Daihnak Chuahtertu Si I Zuam U

‘Daihnak a chuahtertu thil kha kan i tinh awk a si.’—ROM 14:19.

1, 2. Jehovah Tehte hna lakah zeicah daihnak a um?

TUCHAN ah daihnak taktak a um ti lo. Ramkhat ah a ummi le holh aa khatmi hmanh biaknak, uknak, tangka le ca cawnnak kongkau ah an lung aa khat lo. Asinain Jehovah Tehte pawl tu cu “phun kip, ram kip, holh kip le hrin kip chungin a rami an si” nain an lakah daihnak le remnak a um.—Biat. 7:9.

² Kan lakah daihnak a umnak a ruang a um. A bik in “Pathian he kan i rem” caah a si. Pathian he kan i rem cu kan caah a nunnak a pemi a Fapa kan zumh caah a si. (Rom 5:1; Efe. 1:7) Cun Jehovah nih zumhfekmi a salle kha thiang thlarau a pek hna i thlarau nih a chuahtermi ziaza ah daihnak aa tel. (Gal. 5:22) Daite le lungrual tein kan umnak a ruang dang cu ‘hi vawlei ta kan si lo’ caah a si. (Johan 15:19) Chim duhmi cu nainganzi le raltuknak ah kan i tel lo tinak a si. Baibal nih a chim bantuk in Jehovah miphun nih ‘kan vainam kha tuhmui ah kan ser.’—Isa. 2:4.

3. Kan lakah a ummi daihnak nih zeidah a chuahter, hi capar ah zei kong dah kan i ruah lai?

³ Jehovah Tehte pawl cu miphun le nunphung kan i dang nain ‘pakhat le pakhat kan i daw.’ (Johan 15:17) Kan lakah daihnak a um ti tikah unau kha harnak kan pe hna lo tinak lawng a si lo. Daihnak nih ‘mi cungah ṭhatnak tuah le zumhnak lei i kan rualchan a simi hna cungah tuah khun’ awk a kan bawmh. (Gal. 6:10) Jehovah a biami hna lakah a ummi daihnak cu a sung tukmi a si caah kilven awk a si. Cucaah Khrihfabu ah remnak le daihnak a um nakhnga zeidah tuah khawh a si kha i ruah u sih.

Palhnak Kan Tuah Tikah

4. Mi pakhat a thin kan hunter tikah daihnak a um nakhnga zeidah tuah awk a si?

⁴ Zultu Jeim nih “kan dihlak hin palhnak kan tuah cio tawn. A biachim ah palhnak a tuah lomi cu mitling a si” tiah a ṭial. (Jeim 3:2) Cucaah unau lakah lung i khah lonak le i theihsualnak a chuak kho. (Fil. 4:2, 3) Cutikah buainak kha tawnghtham in Khrihfabu daihnak kilven awk a si. Tahchunhnak ah, mi pakhat a thin kan hunter ti kan hngalh ahcun Jesuh chimmi bia hi ṭha tein kan ruah awk a si.—Matthai 5:23, 24 rel.

5. Mi nih kan thin an kan hunter tikah daihnak a um nakhnga zeitin tuah khawh a si?

⁵ Mi nih kan cungah palhnak hmete an tuah ah tah? Kan sin ra in ngaihthiam hal lai kan i ruahchan awk a si maw? 1 Korin 13:5 nih “[dawtnak cu] palhnak kha aa cinken peng lo” tiah a ti. Kan thin an kan hunter tikah ngaihthiam le philhnak thawngin daihnak a um nakhnga kan i zuam. (Kolos 3:13 rel.) Palhnak hmete kan cung an tuah tikah ngaihthiam cu a ṭha bikmi a si i mah nih unau pawl he remte le dai tein um awk a kan bawmh leng ah kan lung zong a daihter. Phungthlukbia nih “palhnak i maimilh cio hi minung sunparnak a si” tiah a ti.—Ptb. 19:11.

