Psonm
En sanson David.
143 O Zeova, ekout mon lapriyer.
Ekout mwan ler mon sipliy ou pour ed mwan.
Reponn mwan akoz ou fidelite ek ladrwatir.
2 Pa ziz ou serviter,
Parski napa personn vivan ki inosan* devan ou.
3 Parski mon lennmi i tay deryer mwan
I’n zet mwan ater e pil lo mwan.*
I’n fer mwan reste dan fernwanr parey dimoun ki’n mor depi lontan.
4 Mon lespri i fatige,*
Mon leker i angourdi anndan mwan.
5 Mon mazin dan letan lontan.
Mon medit lo tou sa ki ou’n fer.
Mon kontan reflesi lo* bann keksoz ki ou’n fer.
6 Mon lev mon lanmen pour priy ou.
Mon pe esper* ou parey later sek ki bezwen lapli. (Sela)
7 O Zeova, pa tarde pour reponn mwan.
Mon nepli annan lafors.
Pa kasyet ou figir avek mwan,
Si non, mon pou vin parey bann ki pe desann dan trou.*
8 Dan bomaten, les mwan tann konsernan ou lanmour fidel,
Parski mon annan konfyans dan ou.
Montre mwan sa semen ki mon devret mars lo la,
Parski mon depan lo ou.
9 O Zeova, sov mwan dan lanmen mon bann lennmi.
Mon rod ou proteksyon.
10 Ansenny mwan pour fer ou lavolonte,
Parski ou mon Bondye.
Ou bon,
Ki ou lespri sen i gid mwan dan en landrwa plat.*
11 O Zeova, gard mwan vivan akoz ou non.
Sov mwan dan problenm akoz ou ladrwatir.
12 Akoz ou lanmour fidel, touy mon bann lennmi.
Detri tou bann ki persekit mwan,
Akoz mwan mon ou serviter.