AGAY

1 Premye zour, sizyenm mwan, dezyenm lannen ki Daryis ti lerwa, Zeova ti anvoy en mesaz atraver profet Agay*+ pour gouverner Zida, Zeroubabel+ garson Sealtyel e pour Granpret Zozye garson Zeozadak. I ti dir:

2 “La sa ki Zeova Sef larme i dir, ‘Sa bann dimoun i dir, “Letan pa ankor arive pour lakaz* Zeova ganny konstri.”’”*+

3 Ankor enn fwa, Zeova ti koz avek profet Agay.+ I ti dir: 4 “Eski la i en ler pour zot reste dan zot bann zoli lakaz, kan sa lakaz in ganny abandonnen?+ 5 La sa ki Zeova Sef larme i dir, ‘Reflesir byen* lo zot fason viv. 6 Zot in senm en kantite lagrenn, me zot in rekolte en ptigin.+ Zot manze, me zot ankor lafen. Zot bwar, me zot ankor swaf. Zot in met lenz lo zot, me zot ankor ganny fre. Sa labourer ki ganny peye i met son larzan dan en sak ki ranpli avek trou.’”

7 “La sa ki Zeova Sef larme i dir, ‘Reflesir byen* lo zot fason viv.’

8 “Zeova i dir, ‘Al lo montanny e rod dibwa.+ Konstri mon lakaz,+ pour ki mon ganny glorifye+ e ki sa lakaz i fer mwan plezir.’”

9 “La sa ki Zeova Sef larme i dir, ‘Zot ti pe ekspekte en bon rekolt me zot ti ganny en ptigin e ler zot ti anmenn li dan zot lakaz, mon ti soufle li e fer li disparet.+ Pour ki rezon? Parski mon lakaz in vin en ta debri, tandis ki zot tou zot okipe pe pran swen avek zot prop lakaz.+ 10 Pour sa rezon, lesyel pa’n donn zot son laroze e later pa’n donn zot son rekolt. 11 Mon ti fer lasesres vin lo later e lo bann montanny, sa ti fer ki i ti napa dible, nouvo diven, delwil ek plant. Bann imen ek troupo ti soufer e tou zot travay ti anven.’”

12 Zeroubabel+ garson Sealtyel+ ek Granpret Zozye garson Zeozadak+ ek tou lezot dimoun ti ekout Zeova zot Bondye ek profet Agay, parski Zeova zot Bondye ti’n anvoy li e bann dimoun ti konmans annan en gran respe pour Zeova.

13 Apre sa, dapre misyon ki i ti’n gannyen avek Zeova, Agay, mesaze Zeova ti dir bann dimoun: “La sa ki Zeova i dir, ‘Mon avek zot.’”+

14 Alor Zeova ti motiv*+ gouverner Zida,+ Zeroubabel garson Sealtyel ek Granpret Zozye+ garson Zeozadak ek tou bann dimoun. Zot ti vin travay lo lakaz Zeova Sef larme, zot Bondye.+ 15 Zot ti konmans sa travay vennkatriyenm zour, sizyenm mwan dan dezyenm lannen ki Daryis ti lerwa.+

2 Venteentyenm zour, setyenm mwan, Zeova ti koz avek profet Agay+ e dir, 2 “Silvouple demann gouverner Zida+ Zeroubabel+ garson Sealtyel ek Granpret Zozye+ garson Zeozadak+ e larestan dimoun: 3 ‘Eski i annan parmi zot ki rapel labote* sa lakaz* parey i ti ete avan?+ Ki mannyer zot vwar li la konmela? Eski zot pa krwar ki i nanryen ditou konpare avek sa ki i ti ete avan?’+

4 “La sa ki Zeova i dir, ‘Aprezan Zeroubabel, pran kouraz e ou Granpret Zozye garson Zeozadak, pran kouraz.’

“La sa ki Zeova i dir, ‘Zot tou ki reste dan sa pei, pran kouraz+ e travay.’

