Psonm
En sanson David.
141 O Zeova, mon priy ou.
Silvouple, depese pour vin ed mwan.
Ekout mwan ler mon priy ou.
2 Ki mon lapriyer i parey lansan ki’n ganny prepare devan ou,
Ki ler mon ouver mon lanmen pour priy ou i parey lofrann lagrenn aswar.
3 O Zeova, met en gardyen devan mon labous,
Ed mwan pour vey sa ki mon dir.*
4 Pa les mon leker anvi fer sa ki mal,
Pour ki mon pa partisip dan sa ki mal avek bann move dimoun.
Mon pa pou zanmen manz zot bann bon manze.
5 Si en dimoun ki fer sa ki byen i tap mwan, sa ti pou montre ki i annan lanmour fidel pour mwan.
Si i koriz mwan, i ti pou konmsi i’n vid delwil lo mon latet
E mon pa ti pou zanmen refize.
Mon pou kontinyen priy pour li, menm ler i pas dan maler.
6 Zot bann ziz in ganny zete dan en ranpar,
Me dimoun pou ekout mon parol, parski zot agreab.
7 Zis parey en dimoun i labour e kas later,
Koumsanmenm ki nou bann lezo in ganny disperse kot Latonm.*
8 O Souvren Senyer Zeova, mon depan lo ou.*
Mon’n rod ou proteksyon.
Pa bezwen pran mon lavi.
9 Protez mwan pour ki mon pa tonm dan pyez ki zot in mete pour mwan,
Dan latrap bann move dimoun.
10 Bann move dimoun pou tonm dan zot prop lasenn, zot tou ansanm
Me mwan, mon pou pas o bor zot an sekirite.