“Mon’n trouv tou sa ki mon ti bezwen”

DAPRE en rapor Lorganizasyon Mondyal pour Lasante, in estimen ki depresyon pe aktyelman afekte plis ki 120 milyon dimoun atraver lemonn. Sak lannen, en milyon dimoun i komet swisid e ant 10 a 20 milyon i esey met en lafen avek zot lavi. Ki led i annan pour bann ki soufer avek depresyon? Tretman medikal i kapab soulaz sa soufrans, e sipor emosyonnel i esansyel. Deplis, serten dimoun ki annan bann tel santiman in trouv led siplemanter dan bann piblikasyon Temwen Zeova ki baze lo Labib, parey sa let sorti Lafrans i montre.

“En pe letan pase, mon ti nepli anvi kontinyen viv. Mon ti priy avek Bondye pour les mwan mor. I ti konmsi mon ti’n fini mor. Mon ti priy Zeova en kantite, pour mwan kapab trouv gidans. Mon ti osi deside pour lir Annuaire des Témoins de Jéhovah 2002 e konplet li dan trwa zour. Mon kapab dir ki i ti ankouraz mwan en kantite e fortifye mon lafwa.

“Mon ti fer en pe resers dan magazin Latour Veyer ek Réveillez-vous! Mon ti ganny en sirpriz! Mon’n lir sa bann magazin regilyerman pour plis ki 15 an, me zanmen mon’n realize ki kantite ankourazan e enteresan sa bann lartik i ete. Zot ranpli avek lanmour, en kalite ki telman rar denozour. Mon’n trouv tou sa ki mon ti bezwen.”

Labib i dir: “Zeova i pre avek sa bann ki annan leker brize; e i sov bann ki zot lespri i fatige.” (Psonm 34:18) San dout, tou bann “ki annan leker brize” oubyen “ki zot latet i fatige” i kapab trouv lankourazman ek lespwar pour lavenir dan Labib. Temwen Zeova i distribye bann piblikasyon baze lo Labib pour ed bann ki dan bezwen pour benefisye avek sa sours rekonfor ki ganny enspire par Bondye.