Nunning le Rianṭuannak Tuahchunhnak Cauk caah Cherhchanmi
SEPTEMBER 6-12
BAIBAL AH THUHMI RO HNA | DEUTERONOMI 33-34
“Jehovah I ‘Zungzal Hmunmi Ban’ ah Himnak Kawl”
it-2 51
Jeshurun
Israel mi upatnak min a si. Greek Septuagint i “Jeshurun” timi cu tlaihchannak timi biafang in a rami a si i “dawtmi” ti zongin an leh. “Jeshurun” timi nih Israel mi kha annih cu Jehovah he biakamnak a sermi miphun an si i ding tein um awkah rian an ngei ti kha a hngalhter hna awk a si. (Deut. 33:5, 26; Isa. 44:2) Deuteronomi 32:15 ah Jeshurun timi min kha bia-eng phun in a hman. Israel mi cu Jeshurun timi min ningin nun canah a lung a khongmi, Sertu a hlawmi le Khamhtu zei ah a rel lomi an hung si.
‘Zeizong Vialte Ah A Kan Hnemtu Pathian,’ Jehovah Kha I Bochan
18 Moses nih Israel mi caah thazaang petu le hnemtu a simi hla kha hitin a ṭial: “Zungzal hmunmi Pathian cu na umnak hmun a si i na tangah zungzal hmunmi ban kha an um.” (Deut. 33:27) Profet Samuel zong nih Israel mi kha hitin a ti hna: “BAWIPA nan zulhnak khan pial loin nan lungthin dihlak in BAWIPA rian kha ṭuan tuah u; . . . a min ngan ruangah hin, BAWIPA nih a mi cu aan hlonh hna lai lo.” (1 Sam. 12:20-22) Jehovah kha zumhfek tein kan biak chung paoh cu zeitikhmanh ah a kan hlaw lai lo. Bawmh kan herh tik paohah a kan bawmh zungzal lai.
Tlikzuamnak Ah Inkhawhnak He Tli
16 Moses zong Abraham bantukin a nun chungah Pathian biakam a tlin a rak hmu ve lo. Israel mi Biakammi Ram an luh lai ah Pathian nih Moses kha hitin a ti: “Na hmai i ram cu na hmuh lai; sihmanhsehlaw khika ah, Israel mi ka pekmi hna ram chungah cun na lut lai lo.” Zeicahtiah Aaron le Moses cu doh hmangmi Israel mi ruangah an thin a hung i ‘Merbath-kadesh ti ah khan, Israel mi hna lakah Pathian an hmaizah lo’ caah a si. (Deut. 32:51, 52) Cu tikah Moses cu lungdong le thinhung in a um maw? A um lo. Mah kha Israel mi thluachuah a pekmi hna ah kan hmuh. Hitin a bia a donghter: “Maw, Israel, na van a ṭha ko! Nangmah bantuk ahodah a um? BAWIPA nih a khamhmi na si, Amah cu aan hupphengtu phaw le teinak vainam a si!”—Deut. 33:29.
Thlaraulei Lungvar Hna
it-2 439 ¶3
Moses
Moses cu a thih ah kum 120 a si. A thazaang he aa tlaiin Baibal nih “a mit a mui lo i a thazaang zong a ṭum lo” tiah a ti. Jehovah nih a vuinak hmun cu zeitikhmanh ah hngalh a si lo. (Deut. 34:5-7) Mah cu Israel mi nih a thlan ah biaknak hmunthiang ser in a hmaan lomi biaknak rap ah an tlak nakhnga lo kilvennak caah a si men lai. Satan nih Moses ruak kha cu bantuk tinhnak caah hmang hna seh ti a duh kha Jesuh Khrih i a nau, zultu Judas nih hitin a langhter: “Vancungmi lak i upa bik Mikhael hmanh, cu bantuk cun a um lo. Moses ruak cu aho nih dah a co lai, ti i Khuachia he an i al lioah khan, Mikhael nih cun Khuachia kha serhsat in sual a phaw ngam lo. ‘Bawipa nih aan sik,’ ti tu in a ti.” (Judas 9) Joshua hruainak in Kanaan ram an luh hlanah Israel mi nih Moses cu ni 30 chung an ṭah.—Deut. 34:8.
SEPTEMBER 13-19
BAIBAL AH THUHMI RO HNA | JOSHUA 1-2
“Na Lam Tluanter Khawh Ning”
Jehovah Cu Na Sinah A Um Caah Ralṭha Tein Um!
