Ezekyel

14 Serten ansyen dan Izrael ti vini e asiz devan mwan.+ 2 Apre, Zeova ti koz avek mwan e dir: 3 “Garson zonm, sa bann zonm i determinen pour ador zot bann zidol degoutan* e zot in met en lobstak ki fer dimoun fer pese. Eski mon pou les zot demann mwan gidans?+ 4 Aprezan dir zot, ‘La sa ki Souvren Senyer Zeova i dir: “Si en Izraelit i determinen pour ador son bann zidol degoutan e i met en lobstak ki fer dimoun fer pese e apre i vin demann kestyon en profet, mwan Zeova, mon pou donn li en larepons apropriye konsernan son ta zidol degoutan. 5 Anfet, mon pou fer pep Izrael* per parski zot tou zot in kit mwan e zot in al ador zot bann zidol degoutan.”’+

6 “Alor dir pep Izrael, ‘La sa ki Souvren Senyer Zeova i dir: “Retournen, aret ador zot bann zidol degoutan e aret fer tou sa bann keksoz degoutan ki zot pe fer.+ 7 Parski si en Izraelit oubyen en etranze ki reste Izrael i kit mwan, i determinen pour ador son bann zidol degoutan e i met en lobstak ki fer dimoun fer pese e apre i vin demann kestyon mon profet,+ mwan Zeova, mon pou reponn li personnelman. 8 Mon pou get sa zonm e mon pou fer li vin en siny lavertisman ek en proverb.* Mon pou detrir li parmi mon pep+ e zot pou bezwen konnen ki mwan, mon Zeova.”’

9 “‘Me si sa profet i ganny anbete e i donn zot en larepons, mon menm mwan Zeova ki’n anbet sa profet.+ Apre mon pou lev mon lanmen kont li e detrir li parmi mon pep Izrael. 10 Zot pou bezwen pey konsekans pour zot fot. Zis parey sa dimoun ki’n demann kestyon sa profet i koupab, sa profet osi i koupab, 11 koumsa pep Izrael pou aret elwannyen avek mwan e aret fer tou zot bann lofans ki fer zot enpir. Alor zot pou vin mon pep e mon pou vin zot Bondye.’+ La sa ki Souvren Senyer Zeova in dir.”

12 Zeova ti koz avek mwan ankor enn fwa e dir: 13 “Garson zonm, si dimoun dan en pei i fer pese kont mwan akoz zot enfidel, mon pou lev mon lanmen kont zot e mon pou fer zot aret ganny manze.*+ Mon pou osi anvoy lafanmin lo zot+ e detrir dimoun ek zannimo dan sa pei.”+ 14 “‘Menm si Noe,+ Danyel+ ek Zob+ ti dan sa pei, zot ti pou kapab sov zis zot lekor akoz zot ti fer sa ki byen.’*+ La sa ki Souvren Senyer Zeova in dir.”

15 “‘Oubyen, meton mon fer bann zannimo sovaz pas dan sa pei e touy bann zabitan sa pei* e fer li vin en landrwa dezerte kot personn pa pase akoz sa bann zannimo sovaz,+ 16 mwan sa Bondye vivan, mon fer serman ki menm si sa trwa zonm ti dan sa pei, zot pa ti pou sov ni zot bann garson ni zot bann fiy. Zot ti pou sov zis zot lekor e sa pei ti pou ganny abandonnen.’ La sa ki Souvren Senyer Zeova in dir.”

17 “‘Oubyen, meton mon anmenn en lepe kont sa pei+ e dir: “Les en lepe pas dan sa pei” e touy bann dimoun ek zannimo,+ 18 menm si sa trwa zonm ti dan sa pei, mwan sa Bondye vivan, mon fer serman ki zot pa ti pou sov ni zot bann garson ni zot bann fiy. Zot ti pou sov zis zot lekor.’ La sa ki Souvren Senyer Zeova in dir.”

19 “‘Oubyen, meton mon anvoy en lepidemi dan sa pei+ e mon pran en gran lakoler avek li e touy bann dimoun ek zannimo, 20 menm si Noe,+ Danyel+ ek Zob+ ti dan sa pei, mwan sa Bondye vivan, mon fer serman ki zot pa ti pou sov ni zot bann garson ni zot bann fiy. Zot ti pou sov zis zot lekor* akoz zot ti fer sa ki byen.’+ La sa ki Souvren Senyer Zeova in dir.”

21 “Parski la sa ki Souvren Senyer Zeova i dir: ‘Koumsanmenm i pou ete ler mon pou anvoy mon kat pinisyon*+ Zerizalenm, setadir lepe, lafanmin, bann zannimo sovaz ek lepidemi+ pour touy bann dimoun ek zannimo.+ 22 Par kont, serten sirvivan dan sa lavil, enkli bann garson ek fiy pou sove e zot pou sorti.+ Zot pou vin kot zot e ler zot pou vwar zot fason viv ek sa ki zot pe fer, zot pou sirman konpran* akoz mon’n anvoy sa maler lo Zerizalenm e tou sa ki mon’n fer avek li.’”

23 “‘Ler zot pou vwar zot fason viv ek sa ki zot pe fer, sa pou rekonfort zot e zot pou konpran ki mon ti annan rezon pour fer sa ki mon’n fer avek li.’+ La sa ki Souvren Senyer Zeova in dir.”