Piter 3:7) Amah ca ṭhatnak nakin a nupi ca ṭhatnak kha hmasa deuh ah a chiah i pumsa lei, thlarau lei le lungthin lei kha a si khawh chung-in a zohkhenh. (Efesa 5:25, 28) A va a daw taktakmi nu pakhat nih cun a ruah ning bantukin thil a si lo caan te hmanhah a va kha ‘a upat tuk.’ (Efesa 5:22, 33) A va kha luan tukin a hal lai lo i lungthin pek in thlaraulei rian ṭuannak ah a bawmhnak thawng-in a va caah bawmtu le a nawl a ngaimi a si.—Genesis 2:18; Matthai 6:33.
11 Nulepa hna, nan fale nan dawt hna nak kha zeitindah nan langhter khawh? Pumsa lei cawmkennak caah lungtho tein rian nan ṭuanmi cu nan dawt hna ti a langhtermi a si. (1 Timote 5:8) Sihmanhsehlaw fale nih rawl le thilpuan le umnak lawng an herhmi a si lo. A hmaanmi Pathian a daw i a biami in an ṭhan nakhnga thlaraulei cawnpiaknak an herh. (Phungthlukbia 22:6) Cucaah Baibal hlathlainak, phungchimnak le Khrihfa pumhnak hna i pumh awkah chungkhar ning tein i tel ding a caan khiah a hau. (Deuteronomi 6:4-7) Mah kha hmaan tein tuah tikah a hleiin hi harnak caan ahhin a za tawk in mah ca ṭhatnak hlawt a hau. Fale thlaraulei herhmi ca i nan thinphannak le nan i zuamnak cu dawtnak langhternak pakhat a si, cuti tuahnak nih an ca zungzal ṭhatnak nan ruah ti kha a langhter.—Johan 17:3.
12 Nu le pa hna nih fale lungthin lei herhmi zohkhenhnak thawng zong in dawtnak langhter kha a biapi. Ngakchia cu fahter an fawi; a nemnomi an lungthin nih dawtmi an si kha fek tein an zumh a herh. Nan dawt hna kha chim u law, a langh zong langhter u, mah nih khan duhnungmi an si le man ngeimi an si kha a zumhter hna lai. Lungtak in thangṭhat hna u, mah nih khan an i zuamnak kha nan hmuh i man nan ngeihter ti kha a hngalhter hna. Dawtnak in cawnpiak hna, mah nih khan zei bantuk minung an si lai he aa tlaiin na thin a phang ti kha a langhter. (Efesa 6:4) Kha bantuk man a ngeimi dawtnak langhternak vialte cu a nuam i aa dawmi le aa hawikawmmi innchungkhar si awkah bawmtu a si, cu nih cun hi donghnak caan i hneeknak hna kha doh awkah mi kha a timhlamhter deuh.
13 Dawtnak nih midang tlinlonak kha biapi chiah lo awkah a kan forh. Piter nih a ca a reltu pawl chimhhrinnak bia a rak ṭial lioah ‘pakhat le pakhat fakpiin i dawt’ awk a biapitnak kong kha hitihin a rak ṭial: “Dawtnak nih cun sualnak tampi kha a khuh khawh.” (1 Piter 4:8) Sualnak “a khuh” ti tikah sualnak ngan kha ‘a thuh’ tinak a si lo. Mah bantuk sualnak kha cu Khrihfabu i rianngeitu hna sinah chim i tonghtham awk a si. (Levitikas 5:1; Phungthlukbia 29:24) Sualnak ngan a tuahtu hna kha a sual peng nakhnga asiloah sualnak a ngei lomi pawl a hnorsuan hna nakhnga nawl pek cu dawtnak ngeih lo tu a si i Baibal he aa ruang lo.—1 Korin 5:9-13.
14 Voi tamdeuh cu zumtu hawi pawl palhnak le sualnak hna hi thil hmetete an si. Kan zapi in kan biachim in siseh, tuah-sernak in siseh kan palh cio tawn i pakhat le pakhat kan lung kan i fahter asiloah kan lung kan i donghter tawn. (Jeim 3:2) Midang tlinlonak kha thanh colh ding a si maw? Cutin tuahnak nih Khrihfabu chungah lung i khah lonak lawng a chuahter. (Efesa 4:1-3) Dawtnak nih a kan uk a si ahcun, “mi sual kawl” kan hmang lai lo. (Salm 50:20) Tlakrawh vanpang cung i aa bingbonak plaster benh hnu i si thuhmi bantukin dawtnak nih cun midang tlinlonak kha a khuh tawn.—Phungthlukbia 17:9.
15 Dawtnak nih bawmhnak a herh taktakmi hna kha va bawmh awkah a kan forh lai. Hi donghnak caan ahhin thil sining a chiat chin lengmang ruangah zumtu hawi pawl nih a chelchel ah thilri lei le pumsa lei bawmh-nak an herh ko lai. (1 Johan 3:17, 18) Tahchunhnak ah, kan Khrihfabu chungmi pakhatkhat cu tangka a chambau tuk maw asiloah rian ngei loin a um maw? Cu a si ahcun kan sining nih a pek tlukin thilri lei in bawmhnak cheukhat pek khawh a si. (Phungthlukbia 3:27, 28; Jeim 2:14-17) A tarmi nuhmei pakhat a inn remh a haumi tah a um maw? A um ahcun rian cheukhat kha mah nih thawk in aa tlak ningin bawmh khawh a si.—Jeim 1:27.
