Zeremi
28 Dan sa menm lannen, ler Zedekya+ ti’n fek vin lerwa Zida, dan katriyenm lannen, dan senkyenm mwan, profet Ananya garson Azour ki sorti Gibeonn+ ti koz avek mwan dan lakaz Zeova, devan bann pret e devan tou dimoun e i ti dir mwan: 2 “La sa ki Zeova Sef larme, Bondye Izrael, i dir, ‘Mon pou kas zoug* lerwa Babilonn.+ 3 Dan sa de-z-an ki vini, mon pou fer zot retourn avek tou sa bann keksoz ki ti dan lakaz Zeova ki Neboukadnezar lerwa Babilonn ti pran dan sa landrwa e anmenn Babilonn.’”+ 4 “La sa ki Zeova i dir, ‘Mon pou fer Zekonya+ garson Zeoyakim,+ lerwa Zida, retourn dan sa landrwa ansanm avek tou dimoun Zida ki’n al an egzil Babilonn,+ parski mon pou kas zoug lerwa Babilonn.’”
5 Apre, profet Zeremi ti koz avek profet Ananya devan bann pret e devan tou dimoun ki ti pe debout dan lakaz Zeova. 6 Profet Zeremi ti dir: “Amenn!* Ki Zeova i fer sa! Ki Zeova i fer sa profesi ki ou’n dir vin vre e fer zot retourn avek sa bann keksoz ki zot ti pran dan lakaz Zeova e ki zot ti anmenn Babilonn, ansanm avek tou dimoun ki’n al an egzil! 7 Me silvouple, ekout sa mesaz ki mon pe dir ou ek tou dimoun. 8 Depi lontan, bann profet ki ti la avan mwan e avan ou ti abitye dir bann profesi konsernan lager, maler ek lepidemi* ki pou arive dan en kantite pei e dan bann gran rwayonm. 9 Si en profet i dir bann profesi konsernan lape e sa ki i’n dir i vin vre, tou dimoun pou konnen ki Zeova menm ki’n anvoy sa profet.”
10 Alor profet Ananya ti tir sa bar dibwa* lo likou profet Zeremi e i ti kas sa bar dibwa.+ 11 Apre, Ananya ti dir sa devan tou dimoun: “La sa ki Zeova i dir, ‘Koumsanmenm ki mon pou kas zoug Neboukadnezar lerwa Babilonn ki lo likou tou bann nasyon, dan sa de-z-an ki vini.’”+ Apre, profet Zeremi ti pran son semen e i ti ale.
12 Apre ki profet Ananya ti’n kas sa bar dibwa ki ti lo likou profet Zeremi, Zeova ti koz avek Zeremi e i ti dir li: 13 “Al dir Ananya, ‘La sa ki Zeova i dir: “Ou’n kas bann bar dibwa,+ me ou pou fer bann bar feray pour ranplas zot.” 14 Parski la sa ki Zeova Sef larme, Bondye Izrael, i dir: “Mon pou met en bar feray lo likou tou sa bann nasyon pour zot servi Neboukadnezar lerwa Babilonn e zot pou bezwen servi li.+ Mon pou menm donn li bann zannimo sovaz dan lakanpanny.”’”+
15 Apre, profet Zeremi ti dir profet Ananya:+ “Ananya, silvouple ekoute! Zeova pa’n anvoy ou, me ou’n fer sa pep krwar en mansonz.+ 16 Alor la sa ki Zeova i dir, ‘Gete! Mon pou detrir ou konpletman lo later. Ou pou mor sa lannen, parski ou’n ankouraz sa pep pour rebel kont Zeova.’”+
17 Alor profet Ananya ti mor sa menm lannen, dan setyenm mwan.