Izai
32 Gete! En lerwa+ pou dirize avek ladrwatir+
E bann prens pou dirize avek lazistis.
2 Sakenn pou vin parey en landrwa kasyet ler i annan divan,
En landrwa kasyet ler i annan gro lapli,
Parey bann pti larivyer dan en landrwa kot napa delo,+
Parey lonbraz en gro ros dan en landrwa sek.
3 Alor lizye bann dimoun ki vwar kler pou nepli kole
E zorey bann dimoun ki tande pou ekout byen.
4 Leker bann ki azir deswit pou pran letan pour reflesir lo konnesans
E lalang bann dimoun ki begeye pou koz byen e kler.+
5 En dimoun bet pou nepli ganny konsidere konman en dimoun ki zenere
E en dimoun ki pa swiv bann prensip moral pa pou ganny konsidere konman en dimoun enportan.
6 Parski en dimoun bet pou dir keksoz ki pa fer sans
E i pou mazin fer bann keksoz mal dan son leker+
Pour li fer bann dimoun aret ador Bondye,* pour li dir bann keksoz ki pa vre lo Zeova,
Pour li fer en dimoun ki lafen pa ganny manze
E pour li anpes en dimoun ki swaf ganny en keksoz pour bwar.
7 Bann plan en dimoun ki pa swiv bann prensip moral, i move.+
I ankouraz bann dimoun pour fer bann keksoz ki fer onte
E i koz manti pour fer en dimoun ki pe soufer pas dan en kantite maler,+
Menm ler en dimoun pov i dir sa ki byen.
8 Me en dimoun ki zenere i toultan anvi donnen,
E i kontinyen zenere dan tou sa ki i fer.
9 “Zot sa bann madanm ki pa pe fatig zot, leve e ekout mwan!
Zot sa bann fiy ki pa ni enkyet,+ ekout byen sa ki mon dir!
10 Dan en pti pe plis ki enn an, zot ki pa enkyet zot pou tranble,
Parski i pou napa okenn fri ki pou’n ganny anmase ler rekolt rezen in fini.+
11 Zot sa bann madanm ki annan konfyans dan zot lekor, tranble!
Zot ki pa enkyet, tranble!
Tir zot lenz lo zot
E met latwal goni* dan zot leren.+
12 Tap zot lestoman e plennyen
Pour sa bann zoli plantasyon ek sa pye rezen ki raport fri.
13 Parski later mon pep pou ranpli avek pye pikan.
Zot pou kouver tou bann lakaz kot i annan lazwa,
Wi, sa lavil ki pe selebre.+
14 Parski sa gran latour in ganny abandonnen.
Sa lavil ki fer en kantite tapaz in ganny abandonnen.+
Ofel+ ek sa latour in vin en dezer pour touzour,
En landrwa ki bann bourik maron i kontan,
E sa dezer i vin en plantasyon pye fri
E sa plantasyon pye fri i ganny konsidere konman en lafore.+
16 Alor lazistis pou reste dan dezer
E ladrwatir pou reste dan plantasyon pye fri.+
17 Vre ladrwatir pou anmenn lape+
E vre ladrwatir pou anmenn trankilite ek sekirite pour touzour.+
18 Mon pep pou reste dan en landrwa trankil,
Dan bann landrwa ki an sekirite e trankil kot zot kapab repoze.+
19 Me lagrel pou kraz sa lafore
E sa lavil pou ganny kraze konpletman.
20 Ere zot ki senm lagrenn partou kot i annan delo,
Zot ki larg toro ek bourik.”+