Premye liv Samyel

4 Samyel ti koz avek Izrael antye.

En zour, Izrael ti al lager avek bann Filisten. Zot ti enstal zot kan o bor Ebenezer e bann Filisten ti enstal zot kan Afek. 2 Bann Filisten ti organiz zot pour al lager avek Izrael, me bann Izraelit ti konmans perdi lager e bann Filisten ti ganny laviktwar. Zot ti touy apepre 4,000 zonm lo fron batay dan laplenn. 3 Ler bann solda ti retourn dan kan, bann ansyen Izrael ti dir: “Akoz Zeova in les bann Filisten bat* nou ozordi?+ Annou al sers lars* lalyans Zeova ki Silo,+ koumsa i pou avek nou e sov nou dan lanmen nou bann lennmi.” 4 Alor bann dimoun ti anvoy bann zonm Silo e zot ti pran lars lalyans Zeova Sef larme, sa Enn ki pe asiz lo son tronn par lao* bann seriben.*+ Ofni ek Fineas+ sa de garson Eli ti osi la ler lars lalyans sa vre Bondye ti pe ganny anmennen.

5 Dek ki lars lalyans Zeova ti ariv dan kan bann Izraelit, zot tou zot ti konmans kriye e sa ti fer later tranble. 6 Ler bann Filisten ti tann sa tapaz, zot ti dir: “Akoz zot pe kriye koumsa laba dan kan bann Ebre?” Finalman, zot ti tande ki Lars Zeova ti’n ariv dan kan bann Izraelit. 7 Bann Filisten ti konmans per e zot ti dir: “Bondye in antre dan kan!”+ Alor zot ti dir: “Pov nou, zanmen sa in deza arive avan! 8 Pov nou! Lekel ki pou sov nou dan lanmen sa Bondye pwisan? Li menm sa Bondye ki ti frap Lezip avek tou sort kalite maler dan dezer.+ 9 Pran kouraz bann Filisten e fer parey bann vre zonm. Koumsa, zot pa pou bezwen vin serviter bann Ebre zis parey zot ti nou bann serviter.+ Azir parey bann vre zonm e lager!” 10 Alor bann Filisten ti lager e Izrael ti ganny bate.+ Bann Izraelit ti sove e sakenn ti al dan son latant. Zot ti ganny masakre: lo kote Izrael, 30,000 solda apye ti ganny touye. 11 An plis, bann Filisten ti pran Lars Bondye e Ofni ek Fineas sa de garson Eli ti ganny touye.+

12 Sa menm zour, en zonm sorti dan tribi Benzamen ti taye depi lo fron batay ziska Silo, son lenz ti’n desire e i ti annan lapousyer lo son latet.+ 13 Ler sa zonm ti arive, Eli ti pe asize lo sez o bor semen pe veye parski i ti vreman enkyet* konsernan Lars sa vre Bondye.+ Sa zonm ti al dan lavil pour donn zot nouvel e tou dimoun dan lavil ti konmans kriye. 14 Ler Eli ti tann sa leokri, i ti demande: “Akoz zot pe kriye?” Sa menm zonm ti degaze e vin dir Eli sa ki ti’n arive. 15 (Eli ti annan 98 an e i ti zis get dan vid me i pa ti vwar kler.)+ 16 Apre, sa zonm ti dir Eli: “Mwan menm mon sa enn ki sorti lo fron batay! Ozordi menm mon’n sove laba.” Alor Eli ti demann li: “Ki’n arive mon garson?” 17 Alor sa mesaze ti rakont li sa ki’n arive: “Izrael in sove devan bann Filisten e en kantite dimoun in ganny touye parmi lepep.+ Osi, ou de garson, Ofni ek Fineas in mor+ e bann Filisten in pran Lars sa vre Bondye.”+

18 Dek ki sa zonm ti mansyonn Lars sa vre Bondye, Eli ti tonm par ledo lo son sez ki ti o bor baro, kas son likou e i ti mor, parski i ti vye e lour. I ti’n ziz Izrael pour 40 an. 19 Son belfiy ki ti’n marye avek Fineas ti ansent e pros pour ganny son pti baba. Ler i ti tande ki zot ti’n pran Lars sa vre Bondye e ki son boper ek son msye ti’n mor, en sel kou i ti bese dan douler lakousman e i ti ganny son pti baba. 20 Zis avan i mor, bann madanm ki ti pe debout o bor li ti dir: “Pa bezwen per, parski ou’n ganny en pti garson.” I pa ti reponn zot e i pa ti pran kont* sa ki zot ti’n dir. 21 Me i ti apel sa pti garson Ikabod*+ e dir: “Sa ki ti donn laglwar Izrael in al an egzil.”+ I ti dir sa akoz bann Filisten ti’n pran Lars sa vre Bondye e lefet ki son boper ek son msye ti’n mor.+ 22 I ti dir: “Sa ki ti donn laglwar Izrael in al an egzil, parski zot in pran Lars sa vre Bondye.”+