Zob
9 Zob ti reponn:
2 “Mon konn byen ki sa i leka.
Me ki mannyer en imen i kapab annan rezon devan Bondye?
3 Si en dimoun i anvi argimant avek Li,*
Sa dimoun pa pou kapab reponn ni menm en kestyon dan mil ki Bondye i demann li.
4 Bondye i annan en kantite lasazes ek pwisans.
Lekel ki kapab reziste li e pa ganny okenn ditor?
5 I deplas* bann montanny san ki dimoun i konnen.
Dan son lakoler, i devir zot anbalao.
6 I sekwe later e fer li sorti dan son plas
Pour ki son bann fondasyon i tranble.
7 I donn lord soley pour pa klere
E i bar lalimyer bann zetwal.
8 I tal lesyel li tousel
E i mars lo bann gro laroul dan lanmer.
10 I fer bann gran keksoz ki personn pa konpran,
Bann keksoz merveye ki pa kapab ganny konte.
11 I pas o bor mwan e mon pa vwar li.
I pas devan mwan, me mon pa rekonnet li.
12 Ler i pran en keksoz, lekel ki pou kapab anpes li?
Lekel ki kapab demann li, ‘Ki ou pe fer?’
13 Bondye pa pou kontrol son lakoler.
Menm bann ki ed Raab* pou tonm azenou devan li.
14 Alor ki mannyer mon pou kapab reponn li?
Eski mon kapab swazir byen mon parol pour argimant avek li?
15 Menm si mon ti annan rezon, mon pa ti pou reponn li.
Mon zis kapab sipliy mon ziz pour pran pitye pour mwan.
16 Si mon kriy li, eski i pou reponn mwan?
Mon pa krwar ki i pou ekout mon lavwa
17 Parski i kraz mwan avek en tanpet
E i fer mwan ganny plis boubou san okenn rezon.
18 I pa donn mwan letan pour respire
I kontinyen fer mwan ganny plis problenm.
19 Si i annan pour fer avek pouvwar, Bondye ki pli for.
Si i annan pour fer avek lazistis, i dir: ‘Lekel ki kapab fer mwan rann kont?’
20 Si mon ti annan rezon, mon prop labous ti pou kondann mwan.
Menm si mon reste fidel,* i pou dir ki mon koupab.
22 Tousala i menm zafer. Sanmenm sa mon dir,
‘I detri sa enn ki inosan* ek sa enn ki move.’
23 Si en linondasyon i touy dimoun en sel kou,
I pou boufonn bann inosan ki dezespere.
24 Later in ganny livre dan lanmen bann move dimoun.
I bous lizye* bann ziz lo later.
Si i pa li, alor lekel?
25 Mon lavi i al pli vit ki en mesaze ki taye.
I ale san ki mon vwar sa ki bon.
26 I glise parey bann bato ki’n ganny fer avek zon,*
Parey bann leg ki desann vit pour atrap en zannimo.
27 Si mon dir, ‘Mon pou oubliye ki mon ti pe plennyen,’
Mon pou aret tris e mon pou zwaye,’
28 Mon pou kontinyen per akoz tou mon douler,
Me mon konnen ki ou pa pou konsider mwan inosan.
29 Mon pou ganny trouve koupab.*
Alor, akfer mon bezwen fatig mwan?
30 Si mon benny dan delo lanez ki’n fonn
E mon lav mon lanmen avek savon,*
31 Alor, ou ti pou plonz mwan dan en trou labou,
Pour ki menm mon prop lenz ti pou ay mwan.
32 Parski i pa en zonm parey mwan pour mwan reponn li,
Pour ki nou al ankour ansanm.
33 Napa personn ki pou kapab dir lekel ki annan rezon
Ki ti pou kapab vin nou ziz.*
34 Si i aret bat mwan
E pa fer mwan per li,
35 Alor, mon pou koz avek li san okenn lafreyer,
Parski mon napa okenn rezon pour per pour koz avek li.