7 Pathian duhnak tuahnak caah a herhmi ralṭhatnak ngeih awkah Baibal hlathlai le mah ningin nun a hau. Mah cu Joshua nih Moses rian a rak chaan lioah Jehovah nih tuah a fialmi a si. Hitin a fial: “Moses ka sal nih nawl aan pekmi phungbia vialte ningin ralring tein tuah awkah, a ṭhawn bel ṭhawng ngai le ralṭha ngaiin um ko; . . . Hi phungbia cauk nih hin na kaa kha chuahtak hlah seh; sihmanhsehlaw a chungah aa ṭialmi vialte ningin tuah awkah ralring tein na um nakhnga, chun zan in mah cucu na ruat lai; zeitintiah khi tikah na lam kha na tluanter lai i khi tikah khua awng na tong lai.” (Josh. 1:7, 8) Mah ruahnak cheuhnak kha a zulh caah Joshua cu a lam a tluang. Cutin kan tuah ve ahcun Pathian rianṭuannak ah kan ral a ṭha deuh lai i kan lam a tluang lai.
Jehovah Cu Na Sinah A Um Caah Ralṭha Tein Um!
20 Hi chan ṭhalo ah Pathian duhnak tuah cu a zungzal cun a fawi lo. Asinain kanmah lawng kan si lo, kan sinah Pathian a um. Khrihfabu Lu a simi a Fapa zong nih a kan bawmh ve. Cun vawlei pumpi ah zumtu unau 7,000,000 leng zong an um. Cucaah kan dihlak in zumhnak langhter u sih law thawngṭha kha chim zungzal u sih. Cutin tuah awkah “ṭhawng ngai le ralṭha ngaiin um ko. . . . BAWIPA na Pathian cu . . . na sinah a um ko” timi 2013 kumcaang Baibal nih a kan bawmh lai.—Josh. 1:9.
Thlaraulei Lungvar Hna
“Ralṭha Ngaiin Um Law Ṭuan Tuah”
7 Ralṭhatnak a langhtermi a dang pakhat cu Rahab a si. Jeriko khua i a inn ah Israel mi ngiatu pawl an rat tikah ṭihnak ngei in a ṭhawl khawh hna. Asinain Jehovah kha a zumh caah mi ngiatu pahnih kha ralṭha tein a thuh hna i him tein an luat khawh nakhnga a bawmh hna. (Josh. 2:4, 5, 9, 12-16) Rahab nih Jehovah cu a hmaanmi Pathian a si i an ram hi Israel mi a pek hna lai ti kha a zumh. Jeriko siangpahrang le a mi pawl telin midang kha a ṭih hna lo. Amah le a chungkhar khamh an si nakhnga ralṭha ngaiin rian a rak ṭuan.—Josh. 6:22, 23.
SEPTEMBER 20-26
BAIBAL AH THUHMI RO HNA | JOSHUA 3-5
“Zumhnak Tuahsernak Kha Jehovah Nih Thluachuah A Pek”
it-2 105
Jordan
Galilee Rili i a tanglei Jordan tiva cu buaktlak in a thuh hi 1 in 3 m (pe 3 in 10) a si i a kauh hi 27 in 30 m (pe 90 in 100) hrawng a si. Asinain ṭhal thawkka ah Jordan tiva cu a liam i voidang nakin a kau deuh i a thuk deuh tawn. (Josh. 3:15) Ti a lianh lioah Jordan tiva tan ding cu Israel mi pa, nu le ngakchia caah ṭih a nung, a hleiin Jeriko khua pawngin tan cu ṭih a nung. Tiluan cu a hrat tuk caah mi a fenh lengmang hna. Asinain Israel mi nih lei ro in an tan khawh nakhnga Jehovah nih khuaruahhar lam in Jordan tiva kha a kham. (Josh. 3:14-17) Kumzabu tampi hnuah Elijah le Elisha caah voikhat, cun Elisha ca lawngah voikhat ti in cu bantuk khuaruahhar thil a rak um.—2 Si. 2:7, 8, 13, 14.
