Ezekyel

22 Zeova ti koz avek mwan ankor enn fwa e dir: 2 “Ou garson zonm, eski ou’n pare pour donn sa lavil son zizman,* sa lavil ki koupab pour touy dimoun+ e fer li konn tou son bann keksoz degoutan ki i’n fer?+ 3 Ou devret dir, ‘La sa ki Souvren Senyer Zeova i dir: “Ou, lavil ki touy* en kantite dimoun,+ ou letan pe vini.+ Ou fer bann zidol degoutan* pour fer ou vin enpir,+ 4 ou koupab pour touy dimoun+ e ou bann zidol degoutan in fer ou vin enpir.+ Ou’n fer lafen ou bann zour vin pli vit e lafen ou bann lannen in arive. Sanmenm sa mon pou fer bann nasyon mal koz ou e tou bann pei monk ou.+ 5 Bann pei ki pros avek ou ek bann ki lwen pou boufonn ou.+ Ou non i enpir e i annan en kantite dezord kot ou. 6 Sak sef Izrael i servi son lotorite pour touy* dimoun.+ 7 Dan sa pei, zot mepriz zot papa ek zot manman.+ Zot vol bann etranze e zot pa tret bann orfelen* ek vev byen.”’”+

8 “‘Ou mepriz mon bann landrwa sen e ou mank respe pour mon bann saba.+ 9 I annan dimoun kot ou ki malparl lezot e ki anvi touy* dimoun.+ Zot manz sa ki’n ganny ofer konman sakrifis lo bann montanny e zot annan en move kondwit.+ 10 I annan dimoun kot ou ki dezonor lili zot papa*+ e zot vyol en madanm ki enpir ler i pe ganny son peryod.+ 11 I annan en zonm kot ou ki fer bann keksoz degoutan avek madanm son prosen,+ en lot ki fer bann keksoz ki fer onte avek son belfiy+ e en lot i vyol son ser, fiy son prop papa.+ 12 I annan dimoun kot ou ki pran gous pour touy dimoun.+ Ou pret larzan avek lentere+ oubyen pour fer profi* e ou pran larzan ou prosen pardfors.+ Wi, ou’n oubliy mwan konpletman.’ La sa ki Souvren Senyer Zeova in dir.

13 “‘Mon bat mon lanmen avek degou ler mon vwar profi malonnet ki ou’n fer e sa bann dimoun ki’n ganny touye kot ou. 14 Eski ou pou annan ase kouraz* e eski ou lanmen pou reste for ler mon pran aksyon kont ou?+ Mwan Zeova ki’n koze e mon pou azir. 15 Mon pou dispers ou parmi bann nasyon e parmi bann pei.+ Mon pou fer ou aret fer bann keksoz enpir.+ 16 Ou pou ganny imilye devan bann nasyon e ou pou bezwen konnen ki mwan, mon Zeova.’”+

17 Zeova ti koz avek mwan ankor enn fwa e dir: 18 “Garson zonm, pep Izrael in vin parey salte dan bann metal ki pa vo nanryen. Zot tou zot parey kwiv, ferblan, fer ek diplon dan four.* Zot in vin parey salte dan larzan.*+

19 “Alor la sa ki Souvren Senyer Zeova i dir: ‘Vi ki zot tou zot in vin parey salte dan bann metal ki pa vo nanryen,+ mon pe rasanble zot Zerizalenm. 20 Zis parey zot met larzan,* kwiv, fer, diplon ek ferblan dan four e zot soufle dife pour fer zot fonn, pareyman dan mon lakoler, mon pou rasanble zot ansanm e soufle lo zot e fer zot fonn.+ 21 Mon pou rasanble zot ansanm e soufle dife mon lakoler lo zot+ e zot pou fonn dan sa lavil.+ 22 Zis parey larzan* i fonn dan en four, zot osi zot pou fonn dan sa lavil. Zot pou bezwen konnen ki mwan Zeova ki’n pran en gran lakoler avek zot.’”

23 Zeova ti koz avek mwan ankor enn fwa e dir: 24 “Garson zonm, dir li, ‘Ou en landrwa ki pa pou ganny pirifye e ki pa pou ganny lapli ler mon zour lakoler i vini. 25 Ou bann profet in fer konplo,+ parey en lyon ki pe kriye e pe desir bann zannimo ki i’n touye.+ Zot pe devor bann dimoun. Zot pe pran trezor ek bann keksoz presye. Zot in fer en kantite madanm kot ou vin vev. 26 Ou bann pret in kas mon lalwa+ e zot mank respe pour mon bann landrwa sen.+ Zot pa fer okenn diferans ant bann keksoz ki sen ek bann ki ordiner.+ Zot pa’n fer dimoun konnen kwa ki enpir e kwa ki pir.+ Zot refize fer mon bann saba e zot mank respe pour mwan. 27 Ou bann prens i parey bann lelou ki pe desir bann zannimo ki zot in touye. Zot atak e touy dimoun pour ganny profi malonnet.+ 28 Me ou bann profet in kouver sa ki zot in fer avek laso. Zot ganny bann vizyon ki pa vre e zot predir bann mansonz.+ Zot dir: “La sa ki Souvren Senyer Zeova i dir,” kan Zeova li menm pa’n dir nanryen. 29 Dimoun dan sa pei in fer frod, zot in vole,+ zot pa’n tret bann ki dan bezwen ek bann pov byen, zot in fer frod avek en etranze e zot in anpes li ganny lazistis.’

30 “‘Mon ti pe rod en zonm parmi zot pour repar sa miray ros oubyen pour debout devan mwan kot miray in kase pour defann sa pei pour li pa ganny detrir+ me mon pa ti ganny personn. 31 Alor mon pou pran en gran lakoler avek zot e detrir zot avek dife mon lakoler. Mon pou fer zot sibir konsekans sa ki zot in fer.’ La sa ki Souvren Senyer Zeova in dir.”