Zob

 2 “Si selman mon ti kapab viv parey avan,

Ler Bondye ti pe vey lo mwan,

 3 Ler son lalanp ti klere par lao mon latet,

Ler son lalimyer ti ed mwan mars dan fernwanr,

 4 Ler mon ti ankor zenn e for,

Ler Bondye ti mon zanmi dan mon latant,

 5 Ler sa Enn Tou Pwisan ti ankor avek mwan,

Ler mon bann zanfan* ti ankor la avek mwan,

 6 Ler mon lipye ti tranpe dan diber

E ler delwil ti koule sorti dan ros pour mwan.

 7 Ler mon ti abitye al kot baro lavil

E asiz dan landrwa piblik,

 8 Ler bann garson ti vwar mwan e les mwan pase*

E menm bann zonm aze ti leve e reste debout.

 9 Bann prens pa ti koze,

Zot ti met zot lanmen devan zot labous.

10 Bann dimoun enportan ti reste trankil,

Zot lalang ti kole lo zot pale.

11 Tou sa ki ti tann mwan ti koz an byen lo mwan

E bann ki ti vwar mwan ti defann mwan.

12 Parski mon ti sov bann pov ki ti kriy osekour

Bann orfelen* e nenport dimoun ki ti napa personn pour ed li.

13 Sa enn ki ti pros pour mor ti beni mwan

E mon ti fer leker bann vev kontan.

14 Mon ti met ladrwatir lo mwan parey en lenz,

Mon lazistis ti parey en rob* ek en tirban.*

15 Mon ti vin lizye bann aveg

E lipye bann ki bwete.

17 Mon ti kas lanmaswar en move dimoun

E mon ti sov sa viktim dan son labous.

18 Mon ti abitye dir, ‘Mon pou mor dan mon prop lakaz*

E mon pou viv en kantite zour parey bann gren disab o bor lanmer.

19 Mon rasin pou ariv ziska kot i annan delo

E laroze pou reste lo mon brans tou lannwit.

20 Mon pou toultan ganny onore

E mon pou kontinyelman tir fles.’

21 Dimoun ti ekout mwan atantivman

E zot ti esper mwan konsey zot.

25 Parey en sef, mon ti gid zot

E mon ti parey en lerwa devan son larme,

Parey sa enn ki rekonfort bann ki dan dey.