Premye liv Samyel
8 Ler Samyel ti’n vye, i ti apwent son bann garson konman ziz pour Izrael. 2 Son premye garson ti apel Zoel e son dezyenm garson ti apel Abiya.+ Zot ti bann ziz Beer-Seba. 3 Me son bann garson pa ti swiv son legzanp. Zot ti esey fer larzan dan en fason malonnet,+ aksepte gous+ e zot ti pas fo zizman.+
4 Avek letan, tou ansyen Izrael ti zwenn ansanm e vin Rama kot Samyel ti reste. 5 Zot ti dir li: “Gete! Ou’n vye, me ou bann garson pa pe swiv ou legzanp. Aprezan, apwent en lerwa pour ziz nou zis parey tou lezot nasyon.”+ 6 Me Samyel pa ti kontan* ler zot ti dir: “Donn nou en lerwa pour ziz nou.” Apre, Samyel ti priy Zeova 7 e Zeova ti dir Samyel: “Ekout tou sa ki lepep i dir ou, parski pa ou ki zot in rezete, me mwan ki zot in rezete konman zot lerwa.+ 8 Depi zour ki mon ti tir zot Lezip ziska ozordi, zot ankor pe fer menm keksoz. Zot kontinyen abandonn mwan+ pour servi lezot bondye+ e sanmenm sa ki zot pe fer avek ou. 9 Aprezan, ekout zot. Par kont, ou devret seryezman averti zot lo bann konsekans. Dir zot kwa ki sa lerwa ki pou diriz lo zot pou annan drwa demande.”
10 Alor Samyel ti dir bann dimoun ki ti pe demann li en lerwa, tou sa ki Zeova ti’n dir. 11 I ti dir: “La sa ki sa lerwa ki diriz lo zot pou annan drwa demande:+ I pou pran zot garson+ pour fer zot okip son bann saret,+ fer zot mont son bann seval+ e serten pou bezwen tay devan son bann saret. 12 I pou osi apwent serten parmi zot konman bann sef 1,000 solda+ e bann sef 50 solda.+ Serten pou bezwen labour son later,+ anmas son rekolt+ e fer son bann zarm lager ek lekipman pour son bann saret.+ 13 I pou pran zot fiy pour melanz delwil santi bon,* pour kwi manze e fer dipen pour li.+ 14 I pou pran zot pli bon plantasyon, plantasyon rezen ek plantasyon zoliv+ e i pou donn son bann serviter. 15 I pou pran en dizyenm sa ki zot rekolte dan zot plantasyon ek plantasyon rezen e i pou donn son bann zofisye ek serviter. 16 I pou osi pran zot bann serviter ek servant, zot bann pli bon bef ek bourik e i pou fer zot travay pour li.+ 17 I pou pran en dizyenm zot mouton ek kabri+ e zot, zot pou vin son serviter. 18 En zour zot pou plennyen akoz sa lerwa ki zot menm zot in swazir,+ me sa zour, Zeova pa pou reponn zot.”
19 Par kont, lepep pa ti oule ekout Samyel e zot ti dir: “Non, nou’n fini deside ki nou anvi en lerwa. 20 Koumsa, nou pou parey tou lezot nasyon e nou lerwa pou ziz nou, diriz nou e lager avek nou bann lennmi.” 21 Apre ki Samyel ti’n ekout sa ki lepep ti annan pour dir, i ti repet sa devan Zeova. 22 Zeova ti dir Samyel: “Ekout zot e apwent en lerwa pour diriz zot.”+ Apre sa, Samyel ti dir bann zonm Izrael: “Zot tou retourn kot zot dan zot lavil.”