Qual’hè chì hè à l’inìziu di i Testimoni di Ghjehova ?

A stòria oghjinca di i Testimoni di Ghjehova hà principiatu à a fine di u sèculu XIX, vicinu à Pittsburgh, in Pennsylvania (Stati-Uniti). Una manata di cristiani s’hè messa à studià a Bìbbia di modu mitòdicu è senza idee precuncette. Anu messu à paru i dogmi di e chjese cù ciò chì a Bìbbia insegna in veru. Ciò ch’elli amparàvanu, u publicàvanu indè libri, ghjurnali è a revista chjamata oghje A Torra Sentinella annunzia u Regnu di Ghjehova.

Unu di ssi Studienti di a Bìbbia — nome chì s’era datu ssa manata di cristiani — era Charles Russell. Russell hà avutu una parte maiò ind’a diffusione di u missaghju bìblicu, è ghjè statu u primu capuredattore di A Torra Sentinella. Però, ùn hà micca iniziatu una nova religione. U scopu chì ricercàvanu Russell è l’altri Studienti di a Bìbbia era di fà cunnosce l’insignamenti di Ghjesù è d’esse fidi à e pràtiche di l’accultina cristiana di u sèculu unu. Ghjè Ghjesù chì hè à l’inìziu di u cristianìsimu, per noi ghjè ellu chì hè à l’inìziu di a nostra fede (Culussesi 1:18-20).