PREMYE LET ZAN

1 Nou pe ekri zot konsernan parol lavi,+ konsernan sa enn ki ti la depi o konmansman, ki nou’n tande, ki nou’n vwar avek nou lizye, ki nou’n obzerve e ki nou’n touse avek nou lanmen. 2 (Wi, lavi eternel ti ganny revele avek nou, nou’n vwar, nou’n rann temwannyaz+ e anons zot konsernan sa lavi eternel+ ki sorti kot nou Papa e ki’n ganny revele avek nou). 3 Nou’n dir zot sa ki nou’n vwar e tande,+ pour ki zot osi zot kapab ini* avek nou vi ki nou nou ini avek nou Papa e avek son Garson Zezi Kri.+ 4 Nou pe ekri zot sa bann keksoz pour ki nou lazwa i vreman gran.

5 La sa mesaz ki nou’n tande avek li e ki nou pe anons zot: Bondye i lalimyer+ e napa okenn fernwanr dan li.* 6 Si nou dir: “Nou ini avek li” e pourtan nou pe kontinyen mars dan fernwanr, nou pe koz manti e nou pa pe viv an armoni avek laverite.+ 7 Par kont, si nou pe mars dan lalimyer parey li i dan lalimyer, nou vreman ini avek kanmarad e disan Zezi son Garson i pirifye nou avek tou pese.+

8 Si nou dir, “Nou pa fer pese,” nou pe anbet nou lekor+ e laverite pa dan nou. 9 Si nou konfes nou pese, Bondye i fidel e drwat, alor i pou pardonn nou pour nou pese e pirifye nou avek tou sa ki mal.+ 10 Si nou dir: “Nou pa’n fer pese,” nou pe fer li pas pour en manter e nou pa krwar dan son parol.*

2 Mon bann zanfan,* mon pe ekri zot sa bann keksoz pour ki zot pa fer en pese. Pourtan, si en dimoun i fer en pese, nou annan en asistan* ki avek nou Papa e sa i Zezi Kri,+ sa enn ki drwat.+ 2 Li menm sa sakrifis rekonsilyasyon*+ pour nou pese,+ me pa zis pour nou pese me pour pese lemonn antye.+ 3 Si nou kontinyen obeir son bann komannman, i pou evidan ki nou’n aprann konn li. 4 Sa enn ki dir, “Mon konn li” e pourtan i pa obeir son bann komannman, i en manter e laverite pa dan sa dimoun. 5 Me sa enn ki obeir son parol, i montre ki i vreman kontan Bondye.+ Si nou fer sa, nou pou montre ki nou ini avek li.+ 6 Sa enn ki dir i ini avek li i oblize kontinyen viv* parey li i ti viv.+

7 Zot ki mon kontan, mon pa pe donn zot en nouvo komannman, me en vye komannman ki zot in annan depi o konmansman.+ Sa vye komannman i sa parol ki zot in deza tande. 8 Toudmenm, mon pe ekri zot en nouvo komannman, ki vre dan ka Zezi e osi dan zot ka, parski fernwanr pe disparet e sa vre lalimyer pe deza klere.+

9 Sa enn ki dir ki i dan lalimyer e pourtan i ay+ son frer i ankor dan fernwanr.+ 10 Sa enn ki kontan son frer i reste dan lalimyer+ e napa nanryen ki pou fer li tonbe.* 11 Me sa enn ki ay son frer i dan fernwanr e i pe mars dan fernwanr,+ i pa konnen kote i pe ale,+ parski i pa kapab vwar nanryen dan fernwanr.

12 Mon bann zanfan, mon pe ekri zot parski zot pese in ganny pardonnen akoz son non.+ 13 Bann papa, mon pe ekri zot parski zot in aprann konn sa enn ki egziste depi o konmansman. Garson, mon pe ekri zot, parski zot in ranport laviktwar lo sa enn move.+ Zanfan, mon pe ekri zot, parski zot in aprann konn nou Papa.+ 14 Bann papa, mon pe ekri zot, parski zot in aprann konn sa enn ki egziste depi o konmansman. Garson, mon pe ekri zot, parski zot for,+ zot kontinyen krwar dan parol Bondye+ e zot in ranport laviktwar lo sa enn move.+

15 Pa bezwen kontan ni lemonn, ni bann keksoz ki dan lemonn.+ Si en dimoun i kontan lemonn, i napa lanmour nou Papa dan li,+ 16 parski tou sa ki dan lemonn, dezir lekor enparfe,+ dezir lizye+ e ler dimoun i demonstre akoz son bann keksoz materyel,* tousala pa sorti kot nou Papa, me i sorti dan lemonn. 17 Deplis, sa lemonn e osi son bann dezir pou disparet,+ me sa enn ki fer lavolonte Bondye pou reste pour touzour.+

