Psonm

103 Mon anvi loue Zeova,

Mon anvi loue son non sen avek tou mon leker.

 2 Mon anvi loue Zeova,

Mon pa pou zanmen oubliy tou sa ki i’n fer.

 3 I pardonn tou ou bann fot

E geri tou ou bann maladi.

 4 I sov ou dan lanmor*

E kouronn ou avek son konpasyon ek lanmour fidel.

 5 Tou dilon ou lavi, i donn ou bann bon keksoz,

Pour ki ou reste zenn e for parey en leg.

 6 Zeova i azir avek ladrwatir ek lazistis

Pour tou bann ki ganny maltrete.

 7 I ti fer Moiz konn son fason azir*

E bann garson Izrael konn sa ki i ti fer.

 8 Zeova i annan pitye ek konpasyon,*

I pa ankoler vitman* e i annan en kantite lanmour fidel.

 9 I pa pou kontinyen mazin nou fot,

Ni gard rankin pour touzour.

10 I pa’n pini nou dapre nou pese,

Ni fer nou pey sa ki nou merite pour nou fot.

11 Son lanmour fidel pour bann ki annan en gran respe* pour li i vreman gran

Zis parey lesyel i pli o ki later.

12 I’n met nou bann pese lwen avek nou

Parey soley leve i lwen avek soley kouse.

13 Parey en papa i pran pitye pour son zanfan,

Zeova in pran pitye pour bann ki annan en gran respe pour li.

14 Parski i konn byen ki mannyer nou’n ganny formen,

I pa oubliye ki nou’n ganny fer avek lapousyer.

15 Lavi en imen* i parey zerb,

I fleri parey en fler dan lakanpanny.

16 Me ler divan i soufle, i nepli la,

Konmsi i pa ti zanmen la.*

17 Me Zeova i demontre lanmour fidel pour touzour*

Pour bann ki annan en gran respe pour li

E i demontre son ladrwatir pour zanfan zot zanfan,

18 Avek bann ki gard son lalyans

E ki fer sir ki zot obei son bann lord.

19 Zeova in byen etabli son tronn dan lesyel

E son rwayonm i diriz lo tou keksoz.

20 Loue Zeova, tou bann lanz ki vreman pwisan,

Ki pe fer sa ki i dir e ki pe obei son parol.*

21 Loue Zeova, tou son bann larme,

Son bann serviter ki fer son lavolonte.

22 Ki tou son kreasyon i loue Zeova

Partou kot i dirize.*