ZOZYE

1 Apre lanmor Moiz, serviter Zeova, Zeova ti dir Zozye*+ garson Noun, asistan*+ Moiz: 2 “Mon serviter Moiz in mor.+ Aprezan, met ou pare pour travers Larivyer Zourden avek sa pep e antre dan sa pei ki mon pe donn pep Izrael.+ 3 Mon pou donn zot tou landrwa kot zot met zot lipye, zis parey mon ti promet Moiz.+ 4 Zot teritwar pou konmans depi dan dezer e i pou ale ziska Liban, ziska sa gran larivyer, setadir Efrat. Sa i enkli tou pei bann Itit+ e i ale ziska Gran Lanmer* dan was.*+ 5 Osi lontan ki ou vivan, personn pa pou kapab opoz ou.+ Mon pou avek ou zis parey mon ti avek Moiz.+ Mon pa pou kit ou ni abandonn ou.+ 6 Pran kouraz e reste for,+ parski ou ki pou fer sa pep ganny* sa pei ki mon’n promet zot bann zanset.+

7 “Wi, pran kouraz e ou bezwen vreman for. Ou devret obeir tou Lalwa ki Moiz mon serviter in donn ou. Pa bezwen al ni a drwat ni a gos+ pour ki ou azir avek lasazes partou kot ou ale.+ 8 Fodre ou koz lo sa ki’n ganny ekrir dan sa liv Lalwa+ e fodre ou lir li avwabas* lizour konman aswar. Koumsa, ou pou obeir tou sa ki’n ganny ekrir ladan+ e alor ou pou reisi dan ou lavi e ou pou azir avek lasazes.+ 9 Pa mon’n donn ou sa lord? Pran kouraz e reste for, pa bezwen per parski Zeova ou Bondye pou avek ou partou kot ou pou ale.”+

10 Apre, Zozye ti dir bann sef parmi sa pep: 11 “Pas partou dan kan Izrael e donn sa pep sa lord, ‘Prepar sa ki zot pou bezwen pour fer en vwayaz, parski dan trwa zour zot pou travers Larivyer Zourden e zot pou pran sa pei ki Zeova zot Bondye pou donn zot.’”+

12 Apre, Zozye ti dir avek bann Ribennit, Gadit ek lanmwatye tribi Manase: 13 “Rapel sa lord ki Moiz, serviter Zeova ti donn zot:+ ‘Zeova zot Bondye pe donn zot repo e i’n donn zot sa pei. 14 Zot madanm, zanfan ek zot zannimo pou reste dan sa pei ki Moiz in donn zot lo sa kote* Larivyer Zourden.+ Me tou zot bann gerye ki for+ pou bezwen organiz zot pour lager e travers larivyer par devan zot bann frer.+ Zot devret ed zot bann frer 15 ziska ki Zeova i donn zot frer repo zis parey i’n donn zot e ziska ki zot bann frer i pran sa pei ki Zeova zot Bondye in donn zot. Apre, retournen e reste dan sa pei ki Moiz, serviter Zeova in donn zot lo kote les Zourden.’”+

16 Zot ti dir Zozye: “Nou pou fer tou sa ki ou’n donn nou lord pour fer e nou pou al nenport landrwa kot ou pou anvoy nou.+ 17 Nou pou ekout ou zis parey nou ti ekout Moiz. Ki Zeova ou Bondye i avek ou parey i ti avek Moiz.+ 18 Tou dimoun ki rebel kont ou lord e ki pa obeir tou sa ki ou donn zot lord pour fer, i devret ganny met amor.+ Wi, pran kouraz e reste for.”+

2 Apre, Zozye garson Noun ti anvoy de espyon sorti Sitim+ an sekre. I ti dir zot: “Al obzerv sa pei, sirtou rezyon Zeriko.” Alor zot ti ale e zot ti ariv kot lakaz en prostitye ki apel Raab+ e zot ti reste laba. 2 Lerwa Zeriko ti ganny dir ki bann zonm Izraelit ti’n vin espyonn pei pandan lannwit. 3 Ler lerwa Zeriko ti tann sa, i ti anvoy bann zonm al dir Raab: “Fer sorti sa bann zonm ki’n vin reste kot ou parski zot in vin espyonn pei antye.”

4 Me sa madanm ti kasyet sa de zonm. Apre, i ti dir: “Wi, sa bann zonm in vin kot mwan me mon pa ti konnen kote zot sorti. 5 Ler fernwanr ti pe fer e baro lavil ti pros pour fermen, sa bann zonm ti ale. Mon pa konnen kot zot in ale, me si zot depese e tay deryer zot, zot pou kapab zwenn zot.” 6 (Par kont, i ti’n kasyet sa de zonm lo twa lakaz, parmi bann tiz len* ki i ti’n met lo twa lakaz.) 7 Alor, sa bann zonm ti tay deryer zot dan direksyon Larivyer Zourden kot i pa fon+ e dek ki zot ti’n kit lavil, baro lavil ti ganny fermen.

8 Avan ki sa de zonm ti al dormi, Raab ti al kot zot lo twa lakaz. 9 Raab ti dir zot: “Mon konnen ki Zeova pou donn zot sa pei+ e nou nou vreman per zot.+ Tou zabitan sa pei in perdi kouraz akoz zot,+ 10 parski nou’n tande ki mannyer Zeova ti fer Lanmer Rouz sek ler zot ti kit Lezip.+ Nou’n osi tande ki zot in touy Sionn+ ek Og,+ sa de lerwa Amorit lo lot kote* Larivyer Zourden. 11 Ler nou ti tann sa, nou ti demoralize* e tou dimoun ti dekouraze akoz zot, parski Zeova zot Bondye i Bondye lesyel ek later.+ 12 Aprezan, silvouple, vi ki mon’n demontre lanmour fidel anver zot, fer en serman devan Zeova ki zot pou demontre lanmour fidel anver fanmir mon papa e zot devret donn mwan en siny ki zot pou fer sa ki zot in dir. 13 Zot devret gard mon papa ek mon manman vivan e osi mon bann frer ek ser e tou sa ki pour zot. Zot devret sov nou lavi.”+

14 Alor sa de zonm ti dir li: “Nou pou donn nou lavi pour zot! Si zot pa dir personn nou misyon, nou pou demontre lanmour* ek fidelite anver zot ler Zeova i donn nou sa pei.” 15 Apre sa, Raab ti fer zot desann par lafnet avek en lakord parski son lakaz ti lo en kote miray lavil. Anfet, i ti pe reste lo miray.+ 16 Apre i ti dir zot: “Al dan bann montanny e kasyet laba pour trwa zour, koumsa sa bann zonm ki pe tay deryer zot pa pou trouv zot. Apre, ler sa bann zonm i retournen, zot kapab pran zot semen e ale.”

17 Alor sa de zonm ti dir li: “Nou pa pou koupab pour sa serman ki ou’n fer nou fer,+ 18 si ler nou vin dan sa pei, ou anmar sa lakord rouz avek sa lafnet kot ou’n fer nou desann. Ou devret fer ou papa, ou manman, ou bann frer ek tou fanmir ou papa vin dan ou lakaz.+ 19 Si en dimoun i sorti dan ou lakaz e al deor, i pou responsab pour son prop lanmor* e nou nou pou inosan. Me si i ariv en keksoz avek en dimoun ki dan ou lakaz, nou ki pou responsab pour son lanmor. 20 Par kont, si ou al fer konnen nou misyon,+ nou pa pou koupab pour sa serman ki ou’n fer nou fer.” 21 I ti dir zot: “Oke, mon dakor.”

Apre i ti fer zot ale. Pli tar, i ti anmar sa lakord rouz avek lafnet. 22 Alor sa de zonm ti al dan bann montanny e zot ti reste laba pour trwa zour ziska ki sa bann zonm ki ti pe tay deryer zot ti retourn dan lavil. Sa bann zonm ti rod zot partou dan tou semen me zot pa ti trouv zot. 23 Alor sa de zonm ti desann sorti dan bann montanny e travers larivyer. Zot ti al kot Zozye garson Noun e rakont li tou sa ki ti’n arive avek zot. 24 Apre zot ti dir Zozye: “Zeova in donn nou sa pei antye.+ Anfet, tou zabitan sa pei in perdi kouraz akoz nou.”+

3 Zozye ek tou bann Izraelit* ti lev granmaten e zot ti kit Sitim.+ Zot ti al ziska Larivyer Zourden e pas lannwit laba avan ki zot ti travers larivyer.

2 Trwa zour pli tar, bann sef+ ti pas partou dan kan 3 e donn sa pep sa lord: “Dek ki zot vwar bann pret ki sorti dan tribi Levi pe anmenn lars lalyans* Zeova zot Bondye,+ zot devret kit sa landrwa e swiv lars. 4 Me zot devret reste en zistans apepre 2,000 koude* avek Lars. Pa vin pli pros ki sa avek li. Koumsa zot pou konnen kote zot devret ale parski zot pa’n deza vwayaz lo sa semen avan.”

5 Alor Zozye ti dir sa pep: “Sanktifye zot lekor,*+ parski demen Zeova pou fer bann keksoz merveye parmi zot.”+

6 Zozye ti dir bann pret: “Pran lars+ lalyans e pas par devan sa pep.” Alor zot ti pran lars lalyans e zot ti al par devan sa pep.

7 Apre Zeova ti dir Zozye: “Ozordi mon pou konmans onor ou devan Izrael antye+ pour ki zot konnen ki mon pou avek ou+ zis parey mon ti avek Moiz.+ 8 Ou devret donn bann pret ki pe anmenn lars lalyans sa lord: ‘Ler zot ariv o bor Larivyer Zourden, al dan delo e debout ladan.’”+

9 Zozye ti dir bann Izraelit: “Vin ekout parol Zeova zot Bondye.” 10 Apre, Zozye ti dir: “Aprezan zot pou konnen ki i annan en Bondye vivan parmi zot+ e i pou sirman pous bann Kananeen, Itit, Ivit, Perizit, Girgasit, Amorit ek bann Zebouzit devan zot.+ 11 Gete! Lars lalyans Senyer later antye, pe pas par devan zot dan Larivyer Zourden. 12 Aprezan, swazir 12 zonm dan bann tribi Izrael, en zonm dan sak tribi.+ 13 Dek ki bann pret ki pe anmenn Lars Zeova, Senyer later antye, i met zot lipye dan Larivyer Zourden, delo ki pe desann pou aret koule e i pou vin parey en miray.”*+

14 Alor, ler sa pep ti kit sa landrwa kot zot ti pe kanpe, zis avan ki zot travers Zourden, bann pret ki ti pe anmenn lars+ lalyans ti al par devan zot. 15 Dek ki bann pret ki ti pe anmenn Lars ti ariv kot Larivyer Zourden e met zot lipye dan delo (annefe Larivyer Zourden ti deborde+ pandan letan rekolt antye), 16 delo ki ti pe desann ti aret koule. I ti vin parey en miray e i ti al byen lwen ziska kot lavil Adan ki ti o bor lavil Zaretann. Tandis ki delo ki ti pe desann ver Lanmer Araba, savedir Lanmer Sale,* ti aret koule. Larivyer ti aret koule e sa pep ti traverse an fas Zeriko. 17 Pandan ki bann pret ki ti pe anmenn lars lalyans Zeova ti reste debout lo later sek+ dan milye Larivyer Zourden, tou bann Izraelit ti mars lo later sek+ ziska ki nasyon antye ti fini travers Larivyer Zourden.

4 Dek ki sa nasyon antye ti’n fini travers Larivyer Zourden, Zeova ti dir Zozye: 2 “Swazir 12 zonm parmi sa pep, en zonm dan sak tribi+ 3 e donn zot sa lord: ‘Pran 12 ros dan milye Larivyer Zourden dan sa landrwa kot bann pret ti debout,+ anmenn sa bann ros e met zot dan sa landrwa kot zot pou pas lannwit.’”+

4 Alor, Zozye ti apel sa 12 zonm ki i ti’n swazir parmi bann Izraelit, en zonm dan sak tribi 5 e Zozye ti dir zot: “Pas par devan Lars* Zeova zot Bondye dan milye Larivyer Zourden. Sakenn i devret anmenn en ros lo son zepol dapre lakantite tribi Izraelit 6 e i pou en siny parmi zot. Si en zour zot zanfan* i demann zot, ‘Akoz zot in met sa bann ros la?’+ 7 Alor zot devret dir zot: ‘Sa i akoz Larivyer Zourden ti aret koule devan lars+ lalyans Zeova. Ler lars ti travers Larivyer Zourden, sa larivyer ti aret koule. Sa bann ros pou fer pep Izrael rapel sa ki ti arive pour touzour.’”*+

8 Alor, bann Izraelit ti fer sa ki Zozye ti’n donn zot lord pour fer. Zot ti pran 12 ros dan milye Zourden dapre lakantite tribi Izraelit, zis parey Zeova ti’n dir Zozye fer. Zot ti anmenn sa bann ros e met zot dan sa landrwa kot zot ti pou pas lannwit.

9 Zozye ti osi met 12 ros debout dan milye Larivyer Zourden dan sa landrwa kot bann pret ki ti pe anmenn lars lalyans ti debout.+ Sa bann ros i ankor la ziska ozordi.

10 Bann pret ki ti pe anmenn Lars ti reste debout dan milye Larivyer Zourden ziska ki bann Izraelit ti fer tou sa ki Zeova ti’n donn lord Zozye pour fer, zis parey Moiz ti’n dir Zozye fer. Pandan sa letan, sa pep ti depese pour travers larivyer. 11 Dek ki sa pep antye ti’n fini traverse, bann pret ti travers avek Lars Zeova devan tou dimoun.+ 12 Bann Ribennit, Gadit ek lanmwatye tribi Manase ti organiz zot pour lager+ e pas par devan lezot Izraelit, parey Moiz ti’n dir zot fer.+ 13 Apepre 40,000 solda byen ekipe pour lager ti travers larivyer devan Zeova e al dan dezer Zeriko.

14 Sa zour, Zeova ti onor Zozye devan tou Izraelit+ e zot ti annan bokou respe* pour Zozye tou dilon son lavi zis parey zot ti annan bokou respe pour Moiz.+

15 Apre, Zeova ti dir Zozye: 16 “Donn lord bann pret ki pe anmenn lars+ Temwannyaz pour sorti dan Larivyer Zourden.” 17 Alor Zozye ti dir bann pret: “Sorti dan Larivyer Zourden.” 18 Ler bann pret ki ti pe anmenn lars+ lalyans Zeova ti sorti dan milye Larivyer Zourden e ariv lo later sek, larivyer ti rekonmans koule. I ti deborde+ parey avan.

