Nunning le Rianṭuannak Tuahchunhnak Cauk caah Cherhchanmi
APRIL 2-8
BAIBAL AH THUHMI RO HNA | MATTHAI 26
“Lanhtak puai le Ruahnolhnak puai—Aa Lawhnak le Aa Dannak”
(Matthai 26:17-20) Thilnu Cawh Lo Changreu Puai a ni hmasa bik ah khan, a zultu kha Jesuh sinah cun an ra i, “Khuazei ah dah Lanhtak Puai Zanriah cu va tiim u ti na kan duh?” tiah an ti. 18 Annih cu, “Khua chung i mipa pakhat sinah va kal u law, kan Sayapa nih, ‘Ka caan a phan cang, ka zultu hna he na inn ah Lanhtak Zanriah ei kan duh,’ a ti tiah va chim u,” tiah a ti hna. 19 A zultu pawl nih khan Jesuh nih a chimh hna bang cun Lanhtak Zanriah cu an timh. 20 Zanlei sang a hung si tikah Jesuh le a zultu hleihnih hna cu rawl ei awkah khan an ṭhu.
nwtsty chung i media
Lanhtak Zanriah
Lanhtak Zanriah caah a herhmi thil cu (1) ro lakin emmi tuufa (a ruh khiah lomi a si lai) (2) thilnu cawh lo changreu (3) a khami an he le (4) mitsur zu an si. (Exo. 12:5,8; Nam. 9:11) A khami an he ah salat, chikori, pepperwort, a hnah kermi anṭam asiloah ram lakah a khomi aihre rong pangpar hna aa tel tiah Mishnah cauk nih a langhter, mah nih Israel miphun Izipt ram ah sal an rak simi kha a hngalhter ṭhan hna. Jesuh nih a tlingmi a minung pum kha thilnu cawh lomi changreu in a langhter. (Matt. 26:26) Lamkaltu Paul zong nih Jesuh kha “kan langhtak puai tuufa” tiah a auh. (1 Kor. 5:7) Kumzabu pakhatnak lioah, mitsur zu cu Lanhtak puai ah hmanmi pakhat a rak si. Jesuh nih mitsur zu kha a thisen in a rak langhter, mah thisen kha raithawinak caah a rak thlet.—Matt. 26:27, 28.
(Matthai 26:26) Zanriah an ei lioah cun Jesuh nih changreu kha a lak i thla a cam dih in a cheu i a zultu kha a pek hna. “I lak u law ei u; hihi ka pum a si,” tiah a ti.
nwtsty chung i hlathlai awk a kong tawi hna—Matt. 26:26
hihi: Grik biafang e·stinʹ (“a si”) timi biafang cu “langhter; hmelchunhnak; aiawh” ti sullam a ngei. Mah lio caan ah a tlingmi Jesuh pum cu an hmai ah a um, cucaah lamkaltu hna nih an ei hnga dingmi cu thilnu telh lo changreu a si ti cu a fiang ko. Cucaah changreu cu Jesuh pum a si tiah a biafang ningin lak khawh a si lo. Matt. 12:7 ah mah he aa lomi Grik biafang a hmanmi cu cinken awk tlak taktak a si, mah biafang kha a dang Baibal lehnak hna nih “hihi” tiah an leh.
(Matthai 26:27, 28) Cun hrai kha a lak i Pathian sinah lawmhnak bia a chim dih in, annih cu a pek hna i, “Nan dihlak in ding u. 28 Hihi ka thi a si, biakam fehternak thisen, sual ngaihthiamnak ca i mi tampi ca i thletmi cu a si.
nwtsty chung i hlathlai awk a kong tawi hna—Matt. 26:28
biakam fehternak thisen: Jehovah le Chiti thuhmi Khrihfa hna kar ah sermi biakamnak thar cu Jesuh raithawinak in fehter a si. (Heb. 8:10) Sinai Tlang ah Israel mi he Nawlbia biakamnak sernak ah Moses cu remnak sertu a si, Jesuh cu biakamnak thar ah remnak sertu a si. (Exo. 24:8; Heb. 9:19-21) Cawtum asiloah meheh thi nih Pathian le Israel miphun kar ah sermi Nawlbia biakamnak kha a fehter, cu bantukin Jesuh thi nih Jehovah le thlaraulei Israel miphun kar ah sermi biakamnak thar kha a fehter. Biakamnak thar cu AD 33, Pentekos ni ah fehter a hung si.—Heb. 9:14, 15.
