LET POUR BANN KOLOSYEN

1 Pol, en zapot Kris Zezi gras a lavolonte Bondye e Timote+ nou frer, 2 pour bann sen ek frer fidel ki bann disip Kris, ki Kolos:

Ki Bondye nou Papa i donn zot lape ek labonte ekstraordiner.*

3 Nou toultan remersye Bondye, Papa nou Senyer Zezi Kri, ler nou priy pour zot, 4 parski nou’n tann konsernan zot lafwa dan Kris Zezi e sa lanmour ki zot annan pour tou bann sen 5 akoz sa lespwar ki’n ganny rezerve pour zot dan lesyel.+ Zot ti tann koz lo sa lespwar ler mesaz laverite konsernan sa bon nouvel 6 ti ganny anonse avek zot. Sa bon nouvel pe raport fri e pe kontinyen propaze partou dan lemonn,+ parey i leka parmi zot depi zour ki zot in tann e konn egzakteman sa vre labonte ekstraordiner Bondye. 7 Sanmenm sa ki zot in aprann avek Epafras,+ sa serviter* fidel ki nou kontan ki pe servi konman en lesklav Kris dan nou plas. 8 I’n osi fer nou konn zot lanmour ki zot in devlope gras a lespri sen.*

9 Sanmenm sa ki depi zour nou’n tann konsernan zot lafwa ek lanmour, nou pa’n aret priy pour zot+ e demande ki zot ganny konnesans egzakt+ annabondans konsernan son lavolonte avek tou lasazes ek konprenezon lo bann keksoz spirityel.+ 10 Koumsa, zot pou kapab viv dan en fason ki onor Zeova** e ki fer li vreman plezir, zot pou kapab kontinyen raport fri dan tou sa ki zot fer e kontinyen ogmant zot konnesans egzakt lo Bondye.+ 11 Ki lafors glorye ek pwisans Bondye i fortifye zot+ pour ki zot kapab andir tou keksoz avek pasyans ek lazwa, 12 anmezir ki zot remersye nou Papa ki’n fer li posib pour zot ganny sa menm leritaz ki bann sen+ ki dan lalimyer.

13 I’n tir nou dan fernwanr*+ e transfer nou dan rwayonm son Garson ki i kontan. 14 I gras a li e sa ranson* ki nou’n ganny libere, setadir ki nou pese i ganny pardonnen.+ 15 Li menm resanblans sa Bondye envizib,+ premye ne tou kreasyon,+ 16 parski atraver li tou lezot keksoz dan lesyel e lo later in ganny kree, bann keksoz vizib e envizib,+ ki swa i bann tronn, dominasyon, gouvernman ek lotorite. Tou lezot keksoz in ganny kree atraver li+ e pour li. 17 Osi, i’n la avan tou lezot keksoz+ e atraver li tou lezot keksoz in vin an egzistans, 18 i latet* lekor, setadir kongregasyon.+ Li menm konmansman, sa enn premye pour ganny resisite,*+ pour ki i kapab vin sa enn ki premye dan tou keksoz. 19 Parski Bondye ti oule ki tou keksoz i reste dan li+ 20 e ki gras a li, tou lezot keksoz, ki swa bann keksoz lo later ouswa bann keksoz dan lesyel, i ganny rekonsilye avek Bondye+ akoz zot fer lape gras a disan+ ki Zezi ti verse lo poto martir.*

21 Anfet, lontan zot ti lennmi Bondye e zot ti elwannyen avek li akoz zot ti pe zis mazin fer bann move keksoz. 22 Me aprezan, i’n rekonsilye avek zot gras a lekor sa enn ki’n mor, pour ki zot kapab vin devan li, sen, san defo e pour ki personn napa okenn rezon pour akiz zot,+ . . . 23 me selman, fodre ki zot kontinyen annan lafwa+ ki’n ganny etablir lo sa fondasyon+ e ki zot ferm,+ pour ki zot pa ganny antrennen lwen avek sa lespwar konsernan sa bon nouvel ki zot ti tande e ki ti ganny anonse avek dimoun partou lo later.*+ Mwan Pol, mon’n vin en serviter* pour anons sa bon nouvel.+