19 Sa pep ti travers Zourden dizyenm zour premye mwan e zot ti kanpe Gilgal+ ki lo lafrontyer les Zeriko.

20 Zozye ti pran sa 12 ros ki zot ti’n pran dan Larivyer Zourden e i ti met zot debout Gilgal.+ 21 Apre i ti dir bann Izraelit: “Dan lavenir, ler zot zanfan i demann zot papa, ‘Ki sa bann ros i vedir?’+ 22 Zot devret dir zot zanfan: ‘Izrael ti travers Larivyer Zourden lo later sek+ 23 ler Zeova zot Bondye ti fer Larivyer Zourden sek devan zot ziska ki zot ti’n fini traverse. Sa i zis parey ler Zeova zot Bondye ti fer sek Lanmer Rouz devan zot ziska ki zot ti’n fini traverse.+ 24 I ti fer sa pour ki tou dimoun lo later antye i konnen ki kantite Zeova i for+ e pour ki zot toultan annan en gran respe* pour Zeova zot Bondye.’”

5 Dek ki tou bann lerwa Amorit+ ki ti dan was* Zourden e tou lerwa bann Kananeen+ ki ti o bor lanmer ti tande ki Zeova ti’n fer sek Larivyer Zourden devan bann Izraelit ziska ki zot ti’n fini traverse, zot ti demoralize*+ e zot ti perdi kouraz akoz bann Izraelit.+

2 Sa letan, Zeova ti dir Zozye: “Fer bann kouto* avek ros e sirkonsi*+ bann zonm Izrael ankor.” 3 Alor, Zozye ti fer bann kouto avek ros e i ti sirkonsi bann zonm Izrael dan sa landrwa ki ti apel Gibeat-Aaralot.*+ 4 La rezon akoz Zozye ti sirkonsi zot: Tou bann zonm ki ti’n sorti Lezip, setadir bann zonm lager* ti’n mor dan dezer pandan zot vwayaz apre ki zot ti’n kit Lezip.+ 5 Tou zonm ki ti’n kit Lezip ti ganny sirkonsi, me tou bann ki ti ne dan dezer pandan sa vwayaz apre ki zot ti’n kit Lezip, pa ti ankor sirkonsi. 6 Bann Izraelit ti’n mars pour 40 an+ dan dezer ziska ki sa nasyon antye ti mor, setadir sa bann zonm lager ki ti kit Lezip e ki pa ti obeir Zeova.+ Zeova ti fer serman avek zot ki i pa ti pou les zot vwar sa pei+ ki Zeova ti’n promet zot bann zanset pour donn nou,+ en pei kot dile ek dimyel i koule.+ 7 Alor zot bann garson ti ranplas zot.+ Zot menm zot ki Zozye ti sirkonsi parski zot pa ti ankor ganny sirkonsi pandan sa vwayaz.

8 Ler tou zonm ti’n ganny sirkonsi, bann Izraelit ti reste dan kan ziska ki zot ti’n geri.

9 Alor Zeova ti dir Zozye: “Ozordi mon’n tir* laont ki bann Ezipsyen ti’n met lo zot.” Sanmenm sa, sa landrwa ti ganny apele Gilgal*+ ziska ozordi.

10 Bann Izraelit ti kontinyen kanpe Gilgal e zot ti selebre Lapak* katorzyenm zour sa mwan,+ aswar, dan dezer Zeriko. 11 Lannmen apre Lapak, zot ti konmans manz manze ki sa pei ti prodwi, sa i dipen san lelven+ ek lagrenn griye. 12 Sa menm zour, ler zot ti manz manze ki sa pei ti prodwi, lamann ti aret tonbe. Bann Izraelit ti nepli ganny lamann.+ Sa lannen zot ti konmans manz manze ki pei Kanaan ti prodwi.+

13 Ler Zozye ti ariv o bor Zeriko, i ti vwar en zonm+ pe debout devan li avek en lepe dan son lanmen.+ Zozye ti al kot li e demann li: “Eski ou dan nou kote oubyen dan kote nou bann lennmi?” 14 Sa zonm ti reponn: “Non, mon’n vini akoz mon prens* larme Zeova.”+ Alor Zozye ti tonm azenou lafas anba e dir li: “Mon senyer, ki ou annan pour dir ou serviter?” 15 Prens larme Zeova ti dir Zozye: “Tir ou sandalet dan ou lipye parski sa landrwa kot ou pe debout i sen.” Deswit, Zozye ti tir son sandalet.+

6 Bann baro lavil Zeriko ti konpletman fermen akoz bann Izraelit. Personn pa ti sorti e personn pa ti antre.+

2 Alor, Zeova ti dir Zozye: “Gete, mon’n livre Zeriko, son lerwa ek son bann gerye ki for dan ou lanmen.+ 3 Zot bann solda i devret mars otour sa lavil en fwa. Zot devret fer sa pour sis zour. 4 Fer set pret mars par devan Lars* e sakenn i devret anmenn en korn.* Me setyenm zour, zot devret fer letour lavil set fwa e bann pret i bezwen soufle sa bann korn.*+ 5 Dek ki zot tann korn soufle,* tou solda i devret kriye pour fer konnen ki zot pe al lager. Apre sa, miray lavil pou tonm plat ater+ e bann solda i devret antre dan lavil, sakenn drwat devan li.”

6 Alor, Zozye garson Noun ti kriy bann pret e dir zot: “Pran lars lalyans e fer set pret anmenn set korn par devan Lars Zeova.”+ 7 Apre, Zozye ti dir tou bann solda: “Mars otour lavil e bann solda+ i devret mars par devan Lars Zeova.” 8 Zis parey Zozye ti’n dir bann solda, sa set pret ki ti pe anmenn bann korn par devan Zeova ti konmans marse e soufle sa bann korn. Lars lalyans Zeova ti par deryer zot. 9 Bann solda* ti pas par devan bann pret ki ti pe soufle korn* e bann solda ki par deryer ti swiv Lars anmezir ki bann pret ti pe kontinyen soufle korn.

10 Zozye ti’n donn bann solda sa lord: “Pa bezwen kriye ni koze. Pa bezwen dir nanryen ziska sa zour ki mon dir zot, ‘Kriye!’ Alor zot devret kriye.” 11 Zozye ti fer Lars Zeova fer zis en letour lavil, apre sa, bann zonm ti retourn dan kan e pas lannwit laba.

12 Son lannmen, Zozye ti lev boner e bann pret ti pran Lars+ Zeova. 13 Sa set pret ki ti pe anmenn korn ti mars par devan Lars Zeova e zot ti kontinyen soufle korn. Bann solda ti mars par devan zot tandis ki bann solda ki par deryer ti swiv Lars Zeova. 14 Zot ti mars otour lavil pour en dezyenm zour. Zot ti fer en sel letour e apre, zot ti retourn dan kan. Zot ti fer sa pour sis zour.+

15 Setyenm zour, zot ti leve granmaten dek ki lizour ti fer e zot ti mars otour lavil parey avan. Zot ti fer set letour. Zis sa zour ki zot ti fer set letour lavil.+ 16 Setyenm fwa, bann pret ti soufle korn e Zozye ti dir bann solda: “Kriye,+ parski Zeova in donn zot sa lavil! 17 Detrir sa lavil ek tou sa ki ladan konpletman,+ parski tou keksoz i pour Zeova. Zot pa devret touy Raab+ sa prostitye ek tou dimoun ki dan son lakaz, parski i ti kasyet bann espyon ki nou ti anvoye.+ 18 Me reste lwen avek bann keksoz ki sipoze ganny detrir konpletman,+ koumsa zot pa pou anvi pran sa bann keksoz.+ Si non zot pou anmenn maler* lo kan Izrael e fer li vin en keksoz ki sipoze ganny detrir konpletman.+ 19 Par kont, tou larzan* ek lor, ensi ki tou lobze an kwiv e an fer i sen pour Zeova.+ Sa bann keksoz i devret ganny mete dan lasanm trezor Zeova.”+

20 Ler zot ti soufle korn, bann solda ti kriye.+ Dek ki bann solda ti tann korn soufle, zot ti kriye pour fer konnen ki zot ti pe al lager e miray ti tonm plat ater.+ Apre, bann solda ti antre dan lavil, sakenn drwat devan li e zot ti pran sa lavil. 21 Zot ti touy tou sa ki ti dan lavil avek lepe, zonm konman madanm, zenn konman vye, toro, mouton ek bourik.+

22 Zozye ti dir sa de zonm ki ti al espyonn sa pei: “Antre dan lakaz sa prostitye e fer li ek tou sa ki pour li sorti parey zot ti promet li.”+ 23 Sa de zenn espyon ti antre dan lakaz Raab e fer li sorti ansanm avek son papa, son manman, son bann frer, tou sa ki pour li ek tou son fanmir.+ Sa de espyon ti anmenn zot sen e sof dan en landrwa an deor kan Izrael.

24 Apre, bann solda ti bril sa lavil ek tou sa ki ti ladan. Me zot ti pran larzan,* lor, bann lobze an kwiv e an fer e zot ti met dan lasanm trezor ki ti dan lakaz Zeova.+ 25 Zozye pa ti touy Raab sa prostitye, fanmir son papa ek tou sa ki ti pour Raab.+ Raab i ankor pe reste Izrael ziska ozordi+ akoz i ti kasyet sa de zonm ki Zozye ti anvoye pour espyonn Zeriko.+

26 Sa letan, Zozye ti fer sa serman:* “Zeova pou modi sa zonm ki esey rekonstri lavil Zeriko. Ler i pou met fondasyon sa lavil, son premye ne pou mor e ler i pou met laport avek sa lavil, son dernyen zanfan pou mor.”+

27 Alor, Zeova ti avek Zozye+ e i ti vin renonmen lo later antye.+

7  Me bann Izraelit ti enfidel parski zot pa ti obeir sa lord ki zot ti gannyen pour detrir bann keksoz ki ti sipoze ganny detrir konpletman. Anfet, Akann+ garson Karmi, garson Zabdi, garson Zera dan tribi Zida ti pran en pe keksoz ki ti’n sipoze ganny detrir konpletman.+ Alor, Zeova ti pran en gran lakoler avek bann Izraelit.+

2 Apre, Zozye ti anvoy bann zonm sorti Zeriko pour al Ay,+ en lavil o bor Bet-Avenn dan les Betel.+ I ti dir zot: “Monte e al espyonn sa pei.” Alor sa bann zonm ti al espyonn lavil Ay. 3 Ler zot ti retourn kot Zozye, zot ti dir li: “I pa vo lapenn pour anvoy larme antye laba. Apepre de oubyen trwa mil solda i ase pour ganny laviktwar lo lavil Ay. Pa bezwen fer tou solda fatige, parski napa bokou zabitan dan sa lavil.”

4 Alor, apepre 3,000 zonm ti mont Ay, me zot ti bezwen taye e sove devan bann zonm Ay.+ 5 Bann zonm Ay ti touy 36 zonm. Zot ti tay deryer zot depi kot baro lavil ziska Sebarim* e kontinyen touy zot an desandan. Alor, bann Izraelit ti konmans tranble e perdi kouraz.*

6 Zozye ti desir son lenz e tonm azenou lafas anba devan Lars* Zeova ziska aswar, bann ansyen dan Izrael osi ti fer parey. Zot ti anvoy lapousyer lo zot latet. 7 Zozye ti dir: “Ar wi Souvren Senyer Zeova, akoz ou’n fer sa pep travers Larivyer Zourden zis pour bann Amorit touy zot? Si zis nou ti’n kontant nou pour reste lo lot kote* Zourden! 8 Pardonn mwan, O Zeova, ki mon kapab dir aprezan vi ki Izrael in taye e sove* devan son bann lennmi? 9 Ler bann Kananeen ek tou lezot zabitan sa pei pou konnen ki’n arive, zot pou anserkle nou, touy nou e i pou napa personn lo later ki pou rapel nou non.* Ki ou pou fer pour defann ou gran non?”+

10 Zeova ti dir Zozye: “Leve! Akoz ou ankor la ater? 11 Izrael in fer pese. Zot in kas mon lalyans+ ki mon ti donn zot lord pour respekte. Zot in vol+ serten keksoz ki ti sipoze ganny detrir konpletman+ e kasyet dan zot bann zafer.+ 12 Alor bann Izraelit pa pou ganny laviktwar lo zot lennmi. Zot pou vir ledo e taye devan zot lennmi, parski zot menm zot zot in vin en keksoz ki sipoze ganny detrir konpletman. Si zot pa touy sa dimoun ki sipoze ganny detrir parmi zot, mon pa pou avek zot.+ 13 Leve e sanktifye sa pep!*+ Dir zot, ‘Sanktifye zot lekor pour demen parski la sa ki Zeova Bondye Izrael i dir: “Sa ki sipoze ganny detrir konpletman i parmi pep Izrael. Tan ki zot pa tir parmi zot sa ki sipoze ganny detrir, zot pa pou ganny laviktwar lo zot lennmi. 14 Zot devret rasanble la demen bomaten tribi par tribi. Sa tribi ki Zeova i swazir+ pou vin devan group* par group. Sa group ki Zeova i swazir pou vin devan fanmir par fanmir. Sa fanmir ki Zeova i swazir pou vin devan zonm par zonm. 15 Sa dimoun avek ki zot trouv sa bann keksoz ki ti sipoze ganny detrir konpletman, pou ganny brile*+ ansanm avek tou sa ki pour li, parski i’n kas lalyans+ Zeova e i’n fer en keksoz ki fer onte parmi pep Izrael.”’”

16 Son lannmen, Zozye ti leve granmaten e fer pep Izrael vin devan, tribi par tribi. Tribi Zida ti ganny swazir. 17 I ti fer bann fanmir Zida vin devan e fanmir bann Zerait+ ti ganny swazir. Apre, i ti fer bann fanmir Zerait vin devan, zonm par zonm e Zabdi ti ganny swazir. 18 Finalman, i ti fer fanmir Zabdi vin devan, zonm par zonm e Akann garson Karmi, garson Zabdi, garson Zera dan tribi Zida ti ganny swazir.+ 19 Alor Zozye ti dir Akann: “Silvouple mon garson, onor Zeova Bondye Izrael e konfes avek li. Silvouple, dir mwan ki ou’n fer. Pa bezwen kasyet nanryen avek mwan.”

20 Akann ti dir Zozye: “Wi, mwan ki’n fer pese kont Zeova Bondye Izrael. Mon pou dir ou ki mon’n fer. 21 Ler mon ti get parmi bann depouy, mon ti vwar en zoli lenz ofisyel ki sorti Sinar,+ 200 sekel* larzan ek en bar lor ki pez 50 sekel. Mon ti anvi sa bann keksoz, alor, mon’n pran zot. Mon’n kasyet zot anba later dan mon latant ansanm avek sa lor ek larzan.”*

22 Deswit, Zozye ti anvoy bann zonm e zot ti tay kot latant Akann. Zot ti vwar sa lenz ki ti’n ganny kasyet dan son latant e sa larzan anba la. 23 Alor, zot ti tir sa bann keksoz dan latant e anmenn zot kot Zozye ek bann Izraelit. Zot ti osi met sa bann keksoz devan Zeova. 24 Zozye ek tou bann Izraelit ti pran Akann+ garson Zera, sa larzan,* sa lenz ofisyel, sa bar lor,+ ansanm avek son bann garson ek fiy, son toro, bourik, troupo, son latant ek tou sa ki ti pour li e anmenn zot dan Vale Akor.+ 25 Zozye ti dir: “Akoz ou’n anmenn maler* lo nou?+ Ozordi Zeova pou anmenn maler lo ou.” Apre sa, Izrael antye ti saboul zot avek ros+ e bril zot.+ Wi, zot ti saboul zot tou avek ros. 26 Apre, zot ti met en gro ta ros lo li e i ankor la ziska ozordi. Alor lakoler Zeova ti kalmi.+ Sanmenm sa, sa landrwa i apel Vale Akor* ziska ozordi.