Thlaraulei Lungvar Hna kha Hlathlai
(Matthai 26:17) Thilnu Cawh Lo Changreu Puai a ni hmasa bik ah khan, a zultu kha Jesuh sinah cun an ra i, “Khuazei ah dah Lanhtak Puai Zanriah cu va tiim u ti na kan duh?” tiah an ti.
nwtsty chung i hlathlai awk a kong tawi hna—Matt. 26:17
Thilnu Cawh Lo Changreu Puai a ni hmasa bik: Thilnu Cawh Lo Changreu Puai cu Lanhtak Puai (Nisan 14) a dih hnu Nisan 15 in aa thawk i ni sarih chung a si. (App. B15-BU ah zoh.) Jesuh chanah puai cu niriat chung aa peh caah a caan ah Nisan 14 kha “Thilnu Cawh Lo Changreu Puai” tiah an ti tawn. Cucaah hika ah a hmanmi “a ni hmasa bik” kha “mah ni a phanh hlan” tiah ti khawh a si. (Johan 1:15, 30 he tahchunh, mah ah a hmanmi “hmasa bik” [proʹtos] le “mah hlan” timi biafang cu a ṭial ning aa khat, cucaah “ka chuah hlan [proʹtos] in amah cu a rak um cang” tiah ti khawh a si.) Cucaah a hrampi Grik biafang le Judah phunglam ningin Jesuh zultu hna nih Nisan 13 ah an rak halnak a si. Lamkaltu pawl nih Nisan 13 chun in Lanhtak puai caah an timh tuah, Lanhtak puai cu Nisan 14 “ni a tlak hnuah” aa thawk lai.—Mar. 14:16, 17.
(Matthai 26:39) Hmailei ah khin tlawmpal a va kal i vawlei ah a bawk i, “Ka Pa, a si khawh ahcun hi hrai hi ka ṭhialpiak ko. Sihmanhsehlaw keimah duhmi cu si hlah seh, nangmah duhmi tu si ko seh,” tiah thla a cam.
nwtsty chung i hlathlai awk a kong tawi hna—Matt. 26:39
hi hrai hi ka ṭhialpiak ko: Baibal ah “hrai” cu Pathian duhnak asiloah mi pakhat “rianpeknak” he aa pehtlai tawn. (nwtsty chung i hlathlai awk a kong tawi hna—Matt. 20:22 ah zoh.) Pathian thang a chiattu in sual an puhmi nih Pathian min a hnorsuan lai ti kha a phan caah a thihnak ni a naih deuh tikah Jesuh cu a lungre a thei tuk. Mah nih Jesuh kha “hi hrai” hi ka ṭhialpiak ko tiah thlacam dingin a forh.
APRIL 9-15
BAIBAL AH THUHMI RO HNA | MATTHAI 27-28
“Va Kal U Law Zultu Ah Va Ser Hna U—Zeicah, Khoika ah le Zeitindah?”
(Matthai 28:18) Jesuh nih cun a hun naih hna i, “Vancung le vawlei cung i a ummi nawl ngeihnak vialte cu pek ka si cang.”
w04-HK 7/1 8 ¶4
‘Va Kal U Law Zultu Ah Va Ser Hna U’
4 Jesuh cu khrihfabu cungah nawl a ngei, 1914 kum thawk khan dirhka te a simi Pathian Pennak cungah nawl a rak ngei cang. (Kolose 1:13; Biathlam 11:15) Amah cu vancung ralkap lu a si i a nuai nuai zaa in a ummi vancungmi hna aa telmi vancung ralkapbu cungah khan nawl a ngei. (1 Thesalon 4:16; 1 Piter 3:22; Biathlam 19:14-16) A Pa nih dinnak phunglam a dotu “thlaraulei uktu hna le nawlngeitu hna le ṭhawnnak vialte kha” hrawhnak nawl a pek. (1 Korin 15:24-26; Efesa 1:20-23) Jesuh nawlngeihnak cu thilnung pawl cung lawngah a si lo. Amah cu “a nungmi he a thimi he an biaceihtu” asi i thihnak i aa hngilhmi hna kha thawhter ṭhan dingah Pathian pekmi ṭhawnnak le nawlngeihnak a ngei. (Lamkaltu 10:42; Johan 5:26-28) Cu tluk in nawl a ngeimi i fialmi kha a biapi bik cem in hmuh ding a si. Cucaah kannih nih ‘va kal u law zultu ah va ser hna u’ ti fialmi kha upat ngai le huam ngaiin kan ngaih.
