Hmasa Bik Chuncha

NOAH le a innchungkhar lawng chung in a lenglei an chuah lio ah Noah nih a rak tuah hmasa bik mi cu zei a si ti nan hngal maw? Pathian sin ah thawinak a si lo ah laksong a rak pek. A tanglei i hmanthlak ah hin thawinak a tuah mi cu nanhmuh khawh lai. Noah nih buanchukcho chung in a innchungkhar a khamh hna caah Pathian sin ah lawmhnak in saram in thawinak cu a rak pek mi a si.

Cun Noah a pek mi laksawng cung ah cun Jehovah cu a lung aa lawm lai tiah nan ruat maw? A si, aa rak i lawm ngaingai. Cucaah Noah sin ah khan buanchukcho in vawlei cu ka hrawk ti lai lo tiah bia a rak kam.

Tlawmpal hnu ah vawlei cu a hung ro dih i Noah le a innchung khar cu lawng leng ah nunnak thar an rak thok. Pathian nih thluachuah a pek hna i hitin a chimh hna: ‘Fa tampi nan ngei lai. Minung in Vawlei khuazakip an khah hlan tiang nan karh lai.’

Sihmanhsehlaw a hnu ah, mi hna nih buanchukcho kong an theih tik paoh ah, khi bantuk buanchukcho kha a tlung ṭhan sual lai ti an ṭih kho. Cucaah Pathian nih ‘vawlei cung ah buanchukcho ka tlun ter ṭhan bal ti lai lo,’ tiah bia a kam mi kha minung a hngalh ter ṭhan tu ding ah a rak pek mi hna cu zei a si ti nan hngal maw? Cucu chuncha a si.

Chuncha cu van ah ruah a sur hnu in ni a tlan tik ah hmuh khawh a si tawn. Chuncha cu aa dawh ngai mi zawng tampi a ngei. Pakhat tal nan hmu bal hna maw? Hi hmanthlak i hi nan hmu maw?

Pathian nih cun hitin a rak ti: ‘Minung le saram vialte kha zeitik hmanh ah buanchukcho in ka hrawk ti hna lai lo tiah bia kaa kam. Ka chuncha cu minmei chung ah khin ka chiah lai. Cun chuncha a langh tik paoh ah, ka hmuh lai i ka biakamnak kha ka hngalh ṭhan lengmang lai.’

Cucaah chuncha nan hmuh tik ah, mah nih cun zeidah an hngalh ter ṭhan tawn hna lai? A si, buanchukcho in vawlei kha zeitik hmanh ah ka hrawk bal ti lai lo ti mi Pathian biakamnak kha asi.