Jehovah Nawlbia Nih Na Lung In Lawmhter Seh
17 Kan zumhnak kan langhtermi nih Jehovah kan i bochannak kha zeitindah a fehter? Israel mi Biakammi Ram i an luh laiah a cangmi thil kha ruathmanh. Jehovah nih biakamnak kuang a putu tlangbawi pawl kha Jordan Tiva tan awkah nawl a pek hna. Asinain tiva an naih thluahmah tikah ṭhal ruah ruangah ti cu a ngan tuk i a ti luan a hrat tuk kha an hmuh. Israel mi nih zeidah an tuah? Tiva kam ah riahhmun khuar in ti a ṭum lai kha zarh tam nawn asiloah mahnak sau an hngak maw? An hngak lo, Jehovah kha an i bochan i a lamhruainak kha an zulh. Zeidah a cang? “Tlangbawi hna ke cu ti chungah aa hnei tikah cunglei in a rungmi ti kha an dir” tiah Baibal nih a ti. ‘Cun Israel mi vialte nih lei ro cung in an tan lioah tlangbawi hna cu lei ro cungah an dir.’ (Josh. 3:12-17) A ti luan a hrat tukmi tiva, a luan ti lomi an hmuh tikah Israel mi cu zeitluk in dah an i nuamh lai. Jehovah lamhruainak an zulh caah Jehovah an i bochannak cu a fek chin.
Jehovah Nawlbia Nih Na Lung In Lawmhter Seh
18 Jehovah nih tuchan a salle caah cu bantuk khuaruahhar thil a tuah ti lo ti cu a hmaan ko. Asinain kan zumhnak kan langhter tik le a lamhruainak kan zulh tikah thluachuah a kan pek ve. A thiang thlarau nih vawleicung pumpi ah Pennak kong kan chim khawh nakhnga ralṭhatnak a kan pek. Cun Jehovah i a hmasa bik tehte a simi Jesuh Khrih nih a zultu pawl kha phungchim rian nan ṭuan tikah kaan bawmh hna lai tiah bia a kamh hna. Hitin a ti hna: “Khuazakip ah va kal u law miphun vialte kha ka zultu ah va ser hna u; . . . nan sinah a zungzal in, caan dongh tiangin ka um lai.” (Matt. 28:19, 20) A ningzah a pangmi le phung a chim ngam lomi unau tampi nih lohmun ah mising sin phungchim khawh awkah Pathian thiang thlarau nih ralṭhatnak a kan pek tiah an chim.—Salm 119:46; 2 Korin 4:7 rel.
Thlaraulei Lungvar Hna
Joshua Cauk Chungin Hrilhfiah
5:14, 15—“BAWIPA ralkapbu hruaitu” cu ahodah a si? Biakammi Ram an lak hlanah Joshua a rak bawmmi ralkapbu hruaitu vancungmi cu “Bia” tiah auhmi Jesuh Khrih minung pum in a rat hlan kha a si. (Johan 1:1; Daniel 10:13) Tuchan i thlaraulei raldohnak ah Pathian miphun he sunparnak in a khatmi Jesuh Khrih a um ve timi aamahkhannak kan ngeihmi cu thazaang petu taktak a si.
SEPTEMBER 27–OCTOBER 3
BAIBAL AH THUHMI RO HNA | JOSHUA 6-7
“Santlai Lomi Thil Kha Hrial Hna”
Santlai Lomi Thil Kha Nan Mit Nih Mertak Seh!
5 Kumzabu tampi a rauh hnuah, Israel miphun Akhan cu a mit nih Jeriko khua in lakmi thilri cheukhat fir awkah a lem. Jehovah chawva ca timi thilri dah ti lo cu Jeriko khua thilri a zapi in nan hrawh awk a si tiah Pathian nih nawl a pek cang hna. “Hrawh awkah pekchanh ciami thil kha nannih nih nan ulh hna lai, cuti a si lo ahcun, nannih nih . . . thil pakhatkhat kha nan lak sual hnga” tiah Israel mi kha ralrin a pek hna. Akhan nawl a ngaih lo caah Israel mi nih Ai khua an tuk tikah an sung i a cheu cu an thi. Phuan a si hnu lawngah Akhan nih thil a fir kha a chim. Thilri cheukhat kha “ka hmuh hna tikah . . . ka mit an thi i ka lak hna” tiah Akhan nih a ti. A hmuhmi duhnak nih amah he, “a ngeihmi vialte” he rawhnak a phakpi. (Josh. 6:18, 19; 7:1-26) Akhan nih thlauhmi thil kha a lungchung in a duh.
w97 8/15 28 ¶2
Ṭhatlonak kha Zeicah Phuan a Herh?