(Matthai 28:19) Cucaah khuazakip ah va kal u law miphun vialte kha ka zultu ah va ser hna u; Pa le Fapa le Thiang Thlarau min in tipilnak va pe hna u law,”
nwtsty chung i hlathlai awk a kong tawi hna—Matt. 28:19
zultu ah va ser: Grik biafang ma·the·teuʹo cu zultu siter awkah “cawnpiak” ti sullam a ngei. (Matt. 13:52 ah a hmanmi “cawnpiaktu” timi biafang he tahchunh.) “Tipilnak” le “cawnpiaknak” timi biafang nih “zultu ah va ser” ding timi rian ah zeidah aa tel ti kha an langhter.
miphun vialte: “Miphun vialte” tiah a hman ko nain mah nih mi pakhat cio kha a chim duhmi a si, tipilnak va pe hna u timi nih “miphun” kha si loin mi vialte kha a chim duhmi a si. “Miphun vialte” sin kal ding timi nawlpeknak cu a thar a si. Jentail mi hna nih Jehovah an hun biak ahcun Israel mi hna bantuk an si kho ve ti kha Jesuh phungchim rian a thawklei Baibal caang nih a langhter. (1 Siang. 8:41-43) Jesuh nih a zultu hna kha Judah miphun sin lawngah si loin mi vialte sinah phungchim dingin nawl a pek hna, Khrih zultu siternak rian cu vawleicung pumpi dihlak ah ṭuan dingmi a si.—Matt. 10:1, 5-7; Biat. 7:9; hlathlai awk a kong tawi hna—Matt. 24:14 ah zoh.
(Matthai 28:20) Kan fialmi vialte hna hi an zulh nakhnga va cawnpiak hna u. Cun hihi philh hlah u: nan sinah a zungzal in, caan dongh tiangin ka um lai,” tiah a ti hna.
nwtsty chung i hlathlai awk a kong tawi hna—Matt. 28:20
cawnpiak hna u: “Cawnpiak ding” timi Grik biafang ah lamhruainak, fianternak, bia in langhternak le hmelchunhnak peknak hna aa tel. (Hlathlai awk a kong tawi hna—Matt. 3:1; 4:23 ah zoh.) Kan fialmi vialte hna hi an zulh nakhnga va cawnpiak hna u timi Jesuh fialmi rian cu kan ṭuan liomi a si, mah ah a kan cawnpiakmi kong midang cawnpiak, a cawnpiaknak zulh le a nunning i zohchunh aa tel.—Johan 13:17; Efe. 4:21; 1Pet. 2:21.
Thlaraulei Lungvar Hna kha Hlathlai
(Matthai 27:51) Khi tikah Biakinn chung puanzar kha a lu in a taw tiang aa cheu. Vawlei kha aa hnin, lung kha an i cheu i,”
nwtsty chung i hlathlai awk a kong tawi hna—Matt. 27:51
puanzar: Aa dawh tukmi mah puanzar cu biakinn i a Thiang bikmi Hmun le a Thiangmi khaan kar ah zammi a si. A rit ngaimi mah puanzar cu a sau pe 60 (18m), a kauh pe 30 (9m) le a chah lehmah 2.9 (7.4cm) a si tiah Judah phunglam nih a langhter. Puanzar cheu hnih ah aa cheumi nih a Fapa a thattu hna cungah Jehovah a thin a hunmi le vancung nunnak lam aa awnmi kha a langhter.—Heb. 10:19, 20; A Sullam Fianternak ah zoh.
Biakinn: Mah Greek biafang na·osʹ nih a thiangmi le a thiang bikmi khaan aa telmi inn kha a chim duhmi a si.
(Matthai 28:7) Cucaah khulrang in va kal u law a zultu hna kha, ‘Thihnak in thawhter a si cang i atu cu nan hmaiah Galili ram ah a rak kal chung cang; khika ah nan va hmuh lai,’ tiah va chim hna u. Cun kan chimhmi hna hi philh hlah u,” tiah a ti hna.
nwtsty chung i hlathlai awk a kong tawi hna—Matt. 28:7
a zultu hna kha . . . thawhter a si cang . . . tiah va chim hna u: Mah nu hna cu Jesuh a thoṭhan cang timi kong a thei hmasa bikmi an si, mah kong kha a dang zultu pawl chimh ṭhan awk zongah fial an si. (Matt. 28:2, 5, 7) Baibal phunglam he aa ralkahmi Judah phunglam ningin nu pakhat chimmi bia cu biaceihnak zung nih cohlan khawh a si lo. Mah he i ralkah in Jehovah vancungmi nih nu pawl kha a ṭha tukmi rian a pek hnanak thawngin a cawisan hna.
