Ezekyel

18 Zeova ti koz avek mwan ankor enn fwa e dir: 2 “Ki savedir sa proverb* ki zot dir dan pei Izrael, ki dir, ‘Bann papa in manz rezen eg, me ledan bann garson ki grense’?+

3 “La sa ki Souvren Senyer Zeova i dir, ‘Mwan sa Bondye vivan, mon fer serman ki zot pou aret dir sa proverb dan pei Izrael. 4 Tou lavi* i pour mwan. Lavi en papa ek lavi en garson i pour mwan. Sa dimoun* ki fer pese, li menm ki pou mor.

5 “‘Meton en zonm i fer sa ki drwat,* i fer sa ki zis e byen. 6 I pa manz sa ki’n ganny ofer konman sakrifis avek zidol lo bann montanny,+ i pa priy avek bann zidol degoutan* pep Izrael, i pa dormi avek madanm son prosen+ e i pa dormi avek en madanm ler i pe ganny son peryod.+ 7 I tret tou dimoun byen,+ i rann sa dimoun sa keksoz ki sa dimoun ti’n donn li konman garanti.+ I pa vol personn,+ i donn son prop manze sa enn ki lafen+ e i donn lenz sa enn ki touni.+ 8 I pa pret larzan avek lentere oubyen pour fer profi,+ i pa azir dan en fason enzis,+ i ziz avek lazistis ler i ziz de dimoun.+ 9 I kontinyen obeir mon bann lareg ek mon bann lalwa pour li reste fidel. En zonm koumsa, i en dimoun ki fer sa ki byen e i pou kontinyen viv.’+ La sa ki Souvren Senyer Zeova in dir.

10 “‘Me meton sa zonm i papa en garson ki en voler+ oubyen en mertriye*+ oubyen ki fer enn sa bann keksoz 11 (menm si sa papa pa’n fer enn sa bann keksoz): i manz sa ki’n ganny ofer konman sakrifis avek zidol lo bann montanny, i dormi avek madanm son prosen, 12 i pa tret byen bann ki dan bezwen ek bann pov,+ i vole, i pa rann sa ki en dimoun in donn li konman garanti, i priy avek bann zidol degoutan,+ i kontinyen fer bann keksoz degoutan,+ 13 i fer profi e sarz lentere.+ Sa garson pa pou kontinyen viv. Vi ki i’n fer tou sa bann keksoz degoutan, i pou sirman ganny touye. I pou responsab pour son prop lanmor.*

14 “‘Me meton en garson i vwar tou pese ki son papa in fer e menm si sa garson i vwar sa, i pa fer sa bann keksoz. 15 I pa manz sa ki’n ganny ofer konman sakrifis avek zidol lo bann montanny, i pa priy avek bann zidol degoutan pep Izrael, i pa dormi avek madanm son prosen, 16 i tret tou dimoun byen, i rann sa ki en dimoun in donn li konman garanti, i pa vole, i donn son prop manze sa enn ki lafen, i donn lenz sa enn ki touni, 17 i pa fer sa bann ki pov soufer, i pa fer profi oubyen sarz lentere e i obeir mon bann lalwa ek mon bann lareg. En dimoun koumsa, pa pou mor akoz fot son papa. I pou sirman kontinyen viv. 18 Me vi ki son papa ti fer frod, vol son frer e fer bann move keksoz parmi son pep, i pou mor akoz son fot.

19 “‘Me zot pou dir: “Akoz sa garson pa koupab pour fot son papa?” Vi ki sa garson in fer sa ki zis e byen, i’n obeir tou mon bann lareg, i pou sirman kontinyen viv.+ 20 Sa dimoun* ki fer pese, li menm ki pou mor.+ En garson pa pou koupab pour fot son papa e en papa pa pou koupab pour fot son garson. En dimoun ki fer sa ki byen pou ganny zize dapre bann bon keksoz ki i’n fer e en move dimoun pou ganny zize dapre bann move keksoz ki i’n fer.+

21 “‘Aprezan, si en move dimoun i aret fer tou sa bann move keksoz ki i ti fer e i obeir mon bann lareg, i fer sa ki zis e byen, i pou sirman kontinyen viv. I pa pou mor.+ 22 I pa pou ganny pini pour sa bann lofans ki i’n fer.*+ I pou kontinyen viv akoz i’n fer sa ki byen.’+

23 “La sa ki Souvren Senyer Zeova i dir, ‘Eski i fer mwan plezir ler en move dimoun i mor?+ Pa mon prefere ki i sanz son fason viv e i kontinyen viv?’+

24 “‘Me ler en dimoun ki fer sa ki byen i aret fer sa ki byen e i fer sa ki mal,* i fer tou sa bann keksoz degoutan ki bann move dimoun i fer, eski i pou viv? Tou sa bann bon keksoz ki i’n fer pou ganny oubliye.+ I pou mor akoz i pa’n reste fidel e akoz pese ki i’n fer.+

25 “‘Me zot pou dir: “Fason fer Zeova i enzis.”+ Silvouple, ekoute pep Izrael! Eski mon fason fer ki enzis?+ Eski pa zot fason fer ki enzis?+

26 “‘Ler en dimoun ki fer sa ki byen i aret fer sa ki byen e i fer sa ki mal, i pou mor akoz sa. Wi, i pou mor akoz sa keksoz mal ki i’n fer.

27 “‘Ler en move dimoun i aret fer sa ki mal e i konmans fer sa ki zis e byen, i pou sov son prop lavi.*+ 28 Ler i realize ki sa ki i pe fer i mal e i aret fer tou sa bann lofans, i pou sirman kontinyen viv. I pa pou mor.

29 “‘Me pep Izrael pou dir: “Fason fer Zeova i enzis.” Pep Izrael, eski i vreman mon fason fer ki enzis?+ Eski pa zot fason fer ki enzis?’

30 “La sa ki Souvren Senyer Zeova i dir, ‘Alor pep Izrael, mon pou ziz sakenn parmi zot dapre sa ki i’n fer.+ Aret fer tou sa bann lofans, koumsa sa bann lofans pa pou vin en lobstak ki fer zot koupab. 31 Rezet tou sa bann pese ki zot in fer+ e sanz zot leker ek zot fason panse.*+ Pep Izrael, akoz zot devret mor?’+

32 “La sa ki Souvren Senyer Zeova i dir, ‘Mon pa pran plezir dan lanmor personn.+ Alor, aret fer sa ki mal e kontinyen viv.’”+