Izai
13 En mesaz kont Babilonn+ ki Izai+ garson Amoz ti gannyen dan en vizyon:
2 “Met en poto sinyal+ lo en montanny ki annan zis ros.
Kriy zot, lev lanmen avek zot,
Pour zot kapab antre dan larantre bann dimoun enportan.
3 Mon’n donn lord bann dimoun ki mon’n swazir.*+
Mon’n rasanble mon bann gerye pour montre ki mon ankoler,
Zot dan lazwa e zot fyer.
4 Ekoute! I annan en lafoul dimoun dan bann montanny.
I paret ki i annan en kantite dimoun!
Ekoute! Bann rwayonm pe fer tapaz,
Sa i bann nasyon ki’n rasanble ansanm!+
Zeova Sef larme pe rasanble en larme pour lager.+
5 Zeova ek bann zarm ki i pou servi akoz i ankoler
Pe vini, sorti dan en pei byen lwen,+
Dan bout lesyel,
Pour detrir later antye.+
6 Plere, parski zour Zeova i pros!
Sa zour, sa Enn Tou Pwisan pou detrir tou keksoz.+
7 I pour sa rezon ki lebra tou dimoun pou tonbe
8 Bann dimoun pe panik.+
Zot pe tranble e zot dan douler
Parey en madanm ki pe ganny pti baba.
Zot get kanmarad dan sok,
Zot figir i montre ki zot per.
9 Gete! Zour Zeova pe vini,
Sa zour i kriyel avek firer ek gran lakoler.
I pou fer bann dimoun soke ler zot vwar ki’n arive avek sa pei+
E i pou detrir tou dimoun ki fer pese dan sa pei.
10 Parski bann zetwal dan lesyel ek zot bann group zetwal*+
Pa pou alimen.
Soley pou sonm ler i leve
E lalin pa pou klere.
11 Mon pou fer later* rann kont pour bann move keksoz ki i’n fer+
E mon pou fer bann move dimoun rann kont pour zot fot.
Mon pou fer bann dimoun arogan aret fyer
E mon pou abes bann diktater ki arogan.+
12 Mon pou fer dimoun* vin pli rar ki lor pir+
E bann imen vin pli rar ki lor sorti Ofir.+
13 I pour sa rezon ki mon pou fer lesyel tranble.
Mon pou sekwe later e fer li sorti dan son plas.+
Zeova Sef larme pou fer sa avek lakoler, zour son gran lakoler.
14 Parey en gazel ki pe ganny sase e parey en troupo ki napa personn pou rasanble li,
Sak dimoun pou retourn kot son pep.
Sak dimoun pou sove e al dan son prop pei.+
15 Sa ki ganny trouve pou ganny pike
E sa ki ganny tyonbo pou ganny touye avek lepe.+
16 Zot bann zanfan pou ganny kraze devan zot,+
Zot pou vol bann keksoz dan zot lakaz
E zot bann madanm pou ganny vyole.
17 Mon pe fer bann Med atak zot.+
Larzan pa nanryen pour zot
E zot pa enterese avek lor.
18 Zot bann lark* pou kas bann garson an morso.+
Zot pou napa pitye pour bann pti baba,*
Ni konpasyon pour bann zanfan.
19 Babilonn ki annan plis laglwar* parmi bann rwayonm,+
Labote ek lafyerte bann Kaldeen,+
Pou vin parey Sodonm ek Gomor ler Bondye ti detrir zot.+
20 Personn pa pou reste laba ankor,
I pou nepli en landrwa reste, zenerasyon apre zenerasyon.+
I pou napa okenn Arab ki pou mont son latant laba,
Ni okenn berze ki pou fer son troupo repoz laba.
21 Bann zannimo ki reste dan dezer pou dormi laba.
Zot bann lakaz pou ranpli avek bann ibou.*
Bann lotris* pou reste dan sa landrwa+
E bann kabri maron* pou sot sote laba.
22 Bann zannimo ki irle pou kriye dan son bann latour
E bann sakal* pou kriye dan son bann zoli pale.
Son letan i pros e son zour pa pou ganny anvoye pour pli tar.”+