APRIL 16-22
BAIBAL AH THUHMI RO HNA | MARKA 1-2
“Na Sualnak Cu Kaan Ngaihthiam”
(Marka 2:3-5) cu lioah cun mi pali nih a zengmipa pakhat kha an rak zawnh. 4 Asinain mi an tam tuk caah Jesuh sin kha an phakpi kho lo. Cucaah Jesuh cung zawn inncung kha an baoh i mipa cu a ihphah cung i a ih bu khan an vun thlak. 5 Jesuh nih an ka bochan hringhran ti kha a hmuh tikah, “Ka fa, na sualnak cu kaan ngaihthiam,” tiah mizengpa cu a ti.
jy-BU 67 ¶3-5
“Na Sualnak Cu Kaan Ngaihthiam”
Jesuh nih mi tampi umnak khaan i a cawnpiak hna lioah mi pali nih mizengpa pakhat kha ihphah cung a ih buin an rak zawnh. An hawipa kha Jesuh nih damter seh ti an duh. Asinain mi an tam tuk caah “Jesuh sin kha an phakpi kho lo.” (Marka 2:4) Zeitluk in dah an ngaih a chiat lai kha ruathmanh. Inncung ah an kai i inncung cih kha an baoh, cun mizengpa kha inncung in an ṭhumh.
Cu bantukin hnahnawhnak an pek tikah Jesuh cu a thin a hung maw? A hung lo. An zumhnak nih a lung a suk tuk i mizengpa kha hitin a ti: “Na sualnak cu kaan ngaihthiam.” (Matthai 9:2) Asinain Jesuh nih sual ngaihthiam khawhnak nawl a ngei maw? Mah kong he aa tlaiin Phungbia cawnpiaktu hna le Farasi mi hna nih an lung chungin hitin an ti: “Zeitindah hitihin, Pathian ralchanh in bia chim a ngamh hnga? Pathian dah ti lo nih aho nih dah sualnak a ngaihthiam khawh?”—Marka 2:7.
An ruahnak kha a hngalh tikah Jesuh nih hitin a ti hna: “Zeicahdah cu bantuk thil cu nan ruah? Hi mizengpa sinah hin, ‘Na sualnak kaan ngaihthiam,’ ti maw a fawi deuh, ‘Tho tuah, na ihphah kha i put law kal,’ ti dah a fawi deuh?” (Marka 2:8, 9) A caan a phak tikah a pek dingmi raithawinak cungah i hngat in Jesuh nih mi pakhat sualnak ngaihthiam khawhnak nawl a ngei.
(Marka 2:6-12) Khika i a rak ṭhu vemi Phungbia saya a cheukhat hna nih cun, 7 “Zeitindah hitihin, Pathian ralchanh in bia chim a ngamh hnga? Pathian dah ti lo nih aho nih dah sualnak a ngaihthiam khawh?” tiah an lung chungin an ti. 8 A thli tein an lung chung i an ruahmi cu chikkhatte ah Jesuh nih a hngalh i cucaah cun, “Zeicahdah cu bantuk thil cu nan ruah? 9 Hi mizengpa sinah hin, ‘Na sualnak kaan ngaihthiam,’ ti maw a fawi deuh, ‘Tho tuah, na ihphah kha i put law kal,’ ti dah a fawi deuh? 10 Cucaah hmuhsak kan duhmi hna cu, Mi Fapa nih hin vawlei cungah sual ngaihthiamnak nawl a ngei, ti hi a si,” tiah a ti. Cucaah mizengpa cu a thawh i, 11 “Tho tuah, na ihphah kha i lak law va ṭin, kaan ti,” tiah a ti. 12 An dihlak in an zoh ko lioah khan mipa cu a tho i a ihphah cu aa lak i khulrang in a kal. An dihlak in khuaruahhar in ar koin an um i Pathian kha an thangṭhat i, “Hi bantuk thil hi zeitikhmanh ah kan hmu bal lo,” tiah an ti.
nwtsty chung i hlathlai awk a kong tawi hna—Mar. 2:9
Zeidah a fawi deuh: A sual hrimhrim ti a langhtertu thil a um lomi mi pakhat kha na sualnak kaan ngaihthiam tiah ti cu a fawi ko men lai. Asinain Tho tuah . . . kal tiah ti awkah Jesuh nih sual ngaihthiamnak nawl a ngeih kha mi nih an hngalh nakhnga khuaruahhar thil a tuah a hau. Mah kong le Isa. 33:24 nih zawtnak le sualnak aa pehtlaih ning kha a langhter.
