Zeremi
10 Pep Izrael, ekout sa ki Zeova in dir kont zot. 2 La sa ki Zeova i dir:
“Pa bezwen aprann sa ki bann nasyon i fer
E pa bezwen per bann siny ki dan lesyel
Parski bann nasyon ki per sa bann siny.
3 Parski koutim sa bann pep pa vo nanryen.*
I zis en pye dibwa dan lafore ki’n ganny koupe,
Ki en artizan in fer avek son zouti.*
4 Zot dekor li avek larzan* ek lor
E zot servi marto ek klou pour klout li pour li pa tonbe.
5 Zot pa kapab koze parey sa bann poupet* ki zot met dan plantasyon kokonm pour fer bann zwazo per.
Zot bezwen ganny anmennen parski zot pa kapab marse.
Pa bezwen per zot parski zot pa kapab fer okenn dimal
E zot pa ni kapab fer sa ki byen.”
6 O Zeova, napa personn ki parey ou.
Ou gran e ou non i gran e pwisan.
7 Lerwa bann nasyon, lekel ki pa pou annan en gran respe pour ou? Parski ou merite.
Parski parmi tou bann dimoun saz dan bann nasyon e parmi tou zot bann rwayonm,
Napa personn parey ou.
8 Zot tou zot pa kapab reflesi e zot bet.
Lenstriksyon ki en pye dibwa i donnen pa vo nanryen.*
9 Zot enport bann plak annarzan sorti Tarsis ek lor sorti Oufaz
Ki en artizan ek en forzron* i servi pour travay avek.
Zot lenz i ganny fer avek difil ble ek lalenn mov.
Bann artizan ki annan abilite ki fer zot tou.
10 Me Zeova ki sa vre Bondye.
I sa Bondye vivan e Lerwa pour touzour.
Later pou tranble akoz son lakoler
E napa en nasyon ki pou kapab siport son lakoler.
11* La sa ki zot devret dir zot:
“Sa bann bondye ki pa’n fer lesyel ek later
Pou ganny detrir lo later e anba sa lesyel.”
12 I sa Enn ki’n fer later avek son lafors,
Sa Enn ki ti etabli later* avek son lasazes
E ki ti tal lesyel avek son lentelizans.
I fer zekler tape e lapli tonbe*
E i fer divan sorti dan son bann stor.
14 Tou dimoun pa rezonnab e zot napa konnesans.
15 Zot pa vo nanryen,* dimoun i annan rezon monk zot.
Zot pou ganny detrir ler sa zour kot zot pou bezwen rann kont i arive.
16 Bondye* Zakob pa parey sa bann keksoz,
Parski i sa Enn ki’n fer tou keksoz
E Izrael i baton son leritaz.
I apel Zeova Sef larme.
17 Anmas ou bann keksoz ki ater,
Ou sa madanm ki’n ganny anserkle.
18 Parski la sa ki Zeova i dir:
“Mon pe pous bann zabitan dan sa pei la konmela
E mon pou fer zot soufer.”
19 Maler lo mwan akoz mon blesir!*
Napa nanryen ki kapab geri mon blesir.
Mon ti dir: “Sirman sa i mon maladi e mon bezwen siporte.
20 Mon latant in ganny detrir e tou bann lakord avek mon latant in ganny koupe.
Mon bann garson in kit mwan e zot nepli la.
Napa personn ki reste pour redi mon latant oubyen pour lev mon bann latwal latant.
21 Parski bann berze in azir dan en fason bet
E zot pa’n demann Zeova gidans.
Sanmenm sa zot pa’n azir avek bon zizman
E tou zot bann troupo in ganny disperse.”
22 Ekout sa nouvel! I pe vini!
En gro deboulir pe vini sorti dan sa pei ki dan nor,
Pour fer bann lavil Zida vin en landrwa abandonnen, en landrwa kot bann sakal* i reste.
23 O Zeova, mon konn tre byen ki en dimoun pa kapab swazir son prop semen.
En dimoun ki pe marse pa ni menm konnen kote i pou met son lipye.
24 O Zeova, koriz mwan dapre ou zizman,
Me pa fer li dan lakoler pour ki ou pa detri mwan.
25 Devid ou lakoler lo bann nasyon ki inyor ou
E lo bann fanmir ki pa loue* ou non.
Parski zot in touy bann desandans Zakob,
Wi, zot ti pros pour detri li
E zot in detri son pei.