Izai
34 Zot sa bann nasyon, vin pros pour zot tande
E zot sa bann pep, ekout byen.
Ki later ek tou sa ki ladan, i ekoute,
Later ek tou sa ki viv lo la.
2 Parski Zeova i ankoler avek tou bann nasyon+
E i vreman ankoler avek tou zot larme.+
I pou detrir zot konpletman.
I pou fer zot ganny touye.+
3 Bann dimoun ki’n ganny touye pou ganny zet deor
E loder sa bann lekor mor pou monte.+
Zot disan pou fer bann montanny fonn.*+
4 Tou bann larme dan lesyel pou pouri
E lesyel pou ganny roule parey en roulo.
Tou zot larme pou fletri,
Parey en fey sek lo en pye rezen i tonbe
E parey en fig sek lo en pye fig i tonbe.
5 “Parski mon lepe ki dan lesyel pou tou tranpe.+
I pou desann pour ziz Edonm,+
Sa pep ki mon’n deside pour detrir konpletman.
6 Zeova i annan en lepe ki pou kouver avek disan.
I pou kouver avek lagres,+
Avek disan bann zenn mal mouton ek kabri,
Avek lagres ki lo ronnyon bann mal mouton.
Parski Zeova i annan en sakrifis dan lavil Bozra,
I’n touy en kantite dimoun dan pei Edonm.+
7 Bann toro maron pou desann avek zot,
Bann zenn toro ek bann gro toro.
Zot later pou ranpli avek disan
E zot lapousyer pou tou tranpe avek lagres.”
8 Parski Zeova i annan en zour pour revanze,+
En lannen kot i pou pini bann ki’n fer sa ki mal avek Siyon.+
9 Son* bann pti larivyer pou vin koltar,*
Son lapousyer pou vin souf*
E son pei pou vin parey koltar ki pe brile.
10 I pa pou tennyen ni lizour ni aswar.
Son lafimen pou kontinyen monte pour touzour.
I pou reste konman en landrwa ki’n ganny detrir, zenerasyon apre zenerasyon.
Personn pa pou pas laba pour touzour e touzour.+
11 Pelikan ek tang* pou reste laba
E bann ibou gran zorey ek bann korbo pou reste laba.
Bondye pou servi sa lakord ki mezire ek filaplon*
Pour montre ki i vid e pa vo nanryen.
12 Ni enn son bann dimoun enportan pa pou vin lerwa
E tou son bann prens pou vin bann nanryen ditou.
13 Bann pye pikan pou pouse dan son bann gran latour,
Touf pikan ek move zerb pou pouse dan son bann lavil for.
I pou vin en landrwa kot bann sakal* i reste,+
En landrwa kot bann lotris* i reste.
14 Zannimo ki reste dan dezer pou zwenn bann zannimo ki irle
E bann kabri maron* pou kriy avek kanmarad.
Wi, en zwazo ki anvol aswar* pou al reste laba pour repoze.
15 Serpan* pou fer son nik laba e i pou ponn dizef,
I pou sof zot e i pou met son bann piti anba li.
Wi, bann papang* pou al laba, sak femel avek son mal.
16 Rode dan liv Zeova e lir for:
Napa en zannimo ki pou manke.
Zot tou zot pou annan zot mal ek femel,
Parski Zeova ki’n donn sa lord
E son lespri sen ki’n rasanble zot ansanm.
17 Li menm ki’n tir osor* pour zot
E son prop lanmen ki’n mezir sa landrwa ki zot in gannyen.*
I pou vin pour zot pour touzour.
Zot pou reste laba, zenerasyon apre zenerasyon.