8 Alor Zeova ti dir Zozye: “Pa bezwen per oubyen panik.+ Pran tou solda avek ou e al atak lavil Ay. Gete, mon’n livre lerwa Ay, son pep, son lavil ek son pei dan ou lanmen.+ 2 Fer avek Ay ek son lerwa parey ou ti fer avek Zeriko ek son lerwa.+ Me safwasi, zot kapab pran tou sa ki dan sa lavil ek son bann zannimo. Zot devret kasyet par deryer sa lavil pour fer zot latak.”

3 Zozye ek tou bann solda ti al atak lavil Ay. Zozye ti swazir 30,000 gerye ki for e pandan lannwit, i ti fer zot ale. 4 I ti donn zot sa lord: “Gete, zot devret kasyet par deryer sa lavil pour fer zot latak. Pa bezwen al tro lwen avek lavil e met zot tou pare. 5 Mwan ek tou dimoun ki avek mwan, pou apros sa lavil e ler zot sorti pour vin lager avek nou parey zot ti fer avan,+ nou pou taye e sove devan zot. 6 Ler zot sorti pour tay deryer nou, nou pou anmenn zot lwen avek lavil, parski zot pou dir, ‘Zot pe taye e sove devan nou parey lot fwa.’+ Alor nou pou taye e sove devan zot. 7 Apre, zot devret sorti kot zot pe kasyet e pran sa lavil. Zeova zot Bondye pou donn zot sa lavil. 8 Dek ki zot pran sa lavil, zot devret bril li.+ Zot devret fer parey Zeova in dir. Gete, mon’n donn zot en lord.”

9 Apre, Zozye ti fer zot ale e zot ti al dan sa landrwa kot zot ti pou kasyet. Zot ti al ant Betel ek lavil Ay dan kote was lavil Ay. Me Zozye li, i ti pas lannwit avek bann solda.

10 Zozye ti leve granmaten e rasanble bann solda. Li ek bann ansyen dan Izrael ti diriz zot ziska lavil Ay. 11 Tou bann solda+ ki ti avek li ti marse ziska devan lavil. Zot ti kanpe dan nor lavil Ay e i ti annan en vale ant zot ek lavil Ay. 12 Antretan, Zozye ti anvoy apepre 5,000 zonm al kasyet+ ant Betel+ ek lavil Ay dan kote was lavil. 13 Alor, bann solda ti enstal zot kan prensipal dan nor sa lavil,+ tandis ki sa group solda ki par deryer ti al dan kote was lavil.+ Sa zour swar, Zozye ti al dan milye sa vale.

14 Dek ki lerwa Ay ti vwar sa, li ek bann zonm dan lavil ti depese granmaten pour al lager avek Izrael dan en landrwa an fas sa vale. Me lerwa Ay pa ti konnen ki ti annan en group solda ki ti pe kasyet par deryer lavil. 15 Ler bann zonm Ay ti atake, Zozye ek tou Izraelit ti tay dan sa semen ki al dan direksyon dezer.+ 16 Alor, tou bann zonm ki ti dan lavil ti ganny kriye pour tay deryer bann Izraelit. Anmezir ki zot ti tay deryer Zozye, zot ti al pli lwen avek lavil. 17 I pa ti reste ni en zonm dan lavil Ay, ni dan Betel, zot tou zot ti tay deryer bann Izraelit e zot ti kit lavil gran ouver.

18 Zeova ti dir Zozye: “Lev ou lans ki dan ou lanmen ver lavil Ay+ parski mon pou donn ou sa lavil.”+ Alor Zozye ti lev sa lans ki ti dan son lanmen ver sa lavil. 19 Dek ki i ti lev son lanmen, bann solda ki ti pe kasyet ti depese e sorti kot zot ti ete. Zot ti tay dan lavil e pran sa lavil. Deswit zot ti met dife dan sa lavil.+

20 Ler bann zonm Ay ti get deryer, zot ti vwar lafimen sorti dan lavil pe monte ver lesyel. Zot ti napa lafors pour tay okenn par. Alor bann solda ki ti’n tay dan direksyon dezer ti retournen e tay deryer bann zonm Ay. 21 Ler Zozye ek tou bann Izraelit ti vwar ki bann solda ki ti pe kasyet ti’n pran lavil e ki lafimen ti pe monte sorti dan lavil, zot ti vire e atak bann zonm Ay. 22 Lezot Izraelit ti sorti dan lavil pour al zwenn zot. Alor, bann solda Ay ti’n pri dan milye avek bann Izraelit dan sak kote. Bann Izraelit ti touy zot tou e i ti napa okenn zonm Ay ki ti sirviv oubyen sove.+ 23 Me zot ti atrap lerwa Ay+ vivan e anmenn li kot Zozye.

24 Ler bann Izraelit ti’n touy tou bann zabitan Ay ki ti’n tay deryer zot dan dezer, zot ti retourn dan lavil Ay e touy larestan dimoun avek lepe. 25 Sa zour, tou zabitan lavil Ay ti ganny touye. I ti annan 12,000 dimoun ki ti mor, zonm konman madanm. 26 Zozye pa ti bes son lanmen ki ti pe atrap sa lans+ ziska ki tou zabitan lavil Ay ti ganny touye konpletman.+ 27 Par kont, bann Izraelit ti pran bann zannimo ek lezot keksoz ki zot ti trouve dan lavil dapre lord ki Zeova ti’n donn Zozye.+

28 Apre, Zozye ti bril lavil Ay e fer li vin en ta debri.+ I ankor koumsa ziska ozordi. 29 I ti touy lerwa Ay e met son lekor anpandan lo en poto* ziska aswar. Ler soley ti pros pour kouse, Zozye ti donn lord pour tir son lekor lo poto.+ Apre, zot ti zet sa lekor dan larantre baro lavil e zot ti kouver li avek en gro ta ros ki ankor la ziska ozordi.

30 Alor Zozye ti konstri en lotel pour Zeova Bondye Izrael lo Montanny Ebal,+ 31 zis parey Moiz serviter Zeova ti’n donn lord bann Izraelit pour fer e parey i ganny ekrir dan liv Lalwa+ Moiz: “Konstri en lotel avek bann ros ki pa’n ganny taye avek bann zouti an fer.”+ Zot ti ofer bann lofrann brile* ek bann sakrifis lape* pour Zeova lo sa lotel.+

32 Apre, Zozye ti ekri lo sa bann ros en kopi Lalwa+ ki Moiz ti’n ekri devan bann Izraelit.+ 33 Pep Izrael antye, bann ansyen, sef ek ziz ti debout lo de kote Lars.* Sa lars ti par devan bann pret ki sorti dan tribi Levi ki ti pe anmenn lars lalyans Zeova. Bann etranze ti la ansanm avek bann Izraelit.+ En lanmwatye ti debout devan Montanny Gerizim e lot lanmwatye ti debout devan Montanny Ebal+ (zis parey Moiz, serviter Zeova ti’n donn lord pour fer)+ pour ki bann Izraelit i ganny beni. 34 Apre sa, Zozye ti lir Lalwa antye byen for,+ bann benediksyon+ ek bann malediksyon+ zis parey in ganny ekrir dan liv Lalwa. 35 Zozye ti lir tou bann lord ki Moiz ti’n donnen byen for devan pep Izrael.+ Sa ti enkli bann madanm, bann zanfan ek tou bann etranze+ ki ti pe reste* parmi zot.+

9 Tou bann lerwa ki ti dan kote was Zourden+ ti tann sa ki ti’n arive. Sa ti bann lerwa ki ti reste dan bann montanny, dan rezyon Sefela, tou dilon lakot Gran Lanmer*+ e devan Liban, setadir lerwa bann Itit, Amorit, Kananeen, Perizit, Ivit ek Zebouzit.+ 2 Zot ti fer en lalyans pour al lager avek Zozye ek Izrael.+

3 Bann zabitan Gibeonn+ osi ti tann sa ki Zozye ti’n fer avek lavil Zeriko+ ek lavil Ay.+ 4 Alor zot ti azir avek lasazes e met manze dan bann vye sak lo zot bourik. Zot ti osi met diven dan bann vye boutey lapo ki ti annan trou ladan e ki ti’n ganny pyeste. 5 Zot ti osi met dan zot lipye bann vye sandalet ki’n ganny pyeste e bann vye lenz lo zot. Tou dipen ki ti dan zot sak ti sek e kas kase. 6 Alor zot ti al kot Zozye dan kan Gilgal+ e dir li ek tou bann zonm Izrael: “Nou sorti dan en pei byen lwen. Aprezan, fer en lalyans avek nou.” 7 Me bann zonm Izrael ti dir bann Ivit:+ “Petet zot reste lanmenm la o bor nou. Alor, ki mannyer nou kapab fer en lalyans avek zot?”+ 8 Bann Ivit ti dir Zozye: “Nou, nou ou bann serviter.”*

Apre Zozye ti demann zot: “Lekel zot e kote zot sorti?” 9 Alor zot ti reponn li: “Ou bann serviter i sorti dan en pei byen lwen+ e nou’n vin isi akoz non Zeova zot Bondye, parski i renonmen e nou’n tann tou sa ki i’n fer Lezip.+ 10 Nou’n osi tann tou sa ki i’n fer avek sa de lerwa Amorit ki ti lo lot kote* Zourden, Sionn+ lerwa Esbonn ek Og+ lerwa Basann ki ti reste Astarot. 11 Alor nou bann ansyen ek tou bann zabitan nou pei ti dir nou, ‘Pran sa ki zot bezwen pour fer zot vwayaz, al kot zot e dir zot: “Nou pou vin zot serviter.+ Aprezan, fer en lalyans avek nou.”’+ 12 Ler nou ti kit nou lakaz pour vin kot zot, sa dipen ti ankor so e la gete, zot sek e kas kase.+ 13 Sa bann boutey lapo ti nef ler nou ti met diven ladan, aprezan zot in ganny trou.+ Nou lenz ek nou sandalet in ize akoz sa gran zistans ki nou’n marse.”

14 Alor, bann zonm Izraelit ti pran* en pe manze sa bann zonm me zot pa ti demann Zeova gidans.+ 15 Zozye ti fer lape avek zot+ e i ti fer en lalyans pour pa touy zot. Bann sef pep Izrael ti fer serman pour respekte sa lalyans.+

16 Trwa zour apre ki zot ti’n fer sa lalyans, bann Izraelit ti tande ki sa bann zonm ti reste lanmenm la dan zanmirant. 17 Alor, bann Izraelit ti ale e trwazyenm zour zot ti ariv dan bann lavil kot sa bann zonm ti reste. Sa bann lavil ti Gibeonn,+ Kefira, Beerot ek Kiriat-Zearim.+ 18 Me bann Izraelit pa ti atak zot akoz bann sef pep Izrael ti’n fer en serman devan Zeova+ Bondye Izrael. Tou bann Izraelit ti konmans konplent kont bann sef. 19 Alor bann sef ti dir pep Izrael: “Vi ki nou’n fer en serman avek zot devan Zeova Bondye Izrael, nou napa drwa fer zot ditor. 20 La sa ki nou pou fer: Nou pa pou touy zot pour ki Bondye pa ankoler avek nou akoz nou’n fer en serman avek zot.”+ 21 Bann sef ti osi dir: “Les zot viv me fer zot al anmas dibwa e al sers delo pour pep antye.” Sanmenm sa ki bann sef ti promet zot.

22 Zozye ti kriy zot e dir: “Akoz zot in trik nou par dir, ‘Nou sorti dan en pei byen lwen,’ kan an realite zot pe reste lanmenm la o bor nou?+ 23 Apartir ozordi, zot in ganny modi.+ Zot pou toultan travay konman bann lesklav ki anmas dibwa e ki al sers delo pour lakaz mon Bondye.” 24 Zot ti dir Zozye: “Nou’n fer sa parski nou’n ganny dir ki Zeova ou Bondye ti’n donn lord son serviter Moiz pour donn zot tou sa bann pei. I ti osi dir li touy tou son bann zabitan.+ Alor nou ti per pangar zot touy nou.+ Sanmenm sa nou’n fer tousala.+ 25 Aprezan, nou dan ou lanmen. Fer avek nou sa ki ou krwar i bon e zis.” 26 Zozye ti fer sanmenm avek zot. I ti sov zot dan lanmen bann Izraelit e bann Izraelit pa ti touy zot. 27 Sa zour, Zozye ti fer zot konmans anmas dibwa e al sers delo pour pep Izrael+ e pour lotel Zeova dan sa landrwa ki Bondye i swazir.+ Zot ankor pe fer sa travay ziska ozordi.+

10 Adoni-Zedek lerwa Zerizalenm ti tande ki Zozye ti’n pran lavil Ay e detrir li konpletman ansanm avek son lerwa+ parey i ti fer avek Zeriko ek son lerwa.+ I ti osi tande ki bann zabitan Gibeonn ti’n fer lape avek Izrael+ e ki zot ti pe reste parmi zot. 2 Ler i ti tann sa, i ti vreman enkyet+ parski Gibeonn ti en gran lavil parey en lavil rwayal. I ti pli gran ki lavil Ay+ e tou son bann zonm ti bann solda. 3 Alor, Adoni-Zedek lerwa Zerizalenm ti anvoy sa mesaz pour Oam lerwa Ebronn,+ Piram lerwa Zarmout, Zafya lerwa Lakis ek Debir lerwa Eglonn:+ 4 “Vin ed mwan e annou atak Gibeonn parski bann zabitan Gibeonn in fer lape avek Zozye ek bann Izraelit.”+ 5 Alor sa senk lerwa Amorit,+ setadir lerwa Zerizalenm, lerwa Ebronn, lerwa Zarmout, lerwa Lakis ek lerwa Eglonn ti rasanble ansanm avek zot larme. Zot ti al Gibeonn e zot ti etabli zot kan laba pour atak sa lavil.

6 Apre, bann zonm Gibeonn ti anvoy sa mesaz pour Zozye ki ti dan kan Gilgal:+ “Pa bezwen rezet* ou bann lesklav.+ Depese! Vin sov nou e ed nou! Tou bann lerwa Amorit ki dan bann montanny in zwenn ansanm pour atak nou.” 7 Alor Zozye ti monte sorti Gilgal avek tou bann solda ek tou bann gerye ki for.+

8 Zeova ti dir Zozye: “Pa bezwen per sa bann lerwa+ parski mon’n livre zot dan ou lanmen.+ I pou napa ni enn parmi zot ki pou kapab lager avek ou.”+ 9 Zozye ti atak zot par sirpriz apre ki i ti’n marse tou lannwit sorti Gilgal. 10 Zeova ti fer zot panik devan bann Izraelit+ e bann Izraelit ti touy en kantite zot Gibeonn. Bann Izraelit ti tay deryer zot dan semen ki mont ver Bet-Oronn e kontinyen touy zot ziska Azeka ek Makeda. 11 Pandan ki zot ti pe sove devan bann Izraelit an desandan Bet-Oronn, Zeova ti fer bann gro lagrel tonm lo zot ziska Azeka e zot ti mor. Anfet, i ti annan plis dimoun ki ti mor akoz lagrel ki avek lepe bann Izraelit.