Thlaraulei Lungvar Hna kha Hlathlai
(Marka 1:11) Cun van in aw pakhat kha a theih i, “Nangmah cu ka dawtmi ka Fapa na si. Na cungah ka lung a tling ngaingai ko,” tiah aw nih cun a ti.
nwtsty chung i hlathlai awk a kong tawi hna—Mar. 1:11
van in aw pakhat kha a theih: Thawngṭha cauk chung i Jehovah nih minung sinah dairek in bia a chimnak pathum lakah a pakhatnak a si.—Hlathlai awk a kong tawi hna—Mar. 9:7; Joh. 12:28 ah zoh.
Nangmah cu ka dawtmi ka Fapa na si: Vancungmi pakhat in Jesuh cu Pathian fapa a si. (Joh. 3:16) Minung pakhat in hrin a si tikah Jesuh cu a tlingmi Adam bantukin “Pathian Fapa” a si. (Luka 1:35; 3:38) Asinain mahka i Pathian bia nih Jesuh cu ahodah a si ti kha thuk deuh in a langhter. Thiang thlarau a toih i cutin a thanhnak thawngin Jesuh cu van ah kir ṭhan dingin ‘hrin ṭhanmi’ A Fapa ngeihchun a si kha Pathian nih fiang tein a langhter. Cun thiang thlarau in Siangpahrang le Tlangbawi Ngan si awkah chiti a thuhmi a si zong kha a langhter.—Joh. 3:3-6; 6:51; Luk. 1:31-33; Heb. 2:17; 5:1, 4-10; 7:1-3 he tahchunh.
Na cungah ka lung a tling: Asiloah “Na cungah ka lung aa lawm.” Mah he aa khatmi biafang kha Matt. 12:8 ah hmuh khawh a si, Matt. 12:8 cu biakammi Messiah asiloah Khrih kong aa ṭialnak Isa. 42:1 kha a cherhchanhmi a si. Pathian nih thiang thlarau a toih i a fapa kong he aa tlaiin cutin a thanhmi nih Jesuh cu biakammi Messiah a si taktak kha fiang tein a langhter.—Hlathlai awk a kong tawi hna—Matt 3:17; 12:18 ah zoh.
(Marka 2:27, 28) Cun Jesuh nih cun, “Sabbath cu minung caah pei ser a si cu, minung cu sabbath caah ser an si ṭung lo, cucaah Mi Fapa cu sabbath Bawi zong a si,” tiah a ti.
nwtsty chung i hlathlai awk a kong tawi hna—Mar. 2:28
Sabbath Bawi: Jesuh nih amah le amah (Matt. 12:8; Luk. 6:5) kha Sabbath Bawi ka si tiah aa ti, mah nih a Pa fialmi tuah khawh lo awkah Sabbath ni nih a kham kho lo ti kha a langhter. (Johan 5:19; 10:37, 38 he tahchunh.) Sabbath ni ah Jesuh nih khuaruahhar thil a phunphun a rak tuah, mizaw kha a rak damter hna. (Luk. 13:10-13; Johan 5:5-9; 9:1-14) Mah nih sabbath dinhnak bantuk a simi a Pennak tangah lungdaihnak a um lai ti kha fiang tein a langhter.—Heb. 10:1.
APRIL 23-29
BAIBAL AH THUHMI RO HNA | MARKA 3-4
“Sabbath Ni Ah Damternak”
(Marka 3:1, 2) Jesuh cu pumhnak inn ah khan a va kal ṭhan i cuka ah cun a kut a zengmipa pakhat a rak um. Jesuh cu zeitindah sual kan phawt khawh lai ti a bawhmi kha an rak um i cu hna nih cun sabbath ni ah hin aho tal a damter hna lai maw damter lo ti kha ṭha tein an rak ngiat.
jy-BU 78 ¶1-2
Sabbath Ni Ah Zeidah Tuah A Ngah?
Sabbath ni ah Jesuh cu Galili peng i pumhnak inn ah a kal. Cuka ah cun a orhlei kut a zengmipa a rak um. (Luk. 6:6) Phungbia cawnpiaktu saya hna le Farasi mi hna nih Jesuh kha an ngiat. Zeicah? “Sabbath ni ah hin mi damter phung a si maw si lo?” tiah an halmi nih an i tinhnak cu zeidah a si ti kha an langhter.—Matthai 12:10.