Thil ṭhalo phuan a sinak a ruang pakhat cu Khrihfabu thiannak kilvennak caah a si. Jehovah cu a thiangmi Pathian a si. Amah a biami vialte kha ziazalei le thlaraulei ah thian dingin a hal hna. Baibal nih hitin ralrin a kan pek: “Pathian nawl kha ngai u, nan rak hruh lio i nan rak ngeihmi duhnak nih khan nan ziaza cu in uk ti hna hlah seh. Nannih aan kotu hna Pathian cu a thian bantukin nannih zong thiang tein nung ve u. Cathiang nih, ‘Keimah ka thian caah nannih zong nan thian ve awk a si,’ a ti.” (1 Peter 1:14-16) A thiang lomi le a ṭha lomi thil a tuahmi kha chimhhrinh asiloah hloh lo ahcun Khrihfabu dihlak a thurter khawh i Jehovah mithmai ṭha zong a sunghter khawh.—Joshua, dal 7 he tahchunh.
Santlai Lomi Thil Kha Nan Mit Nih Mertak Seh!
8 A hmaanmi Khrihfa zong mit zoh duhmi thil le pumsa duhnak nih a hnorsuan khawh hna. Cucaah Baibal nih kan zohmi thil le kan duhmi thil kongah mah le mah i cawnpiak awk a kan forh. (1 Kor. 9:25, 27; 1 Johan 2:15-17 rel.) Miding Job nih zohmi le duhmi aa pehtlaih tuk kha a cohlan. Hitin a chim: “Ka mit kha, ngaknu na ngia hrimhrim lai lo, tiah ka ti.” (Job 31:1) Nu kha lung thur in tawngh lawng hrial loin cu bantuk thil ruahnak nawl zong aa pe lo. “Ahohmanh nih nu kha sual duhnak lungthin he a zoh [“peng,” NW] ahcun, cu pa cu a lung chungin a sual cang” tiah Jesuh nih a ti tikah lungthin cu ziaza ṭhalo ruat loin a thian awk a si kha a langhter khunmi a si.—Matt. 5:28.
Thlaraulei Lungvar Hna
Careltu Hna Sinin Biahalnak
Hlanlio chan ah ralkap pawl nih khua pakhat kha doh an timh tikah an kulh hmasa tawn. Cutin an kulh tikah khua mi hna cu khua chungah an khonmi rawl lawng an ei caah caan saupi an kulh hna ahcun an rawl a dih thluahmah. A hnuah ralkap nih khua an lak tikah a tangmi rawl ti bantuk telin an duhmi zeithil paoh an lak. Cucaah cutin doh a rak simi Palestine khua rawk hna an hmuh tikah a tangmi rawl a um lo ti awk tluk a si. Asinain Jeriko khua rawk tu cu aa thleidang. Journal pakhat (Biblical Archaeology Review) nih hitin a chim: “A rawkmi thil hna lakah tlak in sermi thilri hna le facang hi a tam bik hmuhmi an si. . . . Hi tluk tam in facang hmuh a simi cu khuaruahhar a si.”
Jeriko khua in zei thil hmanh nan i lak lai lo tiah Israel mi kha Jehovah nih nawl a pek hna caah zei rawl hmanh an la lo tiah Baibal nih a ti. (Josh. 6:17, 18) Mah lengah rawlṭuan caan a dihka, khua chungah rawl tampi an khon caan a simi ṭhal aa thawkka ah Jeriko khua kha Israel mi nih an lak tiah Baibal nih a ti. (Josh. 3:15-17; 5:10) Cucaah Jeriko khua ah rawl tampi a taan rihmi nih Baibal chimmi ningin khua cu caan tawite chung lawng kulh a si ti kha a langhter.
