Annou imit bann kalite Zezi

KONPASYON

Vi ki Zezi ti parfe, nou kapab mazinen i pa ti sitan enkyet bokou oubyen strese parey lezot imen enparfe. Me kantmenm sa, i ti montre ki i ti vreman konpran e kontan lezot. I ti pare pour fer plis ki sa ki dimoun i abitye fer pour son prosen. Son konpasyon ti pous li pour ed lezot parey nou’n vwar dan Sapit 32, 37, 57, 99.

I TI FASIL POUR KOZ AVEK LI

Dimoun tou laz, zenn konman aze, ti santi zot alez pour apros Zezi akoz i pa ti donn lenpresyon ki i tro okipe oubyen enportan. Vi ki dimoun ti vwar ki i ti enterese avek zot personnelman, zot ti kontan ler Zezi ti la avek zot parey nou’n vwar dan Sapit 25, 27, 95.

I TI KONTAN PRIYE

Zezi ti toultan priy avek son Papa ki swa an prive oubyen avek son bann disip. Souvan i ti priye pa zis avan manze. I ti priye pour remersye son Papa, pour loue li e pour rod son gidans avan i fer bann gro desizyon. Get bann legzanp dan Sapit 24, 34, 91, 122, 123.

I PA TI EGOIS

Par ler Zezi ti bezwen repoze, me Zezi ti toultan pare pour met son bann bezwen personnel dekote e ed lezot. Pour li, byennet lezot ti pli enportan ki sa ki pour li. Sa i en bon legzanp ki nou kapab swiv. Etidye ki mannyer Zezi ti demontre sa dan Sapit 19, 41, 52.

PARE POUR PARDONNEN

Zezi pa ti zis koz lo pardonnen, i ti demontre ki i ti pare pour fer li par pardonn son bann disip ek lezot osi. Medit lo sa bann legzanp dan Sapit 26, 40, 64, 85, 131.

DEVOUMAN

I ti’n ganny predir ki laplipar Zwif pa ti pou aksepte Mesi e ki son bann lennmi ti pou touy li. Alor Zezi ti’n kapab pa fer bokou zefor pour ed bann dimoun. Me i ti devoue pour promot vre ladorasyon. I en bon legzanp devouman pour tou son bann disip ki bezwen fer fas avek bann dimoun ki opoz zot oubyen ki pa enterese avek mesaz. Vwar Sapit 16, 72, 103.

LIMILITE

Zezi ti pli siperyer ki bann imen enparfe dan plizyer fason. I ti konn bokou plis keksoz ki zot e i pli ti saz. Vi ki i ti parfe, i tre probab ki i ti pli for fizikman e pli malen ki bann dimoun sa letan. Me avek limilite, i ti pare pour servi lezot. Vwar bann leson ki nou kapab aprann dan Sapit 10, 62, 66, 94, 116.

PASYANS

Zezi ti toultan demontre pasyans anver son bann zapot ek lezot ler zot pa ti arive imit son legzanp oubyen aplik sa ki i ti dir. Avek pasyans, i ti repet plizyer fwa bann keksoz ki ti kapab fer zot vin pli pros avek Zeova. Vwar bann legzanp pasyans dan Sapit 74, 98, 118, 135.