Na Nunnak Ah Ahodah A Biapi Bikmi A Si?

“Nangmah lawnglawng hi . . . vawlei dihlak uktu Cung Nung Bik na si.”—SALM 83:18.

1, 2. Khamhnak hmuhnak ca ah Jehovah min hngalh lawng zeicah a zat lo?

JEHOVAH min hmasa bik na theih cu Jeremiah 33:2 [Judson] an in relpiak lio ah a si men lai. Cuka chung i “hi thil a tuahtu Pathian, hi thil a sertu Pathian, Jehovah tiah min a ngeimi zungzal Pathian” timi bia na hmuh tikah na khuaruah a har ko lai. Cucaah dawtnak a ngeimi Jehovah Pathian kong midang hngalh awk bawmhnak ah mah Baibal cang na hman lai cu a fiang ko.—Rom 10:12, 13.

² Jehovah min hngalh cu a biapi nain a min hngalh lawng in a za lo. Khamhnak hmuhnak ca ah a biapi ngaimi a dang pakhat kha Salm 83:18 ah hitin kan hmuh: “Nangmah lawnglawng hi . . . vawlei dihlak uktu Cung Nung Bik na si.” Jehovah cu van le vawlei dihlak ah a biapi bikmi a si taktak. Zeizong vialte Sertu a si caah a sermi thil vialte kha ka nawlngai u tinak nawl a ngei. (Biat. 4:11) Cucaah ‘ka nunnak ah ahodah a biapi bikmi a si?’ tiah kan i hal awk a si. Mah biahalnak kan leh ning cu a biapi tukmi a si.

Eden Dum ah a Chuakmi Kongkau

3, 4. Satan nih Evi cu zeitindah a hlen khawh i zei thil dah a chuak?

³ Eden dum i a cangmi thil zohnak thawng in mah biahalnak a biapitnak kha fiang tein kan hmuh khawh. A hnu ah Satan Khuachia tiah theihmi dotu vancungmi nih hmasa bik minu Evi kha thingthei phun khat ei lo ding timi Jehovah nawlbia nakin amah duhnak tu tuah deuh awkah a lem. (Gen. 2:17; 2 Kor. 11:3) Evi nih mah lemnak aa teiternak thawng in Jehovah i cungnung bik a sinak a upat lo a langhter. Evi nih a nunnak ah Jehovah kha biapi bik in a cohlang lo. Satan nih Evi kha zeitindah a rak hlen khawh?

⁴ Satan nih Evi he bia an i ruah lio ah fimzer ngai in lam phunphun a hman. (Genesis 3:1-5 rel.) Pakhatnak ah, Satan nih Jehovah min hman lo in “Pathian” ti lawng in a hman. Asinain Genesis ṭialtu nih cun Genesis a ngan pathum a hme pakhat ah Jehovah min kha a hman.a Pahnihnak ah, Satan nih Evi bia a hal tikah “an ti taktak hna maw?” timi bia a hman. Cutin a ti cu Satan nih Pathian chimmi a biapi lo ti an ruah nakhnga aa zuam a si men lai. Pathumnak ah, Evi lawng a chawnh nain “nan” timi biafang a hman. Cuticun Evi kha amah le an pa caah biachimnak nawl a ngeimi ka si ti lungpuam awk a forh. Zei thil dah a chuak? Evi nih “dum chung i a ummi thingthei vialte hi a zei paoh kan ei khawh ko hna” tiah a tinak thawngin an nuva ca in biachim awkah ruamkai in bia khiak sehlaw a lo.

5. (a) Satan nih Evi kha zei kong ruah awk dah a forh? (b) Evi nih thlauhmi thingthei a einak thawngin zeidah a langhter?

⁵ Satan nih biatak zong a merh. Pathian kha a ding lomi lawhter a duh caah Evi kha “dum chung i a ummi thingthei hi a zeihmanh nan ei lai lo” tiah Pathian nih an ti taktak maw tiah a hal. Cun Evi kha amah kong ruah awk le a sining ṭhancho awk, “Pathian bantuk” si awkah zeidah tuah khawh a si timi kong ruah awk zong Satan nih a forh. A donghnak ah, zeizong vialte a Petu he an i pehtlaihnak kong ruah loin thingkung le a thei kong tu ruah awk a forh khawh. (Genesis 3:6 rel.) Ngaihchiat awk cu Evi nih thingthei a einak thawngin a nunnak ah Jehovah kha biapi bik i a chiah lo a langhter.