18 Zanfan, la i sa dernyen erdtan. Zot in tande ki lennmi Kris* pe vini+ e menm la konmela i deza annan en kantite lennmi Kris,+ koumsa ki nou konnen ki nou dan sa dernyen erdtan. 19 Zot ti parmi nou, me zot pa ti parey nou,+ parski si zot ti parey nou, zot ti pou’n reste avek nou. Me zot in kit nou e sa i montre ki pa tou ki parey nou.+ 20 Zot in ganny swazir par sa enn ki sen+ e zot tou zot annan konnesans. 21 Mon pe ekri zot, pa akoz zot pa konn laverite,+ me akoz zot konnen e akoz napa mansonz ki sorti dan laverite.+

22 Lekel sa manter si i pa sa enn ki dir ki Zezi pa Kris?+ Li menm li lennmi Kris,*+ sa enn ki rezet Papa ek Garson. 23 Tou sa ki rezet Garson, i napa laprouvasyon Papa osi.+ Me sa ki aksepte Garson+ i annan laprouvasyon Papa osi.+ 24 Tandis ki zot, zot devret gard sa ki zot in tande depi o konmansman.+ Si zot gard sa ki zot in tande depi o konmansman, zot pou osi reste ini avek Garson e ini avek Papa. 25 Deplis, la sa ki li menm in promet nou, lavi eternel.+

26 Mon pe ekri zot sa bann keksoz konsernan sa bann ki pe esey anbet zot. 27 Tandis ki zot, Bondye in swazir* zot gras a son lespri sen+ e son lespri sen i reste dan zot, alor zot pa bezwen personn pour ansenny zot. Me Bondye i servi son lespri sen pour ansenny zot tou keksoz,+ i vre e i pa koz manti. Zis parey i’n ansenny zot, reste ini avek sa enn ki’n swazir zot.+ 28 Alor mon bann zanfan, reste ini avek li, pour ki ler i ganny revele, nou a kapab koz avek lardyes+ e ki nou pa pou elwannyen avek li ler i la,* akoz nou onte. 29 Si zot konnen ki i fer sa ki byen, zot osi konnen ki tou dimoun ki kontinyen fer sa ki byen i son zanfan.+

3 Gete ki kantite nou Papa in kontan nou!+ Sanmenm i’n swazir nou konman son zanfan*+ e sanmenm ki nou ete. I pour sa rezon ki lemonn pa konn nou,+ parski lemonn pa’n konn li.+ 2 Zot ki mon kontan, menm si la nou zanfan Bondye,+ nou pa ankor konnen ki mannyer nou pou ete.+ Me nou konnen ki ler i pou ganny revele, nou pou vin parey li, parski nou pou vwar li parey i ete. 3 Tou sa ki annan sa lespwar dan li i devret pirifye son lekor,+ zis parey sa enn i pir.

4 Tou sa ki pratik pese pe osi kas lalwa e pese i vedir kas lalwa. 5 Osi zot konnen ki i ti ganny revele pour retir nou pese+ e napa pese dan li. 6 Tou sa ki reste ini avek li pa pratik pese.+ Sa ki pratik pese pa’n vwar li ouswa konn li. 7 Mon bann zanfan, pa les personn anbet zot, sa enn ki kontinyen fer sa ki byen i drwat, zis parey sa enn i drwat. 8 Sa enn ki pratik pese i sorti kot Dyab, parski depi o konmansman* Dyab in kontinyen fer pese.+ I pour sa rezon ki Garson Bondye in ganny revele, pour li elimin* lemal ki Dyab in fer.+

9 Tou sa ki zanfan Bondye pa pratik pese,+ parski Son lespri sen* i reste dan sa enn e i pa kapab pratik pese, parski i en zanfan Bondye.+ 10 La ki mannyer nou kapab konnen lekel ki zanfan Bondye e lekel ki zanfan Dyab: Sa ki pa kontinyen fer sa ki byen pa sorti kot Bondye e ni sa enn ki pa kontan son frer.+ 11 Parski la sa mesaz ki zot in tande depi o konmansman, ki nou devret kontan kanmarad.+ 12 Nou pa devret parey Kaen ki ti zanfan sa enn move* e ki ti touy son frer.+ Akoz i ti touy li? Parski i ti fer sa ki move+ me son frer ti fer sa ki byen.+