6. Mi nih kan cungah an tuahmi palhnak philh kan i harh ahcun zeidah tuah awk a si?

⁶ Mi nih kan cungah an tuahmi palhnak kha philh kan i harh ah tah zeitin? Mah kong mi sin chim cu a ṭha lo. Cubantuk mi thangchiatnak nih Khrihfabu daihnak a hrawh khawh. Cuti a si ahcun zeidah tuah awk a si? Matthai 18:15 nih hitin a chim: “Nan unau pakhatkhat nih nan cungah sualnak an tuah ahcun, amah sinah cun nan va kal lai i a sualnak cu nan va chimh lai. Sihmanhsehlaw, a thli tein nanmah pahnih lawng theih in na va tuah lai. Nan bia a ngaih ahcun, nan unau ah na lak khawh ṭhan a si.” Matthai 18:15-17 nih sualnak ngan kong a chimmi a si nain, a hme 15 i hmuhmi phunglam kha thil sining dang zongah hman khawh a si. Kan cung sualnak a tuahmi sinah kanmah lawng kan kal lai i nem te’n biachim in rem ṭhan kan i zuam lai.a

7. Buainak kha zeicah tawnghtham colh awk a si?

⁷ Lamkaltu Paul nih hitin a ṭial: “Na thin a hun ahcun na thinhunnak kha sualnak chung i an luhpitu siter hlah; cun na thinhunnak cu ni tlak khumhter hlah. Khuachia cu caanṭha pe hlah.” (Efe. 4:26, 27) Ti khamnak cu a pemka ah phih colh lo ahcun a kauh chin bantukin buainak cu tawnghtham colh lo ahcun a ngan chin ve lai. Cucaah tawnghtham colh a hau. I uahnak, nahchuahnak le hakkauhnak ruang ah unau lak i a ummi buainak kha tawnghtham lo in kan um awk a si lo.—Jeim 4:1-6.

Buainak ah Mi Tampi An I Tel Tikah

8, 9. (a) Rom Khrihfabu ah zei lung i khahlonak dah a um? (b) Annih kha Paul nih zeitindah ruahnak a cheuh hna?

⁸ Khrihfabu chung buainak cheukhat ah mi pahnih lawng si lo in mi tampi an i tel tawn. Paul nih ca a kuatmi Rom Khrihfabu zongah cutin a rak si. Judah mi Khrihfa hna le Jentail mi Khrihfa hna lakah lung i khah lonak a um. Cuka um Khrihfa cheukhat nih chiaṭha thleidannak lungthin a dermi kha an zawmhtaih hna. Chiaṭha thleidannak lungthin a dermi zong nih a ṭhawngmi kha sual an phawt hna. Cu tikah Paul nih zeitindah ruahnak a cheuh hna?—Rom 14:1-6.

⁹ Paul nih an phu hnih in ruahnak a cheuh hna. Moses Nawlbia tang ah kan um ti lo ti a theithiammi hna kha unau dang zawmhtaih lo awk a chimh hna. (Rom 14:2, 10) An ruahnak le an tuahsernak nih chiaṭha thleidannak lungthin a dermi unau kha Jehovah he an i pehtlaihnak a rawhter khawh. Cucaah Paul nih “rawl ruang menmen ah Pathian thil tuahmi kha hrawk hlah u” tiah a ti hna. Cun “sa ei i sum te hna, zu din i sum te hna, nan unau a tlukrilhtertu a si ding paohpaoh tuah i sum te hna kha a hmaanmi thil a si” ti zong a chimh hna. (Rom 14:14, 15, 20, 21) Paul nih chiaṭha thleidannak lungthin a dermi hna kha nan ruahnak aa khatlomi pawl soi hna hlah u tiah a ti hna. (Rom 14:13) “Nanmah le nanmah kha a sang tuk ah i ruat hlah u” ti zong in a ti hna. (Rom 12:3) Paul nih an phu hnih in ruahnak a cheuh hna hnu ah hitin a ṭial: “Daihnak a chuahtertu thil le pakhat le pakhat thazaang i peknak a bawmtu thil kha kan i tinh awk an si.”—Rom 14:19.

10. Tuchan ah buainak a chuah tikah Rom Khrihfa hna bantuk in zeidah tuah awk a si?

¹⁰ Rom Khrihfabu nih Paul ruahnak cheuhmi cohlan in an i remh lai cu a fiang ko. Tuchan ah zumtu khat lakah lung i khahlonak a um tikah Baibal chimmi kan zulh ahcun dawtnak he kan tawnghtham khawh lai. Tuchan Khrihfabu ah buainak a chuah tikah ‘pakhat le pakhat rem tein um’ khawh awkah Rom Khrihfa hna bantukin i remh cio a hau.—Mar. 9:50.

Bawmh a Herh tikah

11. Unau pakhat nih zumtu khat he an lung aa khahlonak kong Khrihfa upa a chimh tikah Khrihfa upa nih zeidah a tuah awk a si?