OCTOBER 4-10
BAIBAL AH THUHMI RO HNA | JOSHUA 8-9
“Gibeon Mi Hna Sinin Cawn Khawhmi”
Duhdanhnak A Ngei Lomi Kan Pathian Kha Zohchunh
5 Cun Israel miphun cu tiva kam i nelrawn hna in tlanglei ah an kai. Jehovah lamhruainak bantukin Joshua cu Ai khua kha a rak tuk. (Joshua, angan 8) A changmi ral sunghnak thawngpang hna hruangah Kanaan singpahrang tampi cu ral doh awk an rak i pumh. (Joshua 9:1, 2) Asinain Hivite khua pawngkam i Gibeon khuami hna cu phundang in an rak leh. “Annih nih cun zer ngaiin an tuah” tiah Joshua 9:4 nih a ti. Rahab bantukin Jehovah nih a miphun kha Izipt ram in a chuah hna i Sihon le Og hna kha an tei tiah a rak theih. (Joshua 9:6-10) Dohdalnak cu pakpalawng a si ti kha Gibeon khuami hna nih an hngalh. Cucaah, Gibeon le pawngkam i Chephirah, Beeroth, Kiriath-jearim khua hna caah Gilgal khua i Joshua sinah ram hlapi in a rami bantuk ah a cangmi mibu pakhat kha an rak thlah. An hlennak cu hlawh a rak tling. Luatter nan si lai tiah Joshua nih biakamnak a rak tuah. Nithum a luan hnuah hlen kan si ti kha Joshua le Israel miphun nih an rak hngalh. Zeitin a si ah, Jehovah min in chiatser in biakamnak an tuah bangin an rak tuah. (Joshua 9:16-19) Jehovah nih a lung a tlingpi hna maw?
“Nangmah Fimnak Kha I Rinh Hlah”
14 Hmuhtonnak tam a ngeimi Khrihfa upa telin kan zapi in mitlinglo kan si caah biakhiahnak tuah tikah Jehovah lamhruainak kan hal a hau. Moses rian a changtu Joshua le Israel mi upa pawl kong hi ruathmanh. Gibeon khuami cu lam naite ah an um ko nain lam hlapi i a ummi bantukin an sinah an ra i remnak ser an i zuam. Cu tikah Joshua le Israel mi upa pawl nih Jehovah hal hmasa loin Gibeon khuami hna he remnak biakamnak an tuah. An biakamnak kha Jehovah nih a hrawk lo nain Joshua le Israel mi upa pawl nih a lamhruainak an hal lonak kong Baibal ah a khumh. Mah cu biakhiahnak tuah hlanah Jehovah hal hmasa ding a si ti kan hngalh nakhnga caah a si.—Josh. 9:3-6, 14, 15.
“Ram Hi A Pumpi In Ṭol Tuah”
14 Mah lamkal hna nih khan “Bawipa [“Jehovah,” NW] na Pathian min ruangah ram hlatpi in na sal hna hi kan ra” tiah an rak ti. (Joshua 9:3-9) An hnipuan le an i kenmi an rawl nih ram hlatpi in a rak rami a lawhter hna nain, a ngaingai ti ahcun Gibeon cu Gilgal in meng 20 hrawng lawng a hla. Joshua le hruaitu hna nih Gibeon khua le a pawng khua hna he hawikomhnak tuah tiang in an rak zumh hna. Gibeon khuami hna nih thahnak luatnak ca men ah an rak hlenmi hna a si maw? Cutin si loin, Israel Pathian mithmai ṭha hmuh an duhnak kha an rak langhter. Cu tikah “Bawipa [“Jehovah,” NW] biakṭheng caah annih cu nihin ni tiang in thing hlamtu le ti thantu” sinak nawl pek awkah Jehovah cu a hna a rak tla. (Joshua 9:11-27) Gibeon mi hna nih Jehovah rian ah a nautami rian hna kha ṭuan duhnak lungthin an rak langhter peng. Babilon in a rak kir i rak sak ṭhanmi biakinn i rianṭuantu hna chungah annih lak i a cheu cu an rak i tel lai. (Ezra 2:1, 2, 43-54; 8:20) Pathian he remnak hmunh awk i zuamnak in le, nautami rian hmanh hei si ko seh a rian ṭuan kan duhnak thawngin an lungput ning kha kan i zohchunh khawh hna.
Thlaraulei Lungvar Hna
it-1 1030
Thlainak
Israel mi sin Jehovah pekmi nawlbia ah thihnak tlak sualnak a tuahmi cu thah a si hnuah mipi hmuhnak hmun ah “Pathian chiatserhmi” in thingkung cungah thlai a si. Mah cu ralrin peknak caah a si. Mithi ruak cu zan a phanh hlanah ṭhumh in phum a si lai. Pathian nih Israel mi a pekmi hna ram thurhhnomh a si nakhnga lo zan khuazei thingkung cungah thlai a si lai lo. (Deut. 21:22, 23) Israel mi nih mah phunglam hi Israel miphun a si lomi pakhatkhat thah a si tik zongah an zulh.—Josh. 8:29; 10:26, 27.