Job Chan ah a Chuakmi Thil

6. Satan nih Job zumhfehnak he aa tlai in zeitindah a ti, mah ruangah Job cu zei caanṭha dah a hmuh?

⁶ Kum tampi a rauh hnu ah, zumhfekmi Job cu a nunnak ah ahodah biapi bik a chiah ti langhternak caanṭha a rak hmu. Jehovah nih Job zumhfehnak kong Satan sin a chim tikah, Satan nih “Job nih hin Pathian cu a lak in maw a ṭih?” tiah a leh. (Job 1:7-10 rel.) Satan nih Job cu Pathian bia a ngai lomi a si ticun a ti lo. Asinain, Jehovah a biak cu a dawt ruangah si lo in amah ca ṭhatnak ca ah a si tiah sual a phawt. Mah bia kha Job lawng nih a hmaan lo a langhter khawh i cutin langhternak caanṭha zong a rak hmu.

7, 8. Job cu zei harnak dah a ton, zumhfek te’n a in khawhmi nih zeidah a langhter?

⁷ Jehovah nih Satan kha Job cungah a fakmi harnak pakhat hnu pakhat tlunternak nawl a pek. (Job 1:12-19) Job nih a sining aa thlenmi kha zeitindah a leh? “Hi vialte ah hin Job nih sualnak a tuah lo i Pathian cu a mawhchiat lo” tiah Baibal nih a ti. (Job 1:22) Asinain Satan cu a lung a tling rih lo i “cuar caah cuar! Mi nih cun a ngeihmi vialte cu a nunnak caah cun a sian ko lai ta” tiah a ti chap.b (Job 2:4) Job theng nih fahnak a in ahcun a nunnak ah Jehovah kha biapi bik ah a chia ti lai lo tiah a ti.

⁸ Job cu fih a nungmi hma nih a tlunh i a nupi nih Pathian kha chiatserh law thi ko cang tiah a ti. A hnu ah titer in mi a hnemmi pathum nih na tuahsernak a ṭhat lo caah na inmi a si tiah sual an phawt. (Job 2:11-13; 8:2-6; 22:2, 3) Job cu mah harnak vialte a tong nain zumhfek tein a um. (Job 2:9, 10 rel.) Zumhfek tein a in khawhmi nih Jehovah cu a nunnak ah biapi bik a si kha a langhter. Cun a tlinglomi minung nih Satan sualpuhnak a palh kha kan si khawh chung in langhter khawh a si zong Job nih a langhter.—Phungthlukbia 27:11 he tahchunh.

Jesuh nih Tling tein a Leh Khawh

9. (a) Satan nih Jesuh kha a paw a ṭam lioah zei tuah awk dah a forh? (b) Mah tukforhnak kha Jesuh nih zeitindah a leh?

⁹ Jesuh cu tipil a in hnu tlawmpal ah Jehovah kha a nunnak ah biapi bik chia lo in amah duhmi tuah awkah Satan nih a tukforh. Satan nih Jesuh kha voithum a tukforh. Hmasa bik ah, lung kha changreu i canter awkah a tukforh. (Matt. 4:2, 3) Jesuh cu ni sawm li le zan sawm li rawl loin a um caah a rawl a ṭam tuk ko lai. Cucaah a paw khimter awkah a ṭhawnnak kha ningcang loin hman awkah Satan nih a forh. Jesuh nih zeitindah a leh? Evi he i lo loin Jesuh nih cun Jehovah chimmi kha biapi ah a chiah i tukforhnak kha a al colh.—Matthai 4:4 rel.

10. Satan nih Jesuh kha zeicah biakinn parpahlek in zuan awkah a forh?

¹⁰ Voihnihnak ah, Satan nih Jesuh kha biakinn parpahlek in zuan awkah a tukforh. (Matt. 4:5, 6) Satan nih Jesuh kha zeidah tuahter a duh? Na zuan i naa khawn lo ahcun “Pathian fapa” na si a lang lai tiah a ti. Satan nih Jesuh kha minthannak ca lawng ruat in mi hmai ah langhter seh ti a duh ti cu a fiang ko. Minung cu an i porhlawt ca le mi upatmi si an duh caah ṭih a nungmi thil tuah an ngamh kha Satan nih a hngalh. Cucaah Baibal cang kha a ping in a hman, asinain Jesuh nih Jehovah Bia ṭha tein a hngalhthiam kha a langhter. (Matthai 4:7 rel.) Jesuh nih Satan tukforhnak a almi in Jehovah cu a nunnak ah biapi bik a si kha a langhter ṭhan.