12 Sa zour ki Zeova ti detrir bann Amorit devan bann Izraelit, Zozye ti dir Zeova devan zot:

“Soley, pa bouze+ par lao Gibeonn+ E lalin pa bouze par lao Vale Ayalonn!”

13 Alor soley ek lalin pa ti bouze ziska ki nasyon Izrael ti’n fini ganny laviktwar lo zot lennmi. Pa sa in ganny ekrir dan liv Zasar?+ Soley pa ti bouze dan milye lesyel e i pa ti depese pour kouse pour preski en zour antye. 14 Zanmen i’n deza annan en zour parey sa enn, ni avan ni apre, kot Zeova ti ekout en zonm.+ Anfet, Zeova ti pe lager pour Izrael.+

15 Apre sa, Zozye ek tou bann Izraelit ti retourn dan kan Gilgal.+

16 Antretan, sa senk lerwa ti al kasyet dan kavern Makeda.+ 17 Apre, Zozye ti ganny dir: “Sa senk lerwa pe kasyet dan kavern Makeda.”+ 18 Alor Zozye ti dir: “Roul bann gro ros dan larantre sa kavern e fer bann zonm vey zot. 19 Me larestan zot pa bezwen arete. Kontinyen tay deryer zot lennmi e atak zot par deryer.+ Pa bezwen les zot antre dan zot prop lavil parski Zeova zot Bondye in livre zot lennmi dan zot lanmen.”

20 Zozye ek bann Izraelit ti touy en gran kantite zot. Zot ti pros pour touy zot tou eksepte serten ki ti sove e al dan bann lavil ki ganny proteze avek bann gro miray. 21 Apre sa, tou bann Izraelit ti retournen sen e sof kot Zozye dan kan Makeda. Personn pa ti oze dir en mo* kont bann Izraelit. 22 Apre Zozye ti dir: “Ouver sa kavern e anmenn sa senk lerwa kot mwan.” 23 Alor zot ti tir sa senk lerwa, setadir lerwa Zerizalenm, lerwa Ebronn, lerwa Zarmout, lerwa Lakis ek lerwa Eglonn+ e anmenn zot kot Zozye. 24 Ler zot ti anmenn sa bann lerwa kot Zozye, i ti kriy tou bann solda Izrael ki ti’n al lager avek li e dir zot komandan: “Vini e met zot lipye lo likou sa bann lerwa.” Alor zot ti vini e met zot lipye lo likou sa bann lerwa.+ 25 Zozye ti dir zot: “Pa bezwen per oubyen panik.+ Pran kouraz e reste for, parski sanmenm sa ki Zeova pou fer avek tou zot lennmi ki zot pe lager avek.”+

26 Apre Zozye ti touy sa senk lerwa e met zot anpandan lo senk poto.* Zot ti reste anpandan ziska aswar. 27 Ler soley ti pe kouse, Zozye ti donn lord pour tir sa bann lekor lo poto+ e zet zot dan kavern kot sa bann lerwa ti’n kasyet pli boner. Zot ti met bann gro ros dan larantre sa kavern e zot ankor la ziska ozordi.

28 Sa zour, Zozye ti pran lavil Makeda+ e touy tou zabitan avek lepe. I ti touy son lerwa ek tou dimoun ki ti dan lavil e i pa ti kit personn vivan.+ I ti fer avek lerwa Makeda+ parey i ti fer avek lerwa Zeriko.

29 Apre, Zozye ek tou bann Izraelit ti kit Makeda e al atak Libna.+ 30 Zeova ti livre sa lavil ek son lerwa+ dan lanmen bann Izraelit. Bann Izraelit ti detrir sa lavil e touy tou dimoun avek lepe, zot pa ti kit personn vivan. Zot ti fer avek son lerwa parey zot ti fer avek lerwa Zeriko.+

31 Apre sa, Zozye ek tou bann Izraelit ti kit Libna e al Lakis.+ Zot ti etabli zot kan e atak sa lavil. 32 Zeova ti livre Lakis dan lanmen bann Izraelit e zot ti pran sa lavil son dezyenm zour. Zot ti detrir sa lavil e touy tou dimoun avek lepe+ parey zot ti fer avek Libna.

33 Apre, Oram lerwa Gezer+ ti monte pour vin ed Lakis, me Zozye ti touy li ek son larme e i pa ti kit personn vivan.

34 Apre, Zozye ek tou bann Izraelit ti kit Lakis e al Eglonn.+ Zot ti etabli zot kan e atak sa lavil. 35 Sa zour, zot ti pran sa lavil e touy tou dimoun avek lepe. Zot ti touy tou dimoun dan sa lavil parey zot ti fer avek Lakis.+

36 Apre, Zozye ek tou bann Izraelit ti kit Eglonn e al Ebronn+ pour atak li. 37 Zot ti pran sa lavil, detrir li e touy son lerwa ek tou dimoun avek lepe. Zot pa ti kit personn vivan. Zis parey i ti fer avek Eglonn, i ti detrir Ebronn ek tou dimoun dan sa lavil konpletman.

38 Finalman, Zozye ek tou bann Izraelit ti al Debir+ e atak sa lavil. 39 I ti pran Debir, son lerwa ek son bann lavil dan zalantour. Zot ti touy tou dimoun avek lepe.+ Zot pa ti kit personn vivan.+ I ti fer avek Debir ek son lerwa zis parey i ti fer avek Ebronn ek Libna ek zot lerwa.

40 Zozye ti pran tou teritwar dan bann montanny, setadir Negeb, Sefela,+ bann lapant montanny ek tou zot lerwa. I pa ti kit personn vivan. I ti touy tou sa ki respire,+ zis parey Zeova Bondye Izrael ti’n donn lord pour fer.+ 41 Zozye ti pran sa bann landrwa depi Kades-Barnea+ ziska Gaza+ ek rezyon Gosenn+ antye ziska Gibeonn.+ 42 Zozye ti pran tou sa bann lerwa ek zot pei an menm tan, parski Zeova Bondye Izrael ki ti pe lager pour Izrael.+ 43 Apre, Zozye ek tou bann Izraelit ti retourn dan kan Gilgal.+

11 Dek ki Zabin lerwa Azor ti tann sa ki ti’n pase, i ti anvoy en mesaz pour Zobab lerwa Madonn+ e pour lerwa Simronn, lerwa Aksaf,+ 2 bann lerwa ki ti reste dan bann montanny ki dan nor, bann lerwa ki ti reste dan vale* dan sid Kineret, bann lerwa ki ti reste Sefela ek bann lerwa lo bann lapant montanny Dor+ dan was, 3 ensi ki bann Kananeen+ ki ti dan les ek was, bann Amorit,+ Itit, Perizit, Zebouzit ki ti reste dan bann montanny ek bann Ivit+ ki ti reste anba Montanny Ermonn+ dan rezyon Mizpa. 4 Alor, zot ti vini avek tou zot larme. I ti annan en kantite solda parey bann gren disab o bor lanmer ek en gran kantite seval ek saret lager. 5 Tou sa bann lerwa ti dakor pour zwenn ansanm e zot ti etabli zot kan o bor sours delo Meronm pour lager avek Izrael.

6 Alor Zeova ti dir Zozye: “Pa bezwen per zot,+ parski demen apepre sa menm ler, mon pou livre zot dan lanmen Izrael e Izrael pou touy zot tou. Ou devret bles lapat* zot bann seval+ e bril zot bann saret lager.” 7 Apre, Zozye ek tou bann solda ti atak zot par sirpriz o bor sours delo Meronm. 8 Zeova ti livre zot dan lanmen Izrael+ e bann Izraelit ti ganny laviktwar lo zot. Zot ti osi tay deryer zot ziska Gran Sidon+ ek Misrepot-Maim+ e ziska Vale Mizpe dan les. Zot ti touy tou dimoun e zot pa ti kit personn vivan.+ 9 Zozye ti fer tou sa ki Zeova ti’n dir li fer. I ti bles lapat* zot bann seval e bril zot bann saret lager.+

10 Apre sa, Zozye ti retournen e pran lavil Azor. I ti touy son lerwa avek lepe+ parski dan sa letan, Azor ti sa lavil pli enportan parmi sa bann rwayonm. 11 Bann Izraelit ti touy tou dimoun dan sa lavil avek lepe e detrir zot konpletman.+ Zot ti touy tou sa ki respire.+ Apre Zozye ti bril lavil Azor. 12 Zozye ti pran tou sa bann lavil e touy tou zot lerwa avek lepe.+ I ti detrir zot konpletman+ zis parey Moiz serviter Zeova ti’n donn lord pour fer. 13 Par kont, bann Izraelit pa ti bril bann lavil ki lo bann oter eksepte Azor. Azor ti sa sel lavil ki Zozye ti brile. 14 Bann Izraelit ti pran tou keksoz dan sa bann lavil ek zot zannimo.+ Zot ti touy tou dimoun avek lepe ziska ki zot ti’n detrir zot tou.+ Zot pa ti kit personn ki respire vivan.+ 15 Zis parey Zeova ti’n donn lord son serviter Moiz, Moiz ti donn sa menm lord avek Zozye+ e Zozye ti fer sanmenm. Zozye ti fer tou sa ki Zeova ti’n donn lord Moiz pour fer.+

16 Zozye ti pran sa pei antye, bann montanny, pei Negeb,+ rezyon Gosenn antye, Sefela,+ Araba,+ bann montanny Izrael ek son Sefela,* 17 depi Montanny Alak ki mont ver Seir ziska Baal-Gad+ dan Vale Liban anba Montanny Ermonn.+ Zozye ti tyonbo tou zot bann lerwa e met zot amor. 18 Zozye ti lager avek tou sa bann lerwa pour en bon pe letan. 19 Okenn lavil pa ti fer lape avek bann Izraelit eksepte bann Ivit ki ti reste Gibeonn.+ Zot ti lager e pran tou lezot lavil.+ 20 Zeova ki ti les sa bann dimoun andirsi zot leker+ pour zot lager avek Izrael pour li detrir zot tou konpletman san okenn pitye.+ Zot ti sipoze ganny detrir konpletman zis parey Zeova ti’n donn lord Moiz pour fer.+

21 Sa letan, Zozye ti touy tou bann Anakim+ ki ti reste dan bann montanny, Ebronn, Debir, Anab, dan tou bann montanny Zida e dan tou bann montanny Izrael. Zozye ti detrir zot tou ek zot lavil konpletman.+ 22 I ti nepli annan okenn Anakim dan pei bann Izraelit. Zot ti reste+ zis dan Gaza,+ Gat+ ek Asdod.+ 23 Alor, Zozye ti pran kontrol sa pei antye, zis parey Zeova ti’n promet Moiz.+ Apre, Zozye ti donn bann tribi Izrael sa pei konman en leritaz e zot ti partaz sa pei parmi bann tribi.+ I ti nepli annan lager dan sa pei e i ti anpe.+

12 La bann lerwa dan pei ki bann Izraelit ti touye e pran zot pei dan les Zourden depi Vale Arnonn+ ziska Montanny Ermonn+ ek Araba antye dan les:+ 2 Sionn+ lerwa bann Amorit ki ti reste Esbonn ki ti diriz Aroer+ ki lo lapant Vale Arnonn*+ e dan milye sa vale ek lanmwatye Gilead ziska Vale* Zabok ki ti osi lafrontyer bann Amonnit. 3 I ti osi diriz Araba ziska Lanmer Kineret*+ dan les e ziska Lanmer Araba, Lanmer Sale,* dan les, dan direksyon Bet-Zesimot e ziska dan sid anba lapant Pizga.+

4 Bann Izraelit ti osi pran teritwar Og+ lerwa Basann ki ti enn bann dernyen Refaim+ e ki ti reste Astarot ek Edrey. 5 I ti diriz lo Montanny Ermonn ki Saleka, dan Basann+ antye ziska lafrontyer bann Gesourit ek bann Maakatit+ e lanmwatye Gilead ziska teritwar Sionn lerwa Esbonn.+

6 Moiz serviter Zeova ek bann Izraelit ti ganny laviktwar lo zot.+ Apre sa, Moiz, serviter Zeova ti donn sa bann teritwar avek bann Ribennit, Gadit ek lanmwatye tribi Manase.+

7 La bann lerwa ki Zozye ek bann Izraelit ti touye dan pei ki ti dan was Zourden, depi Baal-Gad+ dan Vale Liban+ ziska Montanny Alak+ ki mont Seir.+ Apre sa, Zozye ti donn sak tribi Izrael zot par dan sa bann pei+ 8 ki dan bann montanny, Sefela, Araba, lo bann lapant, dan dezer ek Negeb.+ Sa ti pei bann Itit, Amorit,+ Kananeen, Perizit, Ivit ek Zebouzit.+ La sa bann lerwa:

13 Zozye ti’n vye e i ti en bon laz.+ Alor, Zeova ti dir li: “Ou’n vye e ou’n ariv en bon laz, me i reste ankor en kantite teritwar pour pran. 2 La bann teritwar ki reste:+ rezyon Filisten antye ek rezyon bann Gesourit+ 3 (depi brans Larivyer Nil* ki dan les* Lezip ziska lafrontyer Ekronn dan nor, ki ti ganny konsidere konman teritwar bann Kananeen)+ ki osi enkli teritwar sa senk sef bann Filisten,+ setadir bann Gazit, Asdodit,+ Askelonnit,+ Gitit,+ Ekronnit+ ek teritwar Avim+ 4 dan sid. Tou pei bann Kananeen ek Meara ki pour bann Sidonyen,+ ziska Afek e ziska lafrontyer bann Amorit, 5 pei bann Gebalit,+ Liban antye ki dan les, depi Baal-Gad anba Montanny Ermonn ziska Lebo-Amat,*+ 6 tou bann zabitan dan bann montanny Liban+ ziska Misrepot-Maim+ e tou bann Sidonyen.+ Mon pou pous sa bann dimoun dan zot pei e donn sa bann pei avek bann Izraelit.+ Ou annan zis pour donn bann Izraelit sa pei konman en leritaz, zis parey mon’n demann ou pour fer.+ 7 Aprezan, ou devret partaz sa pei avek sa nef tribi ek lanmwatye tribi Manase e donn zot konman en leritaz.”+

8 Lot lanmwatye tribi Manase, bann Ribennit ek bann Gadit ti pran zot leritaz ki Moiz ti’n donn zot dan kote les Zourden, zis parey Moiz serviter Zeova ti’n donn zot:+ 9 depi Aroer+ ki lo lapant Vale Arnonn*+ ek sa lavil ki dan milye sa vale e plato Medeba antye ziska Dibonn, 10 tou bann lavil ki ti pour Sionn lerwa bann Amorit ki ti diriz Esbonn, ziska lafrontyer bann Amonnit+ 11 e osi Gilead ek teritwar bann Gesourit ek bann Maakatit,+ Montanny Ermonn antye ek Basann+ antye ziska Saleka+ 12 e tou rwayonm lerwa Og ki ti Basann. Lerwa Og ti diriz Astarot ek Edrey. (I ti enn bann dernyen Refaim.)+ Moiz ti ganny laviktwar lo zot e pous zot dan zot pei.+ 13 Me bann Izraelit pa ti pous+ bann Gesourit ek Maakatit. Bann dimoun Gesour ek Maakat i ankor pe reste parmi bann Izraelit ziska ozordi.

