Lo Montanny Zolivye

SA SE Zezi lo montanny Zolivye. Sa kat zonm ki avek li i son bann zapot. Andre i frer Pyer, e Zak i frer Zan. Sa ki ou vwar dan lwen se tanp Bondye an Zerizalenm.

De zour ti’n pase depi ki Zezi ti’n al Zerizalenm lo en pti bourik. Ti Mardi. Pli boner dan lazournen Zezi ti kot tanp. Laba bann pret ti esey atrap li pour touy li. Me zot ti per pour fer sa akoz bann dimoun ti kontan Zezi.

‘Zot bann serpan ek bann piti serpan!’ Zezi ti dir avek bann sef relizye. Zezi ti dir ki Bondye pou pini zot akoz zot in fer en kantite move keksoz. Apre sa, Zezi ti al lo Montanny Zolivye, e sa kat zapot ti konmans demann li kestyon. Eski ou konnen ki zot ti pe demann Zezi?

Bann zapot ti pe demann kestyon lo bann keksoz ki pou arive dan lavenir. Zot ti konnen ki Zezi pou met en lafen avek bann move keksoz lo later. Me zot ti anvi konnen kan sa pou arive. Kan ki Zezi pou vin ankor pour dirize konman Lerwa?

Zezi ti konnen ki bann ki pe swiv li lo later pa pou kapab vwar li kan i vin ankor. Sa se akoz i pou dan lesyel, e zot pa pou kapab vwar li. Alor Zezi ti dir avek son bann zapot serten keksoz ki pou arive lo later pandan ki i pou dirize konman Lerwa dan lesyel. Kwa sa bann keksoz?

Zezi ti dir ki pou annan gran lager, en kantite dimoun pou malad e lafen, pou annan krim, e pou annan gran tranbleman-d-ter. Zezi ti osi dir ki sa bon nouvel lo rwayonm Bondye pou ganny prese lo later antye. Eski ou vwar sa bann keksoz pe arive dan nou letan? Wi! Alor nou kapab asire ki Zezi pe aprezan dirize dan lesyel. Byento i pou met en lafen avek tou sa bann move keksoz ki pe arive lo later.