Kestyon ki Dimoun i souvan demande

Si Bondye i lanmour, akoz i permet lemal?

BONDYE i permet lemal, e plizyer milyon dimoun i fer sa ki mal volonterman. Par egzanp, zot deklar lager, larg bonm lo bann zanfan, devaste later e provok lafanmin. Plizyer milyon dimoun i fimen e ganny kanser poumon, fer adilter e ganny bann maladi transmet par sèks, abiz lalkol e ganny lanflanmasyon lefwa, ek lezot keksoz ankor. Sa bann dimoun pa vreman anvi sa bann keksoz mal i arete. Zis zot pa anvi sibir konsekans zot aksyon. Ler zot rekolte sa ki zot in senmen, zot plennyen, “Akoz mwan?” E zot blanm Bondye, parey Proverb 19:3 i dir: “Sotiz ki en zonm i fer sanmenm sa ki gat son lavi, epi i ankoler avek Zeova.” (1901 American Standard Version) E si Bondye ti anpes zot fer sa ki mal, zot ti pou konplent ki Bondye in priv zot zot liberte!

Zeova i permet lemal sirtou pour reponn sa bann lakizasyon ki Satan in fer. Satan ti dir ki Bondye pa kapab met lo later bann zonm ki pou reste fidel avek Li si zot ganny teste. (Zob 1:6-12; 2:1-10) Par les Satan viv, Zeova i donn Satan sa loportinite pour prouv son lakizasyon. (Egzod 9:16) Anmezir ki i esey fer sa, Satan i kontinyen anmenn maler lo bann imen pour fer nou rezet Bondye. (Revelasyon 12:12) Me Zob ti reste fidel, e Zezi osi ti fer parey. Ozordi bann vre Kretyen i fer sanmenm.—Zob 27:5; 31:6; Matye 4:1-11; 1 Pyer 1:6, 7.

Mon ti ava kontan krwar ki en zour later pou vin en paradi kot dimoun pou viv pour touzour, me eski sa pa i paret tro bon pour krwar?

Pa dapre Labib. Si sa i paret tro bon pour krwar, sa i zis akoz limanite in konn lemal pour sitan bokou bokou lannen. Zeova ti kree later e i ti dir imen ranpli later avek bann zonm ek fanm drwat ki pou okip bann plant ek zannimo lo la e prezerv son labote olye detrir li. (Vwar paz 12 ek 17.) Sa promes en Paradi i pa tro bon pour vin vre, okontrer nou sitiasyon deplorab i tro move pour kontinyen. Sa Paradi pou ranplas li.

Ki mannyer mon kapab reponn en dimoun ki dir ki listwar ek lasyans pa an ankor avek Labib?

Nou pa ganny ankouraze pour met lafwa dan sa bann promes zis dan vid koumsa menm. “Lafwa i vin par mesaz ki nou tande.” Ler en dimoun i etidye Parol Bondye, i pou vwar lasazes Parol Bondye e son lafwa pou grandi.​—Romen 10:17; Ebre 11:1.

Bann dekouvert arkeolog i prouve ki bokou resi istorik Labib i egzakt. Vre lasyans i an armoni avek Labib. Sa detrwa fe ki swiv ti deza dan Labib byen lontan avan ki bann savan dan sa lemonn ti dekouver zot: sa bann diferan staz ki later in pas ladan dan son devlopman, later i ron, i pa tenir lo nanryen, e ki i annan bann zwazo migrater.​—Zenez, sapit 1; Izai 40:22; Zob 26:7; Zeremi 8:7.

Lakonplisman bann profesi i montre ki Labib in ganny enspire. Danyel ti predir davans bann pouvwar mondyal ki ti pou leve e tonbe, osi byen sa letan ki Mesi ti pou vin lo later e ganny met amor. (Danyel, sapit 2, 8; 9:24-27) Ozordi, i annan lezot profesi ki pe akonpli, e zot permet nou rekonnet ki nou pe viv dan “bann dernyen zour.” (2 Timote 3:1-5; Matye, sapit 24) Zonm napa sa pouvwar pour predir en levennman dan en fason sitan presi. (Izai 41:23) Si ou oule plis lenformasyon, vwar sa liv La Bible: Parole de Dieu ou des hommes? ek Y a-t-il un Créateur qui se soucie de vous?, pibliye par Temwen Zeova.

Ki mannyer mon kapab aprann pour reponn bann kestyon lo Labib?

Ou bezwen etidye Labib e reflesir, anmenmtan demann Bondye pour gid ou par son lespri sen. (Proverb 15:28; Lik 11:9-13) “Si i annan parmi zot ki mank lasazes, ki i demann Bondye e Bondye a donn li parski i donn tou dimoun zenerezman san fer okenn repros.” (Zak 1:5) I annan osi bann piblikasyon baze lo Labib ki kapab ed ou. Normalman, ou pou bezwen led avek lezot, parey ler Filip ti etidye avek sa Etyopyen. (Akt 8:26-35) Temwen Zeova i fer letid Labib avek dimoun ki enterese pour nanryen kot zot. Pa ezite pour demann zot pour etidye avek ou.

Akoz bokou dimoun i opoz Temwen Zeova e dekonsey mwan pour etidye avek zot?

Dimoun ti opoz Zezi ler i ti anons sa bon nouvel dan son letan, e i ti dir ki zot pou osi opoz son bann disip. En zour, kan serten dimoun ti apresye lansennyman Zezi, son bann adverser relizye ti dir sa bann dimoun: “Eski zot osi zot in les li anbet zot? Eski zot in war en sel parmi bann Farizyen ou parmi bann sef Zwif ki kwar li?” (Zan 7:46-48; 15:20) Bokou dimoun ki konsey ou pour pa etidye avek Temwen Zeova i fer li akoz zot pa konn laverite lo nou oubyen zot pa kontan nou san okenn bon rezon. Etidye avek bann Temwen e vwar pour ou menm si ou pa pli byen konpran Labib oubyen non.​—Matye 7:17-20.

Akoz Temwen Zeova i pas devan laport dimoun ki annan zot prop larelizyon?

Sa i akoz zot pe swiv legzanp Zezi. I ti al anver bann Zwif. Bann Zwif ti annan zot larelizyon, me dan bokou fason sa ki zot ti pe fer ti lwen avek Parol Bondye. (Matye 15:1-9) Tou nasyon i annan en serten larelizyon, ki swa bann ki dir zot Kretyen oubyen non. I tre enportan ki nou krwayans i an armoni avek lansennyman dan Parol Bondye. Bann Temwen Zeova i fer zefor pour ed dimoun dan sa domenn, e sa i montre zot lanmour pour zot prosen.

Eski bann Temwen i krwar ki zot larelizyon i sa sel vre larelizyon?

Nenport dimoun ki serye avek son larelizyon pou krwar ki i sa vre larelizyon. Si non, akfer i ti pou enplike dan sa larelizyon? Bann Kretyen i ganny sa konsey: “Egzamin tou keksoz, gard sa ki bon.” (1 Tesalonisyen 5:21) Alor, en dimoun i bezwen fer sir ki son krwayans i baze lo Labib, akoz i annan zis en sel vre lafwa. Sanmenm sa ki Efezyen 4:5 i prouve ler i mansyonn “en sel Senyer, en sel lafwa, en sel batenm.” Zezi pa ti dakor avek sa pwennvi ozordi ki i annan plizyer semen, plizyer larelizyon, e ki zot tou zot anmenn ver delivrans. Okontrer, i ti dir: “Laport i etrwat, e semen i difisil ki anmenn dan lavi, napa bokou ki trouv li.” Bann Temwen Zeova i krwar ki zot in trouv sa semen. Sankwa, zot ti pou rod en lot larelizyon.​—Matye 7:14.

Eski zot krwar ki zis zot ki pou ganny sove?

Non. Plizyer milyon dimoun ki’n viv dan lepase e ki pa ti Temwen Zeova pou ganny resisite e ganny en loportinite pour viv. Ozordi bokou dimoun ki pa ankor fer li i kapab pran en pozisyon pour laverite ek ladrwatir avan ‘gran ladetres,’ e zot pou ganny sove. Deplis, Zezi ti dir ki nou pa devret ziz lezot. Nou, nou get laparans an deor; Bondye li i get leker. Tou keksoz i kler devan li e i pran pitye ler i zize. Bondye in donn Zezi sa pouvwar pour zize, me pa nou.​—Matye 7:1-5; 24:21; 25:31.

Ki zot ekspekte avek bann ki asiste renyon Temwen Zeova an rapor avek kontribye larzan?

La sa ki zapot Pol ti dir konsernan kontribye larzan: “Fodre ki sakenn i donn dapre sa ki i’n deside, non pa avek regre ou par lobligasyon, parski Bondye i kontan sa ki donn avek lazwa.” (2 Korentyen 9:7) I pa zanmen annan laket dan bann Lasal Rwayonm ni dan bann landrwa kot Temwen Zeova i fer zot lasanble. Bann bwat i ganny mete pour fer li fasil pour nenport dimoun kontribye si i anvi. Napa personn ki konnen ki kantite lezot i donnen oubyen si lezot i donnen. Serten i kapab donn plis ki lezot; petet serten pa kapab donn nanryen. Sa ki Zezi ti dir konsernan bwat larzan kot tanp Zerizalenm e lo sa bann ki ti pe kontribye i donn nou sa bon pwennvi: I pa lakantite larzan ki konte, me i mwayen ek leta lespri en dimoun pour donnen.​—Lik 21:1-4.

Si mon vin en Temwen Zeova, eski mon bezwen prese mon osi?

Ler en dimoun i konnen ki Bondye in promet ki later pou vin en paradi anba dominasyon Rwayonm Kris, i pou anvi dir sa avek lezot. Ou osi ou pou oule fer sa. Akoz sa i en bon nouvel!​—Akt 5:41, 42.

Sa i en fason enportan pour montre ki ou en disip Zezi Kri. Dan Labib, Zezi ti ganny apele “temwen fidel e vre.” Ler i ti lo later, Zezi ti prese an dizan: “Rwayonm Lesyel i pros,” e i ti anvoy son bann disip pour dir sanmenm. (Revelasyon 3:14; Matye 4:17; 10:7) Plitar, Zezi ti donn son bann disip sa lord: “Ale e fer tou pep vin mon bann disip. . . . Ansenny zot.” I ti osi dir ki avan lafen i arive, “sa Bonn Nouvel Rwayonm pou ganny anonse partou dan lemonn pour tou dimoun konnen.”​—Matye 24:14; 28:19, 20.

I annan plizyer fason pour anons sa bon nouvel. Ou kapab koz lo sa bon nouvel ler ou pe fer en konversasyon avek ou zanmi ek dimoun ki ou konnen. Serten i fer li par let oubyen par telefonn. I annan osi lezot ki anvoy par lapos en piblikasyon baze lo Labib ki zot krwar i kapab enteres en dimoun ki zot konnen. Bann Temwen Zeova i al devan laport tou dimoun pour anons sa mesaz akoz zot anvi tou dimoun i antann sa bon nouvel.

Labib i ofer ou sa lenvitasyon: “Lespri avek Nouvel-Marye i dir: ‘Vini!’ Ki tou sa ki tande i dir: ‘Vini!’ Ki sa ki swaf i vini, e ki sa ki anvi, i pran delo lavi gratwitman!” (Revelasyon 22:17) Bann ki koz konsernan sa Paradi lo later ek son bann benediksyon i devret fer li volonterman, savedir dan zot leker zot annan sa dezir pour partaz sa bon nouvel.

Sirman ou annan lezot kestyon ki ou anvi demande lo bann Temwen Zeova ek zot krwayans. Petet ou pa partaz menm pwennvi lo serten keksoz. Nou pou kontan pour reponn ou bann kestyon. Dan sa brosir napa ase lespas pour fer sa, alor nou envit ou pour apros e demann bann Temwen dan sa landrwa kot ou reste. Ou kapab fer sa kot zot Lasal Rwayonm oubyen ler zot vizit ou kot ou lakour. Oubyen ou kapab poste ou bann kestyon par servi en ladres apropriye pli ba lo sa paz.