14 Zis tribi Levi ki Moiz pa ti donn en leritaz.+ Zot leritaz ti bann lofrann ki ganny ofer dan dife pour Zeova Bondye Izrael,+ parey i ti promet zot.+

15 Apre sa, Moiz ti donn tribi Ribenn en leritaz dapre zot fanmir, 16 zot teritwar ti konmans depi Aroer ki lo lapant Vale Arnonn* ek sa lavil ki dan milye sa vale ek plato antye ki o bor Medeba, 17 Esbonn ek tou son bann lavil+ ki lo plato, Dibonn, Bamot-Baal, Bet-Baal-Meonn,+ 18 Zaaz,+ Kedemot,+ Mefaat,+ 19 Kiriataim, Sibma+ ek Zeret-Saar lo montanny ki o bor sa vale, 20 Bet-Peor, lapant Pizga,+ Bet-Zesimot,+ 21 tou bann lavil ki lo plato, tou rwayonm Sionn lerwa bann Amorit ki diriz Esbonn.+ Moiz ti ganny laviktwar lo Sionn+ e osi lo bann sef Madyannit, setadir Evi, Rekenm, Zour, Our ek Reba,+ bann lerwa ki ti tonm anba lotorite Sionn e ki ti pe reste dan sa pei. 22 Balaam+ garson Beor ki predir lavenir+ ti enn parmi sa bann dimoun ki bann Izraelit ti touye avek lepe. 23 Larivyer Zourden ti lafrontyer teritwar bann Ribennit. Sa teritwar ansanm avek son bann lavil ek vilaz ti leritaz bann Ribennit dapre zot fanmir.

24 Moiz ti osi donn tribi Gad en leritaz dapre zot fanmir. 25 Zot teritwar ti enkli Zazer+ ek tou bann lavil Gilead, lanmwatye pei bann Amonnit+ ziska Aroer ki an fas avek Raba+ 26 e depi Esbonn+ ziska Ramat-Mizpe ek Betonim e depi Maanaim+ ziska lafrontyer Debir 27 e dan vale ki enkli Bet-Aram, Bet-Nimra,+ Soukot+ ek Zafonn, larestan rwayonm Sionn lerwa Esbonn.+ Zot lafrontyer ti tou dilon lo kote les Zourden ziska dan bout Lanmer Kineret.*+ 28 Sa ti leritaz bann Gadit dapre zot fanmir, avek zot bann lavil ek vilaz.

29 Apre, Moiz ti donn lanmwatye tribi Manase en leritaz dapre zot fanmir.+ 30 Zot teritwar ti konmans depi Maanaim+ enkli Basann antye, tou rwayonm Og lerwa Basann ek tou bann vilaz* Zair+ dan Basann. I ti annan 60 lavil an tou. 31 Moiz ti donn desandans Makir+ garson Manase, lanmwatye Gilead, Astarot ek Edrey+ ki ti bann lavil dan rwayonm Og dan Basann. I ti donn sa bann landrwa avek lanmwatye desandans Makir dapre zot fanmir.

32 Sa ti bann leritaz ki Moiz ti donn zot dan dezer Moab lo lot kote Zourden ki dan les Zeriko.+

33 Me Moiz pa ti donn tribi Levi en leritaz.+ Zeova Bondye Izrael i zot leritaz, zis parey i ti promet zot.+

14 Sa i bann pei ki bann Izraelit ti gannyen dan pei Kanaan ki pret Eleazar, Zozye garson Noun ek bann sef fanmir* bann tribi Izrael ti donn zot konman leritaz.+ 2 Zot ti tir osor* pour zot partaz zot leritaz,+ zis parey Zeova ti’n donn lord pour fer atraver Moiz pour sa nef tribi ek en lanmwatye tribi.+ 3 Moiz ti’n donn sa lot de tribi ek sa lot lanmwatye tribi zot leritaz lo lot kote* Larivyer Zourden+ me i pa ti donn bann Levit en leritaz parmi zot.+ 4 Bann desandans Zozef ti ganny konsidere konman de tribi,+ Manase ek Efraim.+ Zot pa ti donn bann Levit en par dan zot teritwar eksepte bann lavil+ pour zot reste ladan e bann laplenn zerb pour zot bann zannimo ek bann keksoz ki zot ti annan.+ 5 Alor, bann Izraelit ti partaz later zis parey Zeova ti’n donn lord Moiz pour fer.

6 Apre, bann zonm Zida ti al Gilgal+ kot Zozye. Kaleb+ garson Zefoune en Kenizit ti dir li: “Ou konn tre byen sa ki Zeova ti dir+ Moiz, serviter* sa vre Bondye+ konsernan ou ek mwan ler nou ti Kades-Barnea.+ 7 Mon ti annan 40 an ler Moiz serviter Zeova ti fer mwan kit Kades-Barnea pour al espyonn sa pei+ e mon ti retournen e dir li laverite.*+ 8 Menm si mon bann frer ki ti al avek mwan ti fer pep Izrael dekouraze,* mwan mon ti obeir Zeova avek tou mon leker.*+ 9 Sa zour, Moiz ti fer serman e dir: ‘Sa pei kot ou’n marse pou vin en leritaz permanan pour ou ek ou bann garson akoz ou’n obeir Zeova mon Bondye avek tou ou leker.’+ 10 Alor, zis parey i ti promet,+ Zeova in gard mwan vivan+ pandan sa 45 an depi ki Zeova ti fer sa promes avek Moiz ler Izrael ti dan dezer.+ Ozordi mon annan 85 an e mon ankor vivan. 11 Ozordi mon ankor for zis parey ler Moiz ti anvoy mwan dan sa pei. Mon lafors i ankor parey i ti ete avan, pour al lager e fer lezot keksoz. 12 Alor, donn mwan sa bann montanny ki Zeova ti promet sa zour. Menm si sa zour ou ti tande ki i ti annan bann Anakim+ laba avek bann gran lavil ki ganny proteze avek bann gro miray,+ sirman* Zeova pou avek mwan+ e mon pou pous zot zis parey Zeova ti promet.”+

13 Alor, Zozye ti beni Kaleb garson Zefoune e i ti donn li Ebronn konman en leritaz.+ 14 Sanmenm sa, Ebronn i leritaz Kaleb garson Zefoune en Kenizit ziska ozordi, parski i ti obeir Zeova Bondye Izrael avek tou son leker.+ 15 Avan sa, Ebronn ti apel Kiriat-Arba+ (Arba ti en zonm vreman enportan parmi bann Anakim). I ti nepli annan lager dan sa pei e i ti anpe.+

15 Zot ti tir osor*+ e donn sa pei tribi Zida pour zot fanmir. Sa pei ti al ziska lafrontyer Edonm,+ dezer Zin e ziska dan bout sid Negeb. 2 Zot lafrontyer dan sid ti konmans depi dan bout Lanmer Sale,*+ depi son labe ki vir dan sid. 3 I ti kontinyen dan sid ziska montanny Akrabim,+ pas par Zin e apre, sorti dan sid e mont Kades-Barnea,+ ziska Ezronn e mont Adar e fer letour ver Karka. 4 Apre, i ti pas Azmonn+ e ale ziska Larivyer* Lezip+ e zot lafrontyer ti fini kot Lanmer.* Sa ti zot lafrontyer dan sid.

5 Lafrontyer dan les ti Lanmer Sale* ziska finisyon Larivyer Zourden. Lafrontyer ki dan kote nor ti konmans dan labe lanmer, dan finisyon Larivyer Zourden.+ 6 Sa lafrontyer ti monte ziska Bet-Ogla+ e pas dan nor Bet-Araba+ e monte ziska ros Boann+ garson Ribenn. 7 Sa lafrontyer ti monte ziska Debir kot Vale Akor+ e kontinyen dan nor ver Gilgal+ ki par devan montanny Adoumim, setadir sid sa vale. Sa lafrontyer ti pas kot bann larivyer Enn-Semes+ e i ti fini Enn-Rogel.+ 8 Sa lafrontyer ti monte ziska Vale Garson Inonm+ ziska lapant bann Zebouzit+ ki dan sid, setadir Zerizalenm.+ Sa lafrontyer ti monte ziska anler lo latet sa montanny ki an fas avek Vale lnonm dan was ki dan bout Vale Refaim dan nor. 9 Sa lafrontyer ti pas anler lo latet montanny ziska sours delo Neftoa+ e kontinyen ziska bann lavil ki lo Montanny Efronn. Sa lafrontyer ti pas Baala, setadir Kiriat-Zearim.+ 10 Sa lafrontyer ti fer letour Baala dan was ziska Montanny Seir e pas kot lapant Montanny Zearim dan nor, setadir Kesalonn e desann Bet-Semes+ e al Timna.+ 11 Sa lafrontyer ti kontinyen ziska lapant Ekronn+ dan nor e pas Sikeronn e al kot Montanny Baala ziska Zabneel e i ti aret kot lanmer.

12 Lafrontyer dan was ti Gran Lanmer*+ ek son lakot. Sa ti bann lafrontyer ki ti otour teritwar desandans Zida dapre zot fanmir.

13 Zozye ti donn Kaleb+ garson Zefoune en bout later parmi bann desandans Zida zis parey Zeova ti’n donn lord Zozye. I ti donn li Kiriat-Arba (Arba ti papa Anak), setadir Ebronn.+ 14 Alor Kaleb ti pous sa trwa garson Anak+ ki ti dan sa landrwa: Sesay, Aimann ek Talmay,+ bann desandans Anak. 15 Apre, i ti al lager avek bann zabitan Debir.+ (Avan sa, Debir ti apel Kiriat-Sefer.) 16 Kaleb ti dir: “Sa zonm ki atak Kiriat-Sefer e pran sa lavil pou marye avek mon fiy Aksa.” 17 Otnyel+ garson Kenaz,+ frer Kaleb ti pran sa lavil. Alor Kaleb ti fer Otnyel marye avek son fiy Aksa.+ 18 Ler Aksa ti pe al kot lakaz son msye, Aksa ti sipliy Otnyel pour demann son papa Kaleb en bout later. Apre Aksa ti desann lo son bourik* e Kaleb ti demann li: “Ki ou anvi?”+ 19 Aksa ti reponn: “Silvouple beni mwan. Vi ki ou’n donn mwan en bout later dan sid,* donn mwan Goulot-Maim* osi.” Alor Kaleb ti donn li Goulot Anler ek Goulot Anba.

20 Sa ti leritaz tribi Zida dapre zot fanmir.

21 Bann lavil dan bout teritwar tribi Zida dan sid ver lafrontyer Edonm+ ti: Kabzeel, Eder, Zagour, 22 Kina, Dimona, Adada, 23 Kedes, Azor, Itnann, 24 Zif, Telenm, Bealot, 25 Azor-Adata ek Keriot-Ezronn, setadir Azor, 26 Amam, Sema, Molada,+ 27 Azar-Gada, Esmonn, Bet-Pelet,+ 28 Azar-Soual, Beer-Seba,+ Bizyotya, 29 Baala, Iyim, Ezenm, 30 Eltolad, Kesil, Orma,+ 31 Ziklag,+ Madmanna, Sannsana, 32 Lebaot, Silim, Ain ek Rimonn.+ I ti annan 29 lavil an tou ansanm avek zot bann vilaz.

33 Dan Sefela+ i ti annan Estaol, Zora,+ Asna, 34 Zanoa, Enn-Ganim, Tapoua, Enam, 35 Zarmout, Adoulam,+ Soko, Azeka,+ 36 Saaraim,+ Aditaim, Gedera ek Gederotaim.* I ti annan 14 lavil ek zot bann vilaz.

37 Zenann, Adasa, Migdal-Gad, 38 Dilean, Mizpe, Zokteel, 39 Lakis,+ Bozkat, Eglonn, 40 Kabonn, Lamam, Kitlis, 41 Gederot, Bet-Dagonn, Naama ek Makeda.+ I ti annan 16 lavil ek zot bann vilaz.

42 Libna,+ Eter, Asann,+ 43 Ifta, Asna, Nezib, 44 Keila, Akzib ek Maresa. I ti annan nef lavil ek zot bann vilaz.

45 Ekronn ek son bann lavil ek vilaz dan zalantour. 46 Depi Ekronn dan direksyon was e tou sa bann landrwa ki o bor Asdod ek zot bann lavil.

47 Asdod+ ek son bann lavil ek vilaz dan zalantour. Gaza+ ek son bann lavil ek vilaz dan zalantour, an desandan Larivyer* Lezip, Gran Lanmer* ek bann rezyon akote.+

48 Dan bann montanny i ti annan Samir, Zatir,+ Soko, 49 Dana, Kiriat-Sana, setadir Debir, 50 Anab, Estemo,+ Anim, 51 Gosenn,+ Olonn ek Gilo.+ I ti annan 11 lavil ek zot bann vilaz.

52 Arab, Douma, Esann, 53 Zanim, Bet-Tapoua, Afeka, 54 Oumta, Kiriat-Arba, setadir Ebronn+ ek Zior. I ti annan nef lavil ek zot bann vilaz.

55 Maonn,+ Karmel, Zif,+ Zouta, 56 Zezreel, Zokdeam, Zanoa, 57 Kain, Gibea ek Timna.+ I ti annan dis lavil ek zot bann vilaz.

58 Aloul, Bet-Zour, Gedor, 59 Maarat, Bet-Anot ek Eltekonn. I ti annan sis lavil ek zot bann vilaz.

60 Kiriat-Baal, setadir Kiriat-Zearim+ ek Raba. I ti annan de lavil ek zot bann vilaz.

61 Dan dezer i ti annan Bet-Araba,+ Midin, Sekaka, 62 Nibsan, Lavil Disel ek Enn-Gedi.+ I ti annan sis lavil ek zot bann vilaz.

63 Bann zonm Zida pa ti kapab pous bann Zebouzit+ ki ti pe reste Zerizalenm.+ Sanmenm sa, bann Zebouzit i ankor pe reste Zerizalenm parmi pep Zida ziska ozordi.

16 Sa teritwar ki bann desandans Zozef+ ti gannyen ler zot ti tir osor*+ ti konmans depi Larivyer Zourden ki Zeriko ziska bann sours delo ki dan les Zeriko e pas dan dezer ki devan Zeriko e mont dan bann montanny Betel.+ 2 Sa teritwar ti kontinyen depi Betel ki o bor Louz e i ti ale ziska Atarot ki ti lafrontyer teritwar bann Arkit. 3 Apre, i ti desann anba dan direksyon was ziska lafrontyer teritwar bann Zafletit ziska lafrontyer Bet-Oronn Anba+ ek Gezer+ e i ti fini kot lanmer.