24 Aprezan mon dan lazwa akoz mon pe soufer pour zot+ e mon santi ki mon pa ankor ase soufer pour lekor Kris,+ setadir kongregasyon.+ 25 Mon’n vin en serviter* sa kongregasyon akoz sa responsabilite+ ki Bondye in donn mwan pour akonpli pour zot, setadir anons parol Bondye afon, 26 andotmo sa sekre ki sakre+ ki ti’n ganny kasyet depi en kantite letan pase*+ e avek bann zenerasyon pase. Me aprezan, sa sekre ki sakre in ganny revele avek son bann sen.+ 27 Bondye in kontan ki bann sen ek dimoun lezot nasyon osi i konn grander laglwar sa sekre ki sakre,+ setadir Kris ki ini avek zot e sa lespwar ki zot pou ganny glorifye avek li.+ 28 Li menm sa enn ki nou pe koz lo la, nou pe averti tou dimoun e pe ansenny tou dimoun avek tou lasazes, pour ki nou kapab ed zot vin bann disip Kris ki matir+ e prezant zot devan Bondye. 29 Pour reisi fer sa, mon pe vreman travay dir, mon pe donn tou pour tou gras a son lafors ki pe azir dan en fason pwisan dan mwan.+

2 Mon anvi zot realize ki kantite mon pe lite pour zot, pour bann ki Laodise+ e pour tou bann ki pa’n vwar mwan personnelman. 2 Sa i leka pour ki zot kapab ganny rekonforte,+ ki zot kapab ini ansanm dan lanmour ek larmoni+ e pour ki zot kapab ganny tou bann benediksyon setadir en konprenezon kler e asire, pour ki zot ganny en konnesans egzakt konsernan sekre Bondye ki sakre, setadir Kris.+ 3 Dan li, tou bann trezor lasazes ek konnesans in ganny byen kasyet.+ 4 Mon pe dir sa pour ki personn pa anbet zot avek bann fo rezonnman pour esey konvenk zot. 5 Menm si mon pa la avek zot, mon pe mazin zot.* Mon kontan pour konnen ki keksoz i byen annord kot zot+ e ki zot lafwa dan Kris i solid.+

6 Alor, zis parey zot in aksepte Kris Zezi nou Senyer, kontinyen viv* dan linite avek li. 7 Kontinyen batir zot dan Kris e anrasinen dan li.+ Kontinyen vin pli stab dan lafwa+ zis parey zot in ganny ansennyen e toultan remersye Bondye.+

8 Fer atansyon ki personn pa met zot dan pyez* avek zot bann filozofi ek fo rezonnman+ ki pa baze lo Kris me lo bann tradisyon zonm e lo bann keksoz sa lemonn. 9 Pourtan tou bann kalite Bondye i dan Kris.+ 10 Alor, zot pa mank nanryen gras a li, li ki sef tou bann gouvernman ek lotorite.+ 11 Akoz zot relasyon avek li, zot pa’n ganny sirkonsi avek lanmen zonm, me zot in ganny sirkonsi par debaras zot avek lekor enparfe,+ setadir par sirkonsizyon ki sorti kot Kris.+ 12 Parski zot in ganny antere avek li par ganny batize parey li+ e akoz zot relasyon avek li zot ti osi ganny resisite+ ansanm avek li gras a zot lafwa dan sa ki Bondye in fer e ki ti osi resisit li.+

13 Deplis, zot ti’n mor akoz zot fot e akoz zot pa ti’n ganny sirkonsi, Bondye in redonn zot lavi e fer zot ini avek li.+ I’n volonterman pardonn nou pour tou nou bann fot+ 14 e i’n efas sa dokiman an ekri+ avek tou son bann lalwa+ ki ti kont nou.+ I’n tir li par klout li lo poto martir.*+ 15 Gras a sa poto martir,** i’n dezabiy tou bann gouvernman ek lotorite, i’n defet zot e fer zot vin en legzibisyon devan tou dimoun+ e anmenn zot dan en parad laviktwar.

