Zeremi

20 Pret Pasour garson Imer, ki ti osi sef zofisye* dan lakaz Zeova, ti pe ekoute ler Zeremi ti pe profetiz sa bann keksoz. 2 Apre Pasour ti tap profet Zeremi e i ti met li dan blok dibwa+ ki ti kot Baro Benzamen ki Anler, ki ti kot lakaz Zeova. 3  Me son lannmen ler Pasour ti larg Zeremi e tir li dan sa blok dibwa, Zeremi ti dir li:

“Zeova in sanz ou non, ou nepli apel Pasour, me ou apel Lafreyer Partou.+ 4 Parski la sa ki Zeova i dir, ‘Mon pou fer ou per e tou ou bann zanmi pou per ou e zot bann lennmi pou touy zot avek lepe devan ou.+ Mon pou livre Zida antye dan lanmen lerwa Babilonn, i pou anmenn zot an egzil Babilonn e i pou touy zot avek lepe.+ 5 Mon pou donn zot bann lennmi tou larises sa lavil, tou son bann resours, tou son bann keksoz presye ek tou trezor bann lerwa Zida.+ Zot pou pran sa bann keksoz e anmenn Babilonn.+ 6  Me ou Pasour, ou pou ganny pran konman prizonnyen ansanm avek tou dimoun ki reste dan ou lakaz. Ou pou al Babilonn e ou pou mor laba. Ou pou ganny antere laba avek tou ou bann zanmi, parski ou’n dir zot bann profesi ki pa vre.’”+

 7 O Zeova, ou’n anbet mwan e mon’n ganny anbete.

Ou’n servi ou lafors kont mwan e ou’n ganny laviktwar lo mwan.+

Bann dimoun i riy mwan lazournen antye.

Tou dimoun i monk mwan.+

Bann dimoun i ensilte mwan e sikann mwan lazournen antye akoz parol Zeova.+

 9 Alor mon ti dir: “Mon pa pou koz ankor lo li

E mon pou aret koz lo son non.”+

Me dan mon leker, son parol ti vin parey en dife ki pe brile anndan dan mon lezo

E mon ti nepli kapab gard li anndan.

Mon ti nepli kapab siporte.+

10 Parski mon ti tann en kantite rimer.

Mon ti vreman per.+

“Kondann li. Annou kondann li!”

Tou dimoun ki ti pe swet mwan lape ti pe esper mwan tonbe+ e zot ti dir:

“Petet i pou fer en fot bet

E nou pou kapab ganny laviktwar lo li e revanze.”

11  Me Zeova ti avek mwan parey en gerye ki fer per.+

I pour sa rezon ki dimoun ki persekit mwan pou tonbe e zot pa pou ganny laviktwar.+

Zot pou vreman onte parski zot pa pou reisi.

Zot pou ganny imilye pour touzour e personn pa pou oubliy sa.+

12  Me ou, O Zeova Sef larme, ou pe egzamin sa dimoun ki fer sa ki byen.*

Ou vwar panse pli profon* ek leker dimoun.+

Les mwan vwar ler ou revanze kont zot,+

Parski mon’n anmenn mon ka kot ou pour ou zize.+

13 Sant pour Zeova! Loue Zeova!

Parski i’n sov sa enn ki pov dan lanmen bann move dimoun.

14 Ki sa zour ki mon ti ne i ganny modi!

Ki sa zour ki mon manman ti donn mwan nesans pa ganny beni!+

15 Ki sa zonm ki ti dir mon papa sa bon nouvel i ganny modi, sa zonm ki ti dir:

“Ou’n ganny en garson, en garson!”

Ki ti fer li vreman kontan.

16 Ki sa zonm i vin parey bann lavil ki Zeova pa regrete ki i’n detrir.

Ki i tann bann dimoun pe kriye bomaten e ki i tann sinyal pour al lager midi.

17 Akoz i pa ti touy mwan ler mon ti dan vant mon manman,

Pour ki vant mon manman i vin mon latonm

E ki i toultan reste ansent?+

18 Akoz mon ti bezwen sorti dan vant mon manman

Zis pour mwan vwar bann problenm ek sagrinasyon

E pour mwan mor dan laont?+