¹¹ Unau pakhat nih a chungkhar asiloah zumtu khat unau he an lung aa khahlonak kong Khrihfa upa chimh a duh ah tah zeitin? Phungthlukbia 21:13 nih hitin a ti: “Misifak hna an au tikah a hna aa chehmi cu, amah a au ve tikah ahohmanh nih an theihpiak ve lai lo.” Khrihfa upa nih “a hna aa cheh” lai lo ti cu a fiang ko. Asinain phungthlukbia dang pakhat nih hitin a chim: “Biaceihnak zung ah bia a chim hmasami paoh cu a hmaan a lo zungzal, sihmanhsehlaw cu a lawhnak cu a dang a rat ve i amah kha a vun hlathlai tiang lawng khi a si tawn.” (Ptb. 18:17) Khrihfa upa nih zaangfahnak he a ngaihpiak lai nain pakhat chimmi lawng in biakhiah lo awk aa ralrin a herh. Mah pa bia a ngaih hnu ah buainak ah aa telmi unau he tah bia nan i ruah cang maw tiah a hal awk a si. Daihnak a um nakhnga tuah khawhmi Baibal chimmi kha Khrihfa upa nih a ruahceihpi awk a si.

12. Pakhat lawng chimmi bia ngaih hnu ah biakhiah colh ṭih a nunning tahchunhnak pathum chim.

¹² Pakhat lawng chimmi bia ngaih hnu ah biakhiah colh ṭih a nunnak kong hngalh awkah Baibal tahchunhnak pathum zoh u sih. Pakhat cu Potifar a si. A nupi nih lih in Josef nih tlaihhrem a ka timh tiah a chimh tikah Potifar cu a thin a hung tuk i Josef kha thong ah a thlak. (Gen. 39:19, 20) Pahnihnak cu Siangpahrang David a si. Mephibosheth salpa Ziba nih David kha Mephibosheth cu na ral hna lei ah a ṭang tiah a chimh tikah David nih a zumh i “Mephibosheth ta a simi vialte cu nangmah ta an si cang” tiah Ziba cu a ti. (2 Sam. 16:4; 19:25-27) Pathumnak cu Siangpahrang Artazaksis a si. Jerusalem ralhau Judah mi nih an sak ṭhan cu nangmah ralchanh an duh caah a si tiah Judah mi a huatu pawl nih an chimh. Mah kha a zumh i ralhau saknak cu a ngolter hna caah Judah mi nih Pathian inn sak cu an ngol. (Ezra 4:11-13, 23, 24) Paul nih Timote kha thil sining hngalh dih hlan ah biaceih lo awk ralrin a pekmi kha Khrihfa upa nih an zulh ve.—1 Timote 5:21 rel.

13, 14. (a) Mi pahnih an i sik tikah zeidah i cinken awk a si? (b) Khrihfa upa cu biakhiahnak hmaan tuah awkah zeinihdah a bawmh hna lai?

¹³ Baibal nih hitin a ti: “Zeizong ka hngal ve ko ti in aa ruat mipa nih hin a hngalh awk tluk in a hngal tawn lo.” (1 Kor. 8:2) Mi pahnih an i siknak kong ka hngalh tiah kan ruah hmanh ah an i siknak a ruang kan hngal dih tak maw? Aa simi hna an kong tah ṭha tein kan hngal maw? Khrihfa upa cu bia an khiah tikah lihbia le biavakvai in hlen an si nakhnga lo an i ralrin a hau. Pathian nih biaceihnak nawl a pekmi Jesuh Khrih nih ding tein bia a ceih. ‘Lenglang men le mi chim chin bia men in bia a khiak lo.’ (Isa. 11:3, 4) Pathian thlarau lamhruainak tu a zulh. Khrihfa upa zong Pathian thlarau lamhruainak an zulhnak thawng in ṭhatnak an hmu.

¹⁴ Khrihfa upa nih zumtu khat pawl kong biakhiahnak an tuah hlan ah Jehovah sinah thlarau bawmhnak an hal hmasa a hau. Cun Baibal le zumhawk a tlakmi le a fimmi sal chuahmi cauk an hmannak in Pathian thlarau lamhruainak an zulh.—Matt. 24:45.

