CAWN DINGMI 2

Aa Tlak Ningin Bia Chimnak

2 Korin 2:17

A TAWINAK: Na chimmi kong le a ngaitu hna cung i na intuarnak kha langhter. Aa tlak ningin le lungtak tein chim.

Thlacam law ṭha tein i tim. Nangmah kha si loin thawngṭha kha lungthin an pek nakhnga bawmh awkah thlacam. Na chim dingmi kong kha ṭha tein hngalh i zuam. Nangmah bia tein chim. Ca rel bantukin siter hlah.

Baibal asiloah a dang cauk pakhatkhat chungin na rel ahcun na rel dingmi catlangbu kha ṭha tein hngalh i zuam. Mah lawngah nal tein na rel khawh lai. Mi pakhatkhat nih a chimmi kong kha na rel tikah lungtak tein rel. Asinain a hleihluat tuk in rel hlah.
Lungtak tein chim. Mi nih zeicah thawngṭha theih an herh ti kha ruat. Anmah kha lungthin pe hna. Mah tikah phung na chim ning, na hoiher le na mithmai ah lungtak tein na chim ti kha a lang lai.

Aa tlak ningin bia chim ti tikah upatnak ngei loin chim kha a ti duhnak a si lo. Fiang tein le grammar ningin chimnak thawngin thawngṭhabia kha cawisang.
A ngaitu kha zoh hna. Aa tlak ahcun mit tonh in biachim. Phung na chim tikah aa pummi kha a huap in zoh loin pakhat cio kha mit tonh in zoh hna awkah i zuam.