Zenez
18 Apre sa, Zeova+ ti aparet avek Abraam o bor bann gran pye dibwa Mamre.+ Abraam ti pe asize dan larantre latant pandan sa moman pli so dan lazournen. 2 Ler i ti gete, i ti vwar trwa zonm pe debout en zistans avek li.+ Ler i ti vwar zot, i ti taye pour al zwenn zot e i ti tonm azenou devan zot. 3 Apre i ti dir: “Zeova, si mon fer ou plezir, silvouple pas kot ou serviter. 4 Silvouple, les nou anmenn en pe delo pour lav zot lipye+ e apre sa, zot kapab repoze anba pye dibwa. 5 Vi ki zot in vin isi kot zot serviter, les mwan donn zot en pe manze pour zot reganny lafors* e apre zot kapab ale.” Alor zot ti dir: “Oke, ou kapab fer sa ki ou’n dir.”
6 Alor Abraam ti depese e al kot latant. I ti dir Sara: “Fer vit! Pran trwa mezir* bon lafarin, fer lapat e fer dipen.” 7 Apre, Abraam ti tay kot troupo e swazir en bon zenn toro. I ti donn son serviter sa toro e son serviter ti degaze pour prepar li. 8 Apre Abraam ti pran diber, dile ek sa zenn toro ki i ti’n prepare e i ti anmenn sa manze kot zot. Apre i ti debout o bor zot anba pye dibwa anmezir ki zot ti pe manze.+
9 Zot ti demann li: “Oli ou madanm Sara?”+ I ti reponn: “I la dan latant.” 10 Alor, enn sa bann zonm ti dir: “Mon pou retourn kot ou sa menm letan lannen prosenn e gete! ou madanm Sara pou ganny en garson.”+ Sara ti pe ekoute dan larantre latant ki ti par deryer sa zonm. 11 Abraam ek Sara ti aze, zot ti en bon laz.+ Sara ti’n depas laz fer zanfan.*+ 12 Alor Sara ti konmans riye dan li menm e dir: “La ki mon’n vin vye e mon senyer osi in vin vye, eski mon pou vreman annan sa lazwa pou ganny en zanfan?”+ 13 Apre Zeova ti dir Abraam: “Akoz Sara in riye e dir, ‘Eski mon pou vreman ganny en zanfan menm si mon’n vye?’ 14 Eski i annan okenn keksoz ki enposib pour Zeova?+ Mon pou retourn kot ou sa menm letan lannen prosenn e Sara pou ganny en garson.” 15 Me Sara ti dir: “Non, mon pa’n riye mwan!” parski i ti per. Alor Bondye ti dir: “Wi! Ou’n riye ou.”
16 Pli tar, ler sa bann zonm ti leve pour ale, Abraam ti kondir zot. Zot ti ariv dan en landrwa kot zot ti kapab vwar Sodonm.+ 17 Zeova ti dir: “Eski mon pe kasyet avek Abraam sa ki mon pe al fer?+ 18 Anfet, Abraam pou sirman vin en nasyon ki gran e pwisan, tou bann nasyon lo later pou ganny beni* atraver li.+ 19 Parski mon’n swazir* li pour ki i demann son bann garson ek son desandans pour fer lavolonte Zeova e pour fer sa ki byen e zis.+ Alor mwan Zeova, mon pou akonpli mon promes ki mon’n fer avek Abraam.”
20 Alor Zeova ti dir: “Mon’n tann en kantite konplent+ lo Sodonm ek Gomor e zot pese i vreman grav.+ 21 Mon pou desann pour al gete si sa bann konplent ki mon’n tande i vre. Si i pa leka, mon pou konnen.”+
22 Apre, sa bann zonm ti kit sa landrwa e al dan direksyon Sodonm, me Zeova+ ti reste avek Abraam. 23 Alor Abraam ti aprose e demann li: “Eski ou pou vreman detrir bann dimoun ki fer sa ki byen ansanm avek bann move dimoun?+ 24 Meton i annan 50 dimoun ki fer sa ki byen dan sa lavil, eski ou pou detrir zot e ou pa pou pardonn sa lavil akoz sa 50 dimoun ki fer sa ki byen? 25 I enposib pour ou touy bann dimoun ki fer sa ki byen ansanm avek bann move dimoun e ki ou tret bann dimoun ki fer sa ki byen ek bann move dimoun dan menm fason!+ I enposib pour ou fer en keksoz koumsa.+ Eski sa Ziz lo later antye pa pou fer sa ki byen?”+ 26 Alor Zeova ti dir: “Si mon trouv 50 dimoun ki fer sa ki byen dan lavil Sodonm, mon pou pardonn sa lavil antye akoz zot.” 27 Me Abraam ti dir: “Zeova, mon zis lapousyer ek lasann, me silvouple, les mwan koz ankor enn fwa. 28 Meton i mank senk dan sa 50 dimoun ki fer sa ki byen, eski akoz sa senk, ou pou detrir sa lavil antye?” Bondye ti reponn: “Mon pa pou detrir sa lavil si mon trouv 45 dimoun ki fer sa ki byen.”+
29 Me ankor enn fwa Abraam ti dir li: “Meton 40 dimoun ki fer sa ki byen i ganny trouve dan sa lavil.” I ti reponn: “Mon pa pou detrir sa lavil akoz sa 40 dimoun ki fer sa ki byen.” 30 Me Abraam ti dir ankor enn fwa: “Silvouple Zeova, pa bezwen ankoler avek mwan,+ me les mwan kontinyen koze: Meton zis 30 dimoun ki fer sa ki byen i ganny trouve dan sa lavil.” I ti reponn: “Mon pa pou detrir sa lavil si mon trouv 30 dimoun ki fer sa ki byen.” 31 Me Abraam ti dir ankor enn fwa: “Silvouple Zeova, les mwan koz ankor enn fwa: Meton zis 20 dimoun ki fer sa ki byen i ganny trouve dan sa lavil.” I ti reponn: “Mon pa pou detrir sa lavil akoz sa 20 dimoun ki fer sa ki byen.” 32 Finalman Abraam ti dir: “Silvouple Zeova, pa bezwen ankoler avek mwan, me les mwan koz zis ankor enn fwa: Meton zis dis dimoun ki fer sa ki byen i ganny trouve dan sa lavil.” I ti reponn: “Mon pa pou detrir sa lavil akoz sa dis dimoun ki fer sa ki byen.” 33 Ler Zeova ti fini koz avek Abraam, i ti ale+ e Abraam ti retourn kot li.