Pathian he Kan i Rem a Hau

15. Unau pakhat sualnak ngan a tuah ti kan hngalhmi kha zeitikah dah Khrihfa upa sin chim awk a si?

¹⁵ Khrihfa a simi cu daihnak a um nakhnga i zuam awk forh kan si. Asinain Baibal nih hiti zong in a ti: “Cunglei in a rami fimnak cu a hmasa bik ah a thiang i cun daite le nemte in a um.” (Jeim 3:17) Baibal nih thiannak kha daihnak nakin biapi deuh ah a chiah. Thian timi cu a hmaan, hmaan lo kong Pathian chimmi zulh le a duh ning in nun a si. Unau pakhat nih sualnak ngan a tuah ti kan hngalh ahcun Khrihfa upa sinah a sualnak chim kan forh awk a si. (1 Kor. 6:9, 10; Jeim 5:14-16) A chim lo ahcun kanmah nih Khrihfa upa sinah kan chim awk a si. Asinain sualnak a tuahmi he rem kan duh caah kan chim lo ahcun kanmah zong misual kan si ve lai.—Lev. 5:1; Phungthlukbia 29:24 rel.

16. Jehu nih Siangpahrang Joram a dohmi in zeidah kan hngalh khawh?

¹⁶ Jehu tuahmi thil nih sualnak a tuahmi he i rem nakin a dingmi thil tuah a biapit deuh a langhter. Jehu cu Pathian nih Siangpahrang Ahab innchungkhar tuk awkah a thlah. Ahab le Jezebel fapa, Siangpahrang ṭhalo Joram cu Jehu don awkah rangleng aa cit i an i ton tikah “daihnak a si maw, Jehu?” tiah a hal. Jehu nih zeitindah a leh? “Na nu Jezebel hlawhhlannak le eih hmannak liangluang hi an um rih chungah hin, zei daihnak cu dah a um kho lai?” tiah a leh. (2 Si. 9:22) Cun a li cu a koih i Joram lung ah a kah. Jehu bantuk in Khrihfa upa nih a sualnak aa ngaichih lomi he remnak ser duh ah a sualnak i theihter loin a um lai lo. Khrihfabu le Pathian i rem zungzal awkah a sualmi cu bu chung in chuah awk a si.—1 Kor. 5:1, 2, 11-13.

17. Khrihfa a simi nih daihnak a um awkah zeidah tuah a herh?

¹⁷ Kan lakah a ummi buainak tam deuh cu Khrihfa upa tawnghtham haumi a si lo. Cucaah dawtnak in sualnak i ngaihthiam cu a ṭha. Baibal nih hitin a chim: “Midang sualnak a thup khotu nih kha pa dawtnak kha a hmuh lai. Sihmanhsehlaw kha thilte kha hlasak in a sa lengmangmi nih cun hawikom he ṭhennak a ser.” (Ptb. 17:9) Mah bia kan zulh ahcun Khrihfabu ah daihnak a um lai i Jehovah he kan i pehtlaihnak a ṭha lai.—Matt. 6:14, 15.

Daihnak a Chuahtertu Cu Thluachuah An Hmu

18, 19. Daihnak a chuahtertu cu zei thluachuah dah an hmuh lai?

¹⁸ “Daihnak a chuahtertu thil” kan tuah tikah thluachuah tampi kan hmu. Jehovah he pehtlaihnak ṭha kan ngei i Khrihfabu ah daihnak a um. Khrihfabu ah daihnak a um nakhnga kan i zuammi nih “daihnak thawngṭha” kan chimhmi hna he rem tein um zia a kan thiamter. (Efe. 6:15) “Mi vialte cungah zaangfahnak a ngeimi, lung a saumi” si awk a kan bawmh.—2 Tim. 2:24.

¹⁹ “Minung hi miṭha he miṭhalo he thihnak in kan tho ṭhan dih lai” tiah Baibal nih a timi hi i cinken. (Lam. 24:15) Mah bia vawlei ah a tlin tikah sining le lungput aa khat lomi miphun zakip an tho ṭhan lai. A tho ṭhanmi lakah, vawleicung khuazakip ah a ummi, an chan aa dangmi le “vawlei ser hramthawknak” i a rak nungmi zong an i tel lai. (Luka 11:50, 51) A thoṭhanmi pawl daihnak duh awk cawnpiak ding tinvo sung kan hmu lai. Atu i cawnpiak kan simi hi mah tikah bawmtu taktak a si te lai.

[A Tanglei Fianternak]

Zeidah Na Hngalh?

• Mi pakhat a thin kan hunter tikah zeitindah remnak ser khawh a si?

• Mi nih kan thin a kan hunter tikah zeitindah remnak ser khawh a si?

• Buainak tawnghtham tikah pakhat chimmi lawng ngaih cu zeicah a ṭhatlo?

• Sualnak a tuahmi he remnak tuah nakin a dingmi thil tuah zeicah a biapit deuh?

[Cahmai 29nak i hmanthlak]

Mi a ngaithiammi hna cu Jehovah nih a dawt hna