OCTOBER 11-17
BAIBAL AH THUHMI RO HNA | JOSHUA 10-11
“Jehovah cu Israel mi caah Ral a Do”
it-1 50
Adoni-zedek
Anih cu Israel mi nih Biakammi Ram an lak lio caan i Jerusalem siangpahrang a si. Adoni-zedek cu Joshua doh awkah aa zuammi Jordan Nitlaklei i pennak hmetete hna he a ṭangṭi. (Josh. 9:1-3) Asinain Gibeon khua ah a ummi Hiv miphun hna nih Joshua he remnak an ser. A ral he remnak a sermi Gibeon mi kha doh awkah Adoni-zedek nih a ralkap kha Amor mi siangpahrang pali ralkap he a fonh hna i Gibeon khua kha a rak kulh. Joshua nih khuaruahhar lam in Gibeon mi kha a rak khamh hna i a ṭangṭimi ralkap pawl kha a ṭhenṭhek dih hna caah siangpahrang panga cu Makkedah ah an zam. Cuka i lungkua chungah tlaih an rak si. Joshua theng nih Adoni-zedek le a dang siangpahrang pali kha a ralkap hna hmaiah a rak thah hna i thingkung cungah a rak thlai hna. An ruak kha an i thuhnak lungkua chungah a rak hlonh hna, mah lungkua cu an thlan ah a hung cang.—Josh. 10:1-27.
it-1 1020
Rial
Jehovah nih a hmanmi. Rial cu Jehovah nih a bia tlinter awk le a liannganmi a ṭhawnnak langhter awkah a hman tawnmi a si. (Salm 148:1, 8; Isa. 30:30) Baibal ah a voikhatnak a langhtermi cu hlanlio Izipt mi hna cungah a tlungmi rai pasarihnak kha a si. Mah rial nih tisik an-hnah le thingkung kha a hrawh dih hna i leng ah a ummi minung le saram kha a thah dih hna, asinain Goshen ah a ummi Israel mi cungah cun a tlung lo. (Ex. 9:18-26; Salm 78:47, 48; 105:32, 33) A hnuah Biakammi ram ah Joshua hruaimi Israel mi nih Amor siangpahrang panga tlerhkhonhnak a tongmi Gibeon mi an bawmh hna lioah Jehovah nih rial nganpipi hmangin Amor mi kha a rak doh hna. Mah lioah Israel mi nih an thahmi hna nakin rial in a thimi cu an tam deuh.—Josh. 10:3-7, 11.
Joshua Cauk Chungin Hrilhfiah
10:13—Mah khuaruahhar thil cu zeitindah a si khawh? Van le vawlei a Sertu “BAWIPA caah hin zeithil paoh hi a har tukmi a um maw?” (Genesis 18:14) Jehovah nih a duh ahcun vawleicung in a zohtu pakhat caah nika le thlapa kha aa thawn ti lomi a lawh nakhnga vawlei aa helning kha a thlen khawh. Asiloah nika le thlapa kha a kal tawn ningin a kal lioah nika le thlapa ceunak kha lam khatkhat in a pialter khawh i mah ceunak inn pahnih in ceunak a chuahter khawh rih. Zeitin a si hmanhah minung tuanbia ah “cu bantuk ni . . . cu hlanah siseh, cu hnuah siseh a um bal lo.”—Joshua 10:14.
Thlaraulei Lungvar Hna
w09 3/15 32 ¶5
Careltu hna Sinin Biahalnak
Cauk cheukhat kha Baibal ah a langhter, mah cauk hna kha cherhchan a lak caah thawchuah hnawhmi an si tiah kan ti kho lo. Asinain Jehovah Pathian nih “Pathian bia” ah aa telmi ṭialmi vialte kha a kilven i “zungzal in a hmun” lai. (Isa. 40:8) A si ko, kan hmuhmi Baibal uk 66 ah tel dingin Jehovah nih a thimmi cu “thil ṭha phun zakip tuah khawh awkah thilthuam tling tein a ngeimi” si awkah kan herhmi zat a si.—2 Tim. 3:16, 17.
