Let pour bann Romen
4 Dan sa ka, ki Abraam nou zanset ti gannyen? 2 Par egzanp, si Abraam ti ganny aprouve konman en dimoun ki fer sa ki byen akoz sa ki i ti fer, i ti pou annan rezon pour li fyer, me pa devan Bondye. 3 Parski ki lekritir i dir? “Abraam ti annan lafwa dan Zeova* e pour sa rezon, Bondye ti konsider li konman en dimoun ki fer sa ki byen.”+ 4 Ler en dimoun i travay, i pa akoz labonte ekstraordiner ki i ganny son lapey me i akoz zot dwa li. 5 De lot kote, en dimoun i ganny aprouve par Bondye,* pa dapre sa ki i fer me dapre son lafwa dan Bondye ki konsider li konman en dimoun ki fer sa ki byen+ menm si i fer pese. 6 David osi ti koz lo lazwa ki en dimoun i gannyen ler Bondye i konsider li konman en dimoun ki fer sa ki byen menm si i pa swiv lalwa. I ti dir: 7 “Ere sa bann ki zot move aksyon i ganny pardonnen e ki zot pese i ganny kouver,* 8 ere sa dimoun ki Zeova* pa pran kont son pese ditou.”+
9 Alor, eski zis bann ki sirkonsi ki kapab ere ouswa bann dimoun ki pa sirkonsi osi?+ Parski nou’n fini dir: “Bondye ti konsider Abraam konman en dimoun ki fer sa ki byen akoz son lafwa.”+ 10 Me kan ki Bondye ti konsider Abraam konman en dimoun ki fer sa ki byen? Ler i ti sirkonsi oubyen pa sirkonsi? Ler i pa ti ankor ganny sirkonsi. 11 Bondye ti demann Abraam pour sirkonsi e sa ti vin en siny+ ek en garanti* ki ti montre ki gras a son lafwa, Bondye ti konsider li konman en dimoun ki fer sa ki byen menm ler i pa ti ankor sirkonsi. Sa ti arive pour ki i kapab vin papa tou sa bann ki annan lafwa+ menm si zot pa sirkonsi e pour ki zot ganny konsidere konman dimoun ki fer sa ki byen 12 e osi pour ki Abraam i vin papa bann ki an faver sirkonsizyon. I pa zis papa bann ki sirkonsi me i osi papa bann ki viv zot lavi dapre son legzanp lafwa+ ler i pa ti ankor sirkonsi.
13 I pa akoz lalwa ki Abraam oubyen son desandans ti ganny sa promes ki i ti pou zeritye lemonn,*+ me i akoz i ti annan lafwa+ ki i ti ganny konsidere konman en dimoun ki fer sa ki byen e ki i ti ganny sa promes. 14 Parski si i zis bann ki obeir lalwa ki vin zeritye, i pa neseser annan lafwa e sa promes i dan vid. 15 An realite, Lalwa ki fer Bondye ankoler,+ me kot napa lalwa, napa okenn lofans.+
16 Abraam ti ganny sa promes akoz son lafwa ek labonte ekstraordiner Bondye.+ Alor tou son desandans osi ti ganny sa promes.+ I pa zis bann ki swiv Lalwa ki ganny sa promes me osi bann ki annan lafwa parey Abraam ki papa nou tou.+ 17 (Sa i zis parey i’n ganny ekrir: “Mon’n fer ou vin papa en kantite nasyon.”)+ Sa promes ti ganny fer devan Bondye e Abraam ti annan lafwa dan sa enn ki resisit bann mor e koz lo bann keksoz ki pa ankor arive konmsi zot in fini arive.* 18 Menm si i ti napa rezon pour annan lespwar, akoz sa lespwar Abraam ti annan lafwa ki i ti pou vin papa en kantite nasyon dapre sa ki i ti’n ganny dir: “Koumsanmenm ou desandans pou ete.”+ 19 Menm si son lafwa ti ankor for, pour li i ti konmsi son lekor ti’n fini mor (vi ki i ti annan preski 100 an)+ e i ti osi konnen ki Sara ti tro vye pour annan zanfan.*+ 20 Me akoz promes Bondye, i ti annan lafwa e i pa ti doute, plito par son lafwa i ti vin for e sa ti glorifye Bondye 21 e i ti antyerman konvenki ki sa ki I ti’n promet li, I ti pou osi kapab fer.+ 22 Alor, “akoz sa, Bondye ti konsider li konman en dimoun ki fer sa ki byen.”+
23 Par kont, sa parol “Bondye ti konsider li konman en dimoun ki fer sa ki byen” pa ti ganny ekrir zis pour li,+ 24 me osi pour nou ki pou ganny konsidere konman dimoun ki fer sa ki byen parski nou krwar dan sa Enn ki ti resisit Zezi nou Senyer.+ 25 Zezi ti ganny met amor pour nou pese+ e resisite pour ki nou kapab ganny aprouve konman dimoun ki fer sa ki byen.+