16 Midang cung i dawt-nak langhter tikah kan pawngkam i a ummi hna cung lawngah langhter ding a si lo. A chelchel ah, thlichia, lihnin le ram chung raltuknak fak piin a ingmi ramdang i a ummi Pathian salle kong kha kan theih ko lai. Annih nih tirawl, thilpuan le a dangdang hman awk thil hna kha an herh tuk lai. Miphun aa danmi kha biapi a si lo. ‘Unau bu dihlak cungah dawtnak kan ngei lai.’ (1 Piter 2:17, NW) Cucaah kum zabu pakhatnak Khrihfabu hna bantukin bawmhnak peknak caah an dirhmi chanhnak peknak rian hna kha bawmh kan duh hringhran ko. (Lamkaltu 11:27-30; Rom 15:26) Cu bantuk lam vialte in dawtnak kan langhter tikah hi hmanung bik ni hna ah kan lung aa rualnak kha kan fehter.—Kolose 3:14.
17 Dawtnak nih midang sinah Pathian Pennak Thawngṭha chim awkah a kan forh. Jesuh nunning kha ruat tuah hmanh. Zeicah mi kha phung a chimh hna i a cawnpiak hna? Thlarau lei an si a fah ruangah khan mibu kha “a zaang an fak ngaingai.” (Marka 6:34) Annih cu thlarau lei biatak cawnpiak in ruahchannak pek ding tu a simi a hmaan lomi biaknak lamhruaitu pawl zeirel lonak kha an ing i lam an pial. Cucaah, Jesuh cu a thukmi dawtnak le zawnruahnak nih a forhfial i mi kha “Pathian Pennak kong Thawng Ṭha” in a hnemh hna.—Luka 4:16-21, 43.
18 Nihin zongah, mi tampi cu thlarau lei ah daihthlanh an si, lam an pial i ruahchannak an ngei lo. Jesuh bantukin a hmaanmi Pathian a hngal rih lomi hna i thlarau lei herhbaunak kha kan hngalhthiam piak hna a si ahcun Pathian Pennak thawngṭha kha va hrawm awkah dawtnak le zawnruahnak nih a kan forh lai. (Matthai 6:9, 10; 24:14) A taangmi caan a tawi caah mah khamhnak thawngpang kha hlan nakin a biapi ngaiin chim a si lai.—1 Timote 4:16.
“Zeizong Vialte Donghnak Caan Hi A Nai Ko Cang”
19 Piter nih pakhat le pakhat i dawt ding i a rak forh hna lioah “zeizong vialte donghnak caan hi a nai ko cang” timi bia in a rak thawk. (1 Piter 4:7) A rauhhlan ah hi vawlei ṭhalo hi Pathian i a dingmi vawlei thar nih a rolh cang lai. (2 Piter 3:13) Cucaah mahle sining ah hnangam caan a si ti lo. Jesuh nih hitihin ralrin a kan pek: “I ralring tuah u. Zu din sa ei nak le khuasak tintuk harnak lawng kha ruat hlah u, cu ti nan si ahcun cu Ni nih cun ruahlopi ah an tlun hnawh sual hna lai.”—Luka 21:34, 35.
20 Cu a si caah, kan chan tiluan ning kha ralring tein zoh in “hngak peng” u sih. (Matthai 24:42, NW) Kan lung a vaivuanhter khomi Satan tukforhnak paohpaoh khan i veng u sih. Dawtnak a kikmi hi vawlei hi pakhat le pakhat i dawtnak langhter awkah a dontu siter hlah u sih. Cu vialte pinah, a hmaanmi Jehovah Pathian kha hlan nakin naih deuh u sih, a rauhhlan ah Jehovah i Messiah Pennak nih sunparnak in a khatmi aa timhnak kha hi vawlei ah a tlinter lai.—Biathlam 21:4, 5.
[A Tanglei Fianternak]
a 1 Piter 4:8 kha Baibal lehnak dang hna nih pakhat le pakhat “lungtak tein,” “thukpiin,” asiloah “lungtho ngaiin” kan i daw lai tiah an leh.
CAWN AWK BIAHALNAK
• Jesuh nih a zultu pawl kha an i ṭhen lai te ah zeidah a rak cawnpiak hna, Piter nih a chimduh chanmi a hngalhthiam ti kha zeinihdah a langhter? (Catlang. 1-2)
• ‘Fakpiin dawtnak’ ti cu zeidah a si? (Catlang. 3-5)
• Zeicah pakhat le pakhat kan i dawt awk a si? (Catlang. 6-8)
• Zeitindah midang na dawt hna nak kha na langhter khawh? (Catlang. 9-18)
• Zeicah mahle sining ah hnangam caan a si lo, zei tuah awkah dah lungthleh ding a si? (Catlang. 19-20)
[Caption on page 29]
Hawikawmhnak a ngeimi innchungkhar nih hi hmanung bik ni hna i hneeknak hna kha inkhawh awkah timhcia tein a umter deuh
[Caption on page 30]
Dawtnak nih bawmhnak a herh taktakmi hna va bawmh awkah a kan forh
[Caption on page 31]
Midang kha Pathian Pennak kong thawng ṭha chimh cu dawtnak tuahsernak pakhat a si