Deterononm
33 La sa benediksyon ki Moiz, serviter* sa vre Bondye ti donn bann Izraelit avan son lanmor. 2 I ti dir:
“Zeova ti vini sorti Sinai
E i ti ekler zot sorti Seir.
Son laglwar ti briye sorti dan bann montanny Parann
E i ti annan plizyer dizenn milye lanz sen avek li,
Lo son kote drwat, i ti annan son bann gerye.
3 I ti annan lafeksyon pour son pep.
Bann sen dan ou pep i dan ou lanmen.
Zot ti pe asize kot ou lipye,
Zot ti konmans ekout ou bann parol.
4 (Moiz ti donn nou en lord, en lalwa,
Ki’n vin pour pep* Zakob.)
6 Ki Ribenn i kontinyen viv e i pa mor,
Ki son bann zonm pa vin en pti gin.”
7 I ti donn Zida sa benediksyon:
“O Zeova, ekout Zida,
Ki ou reanmenn li kot son pep.
Son lanmen in defann* sa ki pour li
E ki ou ed li ranport laviktwar lo son bann lennmi.”
8 I ti dir lo Levi:
“Ou* Toumim ek Ourim i pour sa zonm ki fidel avek ou,
Sa enn ki ou ti teste Masa.
Ou ti konmans lalit avek li o bor delo Meriba.
9 Sa zonm ki ti dir son papa ek manman, ‘Mon pa’n pran konsiderasyon pour zot.’
Menm son bann frer, i pa ti rekonnet zot
E i ti inyor son bann garson.
Parski zot ti obei ou parol
E zot ti gard ou lalyans.
10 Ki zot ansenny Zakob ou bann lareg
E Izrael ou Lalwa.
Ki zot ofer lansan konman en bon loder pour ou*
E ki en lofrann i ganny brile konpletman lo ou lotel.
11 O Zeova, beni son lafors
E pran plezir dan son travay.
Kraz lipye* bann ki vin atak li,
Pour ki bann ki ay li i nepli atak li ankor.”
12 I ti dir lo Benzamen:
“Ki sa enn ki Zeova i kontan i reste o bor li an sekirite.
Ki i protez li pandan lazournen antye
E i pou reste lo son ledo.”*
13 I ti dir lo Zozef:
“Ki Zeova i beni son pei
Avek bann bon keksoz sorti dan lesyel,
Avek laroze ek delo sorti dan bann sours ki anba later,
14 Avek bann bon keksoz ki soley i fer pouse
E bann bon rekolt tou le mwan,
15 Avek bann pli bon keksoz sorti lo bann montanny ki la depi lontan
E bann bon keksoz sorti lo bann pti montanny ki toultan la,
16 Avek bann bon keksoz ki lo later e ki ranpli later
E avek laprouvasyon sa Enn ki reste dan sa brousay.
Ki tousala i vin lo latet Zozef,
Anler lo latet sa enn ki’n ganny swazir parmi son bann frer.
17 Son labote i parey pour en toro premye ne
E son bann korn i parey korn en toro maron.
Avek son korn, i pou pous* bann pep,
Tou sa bann pep ziska lot bout later.
Sa i bann dizenn milye Efraim
E bann milye Manase.
18 I ti dir lo Zeboulonn:
“O Zeboulonn, ou pou dan lazwa ler ou pe ale
E ou Isakar, ou pou dan lazwa ler ou dan ou latant.
19 Zot pou kriy bann pep pour al lo montanny.
Laba zot pou ofer bann sakrifis ladrwatir.
Parski zot pou pran* dan sa kantite larises ki dan lanmer
E dan bann trezor ki’n kasyet dan disab.”
20 I ti dir lo Gad:
“Beni sa enn ki agrandi lafrontyer Gad.
Laba i alonze parey en lyon,
Pare pour desir en lebra, wi, menm en latet.
21 I pou swazir sa premye bout pour li
Akoz laba sa bout in ganny rezerve pour sa enn ki donn lalwa.
Bann sef lepep pou rasanble ansanm.
I pou fer sa ki drwat devan Zeova
E obei lalwa avek Izrael.”
22 I ti dir lo Dann:
“Dann i en pti lyon.
I pou lanse sorti Basann.”
23 I ti dir lo Naftali:
“Naftali i satisfe akoz i ganny laprouvasyon Bondye
E bokou benediksyon Zeova.
Pran bann rezyon dan was ek sid.”
24 I ti dir lo Aser:
“Aser pou ganny beni avek en kantite garson.
Ki i ganny laprouvasyon son bann frer
E ki i tranp* son lipye dan delwil.
25 Ou bann lok baro i an fer ek kwiv
E ou pou an sekirite tou dilon ou lavi.*
26 Napa enn ki parey sa vre Bondye Zesouroun,
Sa Enn ki travers lesyel pour ed ou
E ki deplase lo bann nyaz dan son laglwar.
27 Bondye i en landrwa kasyet depi lontan,
I tyonbo ou avek son lebra eternel.
I pou pous ou bann lennmi devan ou
E i pou dir, ‘Detri zot konpletman!’
28 Izrael pou viv an sekirite
E bann desandans* Zakob pa pou ganny atake
Dan en pei kot i annan dible ek nouvo diven,
Kot laroze i koule sorti dan lesyel.
29 O Izrael, ou ere!
Lekel ki parey ou,
Sa pep ki Zeova in sove?
I ou boukliye ki protez ou
E ou gran lepe.
Ou lennmi pou tranble devan ou
E ou pou mars lo zot ledo.”*