“La sa ki Zeova Sef larme i dir, ‘Parski mon avek zot.+ 5 Rapel sa ki mon ti promet zot ler zot ti sorti Lezip+ e mon ankor pe gid zot avek mon lafors.*+ Pa bezwen per.’”+

6 “Parski la sa ki Zeova Sef larme i dir, ‘Pourtan ankor enn fwa, dan en pti moman, mon pou sekwe lesyel ek later, lanmer ek later ferm.’+

7 “La sa ki Zeova Sef larme i dir, ‘Mon pou sekwe tou bann nasyon e bann keksoz presye* ki sorti dan tou nasyon pou vin dan sa lakaz+ e mon pou ranpli sa lakaz avek laglwar.’+

8 “La sa ki Zeova Sef larme i dir, ‘Larzan i pour mwan e lor i pour mwan.’

9 “La sa ki Zeova Sef larme i dir, ‘Laglwar sa lakaz pou pli gran ki sa laglwar ki i ti annan avan.’+

“La sa ki Zeova Sef larme i dir, ‘Dan sa landrwa mon pou donn zot lape.’”+

10 Vennkatriyenm zour, nevyenm mwan, dan dezyenm lannen ki Daryis ti lerwa, Zeova ti koz avek profet Agay+ e dir: 11 “La sa ki Zeova Sef larme i dir, ‘Silvouple, demann bann pret ki lalwa i dir:+ 12 “Si en dimoun i anmenn lavyann sen dan son lenz* e si son lenz i tous swa avek dipen, styou, diven, delwil oubyen nenport kalite manze, eski sa manze pou vin sen?”’”

Bann pret ti reponn: “Non!”

13 Alor, Agay ti demande: “Si en dimoun i enpir akoz i’n tous en lekor mor e i tous enn sa bann manze, eski sa manze pou vin enpir?”+

Bann pret ti reponn: “I pou vin enpir.”

14 Alor Agay ti dir: “La sa ki Zeova i dir, ‘Koumsanmenm sa pep i ete, koumsanmenm sa nasyon i ete devan mwan e koumsanmenm tou sa ki zot fer avek zot lanmen i ete, tou sa ki zot ofer i enpir.’

15 “‘Me aprezan, silvouple, reflesir byen* lo la, depi ozordi: Avan ki tanp Zeova ti konmans ganny rekonstrir,+ 16 ki mannyer keksoz ti ete? Ler en dimoun ti sipoze ganny 20 mezir dible kot sa ta dible, i ti annan zis 10 e ler en dimoun ti sipoze ganny 50 mezir diven dan barik, i ti annan zis 20.+ 17 Mon ti pini zot par fer gro lasaler, maladi ek lagrel atak zot plantasyon,+ me personn pa ti retourn ver mwan.’ La sa ki Zeova in dir.

18 “‘Silvouple, reflesir byen* lo la, depi ozordi, vennkatriyenm zour, nevyenm mwan, depi ler fondasyon tanp Zeova ti ganny fer,+ reflesir byen lo la: 19 Eski i ankor annan lagrenn dan stor?+ Pye rezen, pye fig, pye grenad ek pye zoliv, pa’n raport fri, pa i vre? Me, depi ozordi, mon pou beni zot.’”+

20 Zeova ti koz avek Agay en dezyenm fwa, lo vennkatriyenm zour sa mwan+ e dir: 21 “Dir gouverner Zida, Zeroubabel, ‘Mon pou sekwe lesyel ek later.+ 22 Mon pou retir tronn bann rwayonm ek pwisans bann nasyon,+ mon pou detrir saret lager ek son kavalye, bann seval ek zot kavalye pou tonbe e sakenn pou touy kanmarad avek lepe.’”+

23 “La sa ki Zeova Sef larme i dir, ‘Sa zour, mon pou servi ou, mon serviter Zeroubabel+ garson Sealtyel+ konman en bag* ki annan gran valer.’ La sa ki Zeova i dir, ‘Parski ou sa enn ki mon’n swazir.’ La sa ki Zeova Sef larme in dir.”