Neve Pol ti brav

Annou koz lo en zenn onm ki ti sov lavi son tonton. Pol ti tonton sa zenn onm. Nou pa konn non sa zenn onm, me nou konnen i ti fer en keksoz vreman brav. Eski ou anvi konnen ki i ti fer?—

Pol ti dan prizon Zerizalenm. I ti’n ganny arete akoz i ti pe koz lo Zezi. Serten zonm vreman pa bon ti ay Pol, alor zot ti fer en plan pour touy li. Zot ti dir: ‘Annou demann zofisye larme pour fer bann solda anmenn Pol ankour. Nou ava kasyet dan semen e ler Pol ava pase nou ava touy li!’

Neve Pol ti tann koz lo sa plan. Ki i ti fer? I ti al kot prizon e dir Pol sa ki i ti’n tande. Deswit, Pol ti dir li dir sa zofisye larme konsernan sa plan. Eski i ti fasil pour neve Pol koz avek sa zofisye larme?— Non, akoz sa zofisye ti en dimoun enportan. Me, neve Pol ti brav e i ti koz avek sa zofisye larme.

Sa zofisye ti konn egzakteman ki pour fer. I ti swazir preski 500 solda pour protez Pol. I ti dir zot anmenn Pol Sezare sa menm zour swar. Eski Pol ti reisi sove?— Wi, sa bann zonm pa bon pa ti kapab atak li. Zot plan ti tonm dan delo.

Ki ou kapab aprann avek sa zistwar?— Ou osi ou kapab vin brav parey neve Pol. Nou bezwen brav kan nou koz avek lezot lo Zeova. Eski ou pou brav e kontinyen koz lo Zeova?— Si ou fer sa, ou kapab sov lavi en dimoun.