OCTOBER 18-24
BAIBAL AH THUHMI RO HNA | JOSHUA 12-14
“Lungthin Dihlak In Jehovah Kha Zul”
Joshua Cauk Chungin Hrilhfiah
14:10-13. Kaleb cu kum 85 a si cang ko nain Hebron mi hna ṭhawl ding timi, a harmi rian ṭuan dingin hal a rak si. Cuka hmun ah hawi hleiin a sang i a pumrua a nganmi, Anak miphun an um. Jehovah bawmhnak thawngin hmuhtonnak tampi a ngeimi ralkap, Kaleb nih Hebron kha a rak lak i a hnuah dornak khua a hung si. (Joshua 15:13-19; 21:11-13) Kannih zong a harmi theocratic rian pek kan si tikah kan al awk a si lo ti kha Kaleb kong nih a kan cawnpiak.
Zumhnak Le Pathian Ṭihnak Thawngin Ralṭhatnak
11 Cu bantuk zumhnak cu a thimi a si lo. Biatak ningin nunnak, mah i a ṭhatnak kha ‘kawlnak,’ kan thlacamnak leh a si hngalhnak le kan nunnak ah lam tampi in Jehovah lamhruainak kan hmuhnak thawngin kan zumhnak a ṭhangcho. (Salm 34:8; 1 Johan 5:14, 15) Joshua le Kaleb nih Pathian a ṭhatnak kha an kawl caah an zumhnak a rak fek ti cu fiang tein kan zumh khawh. (Joshua 23:14) Hi hna hi ruathmanh: Ramcar ah kum 40 chung an vaih hnuah Pathian biakam bangin an rak nung rih. (Nambar 14:27-30; 32:11, 12) Kum ruk chung Kanaan mi hna dohnak le teinak ah thatho ngaiin an i tel. A donghnak ah, ngandam in caan saupi an nun lengah ram chung i an covo hmanh kha an rak hmuh. Jehovah nih zumhnak le ralṭhatnak in amah a biami hna kha laksawng tampi a pek taktak hna!—Joshua 14:6, 9-14; 19:49, 50; 24:29.
Thlaraulei Lungvar Hna
it-1 902-903
Gebal
Joshua chan ah Israel mi nih an lak dingmi ram hna lakah Jehovah nih “Gebal mi hna ram” zong a rak telh. (Josh. 13:1-5) Gebal khua cu Israel Chaklei (Dan Chaklei km 100 [meng 60] hrawng) ah a ummi a si i Israel mi uknak tangah rak um bal dawh a si lo caah soiseltu hna nih mah cu aa tlak lo tiah an ti. Baibal lei mifim cheukhat nih Hebru Baibal i mah cacaang cu a palh, a tak ti ahcun ‘Lebanon pawng tlangram’ asiloah ‘Gebal ramri tiang’ tiin ti ding a si tiah an ruah. Asinain Joshua 13:2-7 i Jehovah biakam cu a nawl an ngai maw, ngai lo timi cungah aa hngat ti zong kha kan i cinken awk a si. Cucaah Israel mi nih nawl an rak ngaih lo caah Gebal mi hna ram cu an co bal men lai lo.—Josh. 23:12, 13 he tahchunh.
OCTOBER 25-31
BAIBAL AH THUHMI RO HNA | JOSHUA 15-17
“A Sunglawi Tukmi Na Ro Kha Kilveng”
it-1 1083 ¶3
Hebron
Israel mi nih Kanaan thlanglei ram hna an doh thluahmah lioah an siangpahrang (Hoham a changtu) i telin Hebron ah a ummi vialte cu hrawh dih cikcek an si. (Josh. 10:36, 37) Asinain Joshua hruaimi Israel mi nih Kanaan mi hna ṭhawnnak kha an hrawh ko nain teinak an hmuhmi kha kilven awkah khua vengtu ralkap chiah colh dawh an si lo. Cucaah khua dang an doh lioah Anak mi nih Hebron ah anmah tein khua kha an dirh ṭhan caah a hnuah Kaleb (asiloah Kaleb hruainak tangah a ummi Judah fapa hna) nih Hebron khua kha a lak ṭhan a hau. (Josh. 11:21-23; 14:12-15; 15:13, 14; Biac. 1:10) A hramthawk ah Judah mi Kaleb nih a comi Hebron cu a hnuah dornak khua pakhat in a thiangmi hmun ah ser a si. Cun tlangbawi khua zongin ser a si. Asinain “[Hebron] khuapi pawng lo hna” le a khuate hna cu Kaleb kha a covo caah an pek.—Josh. 14:13, 14; 20:7; 21:9-13.
