Vin zanmi Bondye pour touzour!

I demann zefor pour fer en zanmi; i demann zefor pour gard en zanmi. Ou zefor pour vin e reste en zanmi Bondye pou ganny bokou beni. Zezi ti dir avek bann ki ti krwar dan li: “Zot a konn laverite e laverite i ava fer zot lib.” (Zan 8:32) Ki sa i vedir?

Ou kapab rezwir liberte la konmela. Ou kapab lib avek bann fo lansennyman ek mansonz ki ganny propaze par Satan. Ou kapab lib avek dezespwar ki ranpli lavi plizyer milyon dimoun ki pa konn Zeova. (Romen 8:22) Bann zanmi Bondye i menm lib avek “lafreyer lanmor.”—Ebre 2:14, 15.

Ou kapab rezwir liberte dan nouvo monn Bondye. Pa i en liberte merveye ki ou pou rezwir a lavenir! Dan Paradi lo later, nou pou lib avek lager, maladi ek krim. Lib avek lapovrete ek lafen. Lib avek lavyeyes ek lanmor. Lib avek lafreyer, lopresyon ek lenzistis. Konsernan Bondye, Labib i dir: “Ou pe ouver ou lanmen e satisfer dezir tou kreatir vivan.”—Psonm 145:16.

Bann zanmi Bondye pou viv pour touzour. Lavi eternel i en kado presye ki Bondye i donn avek tou sa ki resers son lanmitye. (Romen 6:23) Zis mazinen ki lavi sanfen ti a sinifye pour ou!

Ou pou annan letan pour fer bokou keksoz. Petet ou ti a anvi konnen konman pour zwe en lenstriman mizikal. Oubyen petet ou anvi aprann penn bann desen oubyen vin en sarpantye. I probab ki ou ti a kontan aprann konsernan bann zannimo ek plant. Oubyen i posib ki ou anvi vwayaze e vwar diferan pei ek dimoun. Posed lavi eternel pou fer tou sa bann keksoz posib!

Ou pou annan letan pour fer bokou zanmi. Viv pour touzour, pou fer li posib pour konn bokou lezot ki’n vin zanmi Bondye. Ou pou konn zot bann talan ek zot bann bon kalite, e zot pou vin ou zanmi osi. Ou pou kontan zot, e zot pou kontan ou. (1 Korentyen 13:8) Posed lavi eternel, pou donn ou letan pour fer zanmi avek tou dimoun lo later! Pli enportan ki tou, ou lanmitye avek Zeova pou vin pli solid an mezir ki bann santenn lannen i pase. Fotespere ou vin zanmi Bondye pour touzour!