Zenez
8 Apre, Bondye ti mazin Noe. I ti osi mazin tou bann zannimo sovaz ek zannimo domestik ki ti avek Noe dan lars.+ Bondye ti fer en divan soufle lo later e delo ti konmans desann. 2 Lesyel* ti fermen e delo ki dan lesyel* ti aret devide, alor lapli ti aret tonbe.+ 3 Apre, delo ti konmans diminyen ptitapti lo later. Apre 150 zour, delo ti’n desann. 4 Dan disetyenm zour, setyenm mwan, lars ti aret lo bann montanny Ararat. 5 Delo ti pe kontinyen desann ziska dizyenm mwan. Premye zour dan dizyenm mwan, bann latet montanny ti aparet.+
6 Apre 40 zour, Noe ti ouver lafnet+ ki i ti’n fer dan lars. 7 I ti anvoy en korbo deor. Sa korbo ti ale vini kot lars ziska ler delo ti’n sek lo later.
8 Pli tar, i ti anvoy en kolonm* pour vwar si delo ti’n diminyen lo later. 9 Sa kolonm pa ti vwar okenn landrwa pour apoze, alor i ti retourn kot Noe dan lars, parski i ti ankor annan delo partou lo later.+ Noe ti met son lanmen deor e fer sa kolonm antre dan lars. 10 I ti esper ankor set zour e ankor enn fwa, i ti anvoy sa kolonm deor. 11 Ler sa kolonm ti retournen lo tar apremidi, Noe ti vwar ki i ti annan en fey zoliv ki i ti’n fek kase dan son labek. Alor i ti konnen ki delo ti’n diminyen lo later.+ 12 I ti esper ankor set zour. Apre, i ti anvoy sa kolonm deor, safwasi sa kolonm pa ti retourn kot li.
13 Ler Noe ti annan 601 an,+ premye zour dan premye mwan, delo ti’n fini desann lo later. Noe ti tir kouvertir lars e i ti vwar ki later ti pe sek. 14 Vennsetyenm zour dan dezyenm mwan, later ti’n sek.
15 Aprezan, Bondye ti dir Noe: 16 “Sorti dan lars, ou, ou madanm, ou bann garson ek madanm ou bann garson.+ 17 Fer tou sa ki vivan sorti dan lars:+ bann zannimo ki anvole, bann zannimo domestik, bann zannimo sovaz ek tou reptil* lo later, pour ki zot fer piti, vin bokou e ranpli later.”+
18 Alor Noe ti sorti dan lars ansanm avek son bann garson,+ son madanm ek madanm son bann garson. 19 Tou sa ki vivan, tou reptil,* tou zannimo ki anvole e tou sa ki bouze lo later ti sorti dan lars par group.+ 20 Apre sa, Noe ti fer en lotel+ pour Zeova. I ti pran detrwa zannimo ki pir ek zannimo ki anvole ki pir+ e ofer zot konman en lofrann brile lo lotel.+ 21 Zeova ti konmans santi en bon loder ki ti fer li plezir.* Alor Zeova ti dir dan li menm: “Mon pa pou zanmen modi later+ ankor akoz bann imen, parski dimoun i annan bann move tandans* depi zot zenes.+ Mon pa pou zanmen detrir tou sa ki vivan ankor parey mon’n fer.+ 22 Depi ozordi, dimoun pou toultan senm lagrenn e rekolte. I pou toultan annan lafreser ek lasaler, lete ek liver, lizour ek aswar.”+