16 Alor, pa les personn ziz zot konsernan sa ki zot manze e bwar,+ konsernan en lafet, nouvellin*+ oubyen saba.+ 17 Sa bann keksoz i en reprezantasyon* bann keksoz ki pou vini,+ me larealite i Kris.+ 18 Pa les personn ki fer krwar i annan limilite e ki ador bann lanz* anpes zot ganny sa pri.+ En dimoun koumsa “i ensiste lo bann vizyon”* ki li i’n vwar e i napa okenn rezon pour ponp son lekor akoz son fason panse i move. 19 I pa pe reste atase avek Kris ki latet,+ avek sa enn ki donn lekor antye tou sa ki i bezwen e ki fer bann diferan parti lekor zwenn ansanm dan larmoni gras a bann zwentir ek ligaman* e ki fer li grandi gras a led Bondye.+

20 Si zot in mor avek Kris konsernan bann keksoz sa lemonn,+ akoz zot viv konmsi zot form parti sa lemonn par kontinyen soumet avek son bann lalwa+ ki dir: 21 “Pa bezwen pran, ni goute, ni touse?” 22 Parski sa bann keksoz i fini ler zot ganny servi e sa bann lalwa i bann lord ek lansennyman zonm.+ 23 Zot enpoz lo zot prop lekor en kalite ladorasyon, zot fer krwar ki zot annan limilite e zot fer zot lekor soufer.+ Menm si tousala i paret saz, i napa okenn valer akoz i pa ed zot rezet bann move dezir.

3 Par kont, si zot in ganny resisite avek Kris,+ kontinyen rod bann keksoz ki annan pour fer avek lesyel, kot Kris pe asize dan kote drwat Bondye.+ 2 Gard zot lespri fikse lo bann keksoz ki annan pour fer avek lesyel+ e pa lo bann keksoz ki annan pour fer avek later.+ 3 Parski zot in mor e zot lavi in ganny kasyet avek Kris ki ini avek Bondye. 4 Ler Kris, nou lavi,+ i ganny revele, alor zot osi zot pou ganny revele avek li dan laglwar.+

5 Alor, met amor zot bann move dezir*+ ki annan pour fer avek imoralite seksyel,* lenpirte, move dezir seksyel san kontrol,+ dezir pour fer sa ki mal ek vorasite, ki en form ladorasyon zidol. 6 Bondye pou demontre son lakoler anver bann ki fer sa bann keksoz. 7 Koumsanmenm ki zot osi zot ti pe viv avan.*+ 8 Me aprezan zot devret debaras zot avek tousala: firer, lakoler, lemal,+ lensilt+ e pa les bann parol sal*+ sorti dan zot labous. 9 Pa koz manti avek kanmarad.+ Debaras zot avek sa vye personnalite*+ ek son bann pratik 10 e gras a konnesans egzakt, kontinyen devlop* sa nouvo personnalite+ ki pe ganny renouvle dapre personnalite sa Enn ki’n kree li.+ 11 Dan sa ka, napa ni Grek ni Zwif, dimoun sirkonsi oubyen pa sirkonsi, etranze, bann Sit,* lesklav ouswa dimoun lib, me Kris i tou keksoz e i dan tou.+

12 Alor, konman sa bann ki Bondye in swazir,+ ki sen e ki Bondye i kontan, demontre lafeksyon* avek tandres ek konpasyon,+ labonte, limilite,+ ladouser+ ek pasyans.+ 13 Kontinyen siport kanmarad e pardonn kanmarad volonterman+ menm si en dimoun i annan rezon pour konplent akoz en lot.+ Parey Zeova* in volonterman pardonn zot, zot osi zot devret fer parey.+ 14 Me an plis ki tou sa bann keksoz, demontre lanmour*+ parski lanmour i fer dimoun ini ansanm dan en fason parfe.*+

15 Osi, ki lape Kris i kontrol* zot leker,+ parski zot ti ganny swazir pour ki zot anpe dan en sel lekor. Toultan montre zot rekonesans. 16 Ki parol Kris avek tou son lasazes i konpletman reste dan zot. Kontinyen ansennyen e ankouraz* kanmarad avek bann psonm,+ kantik pour loue Bondye, sanson spirityel ki ganny sante avek rekonesans, sant avek tou zot leker* pour Zeova.*+ 17 Tou sa ki zot dir oubyen fer, fer tou o non Senyer Zezi e remersye Bondye Papa atraver li.+

18 Zot bann madanm, soumet avek zot msye+ parski sa i byen devan Senyer. 19 Zot bann msye, kontinyen kontan zot madanm+ e pa bezwen pran lakoler avek zot.*+ 20 Zot bann zanfan, obeir zot paran dan tou keksoz+ parski sa i fer plezir Senyer. 21 Zot bann papa, pa bezwen fer zot zanfan ankoler*+ pour ki zot pa dekouraze. 22 Zot bann lesklav,* obeir zot met lo later dan tou keksoz,+ pa zis ler zot pe get zot, zis pour fer plezir dimoun, me fer li avek en leker senser e avek en gran respe* pour Zeova.* 23 Tou sa ki zot pe fer, fer li avek tou zot leker* konmsi zot pe fer li pour Zeova*+ e non pa pour dimoun, 24 parski zot konnen ki Zeova* ki pou donn zot en leritaz konman rekonpans.+ Konman en lesklav, servi zot Met, Kris. 25 Sirman sa enn ki fer lemal pou ganny pini akoz sa lemal ki i’n fer,+ parski Bondye pa fer okenn lapreferans.+

4 Zot, bann met, tret zot lesklav* dan en fason drwat e zis, parski zot konnen ki zot osi zot annan en Met dan lesyel.+

2 Persevere dan lapriyer.+ Reste eveye an sa ki konsern lapriyer e remersye Bondye.+ 3 An menm tan, priy pour nou osi,+ pour ki Bondye i kapab ouver en laport pour nou anons son parol e koz lo sa sekre ki sakre konsernan Kris. Anfet, i pour sa rezon ki mon dan prizon.+ 4 Priy osi pour ki mon kapab anons li dan en fason kler parey mon devret fer.

5 Kontinyen viv dan en fason saz ler zot avek bann ki pa form parti kongregasyon e servi byen zot letan.*+ 6 Zot parol i devret touzour agreab, konmsi i asezonnen avek disel,+ pour ki zot konnen konman zot devret reponn sak dimoun.+

7 Tisik,+ en frer ki mon kontan, en serviter* fidel e en lesklav Senyer parey mwan, pou donn zot tou mon nouvel. 8 Mon pe anvoy li kot zot pour ki zot konnen ki mannyer nou ete e pour ki i kapab rekonfort zot. 9 I pe vin ansanm avek Onezim,+ mon frer fidel ki mon kontan, ki sorti kot zot, zot pou rakont zot tou sa ki pe arive isi.

10 Aristark,+ ki dan prizon avek mwan i fer zot salanm. Mark,+ kouzen Barnabas (sa enn ki zot ti ganny lenstriksyon pour byen resevwar li+ si i vin kot zot) 11 ek Zezi ki osi ganny apele Zistis i fer zot salanm. Zot form parti bann Zwif.* Zis zot ki travay ansanm avek mwan pour Rwayonm Bondye e zot in vin en gran sours rekonfor* pour mwan. 12 Epafras,+ ki sorti kot zot, en lesklav Kris Zezi i fer zot salanm. I pe toultan lite pour zot dan son bann lapriyer, pour ki zot finalman vin bann dimoun matir* e vreman konvenki an sa ki konsern tou lavolonte Bondye. 13 Parski mon asir zot ki i pe fer en kantite zefor pour zot e pour bann ki Laodise ek Yerapolis.

14 Lik,+ sa dokter ki nou kontan ek Demas+ i fer zot salanm. 15 Fer salanm bann frer ki Laodise e osi nou ser Nimfa, ensi ki bann dan sa kongregasyon ki zwenn kot son lakour.+ 16 Ler sa let in fini ganny lir avek zot, fer laranzman pour ki i osi ganny lir+ dan kongregasyon Laodise e zot, zot pou osi lir sa let ki’n ganny anvoye Laodise. 17 Deplis, dir Arsip:+ “Kontinyen veye ki ou akonpli byen sa minister ki ou ti aksepte dan Senyer.”

18 Mwan osi Pol, mon fer zot salanm. Sa mon’n ekri avek mon prop lanmen.+ Pa bliye ki mon dan prizon.+ Ki labonte ekstraordiner Bondye i avek zot.