Servi Mikro

NOU bann frer ek ser i depans bokou letan ek zefor pour asiste bann renyon Kretyen. Si zot pou benefisye atraver sa ki ganny dir, fodre ki zot kapab antann klerman.

Dan letan ansyen Izrael, ti napa okenn sistenm son elektrik pour anplifye lavwa. Ler Moiz ti koz avek nasyon Izrael lo laplenn Moab avan ki zot ti antre dan Later Promiz, konman ki zot tou parmi sa plizyer milyon ki ti prezan, ti kapab tande? I tre probab ki Moiz ti servi en sistenm kot son parol ti ganny repete par bann zonm ki ti’n stasyonnen plizyer landrwa toudilon dan kan. (Det. 1:1; 31:1) Enpe letan apre ki bann Izraelit ti konmans zot konket dan rezyon was avek Zourden, Zozye ti rasanble lepep devan Montanny Gerizim ek Montanny Ebal, e tre probab bann Levit dan vale ki ti separ sa de montanny. La tou dimoun ti antann e ti reazir anver bann benediksyon ek malediksyon divin ki ti ganny prezante devan zot. (Zoz. 8:33-35) I posib osi ki dan sa lokazyon, bann zonm ti transmet son parol, me san dout lefe akoustik ekselan sa landrwa ti osi ede.

Apepre 1,500 lannen plitar ler “en gran lafoul ti’n rasanble” kot Lanmer Galile pour ekout Zezi, i ti antre dan en kannot, pous li lo delo, e asize pour koz avek lafoul. (Mark 4:1, 2) Akoz ki Zezi ti koz apartir en kannot? Dapre levidans ki disponib, lavwa imen i ganny anmennen dan en fason tre kler parlao en sirfas delo kalm.

Ziska boner dan ventyenm syek, volim ek ton lavwa kler en orater ti souvan ganny determinen dapre lakantite dimoun dan en lodyans ki ti kapab antann sa ki ti ganny dir. Sepandan, okonmansman bann lannen 1920, bann serviter Zeova ti kapab profit lavantaz sistenm son elektrik ki anplifye lavwa imen dan zot bann lasanble.

Lekipman Son. Tel lekipman i kapab ogmant en kantite volim lavwa en orater anmenmtan ki i mentenir kalite ek ton son lavwa. Pa fodre ki sa orater i kas son lagorz pour koze. Sa bann ki pe ekoute pa fodre fer gran zefor pour antann sa ki pe ganny dir. Alor, zot kapab konsantre plis lo sa mesaz.

Bokou in ganny fer pour fer sir ki bon lekipman son i disponib dan bann lasanble Temwen Zeova. Deplis, bokou Lasal Rwayonm i servi lekipman son pour anplifye lavwa sa bann ki donn diskour, diriz renyon, oubyen lir lo lestrad. E serten kongregasyon i osi annan bann mikro ki ganny servi par lodyans ler zot pe donn bann komanter pandan bann renyon. Si ou kongregasyon i annan sa bann lekipman, aprann servi zot byen.

Detrwa Lenstriksyon debaz. Pour byen servi lekipman gard antet sa bann pwen swivan: (1) mikro i devret zeneralman apepre 10 a 15 santimet avek ou labous. Si mikro i tro pros, ou bann mo i kapab ganny deformen. Si i tro lwen, ou lavwa pa pou kler. (2) Mikro i devret devan ou, pa lo kote. Si ou bouz ou latet lo kote drwat oubyen gos, koz selman ler ou figir i vir ver mikro. (3) Koz en pti pe pli for ki ler ou koze dan konversasyon toulezour. Me napa nesesite pour kriye. Lekipman son pou fasilman anmenn ou lavwa kot sa enn pli lwen dan ou lodyans. (4) Si ou bezwen eklersi ou lagorz oubyen anvi touse oubyen eternen, fer sir pour tourn ou latet lwen avek mikro.

Ler pe donn en Diskour. Ler ou mont devan pipit, ordinerman en frer i aranz pozisyon mikro. Debout dan en fason natirel avek ou figir anver lodyans pandan ki sa frer i fer sa. Met ou not lo pipit, e fer sir ki mikro pa anpes ou vwar ou not.

