Zezi i ansenny son bann disip konman pour priye

Tou sa ki bann Farizyen ti fer, zot ti fer li zis pour enpresyonn lezot. Par egzanp, zot ti fer en bon keksoz zis pour lezot vwar zot. Zot ti priy dan bann landrwa piblik pour ki tou dimoun i vwar zot. Bann Farizyen ti aprann parker bann gran lapriyer e repet zot dan sinagog ek dan kwen semen kot lezot dimoun ti kapab tann zot. Alor bann dimoun ti sirprann ler Zezi ti dir zot: ‘Pa bezwen priy parey bann Farizyen. Zot krwar ki Bondye pou kontan zot gran gran lapriyer, ma i pa leka. Lapriyer i ant ou ek Zeova. Pa bezwen toultan repet menm zafer. Zeova i anvi ou dir li ki mannyer ou vreman santi.

‘La ki mannyer ou devret priye: “Nou Papa ki dan lesyel, ki ou non i ganny sanktifye. Ki ou Rwayonm i vini. Ki ou lavolonte i ganny fer lo later parey dan lesyel.”’ Zezi ti osi dir zot ki zot devret priy pour zot manze sak zour, pour zot pese ganny pardonnen e lo bann keksoz personnel.

Zezi ti dir: ‘Pa zanmen aret priye. Kontinyen demann Zeova, ou Papa, pour bann bon keksoz. Tou paran i kontan pour donn zot zanfan bann bon keksoz. Si ou garson i demann ou dipen, eski ou pou donn li en ros? Si i demann ou en pwason, eski ou pou donn li en serpan?’

Apre Zezi ti eksplike: ‘Si zot konn donn bann bon kado zot zanfan, pa zot Papa, Zeova, pou pli pare ankor pour donn zot lespri sen? Zot zis bezwen demande.’ Eski ou ekout konsey Zezi? Ki kalite keksoz ki ou priy lo la?