Izai
49 Bann zil, ekout mwan.
Bann nasyon ki byen lwen, ekout byen.+
Zeova in apel mwan avan ki mon ti ne.*+
I ti nonm mon non depi ler mon ti ankor dan vant mon manman.
2 I’n fer mon labous vin parey en lepe ki byen koupe.
I’n protez mwan avek son lanmen.*+
I’n fer mwan vin en fles ki’n ganny poli.
I ti kasyet mwan dan son fouro.*
3 I ti dir mwan: “Izrael, ou mon serviter+
E mon pou servi ou pour montre mon laglwar.”+
4 Me mon ti dir: “Mon’n travay dir pour nanryen.
Mon’n gaspiy mon lafors pour keksoz ki pa egziste, ki anven.
Me sirman Zeova ki pou ziz mwan*
E mon Bondye ki pou rekonpans mwan.”*+
5 Aprezan, Zeova, sa Enn ki ti fer mwan ler mon ti dan vant pour mwan vin son serviter,
In dir ki mon devret fer Zakob retourn kot li,
Koumsa Izrael i kapab rasanble kot li.+
Mon pou ganny glorifye devan Zeova
E mon Bondye pou vin mon lafors.
6 I ti dir: “Ou pa mon serviter zis
Pour ou retabli bann tribi Zakob
E pour ou fer bann dimoun Izrael ki ankor vivan retournen,
Me mon’n osi fer ou vin parey en lalimyer pour bann nasyon,+
Pour mon kapab sov* bann dimoun dan bann landrwa pli lwen lo later.”+
7 La sa ki Zeova, sa Enn ki delivre Izrael, sa Enn ki Sen Izrael+ i dir avek sa enn ki ganny meprize,+ avek sa enn ki bann nasyon pa kontan li, avek serviter bann dirizan:
“Bann lerwa pou vwar e zot pou leve
E bann prens pou azenou
Akoz Zeova, sa Enn ki fidel,+
Sa Enn ki Sen Izrael, in swazir ou.”+
8 La sa ki Zeova i dir:
“Mon ti reponn ou dan en bon letan*+
E zour delivrans mon ti ed ou.+
Mon ti kontinyen protez ou pour ou vin en lalyans pour sa pep,+
Pour fer dimoun al reste ankor dan sa pei,
Pour dir bann dimoun ki dan fernwanr,+ ‘Sorti!’
Zot pou manze o bor semen,
I pou annan bann laplenn zerb tou dilon bann vye santye.*
10 Zot pa pou lafen, ni swaf+
E gro lasaler oubyen soley pa pou bril zot.+
Parski sa Enn ki pran pitye pour zot pou diriz zot+
E i pou gid zot kot bann sours delo.+
11 Mon pou fer tou mon bann montanny vin en semen
E mon bann gran semen pou vin o.+
12 Gete! Zot sorti byen lwen e zot pe vini.+
Gete! I annan ki sorti dan nor e dan was
E i annan ki sorti dan pei Sinim.”+
13 Lesyel, kriye dan lazwa e later, ou devret kontan.+
Les bann montanny kriye dan lazwa.+
Parski Zeova in konsol son pep+
E i demontre pitye pour son bann dimoun ki pe soufer.+
14 Me Siyon ti kontinyen dir:
“Zeova in abandonn mwan+ e Zeova in oubliy mwan.”+
15 Eski en madanm i kapab oubliy son zanfan ki ankor pe tete
Oubyen eski i pou napa konpasyon pour sa garson ki’n sorti dan son vant?
Menm si sa bann madanm i oubliye, mon pa pou zanmen oubliy ou.+
16 Gete! Mon ti grav ou non dan mon plak lanmen.
Ou bann miray i toultan devan mwan.
17 Ou bann garson in retourn vitman.
Sa bann dimoun ki ti kraz ou e detrir ou pou ale e kit ou.
18 Get partou otour ou.
Zot tou zot pe rasanble ansanm.+
Zot pe vin kot ou.
La sa ki Zeova i dir, “Mwan sa Bondye vivan, mon fer serman ki
Ou pou met zot tou lo ou parey ou met bann bizou
E ou pou met zot lo ou parey en nouvel marye i fer.
19 Menm si ou bann landrwa ti ganny detrir e ganny abandonnen e ou pei ti’n vin en ta debri,+
Aprezan sa pei pou tro pti pour bann dimoun ki pe reste laba+
20 Bann garson ki ti ne apre ki ou ti’n perdi lezot zanfan, pou dir ou,
‘Sa landrwa i tro pti pour mwan.
Fer lespas pour mon reste isi.’+
21 Apre, ou pou dir sa dan ou leker,
‘Lekel papa sa bann zanfan ki mon’n gannyen,
Vi ki mon en madanm ki’n perdi zanfan e mon steril,
Mon’n ganny anmennen konman prizonnyen an egzil?
Lekel ki’n elve sa bann zanfan?+
Gete! Mon ti tousel,+
Alor, kote tou sa bann zanfan i sorti?’”+
22 La sa ki Souvren Senyer Zeova i dir:
“Gete! Mon pou lev mon lanmen avek bann nasyon
E mon pou met en poto sinyal pour bann dimoun vwar.+
Zot pou anmenn ou bann garson dan zot lebra*
E zot pou anmenn ou bann fiy lo zot zepol.+
23 Bann lerwa pou pran swen avek ou+
E zot bann prenses pou vin ou bann servant.
Zot pou azenou lafas anba devan ou,+
Zot pou lis lapousyer lo ou lipye+
E ou pou bezwen konnen ki mwan mon Zeova.
Bann dimoun ki annan lespwar dan mwan pa pou onte.”+
24 Eski zot kapab pran bann prizonnyen ki pour en zonm for?
Oubyen eski zot kapab sov bann prizonnyen ki pour en diktater?
25 Me la sa ki Zeova i dir:
“Menm bann prizonnyen ki pour en zonm for pou ganny pran avek li+
E bann prizonnyen ki pour en diktater pou ganny sove.+
Mon pou opoz bann dimoun ki opoz ou+
E mon pou sov ou bann garson.
26 Mon pou fer bann dimoun ki maltret ou manz zot prop laser
E zot pou bwar zot prop disan ziska zot sou, parey ler zot bwar diven dou.
Tou dimoun* pou bezwen konnen ki mwan mon Zeova,+
Ou Sover+ e sa Enn ki delivre ou,+
Sa Enn Pwisan Zakob.”+