11. Satan nih hi vawlei pennak vialte kan pek lai a timi kha zeicah Jesuh nih a al?

¹¹ Voithumnak ah, Satan nih Jesuh kha hi vawlei pennak vialte kan pek lai tiah a tukforh. (Matt. 4:8, 9) Mah kha Jesuh nih a al colh. Satan chimmi a cohlan ahcun Lian Ngan Bik Pathian Jehovah i Cungnung Bik a sinak a al a si lai. (Matthai 4:10 rel.) Jesuh nih tukforhnak kha a voithum ningin Jehovah min aa telnak Baibal cang hmang in a leh.

12. Jesuh cu zeicah a lungre a theih ngaingai? Asinain zeidah a tuah, mah in zeidah kan hngalh khawh?

¹² Jesuh nih vawlei a nunnak a dih lai ah a har ngaimi biakhiahnak a rak tuah. Phungchim rian a ṭuan lio ah, raithawinak ca a nunnak pek a duh kha a langhter. (Matt. 20:17-19, 28; Luka 12:50; Johan 16:28) Asinain Judah phunglam nih sual a phawtmi na tuah tiah sualpuh a si lai le Pathian thangchiattu in thah a si lai kha Jesuh nih a hngalh. Misual pakhat in a thih laimi nih a lungre a theihter ngaingai. Asinain “Ka Pa, a si khawh ahcun hi hrai hi ka ṭhialpiak ko. Sihmanhsehlaw keimah duhmi cu si hlah seh, nangmah duhmi tu si ko seh” tiah thla a cam. (Matt. 26:39) Jesuh cu a thih tiang zumhfek tein a um caah a nunnak ah Jehovah biapi bik a si kha fiang tein a langhter.

Kan Bialehnak

13. Evi, Job le Jesuh kong in zeidah kan hngalh khawh?

¹³ A cunglei kan cawnmi in zeidah kan hngalh? Evi kong zoh tikah mah duhnak a zulmi le mahle mah biapi ah aa chiami nih an nunnak ah Jehovah biapi bik an chia lo ti kha kan hngalh. Job zumhfehnak kong in a tlinglomi minung nih harnak ton tikah, zei ruangah a si hngalh lo zongah zumhfek tein inkhawhnak thawngin nunnak ah Jehovah biapi bik chiah khawh a si kan hngalh. (Jeim 5:11) Jesuh nunning nih ningzahnak in ngam awk le minthannak biapi tuk ah chiah lo awk a si kha a kan cawnpiak. (Heb. 12:2) Mah kha zeitindah zulh khawh a si?

14, 15. Jesuh le Evi, tukforhnak lehning zeitindah aa dan, zeitindah Jesuh cu i zohchunh khawh a si? (Cahmai 18 i hmanthlak kha chim chih.)

¹⁴ Tukforhnak ruangah Jehovah kha philh hlah. Evi cu a hmaika ah a ummi tukforhnak lawng ah a lung a um. Thingthei cu “mithlaang ngai a si le a thei cu mitthi ngai a si kha a hmuh tikah a fimmi si cu zeitluk in dah a nuamh hnga ti kha a ruat.” (Gen. 3:6) Jesuh nih tukforhnak pathum a lehning he cun aa va dang dah! A voithum tein a hmaika ah a ummi tukforhnak lawng ruat loin a tuahmi nih zeidah a chuahter lai timi kha a ruat. Pathian Bia kha aa bochan i Jehovah min zong a hman.

¹⁵ Jehovah duh lomi thil tuah awk tukforh kan si tikah zeidah kan lung ah a um? Tukforhnak kong kan lung a um deuhdeuh ah a ṭhalomi tuah kan duh deuh ve ko lai. (Jeim 1:14, 15) Kan lung nih a duhmi a ṭhalomi kha a rannak in hloh a hau, kan pum cheubang pakhatkhat tan bantuk in fahnak in a hauh hmanh ah hloh a hau. (Matt. 5:29, 30) Kan tuahmi nih Jehovah he kan i pehtlaihnak zeitindah a hnorsuan khawh ti kha Jesuh bantuk in ruah a hau. Cun Pathian Bia, Baibal chimmi zong i cinken a hau. Cuti kan tuah lawng ah kan nunnak ah Jehovah biapi bik a si kan langhter khawh lai.

16-18. (a) Zeiruangah dah kan lung a dongh khawh? (b) Kan tonmi harnak inkhawh awkah zeinihdah a kan bawmh lai?

¹⁶ Harnak tonmi ruangah Jehovah cungah na lung fak hlah. (Ptb. 19:3) Hi vawlei donghnak caan a naih chin caah Jehovah miphun cu leiser ral le harnak phunphun kan tong chin. Mah tikah khuaruahhar in huhphenhnak hmuh lai kan i ruahchan lo. Asinain, Job bantuk in dawtmi nih a kan thihtak le harnak dangdang kan ton tikah kan lung a dong men lai.