4 Alor Manase ek Efraim, bann desandans Zozef+ ti pran sa bann teritwar.+ 5 Lafrontyer teritwar bann desandans Efraim dapre zot fanmir ti koumsa: Lafrontyer zot leritaz dan les ti Atarot-Adar+ ziska Bet-Oronn Anler+ 6 e i ti kontinyen ziska kot lanmer. Mikmetat+ ti dan nor e sa lafrontyer ti fer letour dan les ziska Taanat-Silo e kontinyen dan les ziska Zanoa. 7 Apre i ti sorti Zanoa e desann ziska Atarot ek Naara e i ti ariv Zeriko+ e kontinyen ziska Zourden. 8 Depi Tapoua,+ sa lafrontyer ti kontinyen dan was ziska Larivyer* Kana e i ti fini kot lanmer.+ Sa i leritaz tribi Efraim dapre zot fanmir. 9 Bann desandans Efraim ti osi annan lezot lavil parmi leritaz Manase,+ tou bann lavil ek zot bann vilaz.

10 Me zot pa ti pous bann Kananeen ki ti pe reste Gezer.+ Ziska ozordi bann Kananeen i ankor pe reste parmi bann Efraim+ e zot ganny forse pour travay dir.+

17 Ler zot ti tir osor,*+ tribi Manase+ ti ganny son par parski i ti premye ne Zozef.+ Vi ki Makir+ premye ne Manase e papa Gilead ti en zonm lager, i ti ganny Gilead ek Basann.+ 2 Ler zot ti tir osor, larestan desandans Manase ti ganny zot par dapre zot fanmir, setadir bann garson Abi-Ezer,+ bann garson Elek, bann garson Asriel, bann garson Sekenm, bann garson Efer ek bann garson Semida. Sa ti bann zonm dan desandans Manase garson Zozef, dapre zot fanmir.+ 3 Me Zelofead+ garson Efer, garson Gilead, garson Makir, garson Manase ti napa garson. I ti annan zis fiy e zot ti apel: Mala, Noa, Ogla, Milka ek Tirza. 4 Alor, zot ti al kot pret Eleazar,+ Zozye garson Noun ek bann sef e dir zot: “Zeova ti donn lord Moiz pour donn nou en leritaz parey i’n donn nou bann frer.”+ Zis parey Zeova ti’n donn lord, zot ti ganny en leritaz parey i ti’n donn bann frer zot papa.+

5 Apard ki Gilead ek Basann, Manase ti osi ganny dis lezot bout later lo lot kote* Larivyer Zourden,+ 6 parski bann fiy Manase ti ganny en leritaz ansanm avek bann garson Manase. Larestan desandans Manase ti ganny Gilead.

7 Lafrontyer teritwar Manase ti konmans depi teritwar Aser ziska teritwar Mikmetat+ ki an fas avek Sekenm.+ I ti kontinyen dan direksyon sid ziska teritwar bann zabitan Enn-Tapoua. 8 Teritwar Tapoua+ ti vin pour Manase, me lavil Tapoua ki ti lo lafrontyer teritwar Manase ti pour bann desandans Efraim. 9 Sa lafrontyer ti desann dan sid Larivyer* Kana. I ti annan bann lavil Efraim parmi bann lavil Manase.+ Lafrontyer teritwar Manase ti dan nor sa larivyer e i ti fini kot lanmer.+ 10 Sa teritwar dan sid ti pour Efraim e sa teritwar dan nor ti pour Manase. Lanmer ti lafrontyer teritwar Manase.+ Dan nor, lafrontyer teritwar Manase* ti ariv ziska teritwar Aser e dan les, i ti ariv ziska teritwar Isakar.

11 Dan bann teritwar Isakar ek Aser, Manase ti ganny Bet-Seann ek son bann lavil dan zalantour, Ibleam+ ek son bann lavil dan zalantour, bann zabitan Dor+ ek son bann lavil dan zalantour, bann zabitan Enn-Dor+ ek son bann lavil dan zalantour, bann zabitan Taanak+ ek son bann lavil dan zalantour e bann zabitan Megido ek son bann lavil dan zalantour. Sa ti trwa rezyon ki ti annan bann pti montanny.

12 Me bann desandans Manase pa ti kapab pran sa bann lavil parski bann Kananeen ki ti pe reste dan sa pei ti refize sorti.+ 13 Ler bann Izraelit ti vin pli for, zot ti fors bann Kananeen pour travay dir+ me zot pa ti pous tou sa bann Kananeen dan sa pei.+

14 Bann desandans Zozef ti dir Zozye: “Akoz ou’n donn nou* zis en bout later konman leritaz ler zot ti tir osor?+ I annan en kantite nou, parski Zeova in beni nou ziska aprezan.”+ 15 Zozye ti dir zot: “Si i sitan annan en kantite zot, al anler dan lafore, koupay e netway en landrwa pour zot laba dan pei bann Perizit+ ek bann Refaim+ vi ki bann montanny Efraim+ i tro pti pour zot.” 16 Apre, bann desandans Zozef ti dir: “Sa bann montanny pa ase pour nou e bann Kananeen ki pe reste dan sa vale i annan bann saret lager+ an fer.* Menm bann ki reste Bet-Seann+ e son bann lavil dan zalantour e bann ki dan Vale Zezreel+ i annan sa bann saret lager.” 17 Alor Zozye ti dir desandans Zozef, Efraim ek Manase: “I annan en kantite zot e zot vreman for. Zot pa pou ganny zis en par,+ 18 me bann montanny pou vin pour zot.+ Menm si i en lafore, zot pou bezwen koupay e netway li. Sa lafore pou vin lafrontyer zot teritwar. Kantmenm bann Kananeen i for e zot annan bann saret lager an fer,* zot pou pous sa bann Kananeen dan sa landrwa.”+

18 Alor, pep Izrael antye ti rasanble Silo+ e zot ti met latant renyon laba+ parski zot ti pe kontrol sa pei.+ 2 Me i ti reste set tribi Izraelit ki pa ti ankor ganny okenn teritwar konman leritaz. 3 Alor Zozye ti dir bann Izraelit: “Konbyen letan zot pou espere pour zot pran sa pei ki Zeova Bondye zot bann zanset in donn zot?+ 4 Swazir trwa zonm dan sak tribi e mon pou anvoy zot dan sa pei. Zot pou al mars partou dan sa pei e fer en map* pour montre kote zot leritaz i ete. Apre sa, zot devret retourn kot mwan. 5 Zot devret partaz sa pei antre zot e diviz li an set parti.+ Zida pou reste dan son teritwar ki dan sid+ e bann desandans Zozef pou reste dan zot teritwar ki dan nor.+ 6 Me zot, zot devret fer map sa pei, diviz li an set par e anmenn sa map kot mwan. Mon pou tir osor*+ pour zot isi devan Zeova nou Bondye. 7 Me bann Levit pa pou ganny donnen en par parmi zot,+ parski zot servis konman pret pour Zeova i zot leritaz.+ Tribi Gad, Ribenn ek lanmwatye tribi Manase+ in fini ganny zot leritaz dan les Zourden ki Moiz, serviter Zeova ti donn zot.”

8 Alor bann zonm ti prepare pour zot ale. Zozye ti donn lord sa bann ki ti pou fer map sa pei: “Ale e mars partou dan sa pei e fer en map. Retourn kot mwan e mon pou tir osor pour zot devan Zeova isi Silo.”+ 9 Alor bann zonm ti al mars partou dan sa pei. Zot ti fer en map e diviz sa landrwa an set par dapre bann lavil. Zot ti ekri sa dan en liv e apre, zot ti retourn kot Zozye dan kan Silo. 10 Zozye ti tir osor pour zot, Silo devan Zeova.+ Laba, Zozye ti partaz pei ant bann Izraelit, en par pour sak tribi.+

11 Ler zot ti tir osor, premye par ti al pour tribi Benzamen dapre zot fanmir. Zot teritwar ti ant teritwar desandans Zida+ ek teritwar desandans Zozef.+ 12 Dan kote nor, lafrontyer zot teritwar ti konmans kot Larivyer Zourden, i ti monte ziska lapant Zeriko+ dan nor e i ti ale ziska lo montanny dan was e kontinyen ziska dezer Bet-Avenn.+ 13 Sa lafrontyer ti kontinyen ziska Louz, lo lapant ki ti dan sid Louz, setadir Betel+ e i ti desann ziska Atarot-Adar+ lo montanny ki ti dan sid Bet-Oronn Anba.+ 14 Sa lafrontyer ti pas dan was e al dan sid depi sa montanny ki an fas avek Bet-Oronn ki dan sid e al fini Kiriat-Baal, setadir Kiriat-Zearim,+ en lavil Zida. Sa ti lafrontyer dan was.

15 Dan kote sid, lafrontyer ti konmans lo bout Kiriat-Zearim e i ti kontinyen dan was ziska sours delo Neftoa.+ 16 Sa lafrontyer ti desann ziska lo bout montanny ki an fas avek Vale Garson Inonm,+ ki dan Vale Refaim+ dan nor e i ti desann ziska Vale Inonm kot lapant bann Zebouzit+ dan sid e kontinyen ziska Enn-Rogel.+ 17 Sa lafrontyer ti pas dan nor e ale ziska Enn-Semes. Apre i ti al Gelilot ki par devan montanny Adoumim+ e desann ziska ros+ Boann+ garson Ribenn. 18 I ti kontinyen ver lapant ki dan nor ki par devan Araba e desann Araba. 19 Sa lafrontyer ti kontinyen ver lapant ki dan nor Bet-Ogla+ e i ti fini dan labe ki dan nor Lanmer Sale,*+ dan bout sid Larivyer Zourden. Sa ti lafrontyer dan sid. 20 Larivyer Zourden ti lafrontyer lo kote les. Sa ti leritaz bann desandans Benzamen dapre zot fanmir, zot lafrontyer ki ti otour zot teritwar.

21 Bann lavil ki ti pour tribi Benzamen dapre zot fanmir ti: Zeriko, Bet-Ogla, Emek-Keziz, 22 Bet-Araba,+ Zemaraim, Betel,+ 23 Avim, Para, Ofra, 24 Kefar-Amoni, Ofni ek Geba.+ I ti annan 12 lavil ek zot bann vilaz.

25 Gibeonn,+ Rama, Beerot, 26 Mizpe, Kefira, Moza, 27 Rekenm, Irpeel, Tarala, 28 Zela,+ Aelef, Zebouzi, setadir Zerizalenm,+ Gibea+ ek Kiriat. I ti annan 14 lavil ek zot bann vilaz.

Sa ti leritaz bann desandans Benzamen dapre zot fanmir.

19 Ler zot ti tir osor,*+ dezyenm par ti al pour tribi Simeon+ dapre zot fanmir. Zot leritaz ti dan leritaz Zida.+ 2 Zot leritaz ti Beer-Seba+ ansanm avek Seba, Molada,+ 3 Azar-Soual,+ Bala, Ezenm,+ 4 Eltolad,+ Betoul, Orma, 5 Ziklag,+ Bet-Markabot, Azar-Sousa, 6 Bet-Lebaot+ ek Sarouenn. I ti annan 13 lavil ek zot bann vilaz. 7 Ain, Rimonn, Eter ek Asann.+ I ti annan kat lavil ek zot bann vilaz 8 e osi tou bann vilaz ki ti otour sa bann lavil ziska Baalat-Beer, setadir Rama ki dan sid. Sa ti leritaz tribi Simeon dapre zot fanmir. 9 Leritaz bann desandans Simeon ti ganny pran dan par Zida, parski par Zida ti tro gran pour zot. Alor, bann desandans Simeon ti ganny en bout later dan leritaz Zida.+

10 Apre sa, ler zot ti tir osor,+ trwazyenm par ti al pour bann desandans Zeboulonn+ dapre zot fanmir. Lafrontyer zot leritaz ti ale ziska Sarid. 11 Zot lafrontyer ti mont dan direksyon was ver Mareal ziska Dabeset e kontinyen dan sa vale* ki ti devan Zokneam. 12 I ti sorti Sarid e al dan direksyon les kot soley i leve ziska lafrontyer Kislot-Tabor e al Daberat.+ Apre, i ti monte ziska Zafya. 13 Sa lafrontyer ti kontinyen dan direksyon les kot soley i leve ziska Gat-Efer+ ek Et-Kazin, i ti al Rimonn e kontinyen ziska Nea. 14 Sa lafrontyer ti tourn dan direksyon nor e al Anatonn e i ti fini kot Vale Ifta-El 15 ek Katat, Naalal, Simronn,+ Idala ek Betleenm.+ I ti annan 12 lavil ek zot bann vilaz. 16 Sa ti leritaz bann desandans Zeboulonn dapre zot fanmir.+ Sa ti zot bann lavil ek zot bann vilaz.

17 Ler zot ti tir osor,+ katriyenm par ti al pour bann desandans Isakar+ dapre zot fanmir. 18 Zot lafrontyer ti Zezreel,+ Kesoulot, Sounenm,+ 19 Afaraim, Siyonn, Anaarat, 20 Rabit, Kisyonn, Ebes, 21 Remet, Enn-Ganim,+ Enn-Ada ek Bet-Pazez. 22 Sa lafrontyer ti ariv ziska Tabor,+ Saazouma ek Bet-Semes e i ti fini kot Larivyer Zourden. I ti annan 16 lavil ek zot bann vilaz. 23 Sa ti leritaz tribi Isakar dapre zot fanmir.+ Sa ti zot bann lavil ek zot bann vilaz.

24 Ler zot ti tir osor,+ sa senkyenm par ti al pour tribi Aser+ dapre zot fanmir. 25 Zot lafrontyer ti Elkat,+ Ali, Betenn, Aksaf, 26 Alamelek, Amad ek Misal. Sa lafrontyer ti kontinyen dan was ziska Karmel+ e ziska Sior-Libnat, 27 i ti retourn dan direksyon les e al Bet-Dagonn ziska Zeboulonn ek Vale Ifta-El ki dan nor. I ti kontinyen ziska Bet-Emek ek Neyel e i ti ale ziska Kaboul lo kote gos, 28 ziska Ebronn, Reob, Amonn ek Kana e ziska Gran Sidon.+ 29 Sa lafrontyer ti retourn Rama e i ti ale ziska Tir+ sa lavil ki ganny proteze avek bann gro miray. Apre i ti retourn Osa e fini kot lanmer dan rezyon Akzib, 30 Ouma, Afek+ ek Reob.+ I ti annan 22 lavil ek zot bann vilaz. 31 Sa ti leritaz tribi Aser dapre zot fanmir.+ Sa ti zot bann lavil ek zot bann vilaz.

