Zeremi
17 “Pese Zida in ganny ekri avek en pwenson feray.*
I’n ganny grave lo zot leker avek en zouti pwent ki’n ganny fer avek dyanman
E osi lo bann korn lo zot bann lotel,
2 Pandan ki zot bann garson i mazin zot bann lotel ek zot bann poto sakre*+
O bor en zoli pye dibwa, lo bann montanny,+
3 Lo bann montanny dan lakanpanny.
Mon pou fer zot vin pran ou bann resours ek tou ou bann trezor.+
Wi, zot pou vin pran ou bann landrwa ladorasyon* parski ou’n fer pese partou dan ou bann teritwar.+
4 Ou pou aksepte pour ou perdi ou leritaz ki mon ti donn ou.+
Mon pou fer ou servi ou bann lennmi dan en pei ki ou pa konnen,+
Parski ou’n alim mon lakoler parey en dife.*+
I pou brile pour touzour.”
5 La sa ki Zeova i dir:
“Modi sa zonm* ki met son konfyans dan bann imen,+
E ki vir ledo avek Zeova.
6 I pou vin parey en pye dibwa ki tousel dan dezer.
I pa pou vwar ler bann bon keksoz i arive,
Me i pou reste dan bann landrwa sek dan dezer,
Dan en laplenn disel kot personn pa kapab reste.
8 I pou vin parey en pye dibwa ki’n ganny plante o bor delo,
Ki anvoy son bann rasin ziska kot larivyer.
I pa pou santi ler lasaler i vini,
Me son bann fey pou toultan reste ver.+
I pa pou enkyet pandan lannen lasesres
E i pa pou ni aret raport fri.
9 Leker i pli tret* ki tou lezot keksoz e i vreman move.*+
Lekel ki kapab konn li?
10 Mwan, Zeova, mon pe egzamin leker,+
Mon pe egzamin bann panse pli profon,*
Pour donn sak dimoun dapre son kondwit,
Dapre tou sa ki i’n fer.+
11 Zis parey en perdri* i anmas dizef ki i pa’n ponn,
Sa dimoun ki vin ris dan en fason malonnet,* i parey sa perdri.+
Son larises pou kit li dan milye son lavi
E finalman, i pou montre ki i bet.”
12 Sa tronn glorye ki’n ganny glorifye depi o konmansman,
I nou landrwa sen.+
13 O Zeova, ou ki sa lespwar pour Izrael,
Tou sa bann ki abandonn ou pou onte.
Non sa bann ki aret ador ou* pou ganny ekrir dan lapousyer,+
Parski zot in abandonn Zeova, sa sours delo lavi.+
14 O Zeova, geri mwan e mon pou ganny geri.
Sov mwan e mon pou ganny sove,+
Parski mon pou loue ou.
15 Gete! I annan dimoun ki pe dir mwan sa:
“Oli sa ki Zeova in dir?+
Ki sa ki i’n dir i ganny akonplir!”
16 Me mwan, mon pa ti aret swiv ou konman en berze
E mon pa ti anvi ki sa zour ki pou annan maler i vini.
Ou konn tre byen tou sa ki mon’n dir.
Mon’n dir tousala devan ou!
17 Pa bezwen fer mwan per.
Ou ki mon landrwa kasyet ler mon dan maler.
18 Fer sa bann dimoun ki pe persekit mwan onte,+
Me pa bezwen fer mwan onte.
Fer zot per,
Me pa bezwen fer mwan per.
Anmenn maler lo zot,+
Kraz zot e detrir zot konpletman.*
19 La sa ki Zeova ti dir mwan: “Al debout devan baro bann garson sa pep, devan sa baro ki bann lerwa Zida i antre sorti e devan tou bann baro Zerizalenm.+ 20 Ou devret dir zot, ‘Ekout sa ki Zeova i dir, zot bann lerwa Zida, pep Zida antye ek tou bann zabitan Zerizalenm, ki antre par sa bann baro. 21 La sa ki Zeova i dir: “Fer atansyon e pa bezwen anmenn okenn keksoz oubyen antre avek bann keksoz dan bann baro Zerizalenm zour Saba.+ 22 Zot pa devret sorti kot zot avek okenn keksoz zour Saba e zot pa devret fer okenn travay.+ Zot devret gard sa zour Saba konman en zour sakre, zis parey mon ti donn zot bann zanset lord pour fer.+ 23 Me zot pa ti ekoute oubyen ouver zot zorey. Zot ti antete e zot pa ti oule* obeir oubyen aksepte disiplin.”’+
24 “‘La sa ki Zeova i dir, “Me si zot fer sir ki zot obeir mwan e si zot pa antre avek okenn keksoz dan bann baro sa lavil zour Saba e si zot gard sa zour Saba konman en zour sakre e zot pa fer okenn travay sa zour,+ 25 bann lerwa ek bann prens ki asiz lo tronn David+ pou osi antre dan sa bann baro sa lavil dan saret lager e lo seval e osi bann zonm Zida ek bann zabitan Zerizalenm.+ Bann dimoun pou reste dan sa lavil pour touzour. 26 Bann dimoun pou antre sorti dan bann lavil Zida, dan bann landrwa otour Zerizalenm, dan pei Benzamen,+ dan laplenn,+ dan bann montanny ek Negeb.* Zot pou anmenn bann lofrann brile,*+ bann sakrifis,+ bann lofrann lagrenn,*+ lansan blan* ek bann sakrifis remersiman dan lakaz Zeova.+
27 “‘“Me si zot pa obeir mwan, si zot pa gard sa zour Saba konman en zour sakre e si zot antre avek bann keksoz dan bann baro Zerizalenm zour Saba, mon pou met dife dan son bann baro e i pou sirman bril bann gran latour Zerizalenm+ e sa dife pa pou ganny tennyen.”’”+