BUANCHUKCHO hnu in mi hna an rak kal i an umnak hmun pakhat cu Ur tiah an ti. Inn ṭhaṭha a rak umnak a biapi ngai mi khua pakhat a rak si. Sihmanhsehlaw cu khua mi hna cu a hmaan lo mi pathian kha an rak biak hna. Cucu Babel i an rak tuah mi kha a si ve ko. Ur le Babel i mi hna cu Jehovah a rak bia rih ko mi Noah le a fapa Shem bantuk an rak si lo.

Buanchukcho in kum 350 hnu ah Noah cu a rak thi. Cucu hi hmanthlak i nan hmuh mi pa a chuah hnu kum hnih hnu ah a rak si. Amah cu Pathian hmai ah mi phundang ngaingai a rak si. Amah min cu Abraham a si. Amah cu a innchungkhar hna he khi Ur khua ah cun an rak um.

Nikhat cu Jehovah nih Abraham cu: ‘Ur khua le na rualchan hna kha kaltak hna law kan hmuhsak lai mi ram ah va kal tuah,’ tiah a rak ti. Abraham nih Pathian bia cu ngai in Ur khua i sunparnak vialte cu a rak kaltak maw? A si, a rak kaltak dih ko. Cun Abraham cu Pathian bia kha a ngaih zungzal caah amah cu Pathian hawi tiah an rak ti.

Abraham nih Ur khua in a rak chuah lio ah khan a rualchan a cheu zong amah sin ah an rak kal ve. A pa Terah zong a kal ve. A nau fapa Lot zong a rak kal ve. Cun Abraham a nupi Sarah zong a rak kal ve hen ta. Cun Haran an ti mi hmun ah khan an hung phan i cuka ah cun Terah cu a rak thi. Ur khua in lam hlapi an hung phan cang.

Cu hnu ah Abraham le a innchungkhar cu Haran khan an chuak i, Kanaan ti mi ram ah khan an hung phan. Cuka ah cun Jehovah nih: ‘Hi cu na tefa ka pek hna lai ding mi ram cu a si,’ tiah a rak ti. Abraham cu Kanaan ram ah cun thlam inn chung ah khan a rak um.

Pathian nih Abraham cu a rak bawmh caah amah cu tuurun le saram dang hna le sal tampi a rak ngei. Sihmanhsehlaw amah le Sarah cu tefa pakhat hmanh an rak ngei lo.

Abraham cu kum 99 a si tik ah, Jehovah nih: ‘Nangmah cu miphun tampi pa ah kan can ter lai tiah bia kaa kam,’ tiah a rak ti. Sihmanhsehlaw mah cu zeitindah a si khawh lai? Abraham le Sarah cu fa hrin awk ah an tar tuk cang ṭung?

KAHIN Abraham cu zeidah a tuah ti nan hngal maw? Namte aa put i a fapa kha thah aa tim mi a lo. Zeicahdah mah cu a rak tuah hnga? Hmasa bik ah Abraham le Sarah nih an fapa cu zeitindah an rak hmuh ti kha zoh hmanh u sih.

Annih cu fapa pakhat nan ngei lai tiah Pathian nih bia a kam hna ti kha philh hlah u law. Sihmanhsehlaw mah cu a si kho lai lo mi a lo, zeicahtiah Abraham le Sarah cu an tar tuk cang. Asinain Abraham nih cun a si kho lo mi thil zong Pathian cu a tuah khawh ko tiah a rak zumh. Cucaah zeitindah a rak si?

Pathian nih biakamnak a tuah hnu in kumkhat bak a rak luan. Cun Abraham cu kum 100 a rak si i Sarah cu kum 90 a si tik ah Isak an ti mi fapa pakhat an rak ngei. Pathian nih a biakamnak cu a rak tlin ter.

Sihmanhsehlaw Isak cu a hung upat deuh tik ah, Jehovah nih Abraham zumhnak cu a rak hneksak. ‘Abraham!’ tiah a rak auh i, Abraham nih cun: ‘Bawipa, ka ngaih ko,’ tiah a rak leh. Cu tik ah Pathian nih: ‘ Na fapa pakhat lawngte na ngeih mi Isak kha la law kan hmuhsak lai mi tlang ah kal u. Cuka ah cun na fapa kha na thah lai i khangh thawinak ah na ka pek lai,’ tiah a rak ti.

Abraham nih a fapate cu a dawt tuk hringhran caah khi bia a theih tik ah Abraham cu a ngaih a chia ngaingai! Cun Abraham a tefa pawl cu Kanaan ram ah an um te lai tiah Pathian nih bia a rak kam mi zong kha philh hlah u. Isak a thih ah cun cu biakamnak cu zeitindah a tlin khawh hnga? Abraham cu a sullam a thei kho hrimhrim lo. Asinain Pathian bia cu a rak ngaih ṭhiamṭhiam ko.

Abraham nih tlang cung a va phak tik ah a fapa Isak cu hri in a ṭem i a ser mi theng cung ah khan a chiah. Cun namte cu a lak i a fapa cu thah aa rak i tim. Sihmanhsehlaw mah lio te ah cun Pathian vancungmi nih: ‘Abraham, Abraham!’ tiah a run auh. Cun Abraham nih: ‘A si, hika ah ka um ko! tiah a rak leh.

‘Ngakchiapa kha zeihmanh harnak pe hlah, a cung ah zeihmanh zong tuah fawn hlah,’ tiah Pathian nih a ti. ‘Fapa pakhat lawngte na ngeih mi hmanh pek sian lo in na ka um piak lo caah, atu cu na ka zumh taktak ti kha ka hngalh,’ tiah Pathian nih a ti.

Zeitluk a ngan mi zumhnak dah Abraham nih Pathian cung ah a ngeih ruat hmanh u! Jehovah a tuah khawh lo mi thil a um lo i, Isak zong kha thihnak in Jehovah nih a thawh ter khawh ṭhan ko lai tiah a rak zumh. Sihmanhsehlaw Abraham nih Isak kha that tak tak seh ti Pathian nih a rak duh mi a si lo. Cucaah Pathian nih an pawngte i a um mi burbuk chung ah khan tuu pakhat kha aa ngerh ter i, Abraham kha a fapa can ah mah tuu in khan thawinak tuah awk ah a rak chimh.