13 Mon bann frer, pa bezwen sirprann ki sa lemonn i ay zot.+ 14 Nou konnen ki i ti konmsi nou ti’n mor me la nou vivan,+ parski nou kontan nou bann frer.+ Sa ki pa kontan son frer, i konmsi i ankor mor.+ 15 Tou sa ki ay son frer i en mertriye*+ e zot konnen ki en mertriye pa ganny lavi eternel.+ 16 Nou konnen kisisa lanmour, parski sa enn in donn son lavi* pour nou+ e nou nou oblize donn nou lavi* pour nou bann frer.+ 17 Me sa ki annan bann keksoz materyel dan sa lemonn e i vwar son frer dan bezwen me i refize demontre konpasyon anver li, ki mannyer i kapab dir ki i kontan Bondye?+ 18 Mon bann zanfan, nou devret kontan lezot pa zis an parol ouswa avek labous,+ me montre ki nou lanmour i senser+ par nou aksyon.+

19 Si nou fer sa, nou pou konnen ki nou dan laverite e nou pou konvenk* nou leker ki Bondye pa kondann nou, 20 menm si nou leker i kondann nou, parski Bondye i pli gran ki nou leker* e i konn tou keksoz.+ 21 Zot ki mon kontan, si nou leker pa kondann nou, nou kapab koz avek Bondye libreman+ 22 e nenport kwa ki nou demande, i donn nou+ parski nou pe obeir son bann komannman e nou pe fer sa ki fer li plezir. 23 Anfet, la son komannman: ki nou annan lafwa dan non son Garson Zezi Kri+ e ki nou kontan kanmarad,+ zis parey i’n donn nou lord. 24 Deplis, sa enn ki obeir son bann komannman i reste ini avek Bondye e Bondye i ini avek li.+ Gras a lespri sen ki i’n donn nou, nou konnen ki i reste ini avek nou.+

4 Zot ki mon kontan, pa bezwen krwar tou parol enspire,*+ me teste sa bann parol enspire* pour vwar si zot sorti kot Bondye,+ parski i annan en kantite fo profet dan sa lemonn.+

2 La ki mannyer zot a konnen si en parol enspire i sorti kot Bondye: Tou parol enspire i sorti kot Bondye si i dir ki Zezi Kri in vin lo later konman en imen.+ 3 Me tou parol enspire ki dir ki Zezi pa ti vin lo later konman en imen pa sorti kot Bondye.+ Deplis, sanmenm sa parol enspire lennmi Kris* ki zot in tande pou vini+ e i deza la dan lemonn.+

4 Mon bann zanfan ki mon kontan, zot sorti kot Bondye e zot in ranport laviktwar lo bann fo profet+ parski sa enn ki ini avek zot+ i pli gran ki sa enn ki ini avek sa lemonn.+ 5 Zot sorti dan lemonn,+ sanmenm zot koz lo sa ki sorti dan lemonn e lemonn i ekout zot.+ 6 Nou nou sorti kot Bondye. Sa ki aprann konn Bondye i ekout nou,+ sa ki pa sorti kot Bondye pa ekout nou.+ Koumsa ki nou konn diferans ant parol enspire ki vre ek parol enspire ki fo.+

7 Zot ki mon kontan, annou kontinyen kontan kanmarad,+ parski lanmour i sorti kot Bondye e tou sa ki kontan lezot i zanfan Bondye e i konn Bondye.+ 8 Sa ki pa kontan lezot pa’n aprann konn Bondye parski Bondye i lanmour.+ 9 Dan nou ka, Bondye in montre ki i kontan nou par anvoy son sel Garson*+ dan lemonn pour ki gras a li nou kapab ganny lavi.+ 10 La sa ki lanmour i vedir, i pa ki nou nou’n kontan Bondye, me ki Bondye in kontan nou e i’n anvoy son Garson konman en sakrifis rekonsilyasyon+ pour nou pese.*+

11 Zot ki mon kontan, si koumsa ki Bondye in kontan nou, alor nou oblize kontan kanmarad.+ 12 Personn pa’n zanmen vwar Bondye.+ Si nou kontinyen kontan kanmarad, Bondye pou reste avek nou e son lanmour pou vin parfe dan nou.+ 13 Koumsa ki nou konnen si nou pe reste ini avek li e li i ini avek nou, parski i’n donn nou son lespri sen. 14 Deplis, nou menm nou’n vwar e nou pe rann temwannyaz ki nou Papa in anvoy son Garson pour sov lemonn.+ 15 Sa ki dir ki Zezi i Garson Bondye,+ Bondye i reste ini avek li e li i ini avek Bondye.+ 16 Nou konnen e nou krwar ki Bondye i kontan nou.+