it-1 848
Hnekmi Rian
“Hnekmi rian” (Heb., mas) timi biafang cu Baibal chan ah teinak a hmumi hna nih sal in an tlaihmi hna he aa tlaiin an hman tawnmi a si. (Deut. 20:11; Josh. 16:10; 17:13; Esther 10:1; Isa. 31:8; Ṭah. 1:1) Izipt bawi pawl nih Israel mi kha sal in hnekmi rian kha an ṭuanter hna i an hrem hna, cun rawl khonnak khua Pithom le Rameses kha an sakter hna. (Ex. 1:11-14) Biakammi Ram i an luh tikah cuka ram i a ummi Kanaan mi vialte dawi dih ding le hrawh dih ding timi Jehovah nawlbia kha zul loin sal rian an ṭuanter hna. Mah ruangah Israel mi cu a hmaan lomi biaknak huham nih a iap hna. (Josh. 16:10; Biac. 1:28; 2:3, 11, 12) Siangpahrang Solomon nih hnekmi rianṭuantu salbu ah a sermi Kanaan mi hna ah Amor mi, Hit mi, Periz mi, Hiv mi le Jebus mi hna an i tel.—1 Si. 9:20, 21.
it-1 402 ¶3
Kanaan
Kanaan mi tampi cu Israel mi sinin an luat i an kuttang ah an um lo nain “Bawipa nih Israel mi cu an pupa hna sinah pek awk in chiat a sermi ram vialte kha a pek hna,” “a kenkip ah dinhnak a pek hna” i “Bawipa nih Israel chungle hna sinah biakamnak ṭha a sermi vialte lakah khan pakhat hmanh pakpalawng ah a cangmi a um lo; an dihlak tein a tling dih” tiah ti khawh a si. (Josh. 21:43-45) Israel mi pawngkam ah a ummi, ral pawl cu an himnak he aa tlaiin tlerhkhonh an si lo. Pathian nih ram cu a lawn i saram an tam tuk sual nakhnga lo “tlawmtete, tlawmtete” in Kanaan mi kha ka ṭhawl hna lai tiah a rak ti. (Ex. 23:29, 30; Deut. 7:22) Kanaan mi cu thir rangleng i telin raldohnak hriamnam tampi a ngeimi an si ko nain Israel mi nih hmun cheukhat an lak khawh lomi cu Jehovah nih a biakam a tlinter lo caah a si tiah mawhchiat khawh a si lo. (Josh. 17:16-18; Biac. 4:13) Baibal nih Israel mi an sunghnak cu anmah zumhfek tein an um lo ruangah a si ti kha a langhter.—Nam. 14:44, 45; Josh. 7:1-12.
Thlaraulei Lungvar Hna
Na Hngal Maw?
Hlanlio Israel ram ah thingkung tampi a um tiin Baibal nih a langhter maw?
BAIBAL nih Biakammi Ram i hmun cheukhat ah thingkung ‘a tampi’ ti in a langhter. (1 Si. 10:27; Josh. 17:15, 18) Asinain tuchan ah cuka hmun cu ram pon in hmuh a si caah cutin a rak si kho hnga maw tiah lunghrinnak a um kho.
Cauk pakhat (Life in Biblical Israel) nih “hlanlio Israel ram i a ummi tupi cu tuchan i a ummi nakin a kau deuh tuk” tiah a ti. Tlangram hna ah a bik in Aleppo far kung (Pinus halepensis), kuh thing a hring zungzalmi (Quercus calliprinos) le terebinth (Pistacia palaestina) ti bantukin an khat. Tlang le Mediterranean Rilikam kar i a ummi tlanghram hna i telin Shefelah hmun ah saikamor kung (Ficus sycomorus) hna tampi a um.
Cauk pakhat (Plants of the Bible) nih Israel ram i hmun cheukhat ah atu cu thingkung vialte an kong dih cang a ti. Mah kha zeinihdah a langhter? Mah cauk nih hitin a ti: “Mi nih an lo le an saṭil pawl tlonnak hmun kauh chap awk, innsaknak ca le mei caah a herhmi thil hna hmuh awkah thingram pawl kha an hrawh.”