Judah biaknaklei hruaitu hna nih Sabbath ni ah cun nunnak ca i ṭih a nun lawngah thlop khawh a si tiah an zumh. Tahchunhnak ah Sabbath ni ah nunnak ca i ṭih a nung tuk lomi ruh a kiakmi asiloah aa ilhmi kha thlop khawh a si lo. Phungbia cawnpiaktu saya hna le Farasi mi hna nih a kut a zengmipa cungah zaangfahnak an ngeih caah cutin an halmi a si lo ti cu a fiang ko. Jesuh kha sualpuh an duh caah a si.
(Marka 3:3, 4) A kut a zengmipa cu Jesuh nih cun a thawh i, “Hmailei ah hin ra chuak tuah,” tiah a ti. Cun mizapi cu a thawh hna i, “Kan Phung nih sabbath ni ah zeidah tuah a kan awnh? Ṭhatnak nan tuah lai, a ti maw ṭhat lonak nan tuah lai, a ti dah?” tiah a ti hna. Sihmanhsehlaw bia kaa khat hmanh an chim lo.
jy-BU 78 ¶3
Sabbath Ni Ah Zeidah Tuah A Ngah?
Asinain Jesuh nih an ruahnak kha a hngalh. Sabbath Ni ah rianṭuan lo ding timi phunglam buarnak kong he aa tlaiin an ruahnak cu Baibal phunglam he aa ralkah ti kha a hngalh. (Exodus 20:8-10) Thilṭha a tuahmi he aa tlaiin sualpuhnak a rak tong bal. Jesuh nih a kut a zengmi pa kha “hmailei ah hin ra chuak tuah” tiah a tinak thawngin mah thil sining kha ralṭha tein a rak tawnghtham.—Marka 3:3.
(Marka 3:5) Cu tlukin an lung a hah le an palh kha a hmuh hna tikah a thin a hung a ngaih a chia i mipa cu a thawh i, “Na kut kha samh,” a ti. A samh i a dam ai!
nwtsty chung i hlathlai awk a kong tawi hna—Mar. 3:5
a thin a hung a ngaih a chia: Jesuh nih biaknaklei hruaitu pawl an lung a hahmi a hmuh hna tik i a lehrulh hna ning kong kha Marka lawng nih a ṭial. (Matt. 12:13; Luk. 6:10) Peter a lung a ranmi le a lung a hnomi cu Jesuh intuarnak langhter ning ruangah a si kho men.—“Marka Biahmaiṭhi” ah zoh.
Thlaraulei Lungvar Hna kha Hlathlai
(Marka 3:29) Sihmanhsehlaw Thiang Thlarau ralchanh in bia ṭhalo a chimmi cu zeitikhmanh ah ngaihthiam khawh an si lai lo, zeicahtiah zungzal in a hmunmi sualnak kha an tuah cang,” tiah a ti.
nwtsty chung i hlathlai awk a kong tawi hna—Mar. 3:29
Thiang Thlarau ralchanh in bia ṭhalo a chimmi: Bia ṭhalo a chimmi timi nih Pathian asiloah thiang thlarau ralchanh in volhpamh, thangchiat le mawhchiat in biachim kha a chim duhmi a si. Thiang Thlarau cu Pathian ṭhawnnak a si caah thiang thlarau ralchanh in bia chim cu Pathian ralchanh he aa khat. Matt. 12:24, 28 le Mar. 3:22 ah a langhter bantukin Judah biaknaklei hruaitu hna nih Jesuh tuahmi khuaruahhar thil ah Pathian thiang thlarau rianṭuannak an hmuh, asinain mah cu Satan, Khuachia ṭhawnnak a si tiah an ti.
zungzal in a hmunmi sualnak: Hramhram in tuahmi sualnak ngaihthiam khawhnak caah zei bantuk raithawinak hmanh um dawh a si lo.—Mah Baibal caang chung i Thiang Thlarau ralchanh in bia ṭhalo a chimmi timi hlathlai awk a kong tawi le hlathlai awk a kong tawi hna—Matt. 12:31 kha zoh.