32 Ler zot ti tir osor,+ sa sizyenm par ti al pour bann desandans Naftali dapre zot fanmir. 33 Zot lafrontyer ti konmans Elef kot sa gro pye dibwa ki Zaananim+ e al ver Adami-Nekeb ek Zabneel ziska Lakoum e i ti fini kot Larivyer Zourden. 34 Sa lafrontyer ti retourn dan direksyon was e al Aznot-Tabor ziska Oukot e kontinyen ziska Zeboulonn ki dan sid. I ti kontinyen ziska Aser ki dan was e al Zida kot Larivyer Zourden dan direksyon les. 35 Bann lavil ki ganny proteze avek bann gro miray ti Zidim, Zer, Amat,+ Rakat, Kineret, 36 Adama, Rama, Azor,+ 37 Kedes,+ Edrey, Enn-Azor, 38 Yironn, Migdal-El, Orenm, Bet-Anat ek Bet-Semes.+ I ti annan 19 lavil ek zot bann vilaz. 39 Sa ti leritaz tribi Naftali dapre zot fanmir.+ Sa ti zot bann lavil ek zot bann vilaz.

40 Ler zot ti tir osor,+ sa setyenm par ti al pour tribi Dann+ dapre zot fanmir. 41 Lafrontyer zot leritaz ti Zora,+ Estaol, Ir-Semes, 42 Saalabin,+ Ayalonn,+ Itla, 43 Elonn, Timna,+ Ekronn,+ 44 Elteke, Gibetonn,+ Baalat, 45 Zeoud, Bene-Berak, Gat-Rimonn,+ 46 Me-Zarkonn ek Rakonn e sa lafrontyer ti pas devan Zope.+ 47 Me teritwar Dann ti tro pti pour zot.+ Alor zot ti al atak Lesenm,+ pran sa lavil e touy tou dimoun avek lepe. Apre zot ti reste dan sa landrwa e zot ti sanz non Lesenm e apel li Dann, menm non avek zot zanset.+ 48 Sa ti leritaz tribi Dann dapre zot fanmir. Sa ti zot bann lavil ek zot bann vilaz.

49 Alor, zot ti fini partaz sa pei dapre bann teritwar pour ki bann tribi i ganny zot leritaz. Apre, bann Izraelit ti donn Zozye garson Noun en leritaz parmi zot. 50 Parey Zeova ti’n donn lord, zot ti donn li sa lavil ki i ti demande, setadir Timnat-Sera+ dan bann montanny Efraim. Zozye ti ranforsi sa lavil e i ti reste laba.

51 Sa ti bann leritaz ki pret Eleazar, Zozye garson Noun ek bann sef fanmir* bann tribi Izrael ti partaze+ ler zot ti tir osor Silo,+ devan Zeova dan larantre latant renyon.+ Alor, zot ti fini partaz sa pei.

20 Apre, Zeova ti dir Zozye: 2 “Dir bann Izraelit, ‘Swazir pour zot menm bann lavil refiz*+ ki mon ti koz avek zot lo la atraver Moiz, 3 pour ki sa enn ki touy en dimoun par aksidan* oubyen san fer par ekspre, i kapab sov laba. Sa bann lavil refiz pou protez zot kont sa fanmir ki revanze.*+ 4 Sa dimoun ki’n touy en lot dimoun pou bezwen sov dan enn sa bann lavil.+ I pou bezwen debout dan larantre baro lavil+ e eksplik son ka avek bann ansyen dan sa lavil. Apre, zot pou bezwen aksepte li dan sa lavil e donn li en landrwa reste parmi zot. 5 Si sa fanmir ki revanze i tay deryer sa dimoun ki’n touy en lot dimoun, zot pa devret donn li avek sa fanmir ki pe vin revanze, parski i’n touy son kanmarad par aksidan,* me pa akoz i ti ay li.+ 6 I bezwen reste dan sa lavil ziska ki i ganny zize devan sa pep*+ e reste laba ziska lanmor granpret+ ki la sa letan. Apre sa, sa dimoun i kapab retourn dan son lavil e i kapab antre dan son lakaz.’”+

7 Alor, zot ti fer sa bann lavil vin sakre,* Kedes+ ki Galile dan bann montanny Naftali, Sekenm+ dan bann montanny Efraim ek Kiriat-Arba,+ setadir Ebronn dan bann montanny Zida. 8 Dan rezyon Zourden, les avek Zeriko, zot ti swazir lavil Beser+ ki ti dan dezer lo plato e ki ti tonm dan teritwar tribi Ribenn. Dan teritwar tribi Gad zot ti swazir Ramot+ ki Gilead e dan teritwar tribi Manase,+ zot ti swazir Golann+ ki Basann.

9 Sa bann lavil ti ganny swazir pour tou bann Izraelit ek etranze ki pe reste parmi zot, pour ki nenport dimoun ki touy en lot dimoun san fer par ekspre, i kapab sov laba+ e pa ganny touye par sa fanmir ki revanze, avan ki i ganny zize devan lepep.*+

21 Bann sef fanmir* bann Levit ti al kot pret Eleazar,+ Zozye garson Noun e kot bann sef fanmir* bann tribi Izrael 2 ki ti Silo+ dan pei Kanaan e zot ti dir: “Zeova ti donn lord Moiz pour donn nou bann lavil pour nou reste ladan ek zot bann laplenn* pour nou bann zannimo.”+ 3 Alor, zis parey Zeova ti’n donn lord, bann Izraelit ti donn bann Levit sa bann lavil+ ek zot bann laplenn dan zot prop leritaz.+

4 Ler zot ti tir osor,* bann fanmir Koatit+ ek bann Levit ki ti bann desandans pret Aaron ti ganny 13 lavil dan teritwar tribi Zida,+ dan teritwar tribi Simeon+ e dan teritwar tribi Benzamen.+

5 Larestan Koatit ti ganny* dis lavil dan teritwar bann fanmir ki dan tribi Efraim,+ dan teritwar tribi Dann e dan teritwar lanmwatye tribi Manase.+

6 Bann Gersonnit+ ti ganny 13 lavil dan teritwar bann fanmir ki dan tribi Isakar, dan teritwar tribi Aser, dan teritwar tribi Naftali e dan teritwar lanmwatye tribi Manase ki Basann.+

7 Bann Merarit+ dapre zot fanmir ti ganny 12 lavil dan teritwar tribi Ribenn, dan teritwar tribi Gad e dan teritwar tribi Zeboulonn.+

8 Alor, bann Izraelit ti donn bann Levit sa bann lavil ek zot bann laplenn par tir osor zis parey Zeova ti donn lord Moiz pour fer.+

9 Sa i non sa bann lavil ki zot ti pran dan teritwar tribi Zida e dan teritwar tribi Simeon+ 10 e ki zot ti donn desandans Aaron dan fanmir Koatit ki dan tribi Levi, parski zot ti ganny premye par ler zot ti tir osor. 11 Zot ti ganny donnen Kiriat-Arba+ (Arba ti papa Anak), setadir Ebronn+ ki dan bann montanny Zida ek son bann laplenn dan zalantour. 12 Me zot ti donn lakanpanny ki ti otour sa lavil ek son bann vilaz Kaleb garson Zefoune konman son propriyete.+

13 Zot ti donn bann desandans pret Aaron, Ebronn+ ek son bann laplenn ki ti en lavil refiz* pour sa dimoun ki touy en lot dimoun par aksidan.+ Zot ti osi donn zot Libna+ ek son bann laplenn, 14 Zatir+ ek son bann laplenn, Estemoa+ ek son bann laplenn, 15 Olonn+ ek son bann laplenn, Debir+ ek son bann laplenn, 16 Ain+ ek son bann laplenn, Zouta+ ek son bann laplenn e Bet-Semes ek son bann laplenn. Sa ti nef lavil dan teritwar sa de tribi.

17 Dan teritwar tribi Benzamen, zot ti donn Gibeonn+ ek son bann laplenn, Geba ek son bann laplenn,+ 18 Anatot+ ek son bann laplenn e Almonn ek son bann laplenn. I ti annan kat lavil.

19 An tou, bann desandans pret Aaron ti ganny 13 lavil ek zot bann laplenn.+

20 Ler zot ti tir osor, lezot fanmir Koatit parmi bann Levit ti ganny bann lavil dan teritwar tribi Efraim. 21 Zot ti ganny donnen Sekenm+ ek son bann laplenn dan bann montanny Efraim, ki ti en lavil refiz pour sa dimoun ki touy en lot dimoun par aksidan.+ Zot ti osi ganny Gezer+ ek son bann laplenn, 22 Kibzaim ek son bann laplenn e Bet-Oronn+ ek son bann laplenn. I ti annan kat lavil.

23 Dan teritwar tribi Dann, zot ti donn Elteke ek son bann laplenn, Gibetonn ek son bann laplenn, 24 Ayalonn+ ek son bann laplenn, Gat-Rimonn ek son bann laplenn. I ti annan kat lavil.

25 Dan teritwar lanmwatye tribi Manase, zot ti donn Taanak+ ek son bann laplenn e Gat-Rimonn ek son bann laplenn. I ti annan de lavil.

26 An tou, lezot fanmir Koatit ti ganny dis lavil ek zot bann laplenn.

27 Bann Gersonnit+ ki ti dan fanmir bann Levit ti ganny bann lavil dan teritwar lanmwatye tribi Manase. Enn sa bann lavil ti en lavil refiz pour sa dimoun ki touy en lot dimoun par aksidan, setadir Golann+ ki Basann ek son bann laplenn. Zot ti osi ganny Beestera ek son bann laplenn. I ti annan de lavil.

28 Dan teritwar tribi Isakar,+ zot ti donn Kisyonn ek son bann laplenn, Daberat+ ek son bann laplenn, 29 Zarmout ek son bann laplenn e Enn-Ganim ek son bann laplenn. I ti annan kat lavil.

30 Dan teritwar tribi Aser,+ zot ti donn Misal ek son bann laplenn, Abdonn ek son bann laplenn, 31 Elkat+ ek son bann laplenn e Reob+ ek son bann laplenn. I ti annan kat lavil.

32 Dan teritwar tribi Naftali, zot ti donn Kedes+ ki Galile ek son bann laplenn ki ti en lavil refiz+ pour sa dimoun ki touy en lot dimoun par aksidan. Zot ti osi donn Amot-Dor ek son bann laplenn e Kartann ek son bann laplenn. I ti annan trwa lavil.

33 An tou, bann Gersonnit dapre zot fanmir ti ganny 13 lavil ek zot bann laplenn.

34 Dan teritwar tribi Zeboulonn,+ bann fanmir Merarit+ ek lezot Levit ti ganny Zokneam+ ek son bann laplenn, Karta ek son bann laplenn, 35 Dimna ek son bann laplenn e Naalal+ ek son bann laplenn. I ti annan kat lavil.

36 Dan tribi Ribenn, zot ti ganny Beser+ ek son bann laplenn, Zaaz ek son bann laplenn,+ 37 Kedemot ek son bann laplenn e Mefaat ek son bann laplenn. I ti annan kat lavil.

38 Dan teritwar tribi Gad,+ zot ti donn Ramot ki Gilead+ ek son bann laplenn ki ti en lavil refiz pour sa dimoun ki touy en lot dimoun par aksidan. Zot ti osi donn Maanaim+ ek son bann laplenn, 39 Esbonn+ ek son bann laplenn e Zazer+ ek son bann laplenn. I ti annan kat lavil an tou.

40 An tou, bann Merarit dapre zot fanmir ek lezot fanmir dan tribi Levit ti ganny 12 lavil.

41 An tou, bann Levit ti ganny 48 lavil ek zot bann laplenn+ dan teritwar bann Izraelit. 42 Sak sa bann lavil ti annan son laplenn otour li. Tou bann lavil ti koumsa.

43 Alor Zeova ti donn bann Izraelit sa pei antye ki i ti’n promet pour donn zot bann zanset.+ Zot ti pran sa pei e reste laba.+ 44 Apre, Zeova ti fer zot anpe avek zot bann lennmi otour zot, zis parey i ti’n promet zot bann zanset.+ Ni enn zot lennmi pa ti kapab lager avek zot.+ Zeova ti donn zot laviktwar lo tou zot lennmi.+ 45 I ti napa en promes* dan tou sa bann bon promes ki Zeova ti’n fer avek pep Izrael ki pa ti vin vre. Tou sa bann promes ti vin vre.+

22 Alor, Zozye ti kriy bann Ribennit, Gadit ek lanmwatye tribi Manase 2 e i ti dir zot: “Zot in fer tou sa ki Moiz serviter Zeova in donn zot lord pour fer+ e zot in obeir tou sa ki mon’n donn zot lord pour fer.+ 3 Pandan tou sa letan, ziska ozordi zot pa’n rezet zot bann frer+ e zot in obeir komannman Zeova zot Bondye.+ 4 Aprezan, Zeova zot Bondye in donn zot bann frer repo zis parey i ti promet zot.+ Alor, zot kapab retourn kot zot* dan sa pei ki Moiz serviter Zeova ti donn zot lo lot kote* Larivyer Zourden.+ 5 Me zot devret fer sir ki zot obeir komannman ek Lalwa ki Moiz, serviter Zeova ti donn zot.+ Zot devret fer sa par kontan Zeova zot Bondye,+ fer tou sa ki i’n demande,+ obeir son bann komannman,+ reste atase avek li+ e servi li+ avek tou zot leker ek tou zot nanm.”*+

6 Apre Zozye ti beni zot, fer zot ale e zot ti retourn kot zot. 7 Moiz ti’n donn lanmwatye tribi Manase en leritaz dan Basann+ e Zozye ti donn sa lot lanmwatye tribi Manase en teritwar dan kote was Larivyer Zourden+ ansanm avek zot bann frer. Deplis, ler Zozye ti fer zot al kot zot, i ti beni zot 8 e i ti dir zot: “Retourn kot zot avek en kantite larises, avek en gran kantite zannimo, larzan,* lor, kwiv ek fer e avek en gran kantite lenz.+ Zot devret pran zot par dan bann keksoz ki zot in gannyen ler zot in lager+ avek zot lennmi e partaz avek zot bann frer.”

9 Apre sa, bann Ribennit, Gadit, ek lanmwatye tribi Manase ti kit lezot Izraelit ki ti Silo dan pei Kanaan e zot ti retourn kot zot dan pei Gilead,+ sa landrwa ki zot ti’n gannyen dapre lord ki Zeova ti donn Moiz.+ 10 Ler zot ti ariv dan rezyon Larivyer Zourden dan pei Kanaan, bann Ribennit, Gadit ek lanmwatye tribi Manase ti konstri en gran lotel ki ti enpresyonan o bor Larivyer Zourden. 11 Pli tar, lezot Izraelit ti tann dir:+ “Gete! Bann Ribennit, Gadit ek lanmwatye tribi Manase in konstri en lotel lo lafrontyer pei Kanaan dan rezyon Larivyer Zourden ki lo nou kote.” 12 Ler zot ti tann sa, pep Izrael antye ti zwenn ansanm Silo+ pour al lager avek zot.

