De garson ki ti resisite

SIPOZE ou’n mor, konman ou manman ti pou santi si en dimoun ti redonn ou lavi? I ti pou vreman kontan! Me eski en dimoun ki’n mor i kapab reviv ankor? Eski sa in deza arive avan?

Get sa zonm la, ek sa madanm ek sa pti garson. Sa zonm i en profet, i apel Eliya. Sa madanm napa msye e i reste dan lavil Tsarfat, e sa i son pti garson. En zour sa pti garson ti tonm malad. Son maladi ti vin grav ziska ki finalman i ti mor. Eliya ti dir avek sa madanm: ‘Donn mwan sa pti garson.’

Eliya ti anmenn sa pti garson dan lasanm anler dan letaz e i ti met li lo en lili. Apre i ti priye: ‘O Zeova, fer sa pti garson viv ankor.’ E sa pti garson ti konmans respire! Apre sa Eliya ti anmenn li kot son manman e i ti dir avek li: ‘Gete, ou pti garson i vivan!’ Son manman ti vreman kontan.

En lot profet enportan Zeova ti apel Elisa. Li osi i ti ganny pouvwar pour fer mirak. En zour Elisa ti al dan lavil Sounenm. Laba ti annan en madanm ki ti vreman zantiy avek li. Plitar sa madanm ti ganny en pti garson.

Sa pti garson ti grandi, e en zour bomaten, i ti al vwar son papa ki ti pe travay dan plantasyon. En pti moman i ti konmans plennyen: ‘Mon latet i fer mal!’ Apre ki i ti’n ganny anmennen kot li, sa pti garson ti mor. Son manman ti vreman sagren. Toudswit i ti al sers Elisa.

Kan Elisa ti arive, i ti al dan lasanm avek sa pti garson ki ti’n mor. I ti priy Zeova, e i ti dormi lo lekor sa pti garson. Lekor sa pti garson ti konmans sofe e i ti eternen 7 fwa. Son manman ti vreman kontan pour vwar son garson vivan ankor.

I annan en kantite, en kantite dimoun ki’n mor. Sa ti fer zot fanmiy ek zanmi vreman tris. Nou napa pouvwar pour resisit bann dimoun ki’n mor. Me Zeova i annan. Plitar nou pou aprann konman i pou fer plizyer milyon dimoun viv ankor.