(Marka 4:26-29) Jesuh nih, “Pathian Pennak cu hi bantuk hi a si: Mipa pakhat nih thlaici kha a lo ah a tuh. Zan ah a it, zing ah a tho i rian a ṭuan i cu chung vialte ah khan thlaici cu an rak keuh i an rak ṭhang, sihmanhsehlaw zeitindah cuticun an si ti kha cu a hngal lo. Vawlei nih khan thlai kheu cu a ṭhanter hna i thei a tlaiter hna, a hmasa bik ah a hnah zimno tete kha an hung chuak, cun an hung vui i an hung zaa. Cun an hung hmin tikah ṭuan caan a cut cang caah a ṭuantupa nih a facang hlehnak fa-ah in a hleh hna,” tiah a ti.
w14-HK 12/15 11 ¶6-8
‘A Sullam kha Na Hngal’ Maw?
6 Mah bianabia in zeidah kan hngalh khawh? Pakhatnak, Baibal kan cawnpiakmi cu zeitluk rang in ṭhangcho seh tiah kanmah nih kan ti kho lo ti kha kan cohlan a hau. A si khawh chungin kan bawmh nain tipil in awkah cun kan hnek bal lai lo. Pathian sinah aa pumpek lai le pumpek lai lo kha amah tein bia a khiah awk a si ti kha toidor tein kan cohlan. Jehovah nih amah kan dawt taktak lawngah kan i pumpeknak kha a cohlan.—Salm 51:12; 54:6; 110:3.
7 Pahnihnak, mah bianabia sullam hngalhthiamnak nih cawnpiaknak rian ah a phichuak kan hmuh colh lo hmanhah lungdongh lo awkah a kan bawmh. Kan lung a sau a hau. (Jeim 5:7, 8) Baibal kan cawnpiakmi kha a si khawh chungin kan bawmh ko nain a lungthin chungah biatak a ṭhan lo ahcun mah cu cawnpiak kan thiam lo tinak a si lo. Jehovah nih thlennak tuah a duhmi, aa toidormi hna lungthin lawngah biatak thlaici kha a ṭhanter. (Matt. 13:23) Cucaah kan phungchimnak hmual a ngei maw, ngei lo timi kha tipil a ingmi pa zeizat an si timi in kan tah awk a si lo. Jehovah zong nih phungchimnak ah kan hlawh a tling maw, tling lo timi kha mi nih an lehrulhning in a tah ve lo. Mah nakcha cun teima tein rian kan ṭuanmi tu kha a sunsak.—Luka 10:17-20; 1 Korin 3:8 rel.
8 Pathumnak, mi pakhat lungthin chungah thlennak a ummi kha kan hmu kho tawn lo. Tahchunhnak ah, missionary unaupa he Baibal a cawngmi nuva hna nih tipil a ing rih lomi thawngthanhtu si kan duh tiah unaupa kha an chimh. Mah tikah unaupa nih kuak zuk nan ngol hmasa a hau tiah a ti hna. Annih nih kan ngolnak thla tam nawn a si cang tiah an ti tikah unaupa cu a khuaruah a har tuk. A thli tein kuak kan zuk hmanhah Jehovah nih a kan hmuh khawh i Jehovah nih i titernak a huat ti kha an hngalh. Cucaah kuak kan zuk ahcun missionary unaupa hmaiah kan zuk lawlaw lai, kan zuk lo ahcun kan ngol lawlaw lai tiah bia an khiak. Mah nuva hna nih thlennak nganpi an tuahmi kha unaupa nih a hngal lo nain Jehovah an dawtnak a ṭhanchomi nih a hmaanmi biakhiahnak tuah awkah a bawmh hna.
APRIL 30–MAY 6
BAIBAL AH THUHMI RO HNA | MARKA 5-6
“Jesuh Cu Kan Dawtmi a Thimi Hna Thawhter Khawhnak Ṭhawnnak a Ngei”
(Marka 5:38) Pumhnak inn uktu inn kha an va phan i Jesuh nih cun an i tuai len ko le an ṭah le an ai kha a hmuh hna,
(Marka 5:39-41) A vung lut i, “Zeicahdah hitihin nan i tuai len ko? Zeicahdah nan ṭah len ko? Ngakchia cu a thih ṭung lo, aa hngilh i pei a si ko cu,” tiah a ti. Annih nih cun a nih in an nih i cucaah an dihlak in a chuahter hna i ngakchianu a nu le a pa le a zultu pathum hna kha aa kalpi hna i ngakchianu an suannak khaan chungah cun an va lut. A kut in a vun tlaih i, “Talitha ko-um,” tiah a ti; cu a sullam cu, “Ngakchianute, tho, kan ti,” tinak a si.
