Proverb
27 Pa bezwen fer vantar konsernan sa ki ou pou fer demen
Parski ou pa konnen ki pou arive demen.*
2 Les en lot dimoun* felisit ou, pa fer li avek ou prop labous.
Les lezot* fer li, pa fer li avek ou prop lalev.
3 Ros ek disab i lour,
Me problenm ki en dimoun bet i fer i pli lour ki tou le de.
4 Lakoler i kriyel e en gran lakoler i parey en linondasyon,
Me zalouzi i pli pir ki sa.
5 I pli bon si ou koriz en dimoun fran dan plas kasyet ou lanmour.
7 Sa enn ki son vant i plen pa oule* dimyel sorti dan gof,
Me pour dimoun ki lafen, menm manze ki anmer i dou.
8 En dimoun ki kit son lakour
I parey en zwazo ki kit* son nik.
9 Delwil ek lansan i fer leker kontan,
Parey en bon zanmi ki donn konsey ki senser.
10 Pa bezwen abandonn ou zanmi oubyen zanmi ou papa
E pa bezwen antre dan lakaz ou frer ler ou dan problenm.
Vomye en vwazen ki reste o bor ou ki en frer ki reste lwen.
12 En dimoun ki pridan i kasyet ler i vwar danze,
Me sa enn ki napa leksperyans i kontinyen ale e i pey konsekans.
13 Pran lenz en dimoun si i’n promet pour responsab det en etranze.
Pran sa garanti si i’n fer sa promes avek en madanm etranze.*
14 Ler en dimoun i koz for pour li beni son prosen granmaten,
Sa pou ganny konsidere konman en malediksyon pour li.
15 En madanm ki kontan fer kankan* i parey twa en lakaz ki kontinyen koule ler lapli i tonbe.
16 Sa enn ki kapab kontrol li i kapab kontrol divan
E i kapab tyonbo delwil dan son lanmen drwat.
18 Sa enn ki pran swen avek en pye fig pou manz son fri
E en dimoun ki pran swen avek son met pou ganny onore.
19 Zis parey en dimoun i kapab vwar son figir dan delo,
Leker en dimoun i parey leker en lot dimoun.
20 Latonm ek landrwa destriksyon* pa zanmen satisfe,
Lizye en dimoun osi pa zanmen satisfe.
21 Larzan* i ganny pirifye dan en resipyan anter* e lor dan four,
Me en dimoun i ganny teste ler i ganny felisite.*
22 Menm si ou kraz en dimoun bet dan en mortye
Parey ou kraz lagrenn,
I pou kontinyen fer bann keksoz bet.
23 Ou devret konn byen ki mannyer ou troupo i ete.
Pran byen swen avek* ou bann mouton,
24 Parski larises pa reste pour touzour
E en kouronn* pa reste pour tou bann zenerasyon.
25 Zerb ver i mor, nouvo zerb i pouse
E dimoun i anmas zerb lo bann montanny.
26 Bann zenn mal mouton i fer ou ganny lenz pour mete
E bann mal kabri i fer ou kapab aste en plantasyon.
27 I pou annan ase dile kabri pour ou,
Pour ou fanmir e pour ou bann servant.