Psonm

Lanmizik ek sanson David.

108 Mon fidel,* O Bondye.

Mon pou sant e zwe lanmizik avek tou mon leker.*

2 Leve, lenstriman lakord e ou osi larp.

Mon pou lev granmaten.

3 O Zeova, mon pou loue ou parmi bann pep.

Mon pou sante* pour loue ou parmi bann nasyon.

4 Parski ou lanmour fidel i gran, i ariv ziska dan lesyel

E ou fidelite i ariv ziska dan lesyel.

5 O Bondye, montre ki ou pli gran ki lesyel.

Ki ou ganny glorifye partou lo later.

6 Sov nou avek ou lanmen drwat e reponn nou,

Pour ki dimoun ki ou kontan i ganny delivre.

7 Bondye ki sen* in dir:

“Mon pou dan lazwa, mon pou donn Sekenm konman en leritaz

E mon pou mezir Vale* Soukot.

8 Gilead i pour mwan e Manase osi.

Efraim i en kask* pour mon latet.

Zida i mon baton komandan.

9 Moab i mon kivet bennyen.

Mon pou zet mon sandalet lo Edonm.

Mon pou selebre akoz Filisti in ganny defet.”

10 Lekel ki pou anmenn mwan kot en lavil for?*

Lekel ki pou anmenn mwan ziska Edonm?

11 O Bondye, ou nepli diriz nou larme.

Nou Bondye, pa ou ki’n rezet nou?

12 Ed nou ler nou dan problenm,

Parski i pa vo lapenn esper bann imen sov nou.

13 Bondye pou redonn nou lafors

E i pou pil lo nou bann lennmi.