13 Apre, bann Izraelit ti anvoy Fineas+ garson pret Eleazar kot bann Ribennit, Gadit ek lanmwatye tribi Manase dan pei Gilead. 14 I ti annan dis sef ki ti osi al avek li. Sa bann sef ti reprezant sak tribi Izrael e zot tou zot ti bann sef fanmir* parmi bann fanmir Izrael.+ 15 Ler zot ti ariv kot bann Ribennit, Gadit ek lanmwatye tribi Manase dan pei Gilead, zot ti dir zot:

16 “La sa ki tou pep Zeova i dir: ‘Akoz zot pa’n reste fidel+ avek Bondye Izrael? Ozordi, zot in aret swiv Zeova par konstri en lotel pour zot menm e zot in rebel kont Zeova.+ 17 Eski sa fot ki nou ti fer Peor pa ti ase? Menm si en fleo ti ganny anvoye lo pep Zeova, ziska ozordi nou pa ankor kapab pirifye nou lekor.+ 18 La ozordi zot pe aret swiv Zeova! Si zot rebel kont Zeova ozordi, demen i pou ankoler avek pep Izrael antye.+ 19 Aprezan, si zot krwar ki zot pei i enpir, vin dan pei Zeova+ kot tabernak* Zeova i ete+ e reste parmi nou. Me pa bezwen rebel kont Zeova e pa fer nou rebel par konstri en lot lotel, parski nou deza annan en lotel pour Zeova nou Bondye.+ 20 Ler Akann+ garson Zera pa ti reste fidel par vol bann keksoz ki ti sipoze ganny detrir konpletman, pa Bondye ti ankoler avek pep Izrael antye?+ Pa zis li tousel ki ti mor pour son fot.’”+

21 Alor, bann Ribennit, Gadit ek lanmwatye tribi Manase ti reponn bann sef mil dimoun dan pep Izrael:+ 22 “Zeova, Bondye bann bondye!* Zeova, Bondye bann bondye!+ Li menm li i konnen e Izrael osi pou konnen. Si nou’n rebele e si nou’n enfidel avek Zeova, pa bezwen sov nou ozordi. 23 Si nou konstri en lotel pour nou menm pour ki nou aret swiv Zeova e apre sa, nou ofer bann lofrann brile,* lofrann lagrenn* ek sakrifis lape* lo la, Zeova pou pini nou.+ 24 Me non, nou’n fer sa pour en lot rezon, parski nou’n dir, ‘Dan lavenir, zot bann garson pou dir nou bann garson: “Ki zot annan pour fer avek Zeova Bondye Izrael? 25 Zeova in fer Larivyer Zourden vin en lafrontyer ant zot ek nou, bann Ribennit ek Gadit. Zot napa nanryen pour fer avek ladorasyon Zeova.” Alor zot bann garson pou anpes nou bann garson ador* Zeova.’

26 “Alor nou ti dir, ‘Annou fer tou sa ki nou kapab e konstri en lotel, pa pour nou ofer bann lofrann brile oubyen bann sakrifis, 27 me pour ki sa lotel i en temwen ant zot ek nou+ e ant nou bann desandans* apre nou, ki nou pou kontinyen ador Zeova avek nou bann lofrann brile ek sakrifis e osi avek nou bann sakrifis lape.+ Koumsa dan lavenir, ou bann garson pa pou dir nou bann garson: “Zot napa nanryen pour fer avek ladorasyon Zeova.”’ 28 Alor nou ti dir, ‘Si dan lavenir zot dir sa avek nou ek nou bann desandans,* nou pou dir zot: “Sa i lotel ki nou bann zanset ti konstri e i menm parey avek lotel Zeova, pa pour ofer lofrann brile ek bann sakrifis, me sa lotel i en temwen ant zot ek nou.”’ 29 Nou pa pou zanmen rebel kont Zeova e aret swiv Zeova+ par konstri en lot lotel pour ofer bann sakrifis. Nou pou ofer bann lofrann brile, lofrann lagrenn ek bann sakrifis zis lo lotel Zeova nou Bondye ki devan son tabernak.”+

30 Ler pret Fineas, bann sef pep Izrael ek bann sef mil dimoun dan pep Izrael ti tann sa ki bann desandans Ribenn, Gad ek Manase ti’n dir, zot ti konpran.+ 31 Alor Fineas garson pret Eleazar ti dir bann desandans Ribenn, Gad ek Manase: “Ozordi nou konnen ki Zeova i parmi nou, parski zot pa’n rebel kont Zeova. Aprezan, zot in sov bann Izraelit dan lanmen Zeova.”

32 Apre, Fineas garson pret Eleazar ek bann sef ti kit bann Ribennit ek Gadit dan pei Gilead e retourn dan pei Kanaan. Zot ti rakont lezot Izraelit sa ki ti’n pase. 33 Bann Izraelit ti dakor avek sa ki zot ti’n ganny rakonte. Alor, bann Izraelit ti loue Bondye e zot pa ti dir nanryen ankor konsernan al lager avek bann Ribennit ek Gadit pour detrir sa pei kot zot ti pe reste.

34 Alor, bann Ribennit ek Gadit ti donn en non sa lotel,* parski zot ti dir, “Sa lotel i en temwen ant nou ki Zeova i sa vre Bondye.”

23 Apre ki en kantite letan ti’n pase depi ki Zeova ti’n donn Izrael repo+ kont tou son bann lennmi dan zalantour, ler Zozye ti’n vye e i ti en bon laz,+ 2 Zozye ti kriy Izrael antye,+ bann ansyen, bann sef, bann ziz ek bann zofisye.+ I ti dir zot: “Mon’n vye e mon en bon laz. 3 Zot in vwar pour zot menm tou sa ki Zeova zot Bondye in fer pour zot avek tou sa bann nasyon. Zeova zot Bondye ti sa enn ki ti pe lager pour zot.+ 4 Gete, mon ti tir osor*+ e donn zot later sa bann nasyon ki nou pa ti ankor pran, konman en leritaz pour zot bann tribi.+ Mon ti osi donn zot tou later sa bann nasyon ki mon ti’n detrir+ depi Larivyer Zourden ziska Gran Lanmer* dan was.* 5 Zeova zot Bondye ki ti pous sa bann nasyon devan zot.+ I ti fer sa bann nasyon sorti dan sa pei pour zot e zot in pran sa bann pei zis parey Zeova zot Bondye ti promet zot.+

6 “Aprezan, zot bezwen annan bokou kouraz pour zot obeir e fer tou sa ki’n ganny ekrir dan liv Lalwa+ Moiz e pa bezwen al ni a drwat ni a gos.+ 7 Pa bezwen frekant sa bann nasyon+ ki pe reste parmi zot. Zot pa devret ni menm nonm non zot bondye+ oubyen fer serman devan zot. Zot pa devret ador sa bann bondye ni menm tonm azenou devan zot.+ 8 Me zot devret reste atase avek Zeova zot Bondye+ zis parey zot in fer ziska ozordi. 9 Zeova pou pous bann nasyon ki gran e pwisan devan zot,+ parski napa en zonm ki’n kapab ganny laviktwar lo zot ziska ozordi.+ 10 Zis en zonm parmi zot pou tay deryer mil dimoun,+ parski Zeova zot Bondye pe lager pour zot+ zis parey i ti promet zot.+ 11 Alor, toultan fer byen atansyon*+ par kontan Zeova zot Bondye.+

12 “Me si zanmen zot vir ledo avek Bondye e atas zot avek sa bann nasyon ki ankor pe reste+ avek zot, marye+ avek zot e frekant zot, 13 asire ki Zeova zot Bondye pa pou kontinyen pous sa bann nasyon devan zot.+ Sa bann nasyon pou vin en latrap pour zot, en roten lo zot deryer+ e bann pikan dan zot lizye, ziska ki zot tou zot mor dan sa bon pei ki Zeova zot Bondye in donn zot.

14 “Aprezan, gete! Mon pros pour mor* e zot konn tre byen avek tou zot leker ek tou zot nanm ki napa en parol dan tou sa bann bon promes ki Zeova zot Bondye in fer avek zot ki pa’n vin vre. Tou sa ki i’n dir, in vin vre pour zot. I napa en parol ki pa’n vin vre.+ 15 Me zis parey tou sa bann bon promes ki Zeova zot Bondye in dir zot in vin vre pour zot,+ koumsanmenm alor ki Zeova pou anmenn tou sa bann maler ki i’n promet.* I pou osi detrir zot dan sa bon pei ki Zeova zot Bondye in donn zot.+ 16 Si zot kas sa lalyans ki Zeova zot Bondye in donn zot lord pour respekte e si zot al ador lezot bondye e tonm azenou devan zot, Zeova pou vreman ankoler avek zot+ e deswit zot pou mor dan sa bon pei ki i’n donn zot.”+

24 Zozye ti rasanble tou tribi Izrael Sekenm. I ti osi kriy bann ansyen dan Izrael, bann sef, ziz ek zofisye+ e zot ti vin devan sa vre Bondye. 2 Zozye ti dir pep antye: “La sa ki Zeova Bondye Izrael i dir, ‘Dan letan lontan, zot bann zanset+ ki enkli Tera papa Abraam ek Naor ti reste lo lot kote Larivyer*+ e zot ti abitye ador lezot bondye.+

3 “‘Apre, mon ti fer Abraam zot zanset+ ki ti lo lot kote Larivyer,* al mars partou dan pei Kanaan e mon ti fer son desandans vin en kantite.+ Mon ti osi donn li Izaak.+ 4 Apre mon ti donn Izaak, Zakob ek Ezai.+ Pli tar, mon ti donn Ezai Montanny Seir+ e Zakob ek son bann garson ti desann Lezip.+ 5 Pli tar, mon ti anvoy Moiz ek Aaron+ pour vin ed zot e mon ti anvoy bann fleo lo Lezip.+ Apre sa, mon ti tir zot dan sa pei. 6 Ler mon ti pe tir zot bann zanset Lezip+ e ler zot ti ariv kot lanmer, bann Ezipsyen avek zot bann saret lager ek bann kavalye ti pe tay deryer zot ziska kot Lanmer Rouz.+ 7 Zot bann zanset ti konmans demann Zeova led,+ alor, i ti fer annan en fernwanr ant zot ek bann Ezipsyen e i ti fer Lanmer Rouz kouver bann Ezipsyen.+ Zot ti vwar pour zot menm sa ki mon ti fer Lezip.+ Apre zot ti reste dan dezer pour plizyer lannen.*+

8 “‘Mon ti anmenn zot dan pei bann Amorit ki ti pe reste lo lot kote* Larivyer Zourden e bann Amorit ti lager avek zot.+ Me mon ti livre bann Amorit dan zot lanmen pour ki zot kapab pran sa pei pour zot e mon ti detrir tou sa bann dimoun.+ 9 Apre, Balak garson Zipor, lerwa Moab ti al lager avek Izrael. I ti kriy Balaam garson Beor pour modi zot.+ 10 Me mon pa ti ekout Balaam.+ Alor i ti beni zot plizyer fwa+ e mon ti sov zot dan son lanmen.+

11 “‘Apre zot ti travers Larivyer Zourden+ e zot ti ariv Zeriko.+ Bann sef* Zeriko, bann Amorit, Perizit, Kananeen, Itit, Girgasit, Ivit ek bann Zebouzit ti lager avek zot. Me mon ti livre zot tou dan zot lanmen.+ 12 Mon ti fer zot tou dekouraze* e akoz sa, zot+ ti sove parey sa de lerwa Amorit. Pa ni zot lepe, ni zot lark* ki ti fer tousala arive.+ 13 Alor, mon ti donn zot en pei ki zot pa’n rente pour gannyen ek bann lavil ki zot pa’n konstri.+ Zot pe manz rezen ek zoliv ki zot pa’n plante.’+

14 “Aprezan, zot devret annan en gran respe* pour Zeova, ador li e reste fidel* e san defo.*+ Tir sa bann bondye ki zot bann zanset ti adore lo lot kote Larivyer* ek Lezip+ e ador Zeova. 15 Me si zot vwar i mal pour ador Zeova, swazir pour zot menm ozordi lekel ki zot pou adore,+ swa bann bondye ki zot bann zanset ti adore lo lot kote Larivyer*+ oubyen bann bondye bann Amorit ki dan sa pei kot zot pe reste.+ Me mwan ek mon fanmir, nou pou ador Zeova.”

16 Alor sa pep ti dir: “Nou pa pou zanmen abandonn Zeova e ador lezot bondye. 17 Zeova nou Bondye ki ti tir nou ek nou bann zanset dan lesklavaz*+ Lezip+ e ki ti fer sa bann gran mirak devan nou.+ I ti osi kontinyen protez nou partou kot nou’n ale e parmi tou sa bann pep kot nou’n pase.+ 18 Zeova ti pous tou sa bann pep enkli bann Amorit ki ti pe reste dan sa pei avan nou. Alor, nou osi nou pou ador Zeova akoz i nou Bondye.”

19 Zozye ti dir sa pep: “Zot pa kapab ador Zeova parski i en Bondye sen+ e i en Bondye ki ekspekte en devosyon* zis pour li tousel.+ I pa pou pardonn zot bann lofans* ek zot bann pese.+ 20 Si zot abandonn Zeova e ador bann bondye etranze,* li osi i pou vir ledo avek zot e i pou detrir zot menm si avan sa, i ti fer bann bon keksoz pour zot.”+

21 Me sa pep ti dir Zozye: “Non, nou pou ador Zeova!”+ 22 Alor Zozye ti dir sa pep: “Zot temwen kont zot prop lekor e zot menm zot ki’n swazir pour ador Zeova.”+ Zot ti dir: “Wi, nou temwen.”

23 “Alor, tir sa bann bondye etranze* ki parmi zot e ador Zeova Bondye Izrael avek tou zot leker.” 24 Sa pep ti dir Zozye: “Nou pou ador Zeova nou Bondye e nou pou obeir li!”

25 Sa zour ler zot ti Sekenm, Zozye ti fer en lalyans avek sa pep e i ti donn zot en lalwa. 26 Apre sa, Zozye ti ekri tousala dan liv Lalwa Bondye+ e i ti met debout en gro ros+ anba sa gro pye dibwa ki o bor landrwa sen Zeova.

27 Apre, Zozye ti dir sa pep antye: “Gete! Sa ros i en temwen kont nou+ akoz i’n tann tou sa ki Zeova in dir nou e i en temwen kont zot, pour ki zot pa trai zot Bondye.” 28 Alor Zozye ti fer sa pep ale, sakenn dan son leritaz.+

29 Apre tou sa ki ti’n arive, Zozye garson Noun, serviter Zeova ti mor a laz 110 an.+ 30 Alor zot ti anter li Timnat-Sera,+ dan teritwar son leritaz ki dan bann montanny Efraim, dan nor avek Montanny Gaas. 31 Bann Izraelit ti kontinyen ador Zeova tou dilon lavi Zozye e osi tou dilon lavi bann ansyen ki ti ankor vivan apre lanmor Zozye. Sa bann ansyen ti’n osi vwar tou sa ki Zeova ti’n fer pour bann Izraelit.+

32 Bann lezo Zozef+ ki bann Izraelit ti’n pran ler zot ti kit Lezip ti ganny antere Sekenm dan sa bout later ki Zakob ti’n aste avek bann garson Amor,+ papa Sekenm, pour 100 pyes larzan.+ Sa bout later ti vin leritaz bann garson Zozef.+

33 Osi, Eleazar garson Aaron ti mor+ e zot ti anter li lo Montanny Fineas son garson.+ Sa montanny ti ganny donnen avek Fineas dan bann montanny Efraim.

[N paz]