¹⁷ Jehovah nih mah thil kha zeicah umnak nawl a awnh ti Job nih a rak hngalh lo bantuk in kannih zong a caan ah zei ruangah thil ṭhalo a um kha kan hngal men lai lo. Haiti (Heiṭi) i a tlungmi lihnin asiloah a dang leiser ral ruangah zumhfekmi unau tampi an thi ti thawng kan theih ko lai. Kan theihmi unau pakhatkhat cu zaangennak asiloah accident ruangah a thi ti thawng kan theih men lai. Kanmah zong lungretheihnak le a dinglo in pehtlaihnak kan tong men lai. Kan lungre a theih tuk tikah ‘Jehovah, zeiruang ah dah mah thil hi ka cungah a tlun, zei sualnak dah ka tuah?’ tiah kan ti men lai. (Hab. 1:2, 3) Cu bantuk thil inkhawh awkah zeinihdah a kan bawmh lai?

¹⁸ Jehovah mithmai ṭha kan hmuh lo ruangah cu bantuk thil kan ton ti ruah kha i ralrin awk a si. Jesuh nih a chan lio i a cangmi ngaihchiat awk thil pahnih hmang in mah kong kha a fianter. (Luka 13:1-5 rel.) Harnak tampi cu ‘a caan le hmuh chung khawh lomi thil sining’ ruangah a cangmi a si. (Pct. 9:11, NW) Harnak kan ton cu zei ruang i a si hmanh ah ‘zaangfahnak in a khatmi Pathian’ kha kan i bochan ahcun kan inkhawh ko lai. Zumhfekmi si zungzal awkah a herhmi thazaang a kan pek lai.—2 Kor. 1:3-6.

19, 20. Jesuh cu serhsatnak phunphun inkhawh awkah zeinihdah a bawmh, kannih tah zeinihdah a kan bawmh khawh?

¹⁹ Porhlawtnak asiloah ningzah huah lainak kong lawng ruat hlah. Jesuh cu aa toidormi a si caah a ngeihmi kha “a hlawt dih hna i sal sinak tu kha aa lak.” (Fil. 2:5-8) Jehovah kha aa bochan caah serhsatnak phunphun a in khawh. (1 Pit. 2:23, 24) Jesuh nih cuti a tuahnak thawngin Jehovah duhnak kha hmasa bik ah a chiah khawh, cucaah a sannak bik hmun ah Pathian nih a hlorh. (Fil. 2:9) Jesuh nih a zultu pawl kha amah bantuk in nun awkah a forh hna.—Matt. 23:11, 12; Luka 9:26.

²⁰ A caan ah, zumhnak hneksaknak kan tonmi cu in a har ko lai. Asinain, lamkaltu Paul bantuk zumhnak kan ngeih awk a si, hitin a chim: “Hi bantuk in sifahnak ka inmi vialte hna hi hi ruangah hin a si. Asinain ka lung a dong naisai lo, zeicahtiah kaa bochanmi cu ahodah a si kha ka hngalh i ka kut chungah a ka pekmi thil kha khi ni tiang him tein a ken khawh ti kha fiang tein ka zumh.”—2 Tim. 1:12.

21. Vawlei ah mahle mah biapi ah aa chiami an tam chin nain zei tuah awk dah bia na khiah?

²¹ Tuchan ah “mi cu anmah zawn lawng aa ruatmi” an si lai tiah Baibal nih a chimchung. (2 Tim. 3:2) Cucaah mahle mah biapi ah aa chiami an tam chinmi hi khuaruahhar awk a si lo. Mah bantuk lungput kan i cawn sual nakhnga lo i zuam u sih. Tukforhnak, harnak le ningzahnak kan ton zongah kan nunnak ah Jehovah lawng biapi bik kan chiah langhter awkah biakhiak u sih.

[A Tanglei Fianternaks]

Zeidah Kan i Cawn Khawh?

• Satan nih Evi a hlen ning in,

• Job nih harnak phunphun a lehrulh ning in,

• Jesuh nih biapi bik a chiahmi thil in, zeidah kan i cawn khawh?

[Cahmai 17nak i hmanthlak]

Evi nih Jehovah he an i pehtlaihnak kha biapi bik ah a chia lo

[Cahmai 1nak i hmanthlak8]

Jesuh nih Satan tukforhnak kha a al i Jehovah duhnak tuahnak tu biapi bik ah a chiah

[Cahmai 20nak i hmanthlak]

Haiti ah li aa hninh hnu i thlam pakhat hnu pakhat phungchim lio

Harnak kan ton lioah ‘zaangfahnak in a khatmi Pathian’ kan i bochan khawh