nwtsty chung i hlathlai awk a kong tawi hna—Mar. 5:39
a thih ṭung lo, aa hngilh: Baibal nih thihnak kha i hngilh he a tahchunh tawn. (Salm 13:3; Johan 11:11-14; Lam. 7:60; 1 Kor. 7:39; 15:51; 1 Thes. 4:13) Jesuh nih ngakchianute kha a thawhter ṭhan lai. Thu hluahmah aa hngilhmi pakhat aa hlauh ṭhan bantukin thihnak in a thawhter ṭhan khawh caah cutin a chimmi a si men lai. Ngakchianute a nunter ṭhan khomi Jesuh ṭhawnnak cu “mithi kha a nunter i a um lo mi thil a bia in a um tertu” a Pa sinin a rami a si.—Rom 4:17.
(Marka 5:42) Hmakhatte ah a tho i aa chawk colh. (Amah cu kum hleihnih mi a si). Cu thil an hmuh tikah an khuaruah a har tuk i a molh dengmang hna.
jy-BU 118 ¶6
Ngakchianute A Nung Ṭhan
Mah hlan deuh ah Jesuh nih a damtermi hna kha mah kong chim lo dingin nawl a pek hna. Cu bantukin ngakchianu i a nu le a pa zong kha a ti hna. Asinain ngakchianu i a nu le a pa le midang hna nih mah kong kha “cuka hrawng ram vialte” ah an thanter dih. (Matthai 9:26) Na dawtmi pakhat thihnak in a thawh ṭhanmi na hmuh tikah naa lawmhnak kong kha chim loin na um kho lai maw? Mah cu Jesuh nih mithi a thawhter ṭhannak kong ṭialmi lakah a pahnihnak a si.
Thlaraulei Lungvar Hna kha Hlathlai
(Marka 5:19, 20) Sihmanhsehlaw Jesuh nih a awnh lo. “Inn tu ah va tlung law Bawipa nih zeizat riamruam dah na ca i a tuahmi kha a si le zeitluk in dah an zaangfah kha na chungle kha va chim deuh hna,” tiah a ti. Cucaah mipa cu a kal i Khua Hra peng timi kha a tlawng i Jesuh nih a tuahpiakmi kha a chimh hna; cun a theimi vialte cu an khuaruah a har dih.
nwtsty chung i hlathlai awk a kong tawi hna—Mar. 5:19
va chim deuh hna: Khuaruahhar thil a tuahmi kong chim lo dingin Jesuh nih lamhruainak a pek hna (Mar. 1:44; 3:12; 7:36), mah he i ralkah in mah pa kha cu Jesuh nih a cangmi kong a chungkhar chimh awkah a fial. Mah ruangah Jesuh kha zeihmanh chimnak nawl pe loin cuka hmun in an ṭhawlmi a si kho men; cun vok tampi a sungmi hna nih an chimmi bia ruang zongah a si kho men.
(Marka 6:11) Cun tluninn an in dawnh hna i nan bia an ngaih duh lo ahcun, cuka hmun cu nan kebeh va khawn hnawhtak u law va chuahtak u. Cucu an caah ralrin peknak a si lai,” a ti.
nwtsty chung i hlathlai awk a kong tawi hna—Mar. 6:11
nan kebeh va khawn hnawhtak u: Cu bantukin an tuahmi nih thawngṭha a ngai lomi hna cungah Pathian nih a tlunter dingmi thil cu zultu pawl he aa pehtlai lo ti kha a langhter. Mah he aa khatmi biafang kha Matt. 10:14; Luka 9:5 ah hmuh khawh a si. Marka le Luka nih cun an caah [asiloah “annih kha”] ralrinnak peknak timi biafang kha an telh. Paul le Barnabas nih Pisidian Antiok i an um lio ah mah lamhruainak kha an rak zulh. (Lam. 13:51) Paul nih Korin khua ah a puan i leidip kha a thinhnawh hnanak thawngin cutin a rak tuah ṭhan, cun hitin a ti hna: “Nan loh ahcun nanmah mawhchiat awk nan si ko cang lai. Kei cu mawhchiat awk ka si ti lai lo.” (Lam. 18:6) Mah cu zultu pawl nih an rak tuah lengmangmi a si; Jentail mi hna ram ah khual a tlawngmi, biaknaklei ah aa zuammi Judah mi hna nih Judah ram chung an luh hlanah an phanah i a thiang lomi leidip kha an thin ta men lai. Asinain Jesuh nih a zultu pawl lamhruainak a pek hna tikah mah kha a chimduhmi a si lo ti cu a fiang ko.