Bondye i lanmour+ e sa enn ki kontinyen demontre lanmour i reste ini avek Bondye e Bondye i reste ini avek li.+ 17 Pour sa rezon, lanmour in vin parfe dan nou, pour ki nou kapab koz avek lardyes*+ zour zizman, parski dan sa lemonn nou parey Kris i ete. 18 Dimoun ki kontan Bondye pa per,+ parski lanmour parfe i fer lafreyer disparet, me lafreyer i paraliz nou. Anfet, sa enn ki per pa ankor kontan dan en fason parfe.+ 19 Nou nou kontan akoz i’n kontan nou premye.+

20 Si en dimoun i dir: “Mon kontan Bondye,” me pourtan i ay son frer, sa dimoun i en manter.+ Parski sa enn ki pa kontan son frer+ ki i kapab vwar, pa kapab kontan Bondye ki i pa kapab vwar.+ 21 I’n donn nou sa komannman, sa ki kontan Bondye i devret osi kontan son frer.+

5 Sa ki krwar ki Zezi i vreman Kris i zanfan Bondye+ e sa ki kontan Papa i osi kontan son zanfan. 2 Nou konnen ki nou kontan bann zanfan Bondye+ ler nou kontan Bondye e obeir son bann komannman. 3 Parski kontan Bondye i vedir obeir son bann komannman+ e pourtan son bann komannman pa en fardo,+ 4 akoz tou bann zanfan Bondye* i ranport laviktwar lo lemonn.+ Gras a nou lafwa, nou’n ranport laviktwar lo lemonn.+

5 Lekel ki kapab ranport laviktwar lo lemonn?+ Pa i sa enn ki annan lafwa ki Zezi i Garson Bondye?+ 6 Li menm li Zezi Kri ki ti vin avek delo ek disan, pa zis avek delo tousel,+ me avek delo ek disan.+ Lespri sen i konfirm sa+ akoz lespri sen i dir laverite.* 7 Parski i annan trwa temwen: 8 lespri sen,+ delo+ ek disan+ e zot tou le trwa i dakor avek kanmarad.

9 Menm si nou aksepte temwannyaz zonm, temwannyaz Bondye i pli siperyer ki temwannyaz zonm, parski Bondye li menm in dir ki Zezi i son Garson. 10 En dimoun ki annan lafwa dan Garson Bondye i krwar dan sa temwannyaz ki Bondye in donnen. En dimoun ki napa lafwa dan Bondye i fer Bondye pas pour en manter+ akoz i pa krwar dan sa ki Bondye in dir konsernan son Garson. 11 La temwannyaz Bondye, ki Bondye in donn nou lavi eternel+ e nou ganny sa lavi gras a son Garson.+ 12 En dimoun ki aksepte son Garson i ganny lavi eternel, en dimoun ki pa aksepte Garson Bondye, pa ganny sa lavi.+

13 Mon pe ekri zot sa bann keksoz, zot ki annan lafwa dan non Garson Bondye,+ pour ki zot kapab konnen ki zot annan lavi eternel.+ 14 Nou annan konfyans dan li,*+ ki nenport kwa ki nou demann li ki an armoni avek son lavolonte, i pou ekout nou.+ 15 Deplis, si nou konnen ki i ekout nou konsernan nenport kwa ki nou demann li, nou konnen ki nou pou ganny sa ki nou demande, parski i avek li ki nou’n demande.+

16 Si en dimoun i vwar son frer pe fer en pese ki pa merit lanmor, i devret priy pour li e Bondye pou donn li lavi.*+ Sa i aplikab pour bann ki fer bann pese ki pa merit lanmor. Par kont, i annan en pese ki merit lanmor.+ Pour sa kalite pese, mon dir sa dimoun pa priy pour li. 17 Tou sa ki mal i en pese,+ me pourtan i annan en pese ki pa merit lanmor.

18 Nou konnen ki en dimoun ki en zanfan Bondye pa pratik pese, me Garson Bondye* i vey li e sa enn move pa kapab fer li nanryen.*+ 19 Nou konnen ki nou sorti kot Bondye, me lemonn antye i anba kontrol sa enn move.*+ 20 Me nou osi konnen ki Garson Bondye in vin lo later+ e i’n ed nou konpran* pour ki nou kapab konn sa enn ki vre. Gras a son Garson Zezi Kri, nou ini avek sa enn ki vre.+ I sa vre Bondye e sa enn ki donn lavi eternel.+ 21 Mon bann zanfan, reste lwen avek bann zidol.+