Premye liv Samyel
3 Antretan, sa pti garson Samyel ti pe servi Zeova anba responsabilite Eli. Sa letan, i ti rar ki Zeova ti koz avek bann imen e i ti napa bokou vizyon.
2 En zour, Eli ti pe alonze dan son plas parey labitid. Sa letan, son lizye ti’n vin sonm, alor i pa ti kapab vwar kler. 3 Lalanp Bondye pa ti ankor tennyen e Samyel ti pe alonze dan tanp* Zeova kot Lars* Bondye ti ete. 4 Apre, Zeova ti kriy Samyel. I ti reponn: “La mon la.” 5 I ti tay kot Eli e dir: “La mon la, ou’n kriy mwan?” Me Eli ti dir: “Non, mon pa’n kriy ou. Retourn dan ou plas.” Alor i ti retourn dan son plas. 6 Zeova ti kriy li ankor en fwa: “Samyel!” Alor Samyel ti leve, al kot Eli e dir: “La mon la, ou’n kriy mwan?” Me Eli ti dir: “Non mon garson, mon pa’n kriy ou. Retourn dan ou plas.” 7 (Samyel pa ti ankor aprann konn Zeova e Zeova pa ti’n deza koz avek li.) 8 Alor Zeova ti kriy en trwazyenm fwa: “Samyel!” Alor i ti leve, al kot Eli e dir: “La mon la, ou’n kriy mwan?”
Eli ti realize ki Zeova ki ti pe kriy sa garson. 9 Alor Eli ti dir Samyel: “Al alonze e si i kriy ou ankor, ou devret dir, ‘Silvouple Zeova koz avek ou serviter, parski mon pe ekout ou.’” Alor Samyel ti ale e alonz dan son plas.
10 Zeova ti vini e zis parey lezot fwa, i ti kriye: “Samyel, Samyel!” Alor Samyel ti dir: “Silvouple koz avek ou serviter, parski mon pe ekout ou.” 11 Zeova ti dir Samyel: “Gete! Mon pe fer en keksoz dan Izrael ki pou fer tou dimoun ki tande soke.* 12 Sa zour, mon pou fer tou sa ki mon ti’n dir konsernan Eli ek son fanmir,* depi konmansman ziska finisyon. 13 Ou bezwen dir li ki mon pou pas en zizman lo son fanmir ki pou dire pour touzour akoz bann fot ki son bann garson in fer. I konnen ki son bann garson pe modi Bondye me i pa’n koriz zot. 14 I pour sa rezon ki mon’n fer serman avek fanmir Eli ki bann sakrifis oubyen lofrann pa pou zanmen kapab kouver bann pese son fanmir.”
15 Samyel ti alonze ziska bomaten, apre i ti ouver bann laport lakaz Zeova. Samyel ti per pour rakont Eli sa vizyon. 16 Me Eli ti kriy Samyel: “Samyel mon garson!” Samyel ti reponn: “La mon la.” 17 Eli ti demann li: “Ki mesaz i’n donn ou? Silvouple, pa kasyet nanryen avek mwan. Ki Bondye i pini ou severman* si ou kasyet menm en mo avek mwan dan tou sa ki i’n dir ou.” 18 Alor Samyel ti rakont li tou keksoz, san kasyet nanryen. Eli ti dir: “Sa i lavolonte Zeova. Les li fer sa ki byen dan son lizye.”
19 Samyel ti kontinyen grandi e Zeova ti avek li. Bondye ti fer ki tou parol Samyel ti ganny akonplir.* 20 Tou dimoun Izrael, depi Dann ziska Beer-Seba, ti konnen ki Zeova ti’n swazir Samyel konman son profet. 21 Zeova ti kontinyen aparet Silo parski laba ki Zeova ti fer Samyel konn li e laba ki Zeova ti koz avek Samyel.