Ler ou konmans koze, ekout konman ou lavwa i rezonnen anmezir ki i sorti dan sistenm son. Eski ou lavwa i tro for, oubyen serten mo i fer tapaz dan spiker? Petet ou bezwen avans detrwa santimet deryer. Ler ou pe get vitman ou not, mazinen ki ou devret koze e lir selman ler ou figir i viz ver mikro oubyen ou figir i en pti gin parlao mikro, me pa pli ba.

Ler pe lir lo Lestrad. I pli bon pour tyonbo ou Labib oubyen lezot piblikasyon anler afen ki ou figir i get ver lodyans. Vi ki mikro pou probableman drwat devan ou, petet ou bezwen tyonbo ou piblikasyon enn pti pe lo kote. Sa i vedir ki ou latet i devret enn pti gin akote mikro. E ler ou lir, ou lavwa pou al direkteman dan mikro.

Laplipar frer ki lir Latour Veyer i debout e koz dan en mikro ki pozisyonnen lo en stenn. Sa pozisyon i permet zot pour respir pli fasilman e pour kapab pli byen eksprim zot ler pe lir. Gard antet ki lir bann paragraf i konstitye en parti mazer dan renyon. Benefis ki lodyans i kapab retire i depan bokou lo antann sa lenformasyon ki pe ganny lir.

Ler pe fer Komanter pandan Renyon. Si ou kongregasyon i servi mikro pour partisipasyon lodyans, mazinen ki i enportan pour ou koz byen kler e ase for. Ler pe fer komanter, esey tyonbo ou piblikasyon oubyen Labib dan ou lanmen. Sa pou permet ou vwar byen sa lenformasyon pandan ki ou pe koz dan mikro.

Dan serten kongregasyon bann frer i ganny dezinyen pour anmenn mikro pour sa bann ki ganny demande pour fer komanter. Si sa i leka dan ou kongregasyon, ler ou ganny demande, gard ou lanmen anler afen ki sa frer avek mikro i kapab vwar kote ki ou pe asize e ariv kot ou vitman. Si i en mikro ki ou bezwen tyonbo dan ou lanmen, prepare pour atrap li. Espere ziska ki mikro i dan en bon pozisyon avan ki ou konmans koze. Ler ou fini ou komanter, pa tarde pour rann sa frer mikro.

Ler pe partisip dan en Demonstrasyon. Servi en mikro pandan en demonstrasyon i demann byen planifye davans. Si mikro i lo en stenn, tou le de ou lanmen pou lib pour tyonbo ou Labib ek ou not. Avek en mikro ki ou bezwen tyonbo dan lanmen i kapab permet ou fer plis mouvman, me ou bezwen organize ki ou asistan i tyonbo mikro. Dan sa fason ou pou kapab tyonbo ou Labib. Ou ek ou asistan zot devret egzers sa afen ki ou partner i konnen konman pour tyonbo mikro byen. Mazinen, osi, ki ler ou lo lestrad, ou pa devret vir ou ledo avek lodyans, sirtou ler ou pe koze.

Bann demonstrasyon dan Renyon Servis, i kapab annan plizyer partisipan, e zot kapab sirkil partou lo lestrad. Alor, petet i pou annan plizyer mikro. Zot devret ganny enstale lo lestrad davans oubyen ler bann partisipan pe mont lo lestrad zot devret resevwar mikro. I demann preparasyon davans pour fer sir ki bann mikro i dan landrwa apropriye e dan moman apropriye. Repet bann demonstrasyon avan ki zot ganny prezante i donn loportinite pour enstri bann partisipan lo konman servi byen mikro. Ler en repetisyon pa kapab ganny fer lo lestrad, i kapab byen pour bann partisipan tyonbo en lobze ki parey en mikro afen pour egzers pozisyon apropriye. Apre demonstrasyon, bann partisipan i devret remet bann mikro dan zot plas byen zantiman, fer atansyon pour pa may dan lakord lezot mikro pandan ki zot pe sorti lo lestrad.

Fer atansyon konman ki nou servi mikro i direkteman konnekte avek en lobzektif prensipal dan bann renyon, se ki atraver nou diskisyon lo Parol Bondye tou dimoun ki prezan i benefisye. (Ebr. 10:24, 25) Par aprann servi mikro dan en fason efikas, nou kapab personnelman kontribye anver sa lobzektif enportan.