CAWN DINGMI 46
Zeicah Pumpeknak Le Tipil Innak Kan Tuah Awk A Si?
Jehovah lawng ka biak lai i ka nunnak ah amah duhnak kha pakhatnak ah ka chiah lai tiah thlacamnak in biakamnak na tuah i nangmahle nangmah Jehovah sinah naa pumpe. (Salm 40:8) Mah hnuah tipil na ing. Cutin na tuahnak thawngin naa pumpek kha midang sinah na langhter. Jehovah sinah i pumpek dingin biakhiahnak tuah cu a biapi bikmi biakhiahnak a si. Na nunnak a thlentermi mah a biapimi biakhiahnak tuah awkah zeinihdah aan forh khawh?
1. Mi pakhat kha pumpeknak tuah awkah zeinihdah a forh?
Dawtnak nih a kan forh caah Jehovah sinah kan i pumpe. (1 Johan 4:10, 19) Baibal nih hitin tha a kan pek: “Bawipa nan Pathian cu nan lungthin dihlak le nan nunnak dihlak le nan ruahnak dihlak le nan thazaang dihlak in nan dawt lai.” (Marka 12:30) Pathian kan dawt kha kan kaa lawng si loin kan tuahsernak zongin kan langhter. Nungak le tlangval cu an i dawt taktak caah ṭhitumnak an tuah bantukin kannih zong Jehovah kha kan dawt caah amah sinah kan i pumpe i tipil kan ing.
2. Jehovah nih tipil a ing cangmi a Tehte hna kha zei thluachuah dah a pek hna?
Tipil na in tikah Jehovah chungkharmi pakhat na hung si lai. Pathian dawtnak kha lam tampi in na hmuh lai i Pathian he atu nakin nan hun i naih deuh lai. (Malakhi 3:16-18 rel.) Cun Jehovah cu na pa bantuk a hung si lai i Pathian le nangmah aan dawmi vawleicung pumpi unau pawl cu na chungkharmi bantuk an hung si lai. (Marka 10:29, 30 rel.) Asinain tipil na in hlanah kehlan cheukhat na hlan a hau. Jehovah kong kha na cawn a hau. Cun Jehovah dawt awk le a Fapa zumh awk zongah na cawn a hau. Mah hnuah Jehovah sinah na nunnak kha naa pumpe lai. Mah kehlan hna kha na hlan i tipil na in ahcun zungzal nunnak hmuh khawhnak lam cungah na kal kho lai. Baibal nih hitin a ti: “Tipil innak nih . . . aan khamh hna.”—1 Peter 3:21.
TAM DEUH IN HLATHLAI
Na caah Jehovah sinah i pumpek le tipil in cu zeicah a biapit timi kong kha hlathlai.
3. Ahodah kan biak lai ti kha i thim
Hlanlio Israel mi cheukhat nih Jehovah an biak pah in a hmaan lomi Baal pathian kha biak khawh a si tiah an rak ruah. Asinain Jehovah nih mah a hmaan lomi an ruahnak kha remh awkah profet Elijah kha a rak thlah. 1 Siangpahrang 18:21 rel law mah biahalnak hi i ruah u:
Israel mi pawl nih zei thimnak dah an tuah?
Israel mi bantukin kannih zong ahodah kan biak lai ti kha kan i thim ve a hau. Luka 16:13 rel law mah biahalnak hna hi i ruah u:
Jehovah biak pah in mi pakhat asiloah thil pakhat kha zeicah biak khawh a si lo?
Jehovah biak dingin kan i thim kha zeitindah kan langhter?
4. Jehovah nih aan dawtnak kong kha ruat
Jehovah nih a sunglawi tukmi laksawng tampi a kan pek. Kannih tah a sinah zeidah kan pek khawh ve? VIDEO kha piah.
Jehovah nih aan dawt ti a langhter ning lam cheukhat cu zei hna dah an si? Salm 104:14, 15 le 1 Johan 4:9, 10 rel law mah biahalnak hna hi i ruah u:
Jehovah nih aan pekmi zei laksawng cungah dah a hleiin naa lawmh?
Mah laksawng hna nih a kong he aa tlaiin zeitindah aan umter?
Kan duh tukmi laksawng pek kan si tikah a kan petu sinah lawmhnak bia chim kan duh. Deuteronomi 16:17 rel law mah biahalnak hi i ruah u:
Jehovah nih aan tuahpiakmi thil kong hna na ruah tikah a sinah zeidah pek ve na duh?
5. Pumpeknak nih thluachuah tampi a hmuhter
Mi tampi nih kan min a than, rian ṭha kan ngeih i tangka kan ngeih ahcun kan i nuam lai tiah an ruah. Mah cu a hmaan maw? VIDEO kha piah, cun a tanglei biahalnak hna hi i ruah u.
Mah video ah zaang lentecelh a thiammi pa pakhat nih pumpululh chuih kha a duh tuk ko nain zeicah a rak chuih ti lo?
Pumpululh chuihnak ah si loin Jehovah sinah i pumpek dingin biakhiahnak a tuah. A biakhiahnak cu a hmaan tiah na ruat maw? Zeicah?
Lamkaltu Paul cu Khrihfa pakhat a si hlanah rian sang ngai a rak ṭuanmi a si. Anih cu a min a thangmi saya pakhat sinah Judah upadi lei fimnak a cawng. Asinain Khrihfa pakhat si awkah mah thil vialte kha a hlawt. Mah ruangah Paul cu aa ngaichih maw? Filipi 3:8 rel law mah biahalnak hna hi i ruah u:
Paul nih Khrihfa si awkah a hlawtmi thil kha “hnawmtam” asiloah hmunthur men ah ka rel hna tiah zeicah a ti?
Zeidah a hmuh ṭhan?
Jehovah rianṭuannak le a dang rianṭuannak na tahchunh ahcun zeitindah a si lai tiah na ruah?
Paul cu Khrihfa pakhat a hung si tikah a hlawtmi nakin tam deuh a hmuh ṭhan
MI CHEUKHAT CHIMMI: “Pathian sinah mahle mah i pumpek a hau lo.”
Jehovah sinah nangmahle nangmah naa pumpek awk a si tiah zeicah na ruah?
A TAWINAK
Dawtnak nih Jehovah sinah i pumpek awk le tipil in awkah a kan forh.
I Ruahṭi Ṭhannak
Jehovah kha zeicah kan lungthin dihlak in kan dawt awk le kan biak awk a si?
Jehovah nih tipil a ing cangmi a Tehte hna kha zeitindah thluachuah a pek hna?
Jehovah sinah nangmahle nangmah i pumpek na duh maw?
HLATHLAI CHAP
Music lei ah a min a thangmi nu pakhat le zaang lentecelhnak ah a min a thangmi pa pakhat cu anmahle anmah zeicah Jehovah sinah an i pumpek timi kong kha hlathlai.
Mino Pawl Biahalnak—Ka Nunnak Kha Zeitindah Ka Hman Lai?—Hnulei Kong Zohṭhannak (6:54)
I pumpek awk a sinak a ruang dang hna zong kha hlathlai.
“Zeicah Jehovah Sinah Naa Pumpek?” (2010, January 15, Vennak Innsang)
Jehovah sinah aa pumpemi hna i an i nuamhnak kong kha mah music video ah zoh.
“‘Zeicah Hi Vawlei Ah Kan Um?’ Timi Kong Theih Ka Duhnak Cu Kum Tampi A Si Cang” timi capar chungah nu pakhat kha pakhatnak ah a chiahmi thil kong dothlat ṭhan awkah